Mɩnla Ti Mɔɔ Ɛdanɩlɛ Wuli Zʋlɔ a?​—Mɩnla Yɛ Bayɩbʋlʋ Yɩ Kã a?

Nnɛ, amanɩyɛwɔlɛ bela mɔɔ ekediye nɩ, sɛ ɩáfalɩ mmenii mɔɔ iluwa mmenii nu nyiyimi ti bɛtɩndɛ betiyia bɔ nwʋ nɩ nwʋ a, nɩ ɩfalɩ basabasayɛlɛ nwʋ.

• “Sikalɛyɩ po mɛyɩ, iluwa Israel nɩɩ Gaza kʋnɛ yɩ ti, mmenii tɩndɛ tiyia bɔ nwʋ wɔ sohyiya midiya zʋ na ɩva basabasayɛlɛ nɩɩ ɛdanɩlɛ sʋ̃maa ɩɣa.”​—The New York Times, November 15, 2023.

• “Ɔzʋmɩ October 7 mɔɔ ɩbaa nɩ, iluwa mmenii nu nyiyimi ti, mmenii tɩndɛ tiyia bɔ nwʋ na basabasayɛlɛ sʋ̃ wuli zʋlɔ wɔ oyuwadɩ munwala.”​—Dennis Francis, United Nations General Assembly, bɛ manlɩ ebani November 3, 2023.

Ndwokɔ ɛyɛkɛ yɛkɛ mɔɔ mmenii kã tiyia bɔ nwʋ, basabasayɛlɛ, nɩɩ kʋnɛ ɩ́dɩ dɩyɛ fʋlɔ. Bayɩbʋlʋ yɩ po kã mmenii mɔɔ bɔwʋwalɩ azɩ wɔ ɔwɔkɩ nɩ nwʋ odwokɔ kɛɛ, ‘bozuwalɩ bo odwokɔ mɔɔ ɩyɛ ɛyɛkɛ nɩ kɛɛ agyianɩ’ na bɛvalɩ bɔ nwʋ bowulalɩ kʋnɛ nɩɩ basabasayɛlɛ nu. (Ndwomi 64:3; 120:7; 140:1) Naasʋ̃ Bayɩbʋlʋ yɩ ma yɛnwʋ kɛɛ, ɛdanɩlɛ mɔɔ ɩkɔlɩɩ zʋlɔ wɔ nnɛ nɩ kile debe.

Ɛdanɩlɛ​—Ɩkɩnla nninyeni mɔɔ ɩkɔhɔlɩ zʋlɔ wɔ yɛ mmɩlɩ zʋ nɩ nwʋ

Bayɩbʋlʋ yɩ kã sianti anwɩ̃ ti mɔɔ ɛdanɩlɛ wuli zʋlɔ wɔ nnɛ nɩ nwʋ odwokɔ.

1. 1. Ɩkã kɛɛ, mmɩlɩ be kɛɣa mɔɔ “mmenii sʋ̃maa bɔ ɔlɔlɛ nu kogo.” (Matiyu 24:12) Kɛ ankɩ bɛkɛla ɔlɔlɛ ali nɩ, mmenii kɛla subanɩ be mɔɔ ɩkɛma bɛkɛdanɩ bɔ nwʋ bɔ nwʋ ali mfomi.​—2 Timoti 3:1-5.

2. 2. Setanɩ Abɔnsamɩ mɔɔ ɩdɩ ɛdanɩlɛvʋlɔ nɩɩ wudivʋlɔ yɩ yɛ ɩma ɛdanɩlɛ wuli zʋlɔ yɩ a. Bayɩbʋlʋ yɩ kã kɛɛ “Abɔnsamɩ [yɛ] idi oyuwadɩ eyi zʋ bulombunli a.”​—1 Dwɔɔnʋ 5:19; Yikile 12:9, 12.

Naasʋ̃, Bayɩbʋlʋ yɩ ma yɛnwʋ kɛɛ ɩlɛ́kyɛ bela, Nyamɩnlɩ kodu nninyeni mɔɔ ɩfa ɛdanɩlɛ ɩba nɩ yɩ tʋ kʋlaa kʋlaa. Akʋ̃ sʋ̃, ɩkɛyɩ ɛyɛkɛ mɔɔ ɛdanɩlɛ va ɣa nɩ wɔ kɛ. Bayɩbʋlʋ yɩ bɔ anʋhʋba kɛɛ:

• Nyamɩnlɩ ‘kɛbɩba bɛ anyɩ tʋ mmʋnlɩ munwala, na owulo íni ɛkɛnɩ ebiyekʋ̃, na alɔbɔ nɩɩ ozunɛ nɩɩ ɛyɛkɛ béni ɛkɛnɩ ebiyekʋ̃. Nninyeni dadampɔ nɩ bodua numɔ.’​—Yikile 21:4.