Ndwokɔɣizialɛ Mɔɔ Ɩzʋ̃ Ɛɣɩngalɛmaa Bɛ Ɛkɛnɩ

Mɩnla mmɩlɩ yɛ amanlɩ amanlɩ nɩ kɛhã kɛɛ “akʋ̃ yenyia azʋ̃nudwolɩyɛ, na dɩyɛ bela ɩdɔ bʋwɔ” a?

Kezimɔ yezunzunli nwʋmɔ wɔ “Ndwokɔɣizialɛ Mɔɔ Ɩzʋ̃ Ɛɣɩngalɛmaa Bɛ Ɛkɛnɩ” wɔ Ɔwɩɛnɩlɛ Aɣanɩa mɔɔ ɩɣalɩ aɣile asã yɩ nu nɩ, yɛnwʋnlɩ yɩ kɛɛ ɩlɛ́kyɛ Gyehova kɛva “yi egyimayɛlɛ nwʋ adwɩnɩ” kowula “mmɛnɩ bunlu nɩ” (enii yɩ aɣanɩ munwatĩĩ) bɛ ahʋnlɩnɩ nu kɛɛ bɛvá bo tumi nɩɩ bɛ anwʋzɩzɩbɛ bɛma “ɛnlamɩ kɔkɔlɔ” yɩ mɔɔ ɩdɩ Amanlɩ Amanlɩ Nkabomi yɩ nɩ. Besia bɔfʋlɔ ɛnlamɩ eyi sʋ̃ kɛɛ “ɛnlamɩ nɩ mɔɔ ili bɔmʋnlɩ nɩ yɩ sasʋ.” (Yik. 13:​14, 15; 17:​3, 16, 17) Na “mmɛnɩ bunlu nɩ” nɩɩ ɛnlamɩ kɔkɔlɔ fʋlɔ yɩ mɔɔ bɛma tumi yi nɩ kɛyɩ awohwi ɔzʋ̃mɩnlɛ wɔ azɩlɛ yɩ zʋ munwatĩĩ. Asʋ̃ bɛkɛzɩkɛ awohwi ɔzʋ̃mɩnlɛ ansaana bɛahã kɛɛ “akʋ̃ yenyia azʋ̃nudwolɩyɛ, na dɩyɛ bela ɩdɔ bʋwɔ”b a, anzɛnyɩɩ bɛkɛhã ɔzɔ na mɛyɩ mɛda ansaana bɛazɩkɛ awohwi ɔzʋ̃mɩnlɛ?—1 Tɛs. 5:3.

Sɛ yɛkɛhã a, yézi mmɩlɩ pɔkyɩɩ mɔɔ bɛkɛhã kɛɛ “akʋ̃ yenyia azʋ̃nudwolɩyɛ, na dɩyɛ bela ɩdɔ bʋwɔ” nɩ. Sɛ yezi eyimmɔ nwʋ ndwokɔ munwala a, ankɩ nwʋmɔ léhyinyia kɛɛ yɛkɔwɩɛnɩ. Naasʋ̃ Gyisɛsɩ hɔlɩ zʋlɔ duli yɩ adʋwavʋlɔ yɩ fʋlɔ mbɔmɩ sʋ̃maa kɛɛ “bɔhɔ́ zʋlɔ bɔwɩɛnɩ.” (Mt. 24:​42, NWT; Mt. 25:13; 26:41) Bɛmá yɛbɩbɛlɩ nkɔmɩ be mɔɔ Gyehova luwalɩ sʋ̃mavʋlɔ Pɔɔlʋ zʋ hyɛlɩ nɩ nu.

Pɔɔlʋ hɛlɛlɩ kɛɛ: “Na mmɩlɩ mɔ mmenii bɔkɔwɔ yɩ tʋ kɛɛ bɛkɩnhãã kɛɛ, ‘akʋ̃ yenyia azʋ̃nudwolɩyɛ, na dɩyɛ bela ɩdɔ bʋwɔ’ nɩ, ɔzɔ mmɩlɩ nɩ yɛ mmuzulo ɩkɛɣa bɔ zʋ aɣilemvile nu” a. (1 Tɛs. 5:​2, 3) Yɛ awuuku azʋlɔtʋ ta kilehile Pɔɔlʋ yɩ odwokɔ yi nu kɛɛ: Sɛ benyia bɛkã kɛɛ “akʋ̃ yenyia azʋ̃nudwolɩyɛ, na dɩyɛ bela ɩdɔ bʋwɔ” la pɛ a, amanlɩ amanlɩ yɩ kɔdʋ kɛhyɛ awohwi ɔzʋ̃mɩnlɛ zʋ, na eyi yɛ ɩkɔhɔ kɛva anwʋhyɩlɩyɛ kezile yi ɩkɛɣa a. Yezia sʋ̃ yɛhã kɛɛ sɛ bɛkã kɛɛ “akʋ̃ yenyia azʋ̃nudwolɩyɛ, na dɩyɛ bela ɩdɔ bʋwɔ” a, nɩ ikile kɛɛ anwʋhyɩlɩyɛ kezile yi ɩbawɔ yɩ tʋ la nɩ.

Naasʋ̃ mmɩlɩ mɔ yɛbɩbɛlɩ odwokɔ eyi nu yɛhɔlɩ aɣinzi dɔkʋ̃ nɩ, yɛnwʋnlɩ kɛɛ ntɩyasɩ fʋlɔ be wɔ odwokɔ eyi nu mɔɔ yɛlɔ́kʋla yekowu yɛ anyɩ yekogua zʋ. Ebiye a, sɛ bɛsɩkɛ awohwi ɔzʋ̃mɩnlɛ bowie a, yɛ bɛkɛhã kɛɛ “akʋ̃ yenyia azʋ̃nudwolɩyɛ, na dɩyɛ bela ɩdɔ bʋwɔ” a. Mɩnla ti mɔɔ ɩkɔhʋla ɩkɛɣa yɩ zɔ a? Ma yezunzu ndwokɔɣizialɛ eyimmɔ nwʋ.

Mɩnla ɔhʋanɩ zʋ yɛ awohwi ɔzʋ̃mɩnlɛ wʋwa ma kʋnɛ hɔlɩ zʋlɔ a? Bayɩbʋlʋ yɩ kilehile numɔ kɛɛ: ‘Yi nu [kile kɛɛ “adwomanlɩwɔlɛnii nɩ mɔɔ ile dima kezile,” anzɛnyɩɩ Babilɔnʋ Kezile yi] yɛ bɛzabɛ mɔɔ bohunli bɛ wɔ azɩlɛ yɩ zʋ nɩ, bo munwatĩĩ be mmegyia ɩwɔ a.’ (Yik. 17:​1, 5; 18:24) Wɔ abakɔsɛmɩ nu nɩ, awohwizʋ̃mɩnlɛ yɛ ɩhyɛ kʋnɛ nɩɩ basabasayɛlɛ mɔɔ ɩkɔlɩɩ zʋlɔ wɔ amanlɩ amanlɩ nu nɩ nwʋ ɛzɩzɩbɛ a, na bɛma bohũhũ mmenii sʋ̃maa. Meti awohwizʋ̃mɩnlɛ bɛáma azʋ̃nudwolɩyɛ nɩɩ banɩwɔlɛ kɔlɩ zʋlɔ na mfomi kʋnɛ nɩɩ basabasayɛlɛ yɛ bɛhyɛ nwʋmɔ ɛzɩzɩbɛ a. Eyi ma yebizia kɛɛ: Asʋ̃ amanlɩ amanlɩ yɩ kɛhã kɛɛ “akʋ̃ yenyia azʋ̃nudwolɩyɛ, na dɩyɛ bela ɩdɔ bʋwɔ” wɔ mmɩlɩ mɔ bɛzɩkɛ Babilɔnʋ Kezile yi mɛda nɩ a? Sa ɩkʋla ɩbayɩ zɔ, naasʋ̃ yɛlɔ́kʋla yekezi yi pi.

Sɛ bɛkã kɛɛ “akʋ̃ yenyia azʋ̃nudwolɩyɛ, na dɩyɛ bela ɩdɔ bʋwɔ” a, mɩnla yɛ ikezi wɔ yɩ mɛda a? Pɔɔlʋ hanlɩ kɛɛ: “Ɔzɔ mmɩlɩ nɩ yɛ mmuzulo ɩkɛɣa bɔ zʋ aɣilemvile nu” a. (1 Tɛs. 5:3) Sɛ bɛsɩkɛ awohwi ɔzʋ̃mɩnlɛ bowie ansaana amanlɩ amanlɩ nɩ bɛahã kɛɛ “akʋ̃ yenyia azʋ̃nudwolɩyɛ, na dɩyɛ bela ɩdɔ bʋwɔ” a, mɛyɩ nɩ eyi kile kɛɛ bɛ ɛzɩkɛlɛ kɛɣa aɣilemvile nu.

Mɩnla yɛ Gyehova yɩ azʋ̃mɩvʋlɔ kɛyɛ wɔ mɔɔ ibazi nɩ nwʋ a? Pɔɔlʋ hanlɩ kɛɛ: “Mmeliyema, mʋnlʋmmɔ mɛyɩ bɛ́da anwunzumi nu, na eɣile nɩ ɩádʋlɩ mʋnlʋmmɔ aɣilemvile nu kɛɛ awulo.” (1 Tɛs. 5:4) Sɛ bɛsɩkɛ awohwi ɔzʋ̃mɩnlɛ bowie ansaana bɛahã kɛɛ “akʋ̃ yenyia azʋ̃nudwolɩyɛ, na dɩyɛ bela ɩdɔ bʋwɔ” a, mɛyɩ nɩ ikile kɛɛ Gyehova yɩ azʋ̃mɩvʋlɔ kɔnwʋ kɛɛ ɩlɛ́kyɛ na amanlɩ amanlɩ yɩ bɛ ɛzɩkɛlɛ ɩaɣa nu. Naasʋ̃ amanlɩ amanlɩ yɩ mɛyɩ, bɛ ɛzɩkɛlɛ kɛɣa aɣilemvile nu kɛɛ awulo, kile kɛɛ ɩkɛɣa wɔ mmɩlɩ mɔ bɛ anyɩ ɩála.

Meti mɩnla yɛ yɛkɔhʋla yekehila yɩ ɔhʋanɩ kɛɛ ikezi a? Ɩlɛ́kyɛ “mmɛnɩ bunlu nɩ” nɩɩ ɛnlamɩ mɔɔ bɛva tumi kezile bɛma yɩ nɩ kɛzɩkɛ awohwi ɔzʋ̃mɩnlɛ. Eyi yɛ ɩkɔwɔ anwʋhyɩlɩyɛ kezile yi yɩ tʋ a. Akʋ̃ sʋ̃, yezi kɛɛ wɔ mmɩlɩ be nu nɩ, amanlɩ amanlɩ nɩ kɛhã kɛɛ “akʋ̃ yenyia azʋ̃nudwolɩyɛ, na dɩyɛ bela ɩdɔ bʋwɔ.” Mɩnla mmɩlɩ yɛ eyi kezi a? Yezunzu mmɩlɩ anwɩ̃ mɔɔ eyi kɔhʋla kezi nwʋ. Ɔkʋ̃ yɛ lɛ kɛɛ: Bɛkɛhã kɛɛ “akʋ̃ yenyia azʋ̃nudwolɩyɛ, na dɩyɛ bela ɩdɔ bʋwɔ” ansaana bɛazɩkɛ awohwi ɔzʋ̃mɩnlɛ. Mɔɔ ɩtɔ zʋlɔ anwɩ̃: Sɛ aɣanɩ azʋlɔtʋ mɔɔ ɩwɔ oyuwadɩ nɩ sɩkɛ awohwi ɔzʋ̃mɩnlɛ a, yɛ bɛkɛhã kɛɛ, “akʋ̃ yenyia azʋ̃nudwolɩyɛ, na dɩyɛ bela ɩdɔ bʋwɔ” a. Ɩsɛ kɛɛ yenyia abʋtalɩ yɛdɩkɛ na yekila mɔɔ ikezi. Mbɔmɩ sʋ̃maa nɩ, sɛ Bayɩbʋlʋ nkɔmɩhyɛ inyiaa numɔɣalɛ anzɛnyɩɩ ɩba nu a, yɛ yɛtɩ yɩ tʋ bʋwɔ paa a.—Fa tindiã Dwɔɔnʋ 12:16 nwʋ.

Naasʋ̃ sikalɛ yɩ mɛyɩ, Nyamɩnlɩ mɔɔ yekeli nɔhʋanlɛ yɛkɛma yɩ nɩ yɛ nwʋmɔ hyinyia a, na kɛ mmɩlɩ mɔ bɛkɛhã kɛɛ “akʋ̃ yenyia azʋ̃nudwolɩyɛ, na dɩyɛ bela ɩdɔ bʋwɔ” nɩ a. Ɩsɛ kɛɛ “yɛwɩɛnɩ, na akʋ̃ yɛyɛ ye nninyeni pɛpɛɛpɛ” ama yɛahʋla yeaziyeziye yɛ nwʋ yɛama mɔɔ ibazi yi, ɩávalɩ nwʋmɔ mmɩlɩ bela mɔ ikezi nɩ.—1 Tɛs. 5:6.