Mɩnla Sukuulu Yɛɛ Ɩwɔ Ɛkɛnɩ Ɩma Ɔhʋanɩbukolɛmaa?

Tiyoklasi ɛdɩdɩlɛ ɩdɩ dɩyɛ titili mɔɔ Gyehova Dasɩvʋlɔmaa bɛyɛ daada. Bɛyɛ sukuulu sʋnʋnkʋ̃ be bɛma mmenii mɔɔ bodu bɔnwʋ bɛma kɛɛ bɛkɛva bɛ mmɩlɩ munwatĩĩ bɛkɛyɛ Bulombunlililɛ odwokɔhanlɛ egyima yɩ nɩ na ama bɛahʋla bɛayɛ ‘egyima munwatĩĩ mɔɔ bɛva bowula bɛ sa nɩ.’—2 Timoti 4:5.

Ɔhʋanɩbukolɛmaa Ɔzʋ̃mɩnlɛ Sukuulu. Sɛ eɣile munwatĩĩ ɔhʋanɩbukolɛvʋlɔ inyia ɔlʋbɔ ɔkʋ̃ wɔ mmɩlɩ munwatĩĩ ɔzʋ̃mɩnlɛ egyima yɩ nu a, ɩkɔ aɣile ahyia sukuulu mɔɔ bɛyɛ yɩ wɔ Bulombunli Ayiyialɩyɛ Aliyia be mɔɔ ibike yɩ nɩ. Sianti mɔɔ bɛyɛ sukuulu yɩ nɩ yɛ lɛ kɛɛ, ɩkɔwʋwa ɔhʋanɩbukolɛvʋlɔ yɩ ma ikeɣike Gyehova, iadu mpʋnɩ wɔ yɩ ɔzʋ̃mɩnlɛ egyima yɩ ɔfʋã azʋlɔtʋ nu, na ɩahɔ ɔzʋlɔ ɩayɛ egyima yɩ wɔ nɔhʋanlɛlilɛ nu.

Bulombunlililɛ Odwokɔbahanlɛmaa Sukuulu. Bɛyɛ aziyianɩ anwɩ̃ sukuulu eyi na ɩadɩdɩ ɔhʋanɩbukolɛmaa mɔɔ bɔnwʋ ɩwʋkʋa mɔɔ bɔwɔ ɛpɛ kɛɛ bɔzʋ̃ dɩka mɔɔ bɛda nɩ bokodu bɔkɔhɔ bɔkɔzʋ̃mɩ wɔ dɩka bela mɔɔ behyinyia mmʋwalɛ. Ɔhʋanɩ be zʋ̃ nɩ, bɛkã kɛɛ, “Mamɩ yɛ dɩ! Sʋma mɩ!” bɛfa bosumazuma Odwokɔbahanlɛvʋlɔ kezile yɩ mɔɔ ɩwʋwalɩ azɩ nɩ, Gyisɛsɩ Kɩlayɩsɩ. (Isaiah 6:8, NW; Dwɔɔnʋ 7:29) Bɛawudo mɔɔ bɔzʋ̃ botu bɔkɔ dɩka fʋlɔ nɩ ikile kɛɛ, bɛkɛma bokunlu ikodwoli ɛgyɩkɩ̃ɩ̃ mɔɔ bɔwɔ nɩ nwʋ. Bɛ ammamu, oyumi bʋwabɩlɛ, nɩɩ bɛ alɩyɛ yɩ nɩ ɩkɔhʋla ɩkɛyɛ sʋnʋnkʋ̃ kʋlaa wɔ bɛ dɩyɛ mɔɔ bezi yɩ nɩ nwʋ. Ɩyɛ po a, ɔnwʋmɔ ihyinyia kɛɛ bosuma ɛdɩndɛlɛ fʋlɔ. Ɔzɔ sukuulu eyi ɩbʋwa mmeliyema mmenyia nɩɩ mmaalɛ mɔɔ bɛdɩ sigyiamaa nɩɩ agyiahʋnlɩmaa mɔɔ beli ɔzʋmɩ alʋbɔ 23 kɔbʋmɩ 65, ma benyia sunzuma yɩ mma mɔɔ behyinyia wɔ bɛ egyimayɛlɛ nu nɩɩ ɛdɩdɩlɛ mɔɔ ɩkɔwʋwa bɛ ma Gyehova nɩɩ yɩ ahyɩhyɛdɩ ɩkɛva bɛ ikeli egyima sʋ̃maa.

Watchtower Gɩlɩad Bayɩbʋlʋ Sukuulu. Wɔ Hibulu nu nɩ, “Gɩlɩad” ikile “Dasɩlɛlilɛ Awʋlɔ Tuko.” Ɔzʋmɩ kɛɛ Gɩlɩad ɩwɔlɩ yɩ tʋ wɔ 1943 nu nɩ, mmenii mɔɔ bɔbʋ 8,000 mɔɔ bowie sukuulu eyi yɛɛ bɔzʋ̃ma bɛ ma bɔhɔ nnɩka mvʋlɔ kɛɛ odwokɔbadɛlɛlɛmaa na ama bɛali dasɩlɛ wɔ ‘oyuwadɩ yɩ munwatĩĩ,’ na mfasʋ sʋ̃maa zɛ ɩzʋ̃ numɔ ɩɣa. (Egyima 13:47) Mmɩlɩ mɔɔ ebiyemmɔ belili bɔmʋnlɩ bodwuli Peru nɩ, nɩ asafʋ bela íni manlɩ yɩ nu. Sikalɛpɛyɩ, asafʋ mɔɔ ɩbʋ 1,000 yɛɛ ɩwɔ ɛkɛnɩ a. Mmɩlɩ mɔɔ yɛ odwokɔbadɛlɛlɛmaa bɔwɔlɩ yɩ tʋ kɛɛ bɔsʋ̃mɩ wɔ Japan nɩ, nɩ Dasɩvʋlɔmaa mɔɔ bɔwɔ manlɩ yɩ nu ɛkɛnɩ nɩ bɛádwu bunlu po. Naasʋ̃ sikalɛpɛyɩ, bɔbʋ 200,000. Wɔ aziyianɩ anlu Gɩlɩad dɩyɛzumanlɛ yɩ nu nɩ, bosuma Nyamɩnlɩ yɩ Odwokɔ yɩ bɔkɔ aɣinzi bʋwɔ. Mmenii mɔɔ bɔsʋ̃mɩ kɛɛ ɔhʋanɩbukolɛmaa titili, odwokɔbadɛlɛlɛmaa, bɛtɩlɩmaa, anzɛnyɩɩ mansini zʋ ehilalɛmaa yɛɛ bɔtʋ salɛ bɔfʋlɛ bɛ ma bɔkɔ sukuulu eyi mɔɔ bɛfa bɛtɩdɩ bɛ bʋwɔ ma bɔbʋwa ma oyuwadɩ munwatĩĩ egyima nɩ ikyĩna na ɩhyɛ yɩ ɛzɩzɩbɛ a.

• Mɩnla ti mɔɔ bɛyɛ Ɔhʋanɩbukolɛmaa Ɔzʋ̃mɩnlɛ Sukuulu yɩ a?

• Aninyiammɔ yɛɛ bɛyɛ Bulombunlililɛ Odwokɔbahanlɛmaa Sukuulu yɩ bɛma bɛ a?