Mɩnla Yɛ Bayɩbʋlʋ Kã Falɩ Makeup Nɩɩ Agudi Mɔɔ Bɛfa Besiyeziye Bɔ Nwʋ Nɩ Nwʋ a?

Mɔɔ Bayɩbʋlʋ yɩ ɩkã

Bayɩbʋlʋ yɩ ɩáhã eyi nwʋ odwokɔ sʋ̃maa, naasʋ̃ ɩádɩndɛ itiyia makeup, agudi anzɛnyɩɩ nninyeni mvʋlɔ mɔɔ bɛfa besiyeziye bɔ nwʋ nɩ. Mfomi ɩtwɩ̃ adwɩnɩ isiye ‘Nyamɩnlɩ zʋ anwʋpɩkɛ mɔɔ ɩázɩnza iluwakɛɛ ɩzʋ̃ enii mɔɔ itwe yi nu’ nɩ zʋ, na kɛ anyɩnlɩ zʋ anwʋpɩkɛ a.​—1 Pita 3:​3, 4.

Nninyeni mɔɔ bɛfa besiyeziye bɔ nwʋ, ɩ́dɩ tanɩ

• Mmaalɛ nɔhʋanlɛmaa mɔɔ bɔwɔ Bayɩbʋlʋ yɩ nu nɩ ziyeziyeli bɔ nwʋ. Lɩbɛka mɔɔ nɩ yi hũ lɛ Ayɩzɩkɩ nɩ valɩ anwʋnlɩ nu mbɔdɩya mɔɔ bɛva goodu bɛyɛ, kaba mɔɔ bɛfa betiã bɛ sa, nɩɩ nninyeni mvʋlɔ mɔɔ yɩ bʋlɔ yɛ sɩ mɔɔ Ayɩzɩkɩ yɩ papa Abilehamɩ va hyɛlɩ yɩ nɩ ziyeziyeli yɩ nwʋ. (Gyɛnɛsɩsɩ 24:22, 30, 53) Ɔzɔ la sʋ̃ yɛ mmɩlɩ mɔ nɩ bɛpɛɛ Pɛhyɩya Bulombunli Manlɩ yɩ baahɩ̃ma nɩ, Ɛsɩta leli dianlɩ numɔ ma beziyeziyeli yi na ama ɩahɔ iayiyia bulombunli nɩ a. (Ɛsɩta 2:​7, 9, 12) Nɩ ngɔlɔ azʋlɔtʋ nɩɩ makeup kɩnla nninyeni mɔɔ bɛva beziyeziyeli yi nwʋ.​—New International Version; Easy-to-Read Version.

• Bayɩbʋlʋ nu ndianwʋ azʋlɔtʋ fa agudi mɔɔ bɛfa besiyeziye bɔ nwʋ nɩ di egyima wɔ ɔhʋanɩba zʋ. Kɛ ndianwʋ nɩ, abiye mɔɔ ɩma fʋlɔdulɛ baaba nɩ bɛfa yɩ betindiã ‘asʋmadɩ mɔɔ bɛva goodu bɛyɛ bɛma azʋnlɩ mɔɔ itiye odwokɔ nɩ’ nwʋ. (Ɛɣɛlɛwulɛ 25:12) Ɔzɔ sʋ̃ la yɛ Nyamɩnlɩ valɩ kezimɔ ɩ nɩɩ Yizilayamaa yɩ lili nɩ dindianlɩ ohunɛ mɔɔ ɩfa agudi nɩɩ asʋmadɩ isiyeziye yɩ ayɩfʋlɔ nɩ nwʋ a. Ɔzɔ eziyeziyelɛ nɩ manlɩ manlɩ yɩ nwʋ yɛlɩ ‘pɩkɛ baaba.’​—Izikɩyɛlɩ 16:11-​13.

Awohwi ndwokɔ mɔɔ ɩfalɩ makeup nɩɩ agudi nwʋ

Awohwi ndwokɔ: Iluwakɛɛ nɩ Baahɩ̃ma tinuzɩzɩbɛvʋlɔ Gyezibɛlɩ twi yɩ anyɩ mɛda nɩ ti, sɛ abiye twi yɩ anyɩ mɛda a, ɩdɩ tanɩ.​—2 Awulombunli 9:​30.

Nɔhʋanlɛ odwokɔ: Begyinanlɩ Gyezibɛlɩ mɔɔ nɩ ɩdɩ kodiyiawu nɩ yɩ nyɛlɩyɛ tanɩ yɩ zʋ bowuwalɩ yɩ ndɛnɩ a, na kɛ yɩ anwʋziyeziyelɛ zʋ a.​—2 Awulombunli 9:​7, 22, 36, 37.