Asʋ̃ Nwʋmɔ Hyinyia Kɛɛ Ɛkɛva Wʋ Nwʋ Kɔwɔ Ahyɩhyɛdɩ Be a?
Mɔɔ Bayɩbʋlʋ yɩ kã
Nyɛ, iluwakɛɛ Nyamɩnlɩ pɛ kɛɛ mmenii yiyia numɔ sʋ̃mɩ. Bayɩbʋlʋ yɩ kã kɛɛ: “Mʋnlʋmmɔ bɛmá yɛdwɩnɩ ɔhʋanɩ mɔɔ yɛkɔhʋla yekezizi yɛ ɔhɔnwʋmmɔ bɛ kɛnɣa, yɛlʋlɔ́ yɛ nwʋ nkʋ̃kʋ̃ nkʋ̃kʋ̃, na yɛwɔ́ ɛbɩla baaba. Dɩka mɔɔ yeyiyia numɔ yetiye Nyamɩnlɩ Odwokɔ nɩ nɩ, máma yeyiaki ɛkɛnɩ ɔhɔlɛ.”—Hibulumaa 10:24, 25.
Nɩ Gyisɛsɩ ɩpɛ kehile kɛɛ yɩ mɛdalilɛmaa yɩ kɔwɔ nu kɛyɛ ahyɩhyɛdɩ mmɩlɩ mɔ ɩhanlɩ kɛɛ: “Sɛ bɔdʋdɔ bɔ nwʋ nkʋ̃kʋ̃ a yɛ abiyela ɩkɔnwʋ kɛɛ mʋnlʋmmɔ bɛdɩ mɩ adʋwavʋlɔ a.” (Dwɔɔnʋ 13:35) Nɩ Gyisɛsɩ yɩ adʋwavʋlɔ yɩ kɛla yɩ ali kɛɛ bɔdʋdɔ bɔ nwʋ iluwa bɔ ɔhɔnwʋmmɔ dedimaa mɔɔ bɛ nɩɩ bɛ kɔwɔ nɩ zʋ. Nɩ bɛkɛhyɩhyɛ asafʋ azʋlɔtʋ mɔɔ ɩkɛma bɛkɛda bekeyiyia numɔ na bɛazʋ̃mɩ. (1 Kɔlɛntɩmaa 16:19) Eyi kile kɛɛ bɔkɔwɔ numɔ kɛyɛ mmeliyemayɛlɛ okuwu wɔ oyuwadɩ munwala.—1 Pita 2:17.
Ihyinyia kɛɛ yɛyɛ sʋ̃maa tɛla kɛɛ yɛkɛva yɛ nwʋ kɔwɔ ahyɩhyɛdɩ be kɛkɛ
Ɩwɔ numɔ kɛɛ Bayɩbʋlʋ yɩ kã kɛɛ ɩsɛ kɛɛ mmenii yiyia numɔ sʋ̃mɩ Nyamɩnlɩ dɩyɛ, naasʋ̃ iáhile kɛɛ sɛ abiye fa yɩ bɔ ɔzʋ̃mɩnlɛ be a, mɛyɩ la ma ɩsɔ Nyamɩnlɩ anyɩ. Sɛ Nyamɩnlɩ kɔhʋla kele abiye kediã numɔ a, ɩsɛ kɛɛ ɩma yɩ ɔzʋ̃mɩnlɛ kã yɩ ɛbɩlawɔlɛ. Kɛ ndianwʋ nɩ, Bayɩbʋlʋ yɩ kã kɛɛ: “Nyamɩnlɩzʋ̃mɩnlɛ baaba mɔɔ evinli bela íni nwʋmɔ wɔ Nyamɩnlɩ Ɛzɩlɛ nɩ yɩ anyunu nɩ, mɛyɩ yɛ lɛ kɛɛ ɔkɔwʋwa aɣinsamaa nɩɩ ahunavʋlɔ wɔ bɛ ɛvɛlɩyɛ nu, na wʋayɩ wʋ nwʋ wɔ oyuwadɩ nninyeni tanɩ tanɩ nɩ mmɔ nwʋ.”—Gyemisi 1:27.