Ma Wu Kunlu Duli Nyamɩnlɩ Nwʋ Dɩkɛɛ Obedaya

Obedaya yɛ nɩ ikila Bulombunli Ehabɩ yi pika zʋ a. Nɩ bulombunli eyi yi ti nu yɛ sɩ baaba, na mɛyɩ yɛ ɩmanlɩ Baalɩ ɔzʋ̃mɩnlɛ wulili zʋlɔ wɔ Yizilaya a. Naasʋ̃ ɔzʋmɩ Obedaya yi nnwuakula nu munwala nɩ yi kunlu tuli Gyehova nwʋ. (1 Aw. 18:​1-13) Meti mmɩlɩ mɔ Bulombunli Baalɛ Gyezibɛlɩ hyɛlɩ kɛɛ bohũhũ Gyehova yɩ nkɔmɩhyɛmaa nɩ, Obedaya nwʋnlɩ kɛɛ ɩsɛ kɛɛ ɩfa akɛnɣazɩzɩbɛ ɩyɛ nninyeni be ɩfa ɩbɔ nkɔmɩhyɛmaa nɩ bɔ nwʋ banɩ. Wɔ ɔzɔ bʋwabɩlɛ mɔɔ nɩ numɔ yɛ sɩ nu nɩ, nɩ ɩ́la azɩ kɛɛ abiye kɔwɔ nkɔmɩhyɛnii ɔkʋ̃ po nwʋ banɩ. Naasʋ̃ Obedaya valɩ nkɔmɩhyɛmaa 100 ɣɩntanlɩ, na nɩ ɩfa alɩyɛ ɩkɔ ɩma bɛ ɩávalɩ nwʋmɔ kɛɛ nɩ alɩyɛ nwʋ yɛ sɩ nɩ! Nɩ ɩsɛ kɛɛ ɩyɛ eyi wɔ ɛɣɩntanlɛ nu na ama awohwi nkɔmɩhyɛmaa mɔɔ bɔsʋ̃mɩ bulombunli yi nɩɩ baahɩ̃ma yɩ nɩ bɛánwʋnlɩ bɛ. Kila kezimɔ nɩ bʋwabɩlɛ nu kɛyɛ sɩ kɛma Obedaya!—1 Aw. 18:19.

Mɩnla yɛ yɛkɔhʋla yekozuma wɔ benyia eyi mɔɔ yi kunlu tuli Nyamɩnlɩ nwʋ nɩ yɩ kɛnɩ a? Nɩ Obedaya yi kunlu tuli Ehabɩ nwʋ dɩyɛ, naasʋ̃ nɩ yi kunlu tuli Nyamɩnlɩ nwʋ kʋlaa tɛla Ehabɩ. Eyi manlɩ ɩvalɩ yɩ nnwʋanlɩ idianlɩ asianɩ nu ɩwɔlɩ yi mmeliyema nwʋ banɩ. Amɩyɛ sʋ̃, ɩsɛ kɛɛ yenyia ɔzɔ bɔlɔ yɩ be, ama sɛ bɛfa salɛ betiã yɛ ɔzʋ̃mɩnlɛ zʋ wɔ dɩka mɔɔ yɛwɔ nɩ a, yɛahʋla yɛawʋwa ye mmeliyema mɔɔ beyiyiaa odwodwudiyialɛ nɩ.