Asʋ̃ Ɛkakɛ a?
Asʋ̃ ele mmɩlɩ zunzu dɩyɛzumanlɛ ndwokɔ azʋlɔtʋ mɔɔ ɩwɔ ɔlʋbɔ eyi Ɔwɩɛnɩlɛ Aɣanɩ yɩ nu nɩ nwʋ a? Mɛyɩ, nɩ kila kɛɛ ɔkɔhʋla kɛyɩ ndwokɔɣizialɛ eyimmɔ munwa a:
Mɩnla yɛ ɩkã yɛ ma yɛhyɛ Gyehova animinyiamɩ a?
Yɛyɛ zɔ iluwakɛɛ yebu yi baaba na yɛdɔ yɩ paa. Akʋ̃ sʋ̃, yɛhyɛ Gyehova animinyiamɩ iluwakɛɛ yɛpɛ kɛɛ mmenii mvʋlɔ nwʋ yɩ.—w25.01, owu. 3.
Sɛ abiye yɛ debe tiyia yɛ a, kɛ ɩkɛyɛ na yɛava yɛahyɛ yɩ a?
Yɛáwu yɛ anyɩ yekua yɛ nɣanlɩdɩlɛ zʋ kɛkɛ; naasʋ̃, sɛ yɛyɩ mmenii nwʋ ɛya wɔ ye nu a, ɩáma ɛyɛkɛlilɛ hyɛ yɛ zʋ.—w25.02, owu. 15-16.
Mɩnla ti mɔɔ sʋ̃mavʋlɔ Maakɩ dɩ ndianwʋba ma mmeliyema mmɩlantɩyɛ a?
Maakɩ zʋ̃ yɩ pɛ nu leli dianlɩ numɔ kɛɛ ɩkɔzʋ̃mɩ mmenii mvʋlɔ. Ɩwɔ numɔ kɛɛ bʋwabɩlɛ be manlɩ Maakɩ lili ɛyɛkɛ dɩyɛ, naasʋ̃ mɛyɩ ɩáma iyiaki kɛɛ ɩkɔzʋ̃mɩ yi mmeliyema. Ɩ nɩɩ Pɔɔlʋ nɩɩ bɛzabɛ mɔɔ bɔ nwʋ wʋkwa valɩ ɔhɔnwʋ.—w25.04, owu. 27.
Mmɩlɩ mɔ Gyisɛsɩ wɔlɩ mpayɩ kɛɛ: “Mɩma bɔnwʋ wu dima” nɩ, nɩ ɩpɛɛ kehile mɩnla? (Dwɔɔnʋ 17:26, NWT)
Nɩ yɩ adʋwavʋlɔ yɩ zi Nyamɩnlɩ yi dima daada. Naasʋ̃ Gyisɛsɩ manlɩ bɔnwʋnlɩ Nyamɩnlɩ kʋ̃ mɔɔ Gyehova dɩ. Gyisɛsɩ wʋwalɩ yɩ adʋwavʋlɔ yɩ ma bɔnwʋnlɩ Gyehova bʋwɔ, dɩkɛɛ yi tile nu pɔkɔ, yi egyima, nɩɩ yi subanɩ azʋlɔtʋ.—w25.05, owu. 20-21.
Sɛ yɛkã yɛ nwʋ azɩ a, mɩnla yɛ yekele kediã numɔ a?
Yede yetiã numɔ kɛɛ, kɛ dɩyɛ bela yɛ yezi a. Kɛ ndianwʋ nɩ, yézi mmɩlɩ mɔ awielɩyɛ nɩ kɛɣa, anzɛnyɩɩ ɔhʋanɩ mɔɔ Gyehova koluwa zʋlɔ kɔwʋwa yɛ. Yézi mɔɔ ikezi wɔ ɛhyɩ̃, na kezimɔ Gyehova zi yɛ bʋwɔ nɩ, yɛlɔ́kʋla kɛdɩ yɩ tʋ kʋlakʋla.—w25.06, owu. 15-18.
Mɩnla yɛ ɩkɔhʋla kɔwʋwa yɛ ma yekenyia odwokɔ be mɔɔ ɩwɔ asafʋ buuku be nu anzɛnyɩɩ bagua nu ndɛnɩ be zʋ mfasʋ a?
Sa yɛkʋla yebizia yɛ nwʋ kɛɛ: ‘Mɩnla dasɩlɛ yɛ bɛlɛ bekehilehile Bayɩbʋlʋ nu nɔhʋanlɛ yɩ nu a? Asʋ̃ mʋwɔ ndianwʋ be mɔɔ mʋkɔhʋla mɩkɛva mikehilehile nɔhʋanlɛ odwokɔ yɩ nu bʋwɔ mikehile abiye a? Aninyia yɛ yɩ anyɩ keleli odwokɔtile eyi nwʋ a?’—w25.07, owu. 19.
Sɛ yekila kezimɔ Nyamɩnlɩ ɩ nɩɩ Devidi lili nɩ a, mɩnla yɛ yesuma yɛfalɩ yɩ tanɩfakyɛ nwʋ a?
Ɩwɔ numɔ, Devidi yɛlɩ tanɩ nɣezile, naasʋ̃ mmɩlɩ mɔ ɩzʋ̃ yɩ ahʋnlɩnɩ nu inlunli yɩ nwʋ nɩ, Gyehova valɩ yɩ tanɩ hyɛlɩ yɩ. (1 Aw. 9:4, 5) Sɛ Nyamɩnlɩ fa tanɩ kyɛ a, ɩáhakɛ yɩ dɔkʋ̃ anzɛnyɩɩ ɩlɛ́twɩ̃ yɛ azʋ̃ wɔ nwʋmɔ eɣile be.—w25.08, owu. 17.
Sɛ ɩyɛ sɩ ɩma Bayɩbʋlʋ dɩyɛzumanlɛvʋlɔ be kɛɛ ɩkɛdɩ odwokɔ be tʋ a, mɩnla yɛ ɔkɔhʋla kɛyɛ a?
Sɛ ɔwɔ mmɔdɩnɩ kɛɛ ekegyina Bayɩbʋlʋ yɩ zʋ kehilehile odwokɔ be nu na ɩlanwʋ la ɩádɩ yɩ tʋ a, sa ɔkʋla tʋwa dɩyɛzumanlɛ yɩ zʋ na aɣinzi yi bɛazia bɛazunzu nwʋmɔ.—w25.09, owu. 24.
Bayɩbʋlʋ yɩ kã kɛɛ ‘tanɩ kɔhʋla kɛlahɩlɩlahɩlɩ yɛ.’ (Hib. 3:13) Mɩnla ɔhʋanɩ zʋ a?
Ye sinidɔlɛ kɔhʋla kɛma yɛkɛyɛ nyɛlɩyɛ tanɩ. Sa ɩkʋla sʋ̃ ɩdahɩlɩ yɛ ma yɛta yenyia adwɩnɩ kɛɛ Gyehova ɩálɔ yɛ.—w25.10, owu. 16.
Mɩnla nninyeni asã yɛ ɩkɔhʋla kɛma yɛzayɛ yɛ mpayɩwɔlɛ kodu mpʋnɩ a?
(1) Sa yɛkʋla yɛdwɩnɩndwɩnɩ Gyehova yi subanɩ ngɩnlɩma yɩ nwʋ. (2) Sa yɛkʋla yesunzu ndwokɔzɩzɩbɛ mɔɔ yeyiyiaa yɩ kakɩ yɩ nɩɩ kezimɔ ɩma yɛtɩ nɣanlɩ nɩ nwʋ, dɩkɛɛ abiye mɔɔ ɩyɛ tanɩ yɛ mɔɔ ɩsɛ kɛɛ yɛfa yɛkyɛ yɩ. (3) Sɛ yɛbɔɔ mpayɩ a, íni kɛɛ yɛpɩlɩ yɛ nwʋ. Eyi ma yɛkʋla yɛkã kezimɔ yɛtɩ nɣanlɩ nwʋ odwokɔ sʋ̃maa yekile Gyehova.—w25.10, owu. 19-20.
Mɩnla ɔhʋanɩ zʋ yɛ yɛkɔhʋla kɔwʋwa bɛzabɛ mɔɔ bɛ alʋbɔ hɔ anyunumi nɩ a?
Sa yɛkʋla yɛkɔ yekyela bɛzabɛ mɔɔ bɛ alʋbɔ hɔ anyunumi nɩ anzɛnyɩɩ yɛfʋlɔ bɛ. Sa yɛkʋla sʋ̃ yɛkɔ yeyiaki bɛ wɔ asʋpiti. Anzɛnyɩɩ sa yɛkʋla yɛ nɩɩ bɛ yɛ dasɩlɛlilɛ egyima nɩ yɩ ɔfʋã azʋlɔtʋ be.—w25.11, owu. 6-7.
Mɩnla nninyeni paa yɛ ɩma Kilisinyiamaa bɛ ayɩfʋlɔ hyɛ Gyehova animinyiamɩ a?
Bɛvá aɣanɩ mmɛla mɔɔ ɩfalɩ agyiahʋnlɩ nwʋ nɩ beli egyima. Bɔwɔ́ mmɔdɩnɩ kɛɛ bɛkɛma mɔɔ ɩkɔhɔlɩ zʋlɔ wɔ ayɩfʋlɔ yɩ nɩɩ paati yi tʋ nɩ kɛla Nyamɩnlɩ yi sunzuma yɩ mma nɩ ali. Máma bɛma bɛ anwʋziyeziyelɛ yɛ kuntanyɩɩ, na behila kɛɛ bɔkɔbʋ amanɩ bela mɔɔ ɩ nɩɩ Bayɩbʋlʋ iáyiyia nɩ. Mmɩlɩ mɔ bɛyɛɛ ayɩfʋlɔ nhyɩhyɛlɩyɛ nɩ, bɔwɔ́ mɔɔ bɛpɛ kɛɛ bɛyɛ nɩ nwʋ nkɔmmɔ petee.—w25.12, owu. 21-24.