Mɩnla Ɔhʋanɩ Zʋ Yɛ Bɛkãã Odwokɔba Yɩ a?

Ɩlɛ́kyɛ bela, Gyehova ikoluwa yi Bulombunlililɛ yɩ zʋ ɩkɛyɩ yɛ amanɩyɛnwʋlɛ munwatĩĩ wɔ ɛkɛnɩ. Eyi ɩdɩ odwokɔba mɔɔ ɩsɛ kɛɛ abiyela ɩtɩ ebiye. Nɩ Gyisɛsɩ ɩpɛ kɛɛ yɩ adʋwavʋlɔ nɩ bɛkã odwokɔba eyi bekile abiyela! (Matiyu 28:19, 20) Mɩnla ɔhʋanɩ zʋ yɛ Gyehova Dasɩvʋlɔmaa bɛyɛɛ mɔɔ Gyisɛsɩ ɩhanlɩ yɩ a?

1. Mɩnla ɔhʋanɩ zʋ yɛ Matiyu 24:14 ɩbaa numɔ nnɛ a?

Gyisɛsɩ ɩhanlɩ kɛɛ: “bɔkɔwɔ Odwokɔba eyi mɔɔ ɩfalɩ Nyamɩnlɩ Bulombunlililɛ nɩ nwʋ ɛlawulo wɔ oyuwadɩ yɩ dɩka bela.” (Matiyu 24:14) Gyehova Dasɩvʋlɔmaa bɛlɛ anyɩnlɩlelɛ bɔbʋwaa ma egyima eyi mɔɔ nwʋmɔ ihyinyia ɩtɛla ebiyela nɩ ɩkɔhɔlɩ ɔzʋlɔ. Yɛkãã odwokɔba eyi wɔ oyuwadɩ munwala wɔ ɛdɩndɛlɛ mɔɔ ɩbʋ 1,000 nu! Egyima kezile eyi ihyinyia mmɔdɩnɩwɔlɛ nɩɩ nhyɩhyɛlɩyɛba na ama ɩahɔlɩ ɔzʋlɔ. Sɛ kɛ Gyehova yɩ mmʋwalɩyɛ a, ankɩ yɛlɔ́kʋla yɛkɛyɛ.

2. Mɩnla mmɔdɩnɩ yɛ yɛbɔ yɛfa yɛkã odwokɔba yɩ yekile mmenii a?

Dɩka bela mɔɔ yɛkɔnwʋ mmenii nɩ yɛkã odwokɔ yɩ be yekile bɛ. Dɩkɛ ɔwɔkɩ Kilisinyiamaa nɩ, yɛkã odwokɔ yɩ “wɔ abika abika nu.” (Egyima 5:42) Ɔzɔ ɔhʋanɩ eyi mɔɔ yeduwa ɔzʋlɔ nɩ ɩma yɛ sa ɩkã mmenii sʋ̃maa ɔlʋbɔ bela. Iluwakɛɛ kɛ eɣile bela yɛ mmenii wɔ awudo nɩ ti, yɛkã odwokɔ yɩ be wɔ bagua nu sʋ̃. Eɣile bela yɛpɩbɛ ɔhʋanɩ mɔɔ yɛkɛva yɛkɛhã Gyehova nɩɩ yi tile nu pɔkɔ nwʋ odwokɔ yekehile mmenii mvʋlɔ.

3. Aninyia yɛ ɩdɩ yɩ asɛdɩ kɛɛ ɩkɛhã odwokɔba yɩ be a?

Ɩdɩ nɔhʋanlɛ Kilisinyiamaa munwala bɛ asɛdɩ kɛɛ bɛkɛhã odwokɔba nɩ bekehile mmenii mvʋlɔ. Yɛfa yɛ asɛdɩ eyi anyɩnlɩbʋlʋ paa. Yɛkã odwokɔba yɩ yekile mmenii kɛmɔ yɛ bʋwabɩlɛ ɩkɛma ɔhʋanɩ yɛ, iluwakɛɛ yɛnwʋ kɛɛ mmenii sʋ̃maa bɔ nnwʋanlɩ ɩla asianɩ nu. (Kɩnga 1 Timoti 4:16.) Bɛáduwa kakɛ yɛ wɔ egyima eyi nwʋ, iluwakɛɛ Bayɩbʋlʋ ɩkã kɛɛ: ‘Mʋnlʋmmɔ benyia tumi eyi mbʋanlɩ, ɔzɔ ti máma bede dɩyɛ bela.’ (Matiyu 10:7, 8) Kɛ abiyela yɛ itiye yɛ odwokɔ yɩ a. Naasʋ̃ yɛkɔ ɔzʋlɔ la yɛkã iluwakɛɛ ɩdɩ yɛ ɔzʋ̃mɩnlɛ yɩ ɔfʋã na ɩma Gyehova yɩ anyɩ ide.

SUMÁ SƲ̃MAA

4. Yɛbɔ mmɔdɩnɩ kɛɛ yɛ sa ɩkɛhã mmenii munwala

VIDIYO: Yɛkãã Odwokɔba Yɩ “Wɔ Oyuwadɩ Dɩka Bela” (7:33)

• Mɩnla yɛ wʋ anyɩ ideli nwʋmɔ wɔ mmɔdɩnɩ mɔɔ Gyehova Dasɩvʋlɔmaa bɔbɔ kɛɛ bɛkɛhã odwokɔba yɩ nwʋ a?

Kɩnga Matiyu 22:39 nɩɩ Wulomimaa 10:13-15, na akʋ̃ bozunzú ndwokɔɣizialɛ eyimmɔ nwʋ:

• Mɩnla ɔhʋanɩ zʋ yɛ ye egyima eyi ikile kɛɛ yɛdɔ yɛ ɔhɔnwʋmmɔ a?

• Kɛ Gyehova ɩtɩ nɣanlɩ wɔ bɛzabɛ mɔɔ bɛkã odwokɔba nɩ nwʋ ise a?—Kilá nkyɩkyɛmi 15.

5. Yɛ nɩɩ Nyamɩnlɩ bɔ numɔ yɛ egyima

Ozumanlɛnwʋnlɛ sʋ̃maa ikile kɛɛ Gyehova yɛ ikile ɔhʋanɩ yɛ wɔ egyima eyi nu a. Kɛ ndianwʋ nɩ, wɔ New Zealand nɩ aliyema benyia be mɔɔ bɔfʋlɔ yɩ Paul iyiyialɩ baalɛ be wɔ abika abika nu dasɩlɛlilɛ nu oyuwa ɔkʋ̃ be. Ɔzɔ nwɔnɩ yɩ, baalɛ yɩ ɩwɔlɩ Nyamɩnlɩ yi dima Gyehova wɔ yɩ mpayɩ nu izianlɩ yɩ kɛɛ, ɩmá abiye ɩɣa igyela yɩ. Paul ɩhanlɩ kɛɛ, “Wɔ dɔnɩhwɩlɩ asã mɛda nɩ, mʋhɔlɩ mudwuli yɩ ayɩnkɛ munwa.”

Kɩnga 1 Kɔlɛntɩmaa 3:9, na akʋ̃ bozunzú odwokɔɣizialɛ eyi nwʋ:

• Mɩnla ɔhʋanɩ zʋ yɛ ozumanlɛnwʋlɛ azʋlɔtʋ dɩkɛ mɔɔ izili wɔ New Zealand nɩ, ɩbʋwa ma yɛnwʋ kɛɛ Gyehova yɛ ikilee odwokɔbahanlɛ egyima yɩ ɔhʋanɩ a?

Kɩnga Egyima 1:8, na akʋ̃ bozunzú odwokɔɣizialɛ eyi nwʋ:

• Mɩnla ti yɛ yehyinyia Gyehova yɩ mmʋwalɩyɛ na yɛahʋla yɛayɛ dasɩlɛlilɛ egyima eyi a?

Ezi a?

Dapɛnɩ bela, yenyia ɛdɩdɩlɛ mɔɔ ɩbʋwa yɛ ma yɛyɛ odwokɔbahanlɛ egyima yɩ wɔ yɛ dapɛnɩ avinli dɩyɛzumanlɛ tʋ. Sɛ ɔhɔ ɔzɔ dɩyɛzumanlɛ nɩ be kyɩ̃ a, kɛ ɔnwʋnlɩ ɔzɔ ɛdɩdɩlɛ mɔɔ bɛfa bɛma yɛ nɩ ezeli a?

6. Yetiye Nyamɩnlɩ yɩ ahyɛdɩ mɔɔ ise yɛhã odwokɔba yɩ

Wɔ ɔwɔkɩ nɩ, adamvʋlɔ bɔwɔlɩ mmɔdɩnɩ kɛɛ bɛkɛma Gyisɛsɩ yɩ adʋwavʋlɔ yɩ bekeyiaki odwokɔbahanlɛ egyima yɩ. Ɔwɔkɩ Kilisinyiamaa nɩ bɔwɔlɩ ɔnwʋmɔ ɔhʋanɩ mɔɔ bɔwɔ kɛɛ bɛkɛhã odwokɔba nɩ nwʋ banɩ “na bɛvalɩ odwokɔba nɩ bezieli ɛkɛnɩ wɔ mmɛla ɔhʋanɩ zʋ.” (Fɩlɩpɩmaa 1:7, NWT) Ɔzɔ la yɛ Gyehova Dasɩvʋlɔmaa mɔɔ bɔwɔ ɛkɛnɩ nnɛ sʋ̃ bɛyɛ a.a

VIDIYO: Bɔwɔlɩ Odwokɔba Yɩ Nwʋ Banɩ Wɔ Mmɛla Ɔhʋanɩ Zʋ (2:28)

Kɩnga Egyima 5:27-42, na akʋ̃ bozunzú odwokɔɣizialɛ eyi nwʋ:

• Mɩnla ti mɔɔ yeléyiaki odwokɔba yɩ ɛhanlɛ a?—Kilá nkyɩkyɛmi 29, 38, nɩɩ 39.

YƖ DƆKƆWƆLƐ

Gyisɛsɩ ɩhanlɩ ihileli yɩ adʋwavʋlɔ nɩ mmɔ kɛɛ bɛhã odwokɔba yɩ behile amanlɩ munwatĩĩ. Gyehova ɩbʋwaa yɩ mmenii ma bɛkɛyɛ egyima eyi.

Kɛ Okowuwa Ekeze a?

• Mɩnla ɔhʋanɩ zʋ yɛ bɛkãã odwokɔba yɩ wɔ oyuwadɩ dɩka bela a?

• Mɩnla ɔhʋanɩ zʋ yɛ odwokɔ mɔɔ yɛkã nɩ ikile kɛɛ yɛdɔ mmenii a?

• Ekila a, odwokɔbahanlɛ egyima eyi ɩkɔhʋla ɩkɛma yekenyia anyɩnlɩlelɛ a? Mɩnla ti a?

PƖBƐ́ SƲ̃MAA

Kilá kezimɔ Gyehova Dasɩvʋlɔmaa bɛkã odwokɔba yɩ bekile mmenii wɔ ahyonwa nɣezile nu.

Bagua Nu Dasɩlɛlilɛ Egyima Titili Mɔɔ Bɛyɛlɩ Wɔ Paris (5:11)

Mɩnla ɔhʋanɩ zʋ yɛ Gyehova Dasɩvʋlɔmaa bɛkã odwokɔba yɩ bekile mmenii mɔɔ odwokɔ ɩdʋ bɛ ma bɔdu bɔhɔ manlɩ mvʋlɔ zʋ a?

Belili Mmenii Mɔɔ Bodu Bɔhɔ Manlɩ Mvʋlɔ Zʋ Nɩ Dasɩlɛ (5:59)

Tiye kezimɔ odwokɔbahanlɛ egyima mɔɔ baalɛ be ɩvalɩ yɩ mmɩlɩ munwala ɩyɛlɩ nɩ ɩma yɩ anyɩ ile.

Ɩyɛ Mɩ Fɛ Kɛɛ Mɩyɛlɩ Egyima Eyi (6:29)

Sumá kezimɔ nkunimi azʋlɔtʋ mɔɔ yeli wɔ kɔɔtʋ nɩ, ɩma odwokɔba nɩ ɩdɛlɛ.

“Bulombunlililɛ Odwokɔbahanlɛmaa Bɛfa Bo Ndwokɔ Bɔkɔ Kɔɔtʋ” (Nyamɩnlɩ Bulombunlililɛ Idii Tumi!, yi ti 13)