Asʋ̃ Nyamɩnlɩ Dwɩnɩ Omumunlomaa Nwʋ a?

Nnɛ, mmenii kɛyɛ 70 million yɛ bɛdɩ omumunlomaa wɔ oyuwadɩ yɩ dɩka bela na bo nu sʋ̃maa duwa omumunlo ndɛnɩ mɔɔ ɩbʋ 200 zʋ bɛ nɩɩ mmenii tɩndɛ. Naasʋ̃ alɔbɔ odwokɔ yɛ lɛ kɛɛ, mmenii sʋ̃maa nɩɩ omumunlomaa bɛáli yi bʋwɔ, kɛmɔ ndwokɔ mɔɔ ɩwɔ ɛkɩhyɩ nɩ kile nɩ:

• “Wɔ oyuwadɩ yɩ dɩka bela nɩ, mmenii sʋ̃maa yɩ bɛ anyɩ ma omumunlomaa nɩɩ azʋ̃tiliɣamaa.”—National Association of the Deaf (U.S.)

• “Omumunlomaa mɔɔ bɔwɔ amanlɩ mɔɔ bedi bʋwɔ nu sʋ̃maa dɩ ahyinyiamaa, na ɩyɛ sɩ kɛɛ bekenyia egyima nɩɩ bʋwabɩlɛ baaba na bɛáma bɔkɔ sukuulu sʋ̃.”—World Federation of the Deaf.

Kɛ Nyamɩnlɩ tɩ nɣanlɩ wɔ omumunlomaa nwʋ se a? Mɩnla yɛ Bayɩbʋlʋ yɩ kã wɔ omumunlomaa nwʋ a? Na mɩnla ɔhʋanɩ zʋ yɛ Gyehova Dasɩvʋlɔmaa bʋwaa bɛ wɔ nnɛ a?

Kezimɔ Nyamɩnlɩ Bu Omumunlomaa

Bayɩbʋlʋ yɩ da yɩ ali kɛɛ Gyehovaa Nyamɩnlɩ dwɩnɩ omumunlomaa nwʋ. Ɩpɛ kɛɛ yɛ nɩɩ be di yi bʋwɔ na bɛzabɛ sʋ̃ benyia ehilehilelɛba mɔɔ ɩfa ɩma nɩ zʋ mfasʋ.

Ɛhɛlɛlɛ odwokɔ: “Mákã mmuzulo odwokɔ kile enii mɔɔ yɩ azʋ̃ idi.”—Lɛvitikɔsʋ 19:14.

Ɛhɛlɛlɛ odwokɔ: “Nyamɩnlɩ ɩába mmenii nu.”—Egyima 10:34.

Ɛhɛlɛlɛ odwokɔ: ‘Gyisɛsɩ hɔ bɛsalɩ ahyonwa nɩɩ nzuwalɩyɛ munwatĩĩ zʋ na ɩwɔlɩ Bulombunlililɛ yɩ nwʋ odwokɔba nɩ nwʋ ɛlawulo.’—Matiyu 9:35.

Ɛhɛlɛlɛ odwokɔ: Gyisɛsɩ manlɩ ‘azʋ̃tiliɣanii dɩlɩ odwokɔ na ɩmanlɩ omumunlo dɩndɛlɩ.’—Maakɩ 7:37.

Ɛhɛlɛlɛ odwokɔ: “Bɛzabɛ mɔɔ bɛ azʋ̃ idi nɩ kɛdɩ odwokɔ.”—Ayɩzaya 35:5.

Mɔɔ ikile: Gyehova hyɛlɩ nkɔmɩ kɛɛ azʋ̃tiliɣamaa kɛdɩ odwokɔ.—Ayɩzaya 29:18.

Kezimɔ Gyehova Dasɩvʋlɔmaa Bʋwa Omumunlomaa Wɔ Nnɛ

Gyehova Dasɩvʋlɔmaa kã Nyamɩnlɩ yi odwokɔ yɩ mɔɔ anyɩnlɩlazʋ wɔ nu nwʋ odwokɔ kile omumunlomaa wɔ oyuwadɩ yɩ dɩka bela. Kɛ ɩyɛ mɔɔ yɛkʋla yɛyɛ eyi a? Yehile Bayɩbʋlʋ nɩɩ vidiyo azʋlɔtʋ mɔɔ bɛfa bosuma Bayɩbʋlʋ yɩ tʋ yɛhɔ omumunlo ndɛnɩ mɔɔ ɩbʋ 100 nu. Akʋ̃ sʋ̃, yeduwa omumunlo ndɛnɩ zʋ yɛbʋwa mmenii ma bosuma Bayɩbʋlʋ yɩ na yɛfa yɛyɛ Kilisinyianɩ ayiyialɩyɛ azʋlɔtʋ sʋ̃. Yɛyɛ eyimmɔ munwala yɛma bɛzabɛ mɔɔ bɛpɛ kɛɛ Nyamɩnlɩ bʋwa bɛ nɩ na yɛále ozukua bela. Mɩnla ti a? Iluwakɛɛ Gyisɛsɩ hyɛlɩ kɛɛ: “Mʋnlʋmmɔ benyia tumi eyi mbʋanlɩ, ɔzɔ ti máma bede dɩyɛ bela.”—Matiyu 10:8.

Sɛ ɛpɛɛ nninyeni mɔɔ ilili zʋlɔ yɩ be a, sa ɔkʋla nyia yɩ wɔ intanɛtɩ yɩ zʋ anzɛnyɩɩ ɔtwɩ̃ biye kua wʋ mahyini zʋ:

JW.ORG. Sɛ ɛpɩbɛɛ ndwokɔ be wɔ omumunlo ndɛnɩ pɔkyɩɩ be nu a, minyia dɩka mɔɔ bɛfa bɛpɩbɛ ndɛnɩ mɔɔ ɩwɔ wɛbsayɩtɩ yɩ zʋ nɩ.

JW Library app. Iáhyinyia kɛɛ otuwa ozukua be ansaana wʋahwɩ̃ app eyi, ɔkɔhʋla kehila anzɛnyɩɩ ɔkɔhwɩ̃ vidiyo sʋ̃maa sʋ̃ wɔ omumunlo ndɛnɩ mɔɔ ɩbʋ 100 nu.

Mɩnla Bayɩbʋlʋ Ehilehilelɛ Yɛ Yɛfa Yɛma a?

Bayɩbʋlʋ mɔɔ ɩwɔ omumunlo ndɛnɩ nu. New World Translation of the Holy Scriptures wɔ America Omumunlo Ndɛnɩ Nu yɛ ɩdɩ omumunlomaa bɛ Bayɩbʋlʋ mɔɔ ili bɔmʋnlɩ wɔ oyuwadɩ munwala a. Behile New World Translation Bayɩbʋlʋ yɩ munli munwala tʋ bɔhɔ omumunlo ndɛnɩ azʋlɔtʋ nu na omumunlo ndɛnɩ be sʋ̃ wɔ kɛnɩ a, bɔwɔ yɩ ɔfʋã be la. Na ɔlʋbɔ bela sʋ̃ bekile yɩ tʋ bɔkɔ omumunlo ndɛnɩ mvʋlɔ nu. (Sɛ ɛpɛ kɛɛ ɔnwʋ ndɛnɩ sʋ̃maa anzɛnyɩɩ ekila Bayɩbʋlʋ yɩ mɔɔ ɩwɔ omumunlo ndɛnɩ nu nɩ wɔ intanɛtɩ yɩ zʋ a, kila alɩka mɔɔ ise “The New World Translation of the Bible in Sign Language.”)

• Kila vidiyo mɔɔ ise The Complete New World Translation Is Available in ASL na kila kezimɔ yekile Bayɩbʋlʋ yɩ tʋ yɛkɔ omumunlo ndɛnɩ nu.

• Sɛ ɛpɛ kɛɛ enyia anyunumihɔlɛ wɔ Bayɩbʋlʋ ɛɣɩngalɛ nu a, twɩ̃ JW Library app yɩ be. App eyi bʋwa ma ɛyɩ Bayɩbʋlʋ nkyɩkyɛmi be mɔɔ wʋ anyɩ deli nwʋ mɔɔ ɩwɔ omumunlo ndɛnɩ nu.

• Dmytro nɩɩ Vita dɩ awʋvʋlɔ mɔɔ bɛdɩ omumunlomaa naasʋ̃ bɔ nnwuakula mɛyɩ bɛtɩndɛ. Kila kezimɔ eɣile bela bɛ abusunwa yɩ nyia mfasʋ wɔ Bayɩbʋlʋ mɔɔ bekila yɩ wɔ omumunlo ndɛnɩ nu nɩ zʋ.

Vidiyo azʋlɔtʋ mɔɔ ikilehile Bayɩbʋlʋ yɩ nu. Gyehova Dasɩvʋlɔmaa yɛ vidiyo azʋlɔtʋ wɔ omumunlo ndɛnɩ nu na ɩbʋwa ma mmenii tɩ mɔɔ Bayɩbʋlʋ yɩ kã nɩ tʋ na bɛfa numɔ fʋlɔdulɛ bɛyɛ egyima. Ebiye yɛ lɛ mmʋwalɩyɛ ma . . .

• Agyiahʋnlɩmaa nɩɩ mmusunwa

• Mmɩlantɩyɛ, nɣɛdɛkɛ nɩɩ mbanimbani

• Nnwuakula

Bayɩbʋlʋ dɩyɛzumanlɛ mɔɔ bɛ nɩɩ wʋ kɛyɛ. Sa abiye kʋla bʋwa wʋ ma osuma Bayɩbʋlʋ yɩ wɔ omumunlo ndɛnɩ nu na wʋzawʋ ɔkɔhʋla ekehile mmɩlɩ nɩɩ dɩka pɔkyɩɩ mɔ ɛpɛ kɛɛ osuma nɩ. Ma yehilé wʋ kezimɔ yɛyɛ Bayɩbʋlʋ dɩyɛzumanlɛ eyi mɔɔ bɛáduwa hwɩɩ nɩ.

Jeson Senajonon zʋ̃ Philippines. Kila kezimɔ Bayɩbʋlʋ dɩyɛzumalɛ nwʋ nhyɩhyɛlɩyɛ mɔɔ yɛyɛ nɩ wʋwalɩ yɩ ma ɩhyɛlɩ ɩ nɩɩ Nyamɩnlɩ avinli abusunwawɔlɛ nu ɛzɩzɩbɛ.

Nɩ Mario Antúnez dɩ asɔlɩ ebani wɔ Honduras. Kila kezimɔ inyianlɩ yi ndwokɔɣizialɛ nwʋ munwalɩyɛ, mmɩlɩ mɔ ikilehile yi ndwokɔ nu wɔ odwokɔ mɔɔ ise “Ná Nsɛm Pii Kyere M’adwene” nu nɩ.

Ayiyialɩyɛ nɩɩ egyimalilɛ azʋlɔtʋ. Yɛwɔ omumunlo ndɛnɩ asafʋ nɩɩ okuwu azʋlɔtʋ wɔ oyuwadɩ yɩ dɩka bela mɔɔ omumunlomaa yiyia nu suma Bayɩbʋlʋ yɩ na bɛyɩ Nyamɩnlɩ ayɛlɛ dapɛnɩ bela. Akʋ̃ sʋ̃ ɔlʋbɔ bela, yeyiyia nu yɛyɛ egyimalilɛ nɣezile nɣezile wɔ omumunlo ndɛnɩ nu. Wɔ yɛ ayiyialɩyɛ nɩɩ ye egyimalilɛ azʋlɔtʋ tʋ nɩ, yeduwa ɔhʋanɩ be zʋ yɛbʋwa omumunlomaa nɩɩ anyɩnlɩsunliɣamaa ma bɔnwʋ mɔɔ ɩkɔlɩɩ ɔzʋlɔ nɩ be. Yesia yɛyɛ Bayɩbʋlʋ nwʋ awuuku wɔ braille ndɛnɩ nu mɔɔ yɛále ozukua bela.

• Pɩbɛ asafʋ mɔɔ ibike wʋ.

• Kila kezimɔ yɛyɛ yɛ ɔlʋbɔ ɔlʋbɔ ayiyialɩyɛ nɩɩ mansini ayiyialɩyɛ azʋlɔtʋ nɩ.

• Kɔ Gyisɛsɩ yɩ owulo nwʋ ɛhakɛlɛlilɛ nɩ be, mɛyɩ yɛ ɩdɩ ayiyialɩyɛ titili mɔɔ yɛta yɛyɛ wɔ ɔlʋbɔ bela a.

José Luis Ayala zʋ̃ Mexico. Bɔwʋlɩ yɩ nɩ, nɩ ɩádɩ odwokɔ na aɣinzi yɩ anyɩ sʋ̃ zunli. Kila kezimɔ bɔwʋwalɩ yɩ ma ɩɣa ɩyɛlɩ Bayɩbʋlʋ kilehilevʋlɔ mɔɔ yɩ nwʋ wʋkwa.