Sɛ Eyiyiaa Ndwokɔzɩzɩbɛ Wɔ Wu Onlumanlɛ Mɛda a, Mɩnla Yɛ Ɛkɛyɛ a?

1-2. Mɩnla yɛ ɩkɔwʋwa yɛ ma yɛkɔhɔ zʋ keɣike Gyehova mmɩlɩ mɔ yeyiyiaa ndwokɔzɩzɩbɛ nɩ a? Ma nwʋmɔ ndianwʋ.

YEZI kɛɛ mɔɔ ɩdɩ bela nɩ, yekeyiyia ndwokɔzɩzɩbɛ wɔ Setanɩ yi oyuwadɩ yɩ nu. Meti Gyisɛsɩ hã hileli yɩ adʋwavʋlɔ yɩ kɛɛ: ‘Mɔɔ ɩkɛyɛ bela nɩ ɔzɔ elilelɛ nɩ ɩbaɣa.’ (Mt. 18:7) Eyi kile kɛɛ, yɛkɔhʋla keyiyia ndwokɔzɩzɩbɛ mɔɔ ɩkɔhʋla kɛhã ye dedi azɩ. Kɛ ndianwʋ nɩ, sa yɛkʋla yɛ nɩɩ ye mmeliyema nyia odwokɔ. Naasʋ̃ sa yɛkʋla yesiyeziye yɛ nwʋ yɛma ndwokɔzɩzɩbɛ mɔɔ ɩdɩdɩ zɔ na ama yɛahɔ zʋ yɛaɣike Gyehova.

² Ma yehila ndianwʋ eyi. Bɛta bɛkakɛ Gyehova yi mmenii kɛɛ beziyeziyé bɔ nwʋ bɛma asianɩ azʋlɔtʋ dɩkɛɛ azɩlɛwʋsʋlɛ, ahumi, nzuloyilɛ, nɩɩ mɔɔ ɩdɩdɩ zɔ. Kɛ ɩkɛyɛ na yɛayɛ zɔ a? Ɩsɛ kɛɛ yedi bɔmʋnlɩ yɛnwʋ asianɩ mɔɔ ɩkɔhʋla kezi wɔ dɩka mɔɔ yɛda nɩ, titili mmɩlɩ mɔ yɛɣa yɛwʋwalɩ kɛnɩ a, ɩlɛ́kyɛlɩ nɩ. Mmɩlɩ mɔ ɛyɛ asianɩ azʋlɔtʋ mɔɔ ɩkɔhʋla kezi nɩ ndwɩ nɩ, ihyinyia kɛɛ esiyeziye wʋ nwʋ ma numɔ ɔkʋ̃ bela. (Ɛɣɛ. 21:5) Ɔzɔ la yɛ ɩdɩ baaba kɛɛ yɛkɔnwʋ ndwokɔzɩzɩbɛ mɔɔ yɛkɔhʋla yekeyiyia wɔ ye onlumanlɛ mɛda na yɛyɛ yɩ ndwɩ na ama sɛ yeyiyia numɔ be a, yɛanwʋ mɔɔ yɛkɛyɛ wɔ nwʋmɔ a. Yɛyɛ yɩ zɔ a, ɩlɛ́ma ndwokɔzɩzɩbɛ yɩ kɛhyɛ yɛ zʋ na ɩlɛ́sɩkɛ yɛ nɩɩ Gyehova avinli abusunwawɔlɛ yɩ sʋ̃. (Ndw. 17:5) Bɛmá yezunzu ndwokɔzɩzɩbɛ asã be mɔɔ yɛkɔhʋla yekeyiyia wɔ ye onlumanlɛ mɛda nɩ nwʋ nɩɩ kezimɔ yekeziyeziye yɛ nwʋ yɛkɛma numɔ ɔkʋ̃ bela.a

MMƖLƖ MƆ ELIYEMA BE ƖVƲMƖ WƲ NƖ

3. Wɔ yɛ onlumanlɛ mɛda nɩ, mɩnla ndwokɔzɩzɩbɛ yɛ yɛkɔhʋla keyiyia wɔ asafʋ yɩ nu a?

³ Ɛkakɛ mmɩlɩ mɔ ili bɔmʋnlɩ mɔ ɔhɔlɩ dɩyɛzumalɛ yɩ a? Kɛ ɛdɩlɩ nɣanlɩ zeli a? Ebiye a, ɔlɔlɛ mɔɔ ɩwɔ mmeliyema yɩ bo nu nɩ hanlɩ wʋ paa. Ɩmanlɩ ɔnwʋnlɩ kɛɛ nɔhʋanlɛ ɔzʋ̃mɩnlɛ yɛ dɩ, na ezili pɔkɔ kɛɛ wʋzawʋ sʋ̃ ɔkɔzʋ̃mɩ Gyehova. (Dwɔ. 13:35; Kol. 3:12) Ɔzɔ la yɛ Blancab sʋ̃ dɩlɩ nɣanlɩ a. Naasʋ̃ wɔ yi onlumanlɛ mɛda nɩ, debe mɔɔ nɩ iáhila yɩ ɔhʋanɩ zili. Ɩhanlɩ kɛɛ: “Nɩ mizi kɛɛ Gyehova Dasɩvʋlɔmaa mɛyɩ, bɔbɔ mmɔdɩnɩ kɛɛ bɔkɔwʋwa azʋ̃nudwolɩyɛ nɩɩ ɔlɔlɛ nu. Naasʋ̃ eliyema baalɛ be ɩ nɩɩ mɩ iádi yi bʋwɔ kʋlaa, na mɩɣa mʋnwʋnlɩ yɩ kɛɛ nɩ ɩkɩhã mmenii mvʋlɔ nwʋ ndwokɔ tanɩ sʋ̃. Eyi mɛyɩ, nɩ miáhila yɩ ɔhʋanɩ kʋlaa.” Ɩwɔ numɔ, ye mmeliyema bɔbɔɔ mmɔdɩnɩ kɛɛ bɛkɛla subanɩba ali dɩyɛ, naasʋ̃ bɛáli munli meti bɔkʋla bedi mfʋmɩ. (Ɛfɩ. 4:​23, 24; 1 Dwɔ. 1:8) Eyi ti ɩyɛ la a, sa bo nu be yɛ debe anzɛnyɩɩ ɩkã debe ma ɩyɛ ɛyɛkɛ wʋ. (Gye. 3:8) Alɔbɔ odwokɔ yɛ lɛ kɛɛ, eyi ma abiyemmɔ yiaki Gyehova yɩ ɔzʋ̃mɩnlɛ.

4. Mɩnla yɛ ɩkɔwʋwa yɛ ma yekeziyeziye yɛ nwʋ kɛɛ yɛkɛva ye mmeliyema bɛ tanɩ kɛhyɛ bɛ a? (Ɛfɩsɛsɩmaa 4:32)

⁴ Mɩnla yɛ ɛkɛyɛ kakɩ yɩ na sɛ eliyema be fʋmɩ wʋ a, wʋahɔ zʋ wʋazʋ̃mɩ Gyehova a? Bɔ mmɔdɩnɩ kɛɛ ɛkɛva fʋlɔdulɛ mɔɔ ɩwɔ Ɛfɩsɛsɩmaa 4:32 (Kɩnga) nɩ ɛkɛyɛ egyima. Sɛ ɛyɛ mɔɔ ɔkɔhʋla bela ɛda baabayɛlɛ nɩɩ kunlumiyɩbalɛ ali a, ɩlɛ́ma akasakasa kɛɣa ɛ nɩɩ mmenii mvʋlɔ avinli. Fa yɛ wʋ bʋtayɩ kakɩ yɩ kɛɛ, sɛ abiye yɛ debe tiyia wʋ a, ɛkɛva kɛhyɛ yɩ. Mɩnla yɛ ɩkɔwʋwa wʋ ma ɛkɛyɛ zɔ a? Dwɩnɩ mbɔmɩ sʋ̃maa mɔɔ esiã Gyehova kɛɛ ɩvá wʋ tanɩ ɩhyɛ wʋ na ɩzʋ̃ yɩ pɛ nu ɩfa ɩkyɛ wʋ nɩ nwʋ. (Mt. 6:12) Sɛ ɔdwɩnɩ mbɔmɩ dʋdʋ mɔɔ Gyehova va wʋ tanɩ ɩhyɛ wʋ nɩ nwʋ a, ɩkɛhã wʋ ma ɛkɛva mmenii mvʋlɔ sʋ̃ bɛ dɩyɛ kɛhyɛ bɛ.

5. Mɩnla Bayɩbʋlʋ nu odwokɔ yɛ ɩkɔwʋwa yɛ mmɩlɩ mɔ abiye vʋmɩ yɛ nɩ a? (Ɛɣɛlɛwulɛ 19:11) (Kila mfonyini yi sʋ̃.)

⁵ Kɩnga Ɛɣɛlɛwulɛ 19:11. Bayɩbʋlʋ yɩ kã kɛɛ, sɛ yɛwɔ dɩyɛnunwʋnlɛc na sɛ abiye fʋmɩ yɛ a, yɛlɛ́fa ɛya ndɛndɛ. Bayɩbʋlʋ nu odwokɔ eyi wʋwa Rima mɔɔ inlumanlɩ a ɩlɛ́kyɛlɩ nɩ paa. Ɩhanlɩ kɛɛ: “Sɛ eliyema be fʋmɩ mɩ a, midi bɔmʋnlɩ mɩkakɛ odwokɔ mɔɔ ɩwɔ Ɛɣɛlɛwulɛ 19:11 nɩ, na mʋbɔ mmɔdɩnɩ kɛɛ mʋkɔdwɩnɩndwɩnɩ bʋwabɩlɛ mɔɔ boluwa numɔ kyɩ̃ nɩɩ sianti mɔɔ ebiye a bɛyɛlɩ bɛ dɩyɛ zɔ nɩ nwʋ. Mʋbɔ mmɔdɩnɩ sʋ̃ kɛɛ mɩ nɩɩ bɛ kɔhɔ dasɩlɛlilɛ. Mɩyɛ zɔ a, ɩbʋwa mɩ ma mʋnwʋ bɛ bʋwɔ.” Ɩdɩ baaba paa kɛɛ yɛkɔnwʋ ye mmeliyema bʋwɔ kakɩ yɩ, iluwakɛɛ ɩkɛma yɛkɛdɩ bɔ tʋ mmɩlɩ mɔ bɔvʋmɩ yɛ nɩ.

6. Mɩnla yɛ ɩkɔwʋwa wʋ ma ɛ nɩɩ wu mmeliyema avinli kɛyɛ baaba a?

⁶ Mɩnla yɛ ɩkɔhʋla kɔwʋwa wʋ ma ɛ nɩɩ wʋ mmeliyema kenyia abusunwawɔlɛ baaba a? Sɛ ɛba ɔnwʋ wu mmeliyema bʋwɔ a, bɔ mmɔdɩnɩ kɛɛ ɛkɛva wʋ adwɩnɩ keziye bo subanɩba zʋ (Fa tindiã Ɛɣɛlɛwulɛ 10:12; Wul. 12:10; Fɩl. 2:​2, 3 nwʋ.) Kila kezimɔ eyi wʋwalɩ Mark mɔɔ inlumanlɩ a ɩlɛ́kyɛlɩ nɩ. Mbɔmɩ sʋ̃maa mɔɔ ɩ nɩɩ mmeliyema mɔɔ bɔwɔ yɩ asafʋ yɩ nu bɔɔ nɩ, nɩ ɩnwʋʋ bɔ mfʋmɩ azʋlɔtʋ nɩ sʋ̃. Naasʋ̃ ɩáfa yɩ adwɩnɩ siye bɔ mfʋmɩ yɩ zʋ. Mɩnla yɛ ɩwʋwalɩ yɩ a? Ɩhanlɩ kɛɛ: “Sɛ mɩfa tanɩ nɣezile mɔɔ mmenii mɔɔ bɔwɔ oyuwadɩ yɩ nu di nɩ mitindiã mfʋmɩ mɔɔ mi mmeliyema di nɩ nwʋ a, mʋnwʋ kɛɛ mi mmeliyema bɔ mfʋmɩ azʋlɔtʋ yɩ nɩ, ɩ́dɩ debela. Meti mʋnwʋnlɩ yɩ kɛɛ, íni kɛɛ mɩsɩkɛ mmɩlɩ mʋdwɩnɩndwɩnɩ mi mmeliyema bɔ mfʋmɩ ngyɩkɩ̃ɩ̃ ngyɩkɩ̃ɩ̃ yɩ nwʋ kʋlaa. Na mɩbɩbɛlɩ subanɩba mɔɔ bɛlɛ yɩ nɩ na mɩvalɩ mɩ adwɩnɩ miziyeli mɛyɩ zʋ mfomi.” Sɛ wʋzawʋ sʋ̃ ɛyɛ zɔ a, ɩkɛma ɛ nɩɩ wu mmeliyema bɛ avinli kɛyɛ baaba paa.

MMƖLƖ MƆ WƲ ƐƔƐƐLƐ LƆ NNINYENI MƆƆ EDIÃ YƖ WƆ MƐDALƐ NƖ

7. Mɩnla yɛ ɩkɛma yɛ adwɩnɩ kezia kɔhɔ nninyeni mɔɔ yeyiaki yɩ mɛdalilɛ nɩ zʋ a?

⁷ Mmɩlɩ mɔ ɔnwʋnlɩ nɔhʋanlɛ yɩ fʋlɔ nɩ, nɩ ɩyɛ wʋ fɛ paa meti nɩ ɩáyɛ sɩ ɩma wʋ kɛɛ ekeyiaki Setanɩ oyuwadɩ eyi yɩ mɛdalilɛ. Ebiye a, nɩ ɛkã po kɛɛ, ‘Aninyia yɛ ɩkɛbɛ yɩ kɛɛ ikezia kɔhɔ oyuwadɩ ngyɛpɛlɛ yɩ nu dɔkʋ̃ a?’ Naasʋ̃, sɛ nninyeni nu yɛ sɩ ma wʋ a, ɔkɔnwʋ yɩ nɩ, nɩ wʋ adwɩnɩ zia hɔ nninyeni mɔɔ nɩ ɛyɛ wɔ oyuwadɩ yɩ nu ansaana ɛbazʋ̃mɩ Gyehova nɩ zʋ dɔkʋ̃. (Fá tindiã Nɔmɛsɩ 11:​4-6 nwʋ.) Kɛ ndianwʋ nɩ, mmeliyema be wɔ kɛnɩ a, beyiaki egyima mɔɔ ɩma bedi bʋwɔ naasʋ̃ nɩ ide bɛ mmɩlɩ sʋ̃maa nɩ. Nɩ abiyemmɔ sʋ̃ wɔ ɔhɔnwʋmmɔ sʋ̃maa mɔɔ bɛ nɩɩ bɛ bɔ paa, naasʋ̃ bɔwɔlɩ yɩ tʋ kɛɛ bosumaa Bayɩbʋlʋ yɩ nɩ, bɔhwɩ̃ bɔ nwʋ wɔ bɔ ɔhɔnwʋmmɔ yɩ nwʋ. Abiyemmɔ sʋ̃ wɔ mmɔdɩnɩ yiaki nyɛlɩyɛ evinli mɔɔ ɩma bɛ anyɩ de naasʋ̃ Gyehova kyi nɩ. Sɛ yeyiaki Gyehova yɩ ɔzʋ̃mɩnlɛ na yɛkɔ yɛyɛ nninyeni mɔɔ yeyiaki yɩ mɛdalilɛ nɩ a, kila kezimɔ Gyehova yɩ ɛɣɛɛlɛ kɔwɔ! Sɛ eyiyiaa ndwokɔzɩzɩbɛ a, mɩnla yɛ ɛkɛyɛ na ama wʋásia kɔ nninyeni mɔɔ eyiaki wɔ oyuwadɩ yɩ nu nɩ nwʋ a?

8. Mɩnla yɛ yesuma wɔ Abilehamɩ nɩɩ Sɛla be ndianwʋ yɩ nu a?

⁸ Bayɩbʋlʋ yɩ kã mmenyia nɩɩ mmaalɛ nɔhʋanlɛmaa be mɔɔ ankɩ sa bɔkʋla bɔdwɩnɩndwɩnɩ nninyeni mɔɔ bediã wɔ bɛ mɛda nɩ nwʋ odwokɔ. Kɛ ndianwʋ nɩ, Abilehamɩ nɩɩ Sɛla diyeli Gyehova na boduli wɔ bo twonwa pɩkɛ pɩkɛ Ɔlɩ nu. Nɩ bɔdʋ banɩ wɔ twonwa yɩ nwʋ beyiyia mɔɔ ɩbɔ nwʋmɔ banɩ, naasʋ̃ boduli wɔ kɛnɩ bɔhɔ bɔwʋwalɩ ndamɛ aliyia nu. (Hib. 11:​8, 9) Nɩ bɔwɔ nninyeni baaba mɔɔ nɩ ɩma bɔ nwʋ tɔ bɛ wɔ Ɔlɩ. Meti sɛ bɔhɔlɩ zʋlɔ bɛhakɛlɩ anzɛnyɩɩ bɔdwɩnɩndwɩnɩnlɩ nninyeni mɔɔ bediã yɩ wɔ bɛ mɛda nɩ nwʋ a, ankɩ sa bɔkʋla besialɩ bɛ mɛda bɔkɔ Ɔlɩ. Naasʋ̃ bɛáyɛ zɔ, mfomi bɛvalɩ bɛ adwɩnɩ beziyeli nninyeniba mɔɔ Gyehova va wɔ anʋhʋba bɛ nɩ zʋ.—Hib. 11:​15, 16.

9. Mɩnla ɔhʋanɩ zʋ yɛ sʋ̃mavʋlɔ Pɔɔlʋ nwʋnlɩ nninyeni mɔɔ dianlɩ wɔ mɛdalɛ nɩ a? (Fɩlɩpɩmaa 3:​7, 8, 13)

⁹ Sʋ̃mavʋlɔ Pɔɔlʋ yɛlɩ nzɩnzanlɩyɛ wɔ yɩ ɛbɩlawɔlɛ nu na ama ɩazʋ̃mɩ Gyehova wɔ ɔhʋanɩba zʋ. Kɛ ndianwʋ nɩ, ansaana ɩbayɛ Kilisinyianii nɩ, izumanlɩ Dwuumaa bɛ mmɛla yɩ wɔ kilehilevʋlɔ Gamaliyeli mɔɔ nɩ Dwuumaa bu yi paa nɩ kɛnɩ. (Egy. 22:3) Nɩ ankɩ Pɔɔlʋ kɔhʋla kɛɣa kɛyɛ enii titili wɔ Dwuumaa bɛ Nyamɩnlɩzʋ̃mɩnlɛ mbanimbani yi bo nu. (Gal. 1:​13, 14) Naasʋ̃ mmɩlɩ mɔ ɩɣa ɩyɛlɩ Kilisinyianii nɩ, iduli yi munwala igualɩ dɩka be. Mmɩlɩ mɔ Pɔɔlʋ ɣa yɛlɩ Kilisinyianii nɩ, asʋ̃ ɩvalɩ yɩ nwʋ ilili a? Anhã. Behyili yi, bedianlɩ yɩ fiyiadɩ, na yɩzayɩ yi mmenii danɩnlɩ yɩ. (2 Kɔl. 11:​23-26) Sɛ ɩvalɩ yɩ adwɩnɩ iziyeli odwohilalɛ mɔɔ nɩ iyiyiaa yɩ zʋ na ɩva idindianlɩ bʋwabɩlɛ mɔɔ nɩ ɩwɔ numɔ daada nɩ nwʋ a, ankɩ yi padi kogolɔ kɛɛ ɩɣa ɩyɛlɩ Gyisɛsɩ yɩ tʋwavʋlɔ. Naasʋ̃, ɩvalɩ yɩ adwɩnɩ iziyeli ɔnwʋmɔ ɔhʋanɩ kezile mɔɔ nɩ inyia kɛɛ Gyisɛsɩ yɩ tʋwavʋlɔ nɩɩ akatuwa kezile mɔɔ nɩ ikenyia wɔ eɣile be nɩ zʋ. Nɩ Pɔɔlʋ zi paa kɛɛ mfasʋ wɔ zʋlɔ kɛɛ izili pɔkɔ ɩɣa ɩyɛlɩ Kilisinyianii!—Kɩnga Fɩlɩpɩmaa 3:​7, 8, 13.

10. Mɩnla nninyeni yɛ ɩsɛ kɛɛ yɛta yɛdwɩnɩndwɩnɩ nwʋmɔ a? (Maakɩ 10:​29, 30) (Kila mfonyini yi sʋ̃.)

¹⁰ Mɩnla yɛ yesuma wɔ numɔ a? Sɛ ɔbɔ yɩ tʋ kɛɛ ɔdwɩnɩndwɩnɩɩ nninyeni mɔɔ edianlɩ yɩ wɔ oyuwadɩ yi nu anzɛnyɩɩ eyiakili yɩ yɛlɛ ansaana ɛbaa nɔhʋanlɛ yi nu nɩ nwʋ a, bɔ mmɔdɩnɩ kɛɛ ɔkɔnwʋ sianti mɔɔ edianlɩ yɩ kɛ anzɛnyɩɩ eyiakili yɩ yɛlɛ nɩ. (Odw. 7:10) Dwɩnɩndwɩnɩ nyilalɛ sʋ̃maa mɔɔ wʋ sa hã yɩ kakɩ nɩ nwʋ na ɔkɔnwʋ yɩ kɛɛ ɩtʋ bʋlɔ kʋlaa ɩtɛla mɔɔ ediã yɩ wɔ mɛdalɛ nɩ. Kɛ ndianwʋ nɩ, ɛ nɩɩ Gyehova Nyamɩnlɩ nyia ɔhɔnwʋvalɛ mɔɔ numɔ yɛ sɩ. (Ɛɣɛ. 3:32) Akʋ̃ sʋ̃, enyia sunzuma ɔfʋã nu abusunwa kezile mɔɔ bɔdɔ wʋ paa. (Kɩnga Maakɩ 10:​29, 30.) Biyekʋ̃ sʋ̃, kila eɣile be kɩnlɩma mɔɔ Gyehova va wɔ wʋ anʋhʋba! (Ayɩ. 65:​21-23) Sɛ ɛta dwɩnɩndwɩnɩ nyilalɛ mɔɔ enyia wɔ Gyehova yɩ ɔzʋ̃mɩnlɛ nu nɩ nwʋ a, ɩlɛ́ma ɛkɛdɩ nɣanlɩ kɛɛ debe vi wʋ sa.

11. Mɩnla yɛ osuma wɔ Rosemary yɩ ozumanlɛnwʋnlɛ yi nu a?

¹¹ Eliyema baalɛ Rosemary nlumanlɩ nɩ, nɩ ili kɛyɛ ɔlʋbɔ 50. Bɛmá yehila mɔɔ ɩyɛlɩ mɔɔ ɩáma yɩ adwɩnɩ isia ɩkɔ mɔɔ idianlɩ wɔ mɛdalɛ nɩ zʋ. Ɩkã kɛɛ: “Nɩ itwu Bulonyia mmɩlɩ a, nɩ mɩ ɛɣɛɛlɛ bɔ paa iluwakɛɛ nɩ ɩdɩ mmɩlɩ mɔ mɩ nɩɩ mɩ abusunwamaa bo numɔ de yɛ anyɩ. Nɩ mɩ anyɩ de kɛɛ mɩkɛhyɛ mɩ alɔvʋlɔ nninyeni. Sɛ mʋnwʋ kɛɛ mʋ nnwuakula nɩɩ mɩ nlammɔ yiyia numɔ wɔ owudo mɔɔ bɛfa bedi Bulonyia nɩ nwʋ na bobukoo bɛ akyɛdɩ zʋ a, nɩ mɩ anyɩ le zɔ la.” Mɩnla yɛ ɩwʋwalɩ yɩ a? Rosemary kã kɛɛ: “Minyianlɩ debe fʋlɔ mɔɔ mɩkɛva mikeziye Bulonyia yɩ agyia nu. Nɩ mɩ nɩɩ mɩ abusunwa yiyia numɔ ɔlʋbɔ bela wɔ mmɩlɩ fʋlɔ nu, na mɩkã kezimɔ mɩ anyɩ sɔ bo nu bela nɩ nwʋ odwokɔ mikile bɛ.” Rosemary zialɩ yiyialɩ odwokɔzɩzɩbɛ fʋlɔ. Ɩkã kɛɛ: “Mmɩlɩ mɔ mɩɣa muzumanlɩ nɔhʋanlɛ yɩ nɩ, mʋ ɔhɔnwʋmmɔ alalampɔ yɩ munwala dianlɩ mɩ kɛnɩ. Itwu mmɩlɩ be a, nɩ mɩ ɛɣɛɛlɛ lɔ bɛ na nɩ eyi ma mɩtɩ nɣanlɩ kɛɛ mɩyɛ ankʋnamɩ.”d Mɩnla yɛ ɩwʋwalɩ yɩ a? Ɩ nɩɩ mmeliyema mmaalɛ mvʋlɔ yɛlɩ nhyɩhyɛlɩyɛ wɔlɩ numɔ hɔlɩ dasɩlɛlilɛ. Ɩkã kɛɛ: “Ɔzɔ mɔɔ mɩyɛlɩ nɩ ma minyia ɔhɔnwʋmmɔ mvʋlɔ mɔɔ mʋdɔ bɛ na bɔtʋ bʋlɔ bɛma mɩ.” Mɩnla yɛ ɔkɔhʋla kozuma wɔ yɩ kɛnɩ a? Sa wʋ adwɩnɩ kʋla sia kɔ debe mɔɔ nɩ ɩma wʋ anyɩ de ansaana ɛbazuma nɔhʋanlɛ yɩ nɩ zʋ, naasʋ̃ sa ɔkʋla nyia debe fʋlɔ ɛfa siye yɩ agyia nu mɔɔ ɩkɛma wʋ anyɩ kele. (Fɩl. 4:​8, 9) Na kakɛ kɛɛ, mɔɔ Gyehova ɩlɛ ɩmaa wʋ nɩ tɛla dɩyɛ bela mɔɔ ediã yɩ wɔ mɛdalɛ nɩ.

MMƖLƖ MƆ ABIYE YIAKI GYEHOVA YƖ ƆZƲ̃MƖNLƐ NƖ

12. Mɩnla yɛ ɩkɔhʋla ikezi wɔ asafʋ yi nu mɔɔ ɩkɔhʋla ɩkɛma ekeli ɛyɛkɛ paa a?

¹² Mmɩlɩ mɔ ɛɣa yɛlɩ Dasɩvʋlɔ nɩ, wʋ anyɩ leli kɛɛ ɔhwɩnlɩ wʋ nwʋ wɔ oyuwadɩ tanɩ eyi nwʋ na ɛvalɩ wʋ nwʋ ɣa wɔlɩ mmenii mɔɔ bekilehile nɔhʋanlɛ yɩ na bɛyɛ mɔɔ ɩtɩnɣɛ. (Ayɩ. 65:14) Naasʋ̃ itwu mmɩlɩ be a, ɛkɛdɩ kɛɛ abiye yɛ tanɩ be wɔ asafʋ yɩ nu. Ɩyɛ po a, bɛyɩ enii kʋ̃ nɩ wɔ asafʋ yɩ nu. (1 Kɔl. 5:13) Kila kezimɔ bʋwabɩlɛ be mɔɔ ɩdɩ zɔ nɩ lileli eliyema baalɛ be mɔɔ bɔfʋlɔ yɩ Samar. Ɩkã kɛɛ: “Munlumanlɩ nɩ, ɩákyɛ yɛ asafʋ nu ebani be yɛlɩ tanɩ be mɔɔ numɔ yɛ nlʋmɔ ma bɛyɩlɩ yɩ wɔ asafʋ yi nu a. Ankɩ eyi ɩyɛɛ ɩkɔdʋndʋnlɩ mɩ agyia nu, iluwakɛɛ na nɩ miále midi kɛɛ asafʋ nu ebani kɔhʋla kɛyɛ tanɩ kediyia Gyehova nɩɩ asafʋ yɩ.” Ɩwɔ numɔ, ɩsɛ kɛɛ yenyia ye mmeliyema nu anwʋlazʋ kɛɛ bɔdɔ Gyehova na bɛpɛ kɛɛ bedi nɔhʋanlɛ bɛma yɩ. (1 Kɔl. 13:​4, 7) Naasʋ̃, alɔbɔ odwokɔ yɛ lɛ kɛɛ, ɔlʋbɔ bela bɛyɩ mbiyemmɔ wɔ asafʋ yi nu. Sɛ enii kʋ̃ nɩ dɩ wʋ ɔhɔnwʋ, wu busunwanii anzɛnyɩɩ abiye mɔɔ ekilaa yɩ kozumazuma yɩ a, sa ɩkʋla ɩma edi ɛyɛkɛ paa.

13. Mɩnla yɛ yɛkɔhʋla kɛyɛ wɔ nnɛ na sɛ abiye mɔɔ ibike yɛ nɩ yiaki Gyehova yɩ ɔzʋ̃mɩnlɛ a, ɩádʋndʋnlɩ yɛ agyia nu a?

¹³ Mɩnla yɛ ɔkɔhʋla kɛyɛ wɔ nnɛ na sɛ abiye mɔɔ ibike wʋ nɩ yiaki Gyehova yɩ ɔzʋ̃mɩnlɛ a, ɩádʋndʋnlɩ wʋ agyia nu a? Kɔ zʋlɔ hyɛ ɛ nɩɩ Gyehova bɛ abusunwawɔlɛ yi nu ɛzɩzɩbɛ. (Gye. 4:8) Kakɛ kɛɛ ɛ nɩɩ Gyehova bɛ avinli abusunwawɔlɛ nɩ gyĩ wʋzawʋ wʋ mmɔdɩnɩwɔlɛ zʋ na kɛ abiye dɩyɛ zʋ a. Kɛ ndianwʋ nɩ, yɛta yɛ nɩɩ yɛ abusunwa nɩɩ asafʋ yɩ bɔ numɔ sʋ̃mɩ, naasʋ̃ ɩsɛ kɛɛ ye nu kʋ̃ bela yɩzayɩ ɩyɛ nhyɩhyɛlɩyɛ mɔɔ ɩkɛva ɩkɔwɔ mpayɩ na ɩaɣɩnga Bayɩbʋlʋ yɩ eɣile bela.—Ndw. 1:2; 62:8.

14. Mɩnla yɛ yesuma wɔ sʋ̃mavʋlɔ Pita yi ndianwʋ yɩ nu a? (Dwɔɔnʋ 6:​66-68)

¹⁴ Pita yi ndianwʋ yɩ kɔhʋla kɔwʋwa yɛ paa. Mmɩlɩ be Gyisɛsɩ hanlɩ odwokɔ be na yɩ adʋwavʋlɔ yɩ bɛátɩ yɩ tʋ meti bo nu sʋ̃maa yiakili yɩ mɛdalilɛ. Ɩkɔhʋla ɩkɛɣa yɩ kɛɛ Pita sʋ̃ ɩátɩ yɩ tʋ naasʋ̃ ɩhɔlɩ zʋlɔ ilili Gyisɛsɩ yɩ mɛda. (Kɩnga Dwɔɔnʋ 6:​66-68.) Kɛ ankɩ Pita kɛva yɩ adwɩnɩ keziye mɔɔ mmenii mvʋlɔ bɛyɛɛ zʋ nɩ, ɩvalɩ yɩ adwɩnɩ iziyeli nɔhʋanlɛ ndwokɔ mɔɔ ɩdɩlɩ wɔ Gyisɛsɩ yɩ kɛnɩ nɩ zʋ mfomi. Ɔzɔ ti, mɔɔ bɛyɛlɩ nɩ ɩátʋndʋnlɩ Pita yɩ agyia nu mfomi ɩhɔlɩ zʋlɔ ilili Gyisɛsɩ yɩ mɛda. Ɩwɔ numɔ kɛɛ nnɛ mbiyemmɔ keyiaki Gyehova yɩ ɔzʋ̃mɩnlɛ dɩyɛ, naasʋ̃ kakɛ kɛɛ ahyɩhyɛdɩ eyi yɛ ihilehileli wʋ nɔhʋanlɛ mɔɔ ɩfalɩ Gyehova nwʋ nɩ a. Meti, kɔ zʋlɔ fʋãmɩ nɔhʋanlɛ yɩ nwʋ na di nɔhʋanlɛ ma Gyehova! Samar mɔɔ yɛhã yɩ nwʋ odwokɔ daada nɩ hanlɩ kɛɛ, “Mɩkakɛ mʋ nwʋ eɣile bela kɛɛ, sɛ abiye yɛ tanɩ be a, mɛyɩ iáhile kɛɛ asafʋ yi nu maa munwala dɩ zɔ anzɛnyɩɩ mɔɔ Gyehova yɩ ahyɩhyɛdɩ nɩ kilehile yɛ nɩ dɩ awohwi.”

15. Mɩnla yɛ osuma wɔ Emily yi ndianwʋ yɩ nu a?

¹⁵ Kila mɔɔ ɩdʋlɩ Emily. Inlumanlɩ nɩ, yɩ dapɛnɩ ɔkʋ̃ pɛpɛɛpɛ bɛyɩlɩ yɩ maamɩ wɔ asafʋ yi nu, na yɩ maamɩ dianlɩ bɛ kɛ. Emily kã kɛɛ: “Miásunzu nwʋmɔ kyɩ̃ kɛɛ eyi kezi. Eyi dɩ ɔhawʋ kezile mɔɔ miyiyia, na mɩ ɛɣɛɛlɛ lɔ mɩ maamɩ paa.” Mɩnla yɛ ɩwʋwalɩ Emily ma ɩhʋlalɩ igyinanlɩ ɔzɔ bʋwabɩlɛ yɩ munwa a? Ɩkã kɛɛ: “Ɩlɛ́kalɩ mɩzamɩ nkʋ̃ iluwakɛɛ mɩ papa dɔ mɩ paa na ɩma yɩ anyɩ kɔ mʋ nwʋ. Akʋ̃ sʋ̃, mʋwɔ mmeliyema mmenyia nɩɩ mmaalɛ sʋ̃maa wɔ asafʋ yi nu mɔɔ bɛdɩ kɛɛ mɩ abusunwa. Gyehova yɩ sʋ̃mɩvʋlɔ bela wɔ yɩ ɔhawʋ mɔɔ iyiyiaa. Eyi ti mɔɔ ɩsɛ kɛɛ yɛdʋdɔ yɛ nwʋ na yɛhyɩhyɛ yɛ nwʋ ɛzɩzɩbɛ nɩ a.” (1 Pit. 5:9) Íni kɛɛ yɛdɩkɛ ma ɔhawʋ be twodwu ansaana yɛaɣike ye mmeliyema. Bɔ mmɔdɩnɩ bike wʋ mmeliyema na nwʋ bɛ bʋwɔ wɔ nnɛ. Sɛ ɛyɛ zɔ na sɛ ɔhawʋ be twodwu a, ɩlɛ́ma ɛkɛdɩ nɣanlɩ kɛɛ ɩha wʋzawʋ nkʋ̃ iluwakɛɛ wʋ mmeliyema kɛyɩkyɩ wʋ ɛɣɛɛlɛ.

16. Mɩnla yɛ ɩsɛ kɛɛ yɛkakɛ a? (Kila mfonyini yi sʋ̃.)

¹⁶ Kakɛ sʋ̃ kɛɛ, bɛzabɛ mɔɔ Gyehova dɔ bɛ nɩ yɛ ɩtɩnɣɛ bɛ a. (Hib. 12:6) Bɛzabɛ mɔɔ bɛyɩ bɛ wɔ asafʋ yɩ nu nɩ, Gyehova pɛ kɛɛ bo munwala besia bɛba. (2 Pit. 3:9) Meti sɛ bɛyɩ abiye mɔɔ ibike wʋ paa wɔ asafʋ yɩ nu a, nyia anwʋlazʋ kɛɛ asafʋ nu mbanimbani yi kɛyɛ mɔɔ bɔkɔhʋla bela bɔkɔwʋwa enii kʋ̃ nɩ ma ikezia ɩkɛɣa Gyehova pɛ.—2 Tim. 2:​24, 25.

17. Mɩnla anwʋlazʋ yɛ yɛkɔhʋla kenyia a?

¹⁷ Ndwokɔzɩzɩbɛ mɔɔ ɔkɔhʋla keyiyia wɔ wʋ onlumanlɛ mɛda nɩ, numɔ ɛgyɩkɩ̃ɩ̃ bela yɛ yezunzu nwʋmɔ a. Naasʋ̃ sa ɔkʋla kɔ zʋlɔ di Gyehova nɔhʋanlɛ ɩávalɩ nwʋmɔ ndwokɔzɩzɩbɛ azʋlɔtʋ eyimmɔ nɩ. Nninyeni sʋ̃maa wɔ kɛnɩ mɔɔ ɔkɔhʋla kɛyɛ kɛva keziyeziye wʋ nwʋ. Máma wʋ ɛɣɛɛlɛ fi sʋ̃ kɛɛ Gyehova wɔ kɛnɩ kɛɛ ɩkɔwʋwa wʋ ma ekeli nɔhʋanlɛ kɛma yɩ. Gyehova ili bɔmʋnlɩ ɩwʋwa wʋ, na ɩkɔhɔ zʋlɔ la ɩkɔwʋwa wʋ eɣile bela! (1 Pit. 5:10) Gyehova kɔhɔ zʋlɔ kɛma wʋ anwʋzɩzɩbɛ na ɩawʋwa wʋ ma wʋagyina pindinyii wɔ odwohilalɛ nu. Sɛ ɔkɔ zʋlɔ ɛma Gyehova bʋwa wʋ a, ndwokɔzɩzɩbɛ bela íni kɛnɩ mɔɔ ɩkɔhwɩ̃ wʋ wɔ Gyehova nwʋ kyɩ̃!—Ndw. 119:165; Wul. 8:​38, 39.