Ɔwɔ Ɛpɛ Kɛɛ Ɔkɔhɔ Bulombunlililɛ Odwokɔbahanlɛmaa Sukuulu Nɩ Be a?

Asʋ̃ ɛdɩ ɔhʋanɩbukolɛvʋlɔ mɔɔ eli alʋbɔ 23 kɔbʋmɩ 65 a? Asʋ̃ ɔwɔ pɔkɔdɩlɛ baaba mɔɔ ɔkɔhʋla ɔkɔhɔ ɔkɔzʋ̃mɩ wɔ dɩka mɔɔ mmʋwalɩyɛ nwʋ ihyinyia a? Sɛ owuwalɩ kɛɛ ɛnyɩɩ a, asʋ̃ ozunzu nwʋmɔ kyɩ̃ kɛɛ ɛkɛhyɩhyɛ Bulombunlililɛ Odwokɔbahanlɛmaa Sukuulu fɔɔmɩ nɩ be a? Ɔzʋmɩ mmɩlɩ mɔ bɔwɔlɩ yɩ tʋ nɩ, agyiahʋnlɩmaa nɩɩ mmeliyema mmenyia nɩɩ mmaalɛ asigyiamaa abʋmɩ abʋmɩ sʋ̃maa zɛ yɛ bɔhɔ ebiye a. Naasʋ̃, yehyinyia mmeliyema mmenyia asigyiamaa sʋ̃maa mɔɔ bɔkɔhɔ ebiye. Siãã Gyehova kɛɛ ɩma enyia ɛpɛ kezile kɛɛ ɛkɛyɛ yɩ apɛdɩ na ozumazuma yɩ Ɣa nɩ sʋ̃. (Ndw 40:8; Mt 20:28; Hib 10:7) Na akʋ̃ pɩbɛ́ ahʋanɩ azʋlɔtʋ mɔɔ okoluwa ɔzʋlɔ ɛkɛdɩ nnwʋnlamɩ ɔfʋã nu egyima nɩɩ asɛdɩ azʋlɔtʋ be zʋ na ama wʋavata wʋama sukuulu nɩ.

Mɩnla ɔnwʋmɔ ɔhʋanɩ azʋlɔtʋ yɛ mmenii mɔɔ benyia ɔzɔ tiyoklasi ɛdɩdɩlɛ eyi benyia a? Bɛzabɛ mɔɔ bowie sukuulu yɩ nɩ, bɛma abiyemmɔ bɔsʋ̃mɩ wɔ nnɩka mɔɔ bɛkã ndɛnɩ mvʋlɔ anzɛnyɩɩ bɛyɛ bagua nu dasɩlɛlilɛ wɔ ahyonwa nɣezile nu. Bo nu be sʋ̃ bɔsʋ̃mɩ kɛɛ mansini zʋ ehilelalɛmaa bɛ awʋwavʋlɔ, mansini zʋ ehilalɛmaa, anzɛnyɩɩ odwokɔbadɛlɛlɛmaa. Mmɩlɩ mɔ ɔdwɩnɩndwɩnɩ mɔɔ ɔkɔhʋla ɛkɛyɛ wɔ Gyehova yɩ ɔzʋ̃mɩnlɛ nu nɩ, bɔ́ mmɔdɩnɩ kɛɛ ekenyia ɛpɛ mɔɔ nkɔmɩhyɛnii Ayɩzaya inyianlɩ nɩ be, ɩhanlɩ kɛɛ: “Mamɩ yɛ dɩ! Sʋma mɩ!”—Ayɩ 6:8.

KILÁ VIDIYO MƆƆ ISE ODWOKƆBADƐLƐLƐMAA—EGYIMAYƐLƐMAA MƆƆ BƆWƆ ODUALƐGYIMA YƖ NU, NA AKƲ̃ YƖ́ NDWOKƆƔIZIALƐ EYIMMƆ BO MUNWA:

• 

  Mɩnla ɔhʋanɩ zʋ yɛ bɛyɩ odwokɔbadɛlɛlɛmaa?

• 

  Mɩnla egyimaba yɛ odwokɔbadɛlɛlɛmaa bɛyɛɛ a?

• 

  Nyilalɛ azʋlɔtʋ mɔɔ ɩwɔ odwokɔbadɛlɛlɛ egyima yi nu nɩ be yɛ lɛ mɩnla?