Owulo Nwʋ Bɔlɔ—Kɛ Ɩkɛyɛ Na Wuali Zʋlɔ a?

Mɔɔ Bayɩbʋlʋ yɩ kã

Ye kunlu tuli owulo nwʋ iluwakɛɛ ɩdɩ yɛ tamvʋlɔ meti yɛyɛ nninyeni azʋlɔtʋ be yɛfa yɛbɔ yɛ nnwʋanlɩ nwʋ banɩ. (1 Kɔlɛntɩmaa 15:26) Naasʋ̃, owulo nwʋ bɔlɔ mɔɔ ɩáyɛ baaba mɔɔ igyĩ awohwi ndwokɔ nɩɩ azunzuma evinli zʋ̃ nɩ ma mmenii yɛ ‘alɔngɔ ma owulo wɔ mmɩlɩ mɔ bɛda nnwʋanlɩ nu nɩ.’ (Hibulumaa 2:​15) Naasʋ̃ sɛ yezi nɔhʋanlɛ yɩ a, ɩma yede yɛ nwʋ wɔ owulo nwʋ bɔlɔ nwʋ. Bɔlɔ mɔɔ ɩáma yɛ anyɩ de wɔ yɛ ɛbɩlawɔlɛ nu nɩ.​—Dwɔɔnʋ 8:​32.

Nɔhʋanlɛ odwokɔ mɔɔ ɩfalɩ owulo nwʋ

• Awuvʋlɔ bézi debela. (Ndwomi 146:4) Íni kɛɛ ɛma wu kunlu tu kɛɛ sɛ owu a sa ɛtɩ ɛyɛkɛ, iluwakɛɛ Bayɩbʋlʋ yɩ fa owulo tindiã nna nwʋ.​—Ndwomi 13:3; Dwɔɔnʋ 11:11-​14.

• Awuvʋlɔ bɔlɔ́kʋla bekebila yɛ. Yɛ adamvʋlɔ mɔɔ bɛyɛ basabasa po nɩ ‘bɛáhʋla bɛyɛ hwɩɩ wɔ owulo nu.’ (Ɛɣɛlɛwulɛ 21:16) Bayɩbʋlʋ yɩ kã kɛɛ “bɛ ɛdanɩlɛ nɩɩ bɛ sipe minli dada.”​—Odwokɔhanlɛvʋlɔ 9:6.

• Owulo lɔ́kʋla kodu yɛ tʋ kʋlakʋla wɔ azɩlɛ yɩ zʋ. Iluwa awudunwolɩyɛ yɩ zʋ nɩ, Nyamɩnlɩ kodunwo bɛzabɛ mɔɔ bowuwu nɩ ma bɛkɛɣa nnwʋanlɩ nu.​—Dwɔɔnʋ 5:​28, 29; Egyima 24:15.

• Nyamɩnlɩ bɔ anʋhʋba kɛɛ mmɩlɩ be baɣa mɔɔ nɩ “owulo íni ɛkɛnɩ ebiyekʋ̃.” (Yikile 21:4) Mɔɔ ɩfalɩ ɔzɔ eɣile yi nwʋ nɩ, Bayɩbʋlʋ yɩ kã kɛɛ: “Ɛdɩnɣɛlɛmaa yɛ bekenyia azɩlɛ yɩ a, na bɔkɔwʋwa zʋlɔ daabaa,” mɔɔ bo kunlu lótu kɛɛ bokowu.​—Ndwomi 37:29.