OZUMALƐDƖYƐ 20
Kezimɔ Bɛhyɩhyɛ Asafʋ Yɩ
Gyehova ɩ́dɩ bɛsabɛsayɛlɛ Nyamɩnlɩ. (1 Kɔlɛntɩmaa 14:33) Meti yekila ɔhʋanɩ kɛɛ yɩ mmenii sʋ̃ bɛkɛyɛ bɛ dɩyɛ pɛpɛɛpɛ mɔɔ nhyɩhyɛlɩyɛ ɩla nwʋmɔ. Mɩnla ɔhʋanɩ zʋ yɛ bɛhyɩhyɛ Kilisinyianɩ asafʋ nɩ a? Mɩnla ɔhʋanɩ zʋ yɛ yɛkɔwʋwa na dɩyɛ bela ɩahɔlɩ ɔzʋlɔ pɛpɛɛpɛ wɔ asafʋ yi nu a?
1. Aninyia yɛ ɩdɩ asafʋ yi ti a?
‘Kɩlayɩsɩ yɛ ɩdɩ asafʋ yi ti a.’ (Ɛfɩsɛsɩmaa 5:23) Ɩzʋ̃ sʋlɔ ikila egyima mɔɔ Gyehova yi mmenii bɛyɛ wɔ oyuwadɩ dɩka bela nɩ zʋ. Gyisɛsɩ ɩyɩ “sʋ̃mɩvʋlɔ nɔhʋanlɛvʋlɔ nɩ mɔɔ izi nɣɛlɛbɛ nɩ.” Bɛdɩ okuwu ɛgyɩkɩ̃ɩ̃ be mɔɔ mbanimbani mɔɔ bɔ nwʋ ɩwʋkwa yɛ bɔwɔ nu a, na besia bɔfʋlɔ bɛ Ɔhʋanɩhilelɛ Okuwu. (Kɩnga Matiyu 24:45-47.) Dɩkɛɛ asʋ̃mavʋlɔ nɩɩ mbanimbani mɔɔ nɩ bɔwɔ ɔwɔkɩ Gyelusalamɩ nɩ, Ɔhʋanɩhilelɛ Okuwu nɩ ɩfa ɔhʋanɩhilelɛ ɩma asafʋ azʋlɔtʋ mɔɔ bɔwɔ oyuwadɩ munwala. (Egyima 15:2) Naasʋ̃ kɛ mmenyia eyi yɛ bekile ahyɩhyɛdɩ yɩ ɔhʋanɩ a. Mfomi bɛpɩbɛ ɔhʋanɩhilelɛ wɔ Gyehova nɩɩ yɩ Odwokɔ yi nu, na bɛkã bɔ nwʋ azɩ bowula Gyisɛsɩ yi tiyɛlɛ tʋ.
2. Asafʋ nu mbanimbani be egyima yɛ lɛ mɩnla?
Asafʋ nu mbanimbani bɛdɩ Kilisinyiamaa mmenyia mɔɔ bɔ nwʋ ɩwʋkwa mɔɔ bekyina Ɛhɛlɛlɛ Odwokɔ yɩ zʋ bekilehile, na bekila Gyehova yi mmenii zʋ na bɛhyɛ bɛ ɛzɩzɩbɛ. Bɛáduwa bɛ kakɛ wɔ egyima eyi nwʋ. Mfomi ‘bɔzʋ̃ bɛ ahʋnlɩnɩ nu bekila Nyamɩnlɩ yɩ mmenii bɔ zʋ, kɛ nhyɛ zʋ a, anzɛnyɩɩ angʋmidi ti a.’ (1 Pita 5:1, 2) Asafʋ nu azʋ̃mɩvʋlɔ bʋwa asafʋ nu mbanimbani, na mmɩlɩ ɩkɔlɩ ɔzʋlɔ nɩ bɛzabɛ sʋ̃ bɛba bɛfata kɛɛ asafʋ nu mbanimbani.
Ɔhʋanɩhilelɛ Okuwu nɩ ɩyɩ asafʋ nu mbanimbani eyimmɔ be ma bɛyɛ mansini zʋ ehilalɛmaa. Bekyegyela asafʋ azʋlɔtʋ nɩ, na bɛfa ɔhʋanɩhilelɛ nɩɩ ɛzɩzɩbɛhyɛlɛ bɛma bɛ. Mansini zʋ ehilalɛmaa bekyina mɔɔ Ɛhɛlɛlɛ Odwokɔ yɩ ɩpɩbɛ wɔ mmenyia mɔɔ bɔwɔ asafʋ yi nu bɛ ɛkɛnɩ zʋ bekila kɛɛ bo nu be ɩfata kɛɛ bɛyɩ yɩ kɛɛ asafʋ nu sʋ̃mɩvʋlɔ anzɛnyɩɩ asafʋ nu ebani a.—1 Timoti 3:1-10, 12; Tayɩtɔsɩ 1:5-9.
3. Mɩnla asɛdɩ yɛ Dasɩvʋlɔ bela ɩwɔ a?
Bɛzabɛ mɔɔ bɔwɔ asafʋ yi nu munwatĩĩ ‘bɛyɩ Gyehova yi dima ayɛlɛ,’ iluwa dɩyɛzumanlɛ mɔɔ bɛfa bɔ nwʋ bowula numɔ nɩɩ dasɩlɛlilɛ egyima mɔɔ bɛyɛ kɛmɔ bɔ bʋwabɩlɛ ɩkɛma bɛ ɔhʋanɩ nɩ.—Kɩnga Ndwomi 148:12, 13.
SUMÁ SƲ̃MAA
Sumá anyunumililɛvʋlɔ kʋ̃ mɔɔ Gyisɛsɩ ɩdɩ, kezimɔ asafʋ nu mbanimbani bɔ mmɔdɩnɩ kɛɛ bokozumazuma yɩ, nɩɩ kezimɔ yɛkɔhʋla yɛ nɩɩ Gyisɛsɩ nɩɩ mbanimbani kɔwɔ numɔ kɛyɛ egyima nɩ nwʋ dɩyɛ.
4. Gyisɛsɩ ɩdɩ anyunumililɛvʋlɔ mɔɔ ɩdwɩnɩ yɛ nwʋ
Gyisɛsɩ ɩzʋ̃ ɔlɔlɛ nu ɩtʋ salɛ ɩfʋlɔ yɛ kɛɛ yelé yi yediã numɔ kɛɛ yɛ anyunumililɛvʋlɔ. Kɩnga Matiyu 11:28-30, na akʋ̃ bozunzú odwokɔɣizialɛ eyi nwʋ:
Kɛ Gyisɛsɩ ɩpɛ kɛɛ yɛtɩ nɣanlɩ yese wɔ kezimɔ idi nninyeni anyunu nɩ nwʋ a?
Mɩnla ɔhʋanɩ zʋ yɛ asafʋ nu mbanimbani bosumazuma Gyisɛsɩ yɩ ndianwʋ nɩ a? Yɩ́ VIDIYO nɩ.
Bayɩbʋlʋ yɩ ikilehile kezimɔ ɩsɛ kɛɛ asafʋ nu mbanimbani bɛyɛ be egyima yi nu petee.
Kɩnga Ayɩzaya 32:2 nɩɩ 1 Pita 5:1-3, na akʋ̃ bozunzú ndwokɔɣizialɛ eyimmɔ nwʋ:
Sɛ ɔnwʋ kezimɔ asafʋ nu mbanimbani bɔbɔ mmɔdɩnɩ kɛɛ bɛkɛma mmenii mvʋlɔ bɔ nwʋ ɩkɔdɔ bɛ kɛmɔ Gyisɛsɩ ɩyɛlɩ nɩ a, kɛ ɩma ɛtɩ nɣanlɩ ese a?
Mɩnla nninyeni mvʋlɔ yɛ mbanimbani yi bɛyɛ bɛfa bosumazuma Gyisɛsɩ a?
5. Asafʋ nu mbanimbani bɛyɛ ndianwʋba
Mɩnla ɔhʋanɩ zʋ yɛ Gyisɛsɩ ɩpɛ kɛɛ mbanimbani yi bu egyima mɔɔ iwula bɛ sa nɩ a? Yɩ́ VIDIYO nɩ.
Gyisɛsɩ ɩma yɛnwʋ mɔɔ ɩsɛ kɛɛ bɛzabɛ mɔɔ bedi asafʋ yɩ anyunu nɩ bɛyɛ. Kɩnga Matiyu 23:8-12, na akʋ̃ bozunzú odwokɔɣizialɛ eyi nwʋ:
Mɩnla yɛ Bayɩbʋlʋ ɩkã kɛɛ asafʋ nu mbanimbani bɛyɛ́ a? Asʋ̃ ekila a, nyamɩnlɩzʋ̃mɩnlɛ nu mbanimbani bɛfa mɔɔ Bayɩbʋlʋ ɩkã nɩ bɛyɛ egyima a?
A. Asafʋ nu mbanimbani hyɛ bɛ nɩɩ Gyehova avinli abusunwawɔlɛ nu ɛzɩzɩbɛ na bɔbʋwa bo mmusunwa ma bɛyɛ ɔzɔ la
B. Asafʋ nu mbanimbani bɔdwɩnɩ bɛzabɛ mɔɔ bɔwɔ asafʋ yi nu munwatĩĩ bɔ nwʋ
D. Asafʋ nu mbanimbani bɛfa bɔ nwʋ bowula dasɩlɛlilɛ egyima yi nu
E. Asafʋ nu mbanimbani bɛdɩ ehilehilelɛmaa. Akʋ̃ sʋ̃ bɔbʋwa ma yesiyeziye yɛ ayiyialɩyɛ nnɩka, na bɛyɛ egyima mvʋlɔ sʋ̃ bɔbʋwa
6. Sa yɛkʋla yɛbʋwa mbanimbani yi ma bɛyɛ be egyima
Bayɩbʋlʋ yɩ ɩma yɛnwʋ sianti mɔɔ nwʋmɔ ihyinyia kɛɛ yɛbʋwa mbanimbani yi ma bɛyɛ be egyima yɩ. Kɩnga Hibulumaa 13:17, na akʋ̃ bozunzú ndwokɔɣizialɛ eyimmɔ nwʋ:
Ekila a, ntɩyasɩ ɩwɔ nu kɛɛ Bayɩbʋlʋ yɩ ɩhyɛ yɛ ɛzɩzɩbɛ kɛɛ yɛyɛ́ sutiye, na yɛhã yɛ nwʋ azɩ yɛma bɛzabɛ mɔɔ beli nninyeni anyunu nɩ a? Mɩnla ti mɔɔ ɛkãã ɔzɔ a?
Kɩnga Luuku 16:10, na akʋ̃ bozunzú odwokɔɣizialɛ eyi nwʋ:
Mɩnla ti mɔɔ ɩsɛ kɛɛ yetiye asafʋ nu mbanimbani wɔ nninyeni ngyɩkɩ̃ɩ̃ ngyɩkɩ̃ɩ̃ po nu a?
ABIYEMMƆ BƐKÃ KƐƐ: “Iáhyinyia kɛɛ yɛkɛva yɛ nwʋ yɛkɔwɔ ɔzʋ̃mɩnlɛ okuwu bela.”
Ekila a, mɩnla ti mɔɔ ɩdɩ baaba kɛɛ yɛ nɩɩ mmenii mɔɔ bɔwɔ asafʋ yi nu bɔ numɔ sʋ̃mɩ Nyamɩnlɩ a?
YƖ DƆKƆWƆLƐ
Gyisɛsɩ yɛ ɩdɩ asafʋ yi ti a. Yɛzʋ̃ anyɩnlɩlelɛ nu yetiye mbanimbani mɔɔ bɔsʋ̃mɩ wɔ Gyisɛsɩ tʋ nɩ, iluwakɛɛ bɛma yɛ nwʋ ɩtɔ yɛ na bɛyɛ ndianwʋba bɛma yɛ.
Kɛ Okowuwa Ekeze a?
Aninyia yɛ ɩdɩ asafʋ yi ti a?
Mɩnla ɔhʋanɩ zʋ yɛ asafʋ nu mbanimbani bɔbʋwa asafʋ yɩ a?
Mɩnla asɛdɩ yɛ Gyehova yɩ sʋ̃mɩvʋlɔ bela ɩwɔ a?
PƖBƐ́ SƲ̃MAA
Kila dasɩlɛ mɔɔ ikile kɛɛ Ɔhʋanɩhilelɛ Okuwu yi nɩɩ asafʋ nu mbanimbani bɔdwɩnɩ be mmeliyema Kilisinyiamaa bɔ nwʋ baaba wɔ nnɛ.
Bɛhyɛlɩ Be Mmeliyema Mɔɔ Bɛva Salɛ Bediã Be Egyimalilɛ Zʋ Nɩ Ɛzɩzɩbɛ (4:22)
Kila egyima mɔɔ mansini zʋ ehilalɛmaa bɛyɛ.
Kezimɔ Mansini Zʋ Ehilalɛvʋlɔ Be Mɔɔ Ɩsʋ̃mɩ Wɔ Nzuwalɩyɛ Ɩyɛ Yi Egyima (4:51)
Kɩnga asɛdɩ mɔɔ mmaalɛ bɛlɛ yɩ wɔ asafʋ yi nu nɩ nwʋ odwokɔ.
“Asʋ̃ Gyehova Dasɩvʋlɔmaa Bɔwɔ Mmaalɛ Mɔɔ Bekilehile a?” (Ɔwɩɛnɩlɛ Aɣanɩ, September 1, 2012)
Kɩnga kezimɔ asafʋ nu mbanimbani bɛyɛ egyima ɛzɩzɩbɛ bɛfa bɛhyɛ bɔ ɔhɔnwʋmmɔ dedimaa ɛzɩzɩbɛ nɩ nwʋ odwokɔ.