Gyehova Wʋwalɩ Yɛ Ma ‘Yenyinli Wɔ Dɩka Mɔɔ Boluwalɩ Yɛ Nɩ’

Eliyema Benyia nɩɩ Eliyema Baalɛ Kassholm hɔlɩ Giliyadɩ Sukuulu wɔ 1979 na mɛyɩ mɛda nɩ, “boluwalɩ,” bɛ anzɛnyɩɩ bɛmanlɩ egyimalilɛ bɛ wɔ Iran, Mauritius, Myanmar Tanzania, Uganda, nɩɩ Zaire. Giliyadɩ sukuulu yi tʋ yɛ bɛ ehilehilelɛvʋlɔ mɔɔ bɔfʋlɔ yɩ Jack Redford, manlɩ fʋlɔdulɛ be mɔɔ ɩwʋwalɩ bɛ mmɩlɩ mɔ bɛzɩnzanlɩ be egyimalilɛ mbɔmɩ sʋ̃maa nɩ. Bɛmá behilehile numɔ behile bɛ.

Mats, yesiãã wʋ, di bɔmʋnlɩ kã kezimɔ ɔnwʋnlɩ nɔhʋanlɛ yɩ kile yɛ.

Mats: Wɔ Oyuwadɩ Kʋnɛ II yi nu nɩ, nɩ mɩ papa da Poland na ɩnwʋnlɩ kezimɔ Katɩlɩkɩ ɔzʋ̃mɩnlɛ yɩ valɩ bɔnwʋ wulalɩ kʋnɛ yɩ nu nɩ. Naasʋ̃, nɩ ɩta ɩkã kɛɛ “Nɔhʋanlɛ ɔzʋ̃mɩnlɛ wɔ dɩka be!” Aɣinzi yi, mʋnwʋnlɩ kɛɛ mɔɔ ɩkãã yɩ dɩ nɔhʋanlɛ. Mʋdɔlɩ awuuku sʋ̃maa mɩɣɩnganlɩ. Nɩ ɩ́dɩ awuuku mvʋlɔ. Numɔ ɔkʋ̃ yɛ lɛ buuku be mɔɔ nɩ yɩ mɛda dɩ buluu mɔɔ bɔfʋlɔ yɩ The Truth That Leads to Eternal Life. Odwokɔtile yɩ hwɩnlɩ mɩ adwɩnɩ na mɩɣɩnganlɩ buuku munli yi nunuma yɩ mɔɔ mɩ sa hanlɩ nɩ. Awulohyɩnlɩ nɩ, nɩ mʋnwʋ kɛɛ mʋnwʋ nɔhʋanlɛ yɩ!

Ɔzʋmɩ April 1972 mɔɔ ɩkɔɔ nɩ, mɩɣɩnganlɩ Gyehova Dasɩvʋlɔmaa bɛ awuuku sʋ̃maa na minyianlɩ mɩ ndwokɔɣizialɛ nwʋ munwalɩyɛ. Mɩdɩlɩ nɣanlɩ dɩkɛɛ kualɛlilɛnii mɔɔ ɩwɔ Gyisɛsɩ yi ndianwʋ yi nu mɔɔ ɩdɔnɩnlɩ yɩ nwʋ nninyeni munwatĩĩ na ama ɩahʋla ɩadɔ avidileba ɔkʋ̃ mɔɔ ɩtʋ bʋlɔ nɩ. ‘Mʋdɔnɩnlɩ’ pɔkɔ mɔɔ nɩ mizi kɛɛ mʋkɔhɔ yunivɛsiti na ama mɩayɛ dɔkʋtanii nɩ na ama mɩahʋla mɩadɔ “avidileba” mɔɔ mɛyɩ yɛ lɛ nɔhʋanlɛ yɩ mɔɔ mʋnwʋ yɩ nɩ. (Mt. 13:​45, 46) Munlumanlɩ wɔ December 10, 1972.

Wɔ ɔlʋbɔ ɔkʋ̃ nu nɩ, mɩ awʋvʋlɔ nɩɩ mi anlima benyia kuakula zumanlɩ nɔhʋanlɛ yɩ, na bonlumanlɩ. Wɔ July 1973 nɩ, mʋwɔlɩ mmɩlɩ munwala ɔzʋ̃mɩnlɛ egyima yɩ tʋ. Nɩ eliyema baalɛ ɔhʋanɩbukolɛvʋlɔ be wɔ yɛ asafʋ yi nu mɔɔ yɩ nwʋ yɛ pɩkɛ, ɩbɔ ɛhyɩmɛ na ɩdɔ Gyehova baaba paa. Nɩ bɔfʋlɔ yɩ Ann-Catrin. Yɛdɔlɩ ɔlɔlɛ nu na yegyialɩ wɔ 1975, na yɛvalɩ ɔlʋbɔ anla yɛwʋwalɩ Strömsund mɔɔ ɩdɩ twonwa pɩkɛ pɩkɛ nɩɩ azɩlɛ-sini mɔɔ iso mma nu wɔ Sweden.

Ann-Catrin: Mɩ papa zumanlɩ nɔhʋanlɛ yɩ mmɩlɩ mɔ nɩ ɩka ɛgyɩkɩ̃ɩ̃ ma iwie yunivɛsiti wɔ Stockholm. Ɔzɔ mmɩlɩ yɩ nɩ mili aziyianɩ asã pɛ, naasʋ̃ nɩ ɩ nɩɩ mɩ kɔ dɩyɛzumanlɛ nɩɩ dasɩlɛlilɛ. Nɩ mɩ maamɩ yɩ anyɩ iáleli eyi nwʋ na ɩwɔlɩ mmɔdɩnɩ kɛɛ ikehile kɛɛ Gyehova Dasɩvʋlɔmaa bɛ́dɩ nɔhʋanlɛzʋ̃mɩnlɛ. Naasʋ̃ ɩákʋla, meti aɣinzi yi yɩzayɩ sʋ̃ inlumanlɩ. Minyianlɩ alʋbɔ 13 nɩ, munlumanlɩ, na minyianlɩ alʋbɔ16 nɩ, mʋwɔlɩ ɔhʋanɩbukolɛ egyima yɩ tʋ. Mmɩlɩ mɔ mʋzʋ̃mɩnlɩ wɔ Umeå, dɩka mɔɔ nɩ behyinyia ɛlawulowɔlɛmaa sʋ̃maa mɛda nɩ, mɩɣa mɩyɛlɩ ɔhʋanɩbukolɛvʋlɔ titili.

Mɩ nɩɩ Mats gyialɩ mɛda nɩ, yɛva anyɩnlɩlelɛ yɛwʋwa mmenii sʋ̃maa ma bozuma nɔhʋanlɛ yɩ. Bo nu ɔkʋ̃ yɛ lɛ kuakula baalɛ be mɔɔ bɔfʋlɔ yɩ Maivor mɔɔ aɣinzi yi ɩɣa ɩyɛlɩ mi anlima kuakula baalɛ yɩ ɔhɔnwʋ mɔɔ ɩ nɩɩ yɩ wɔlɩ numɔ yɛlɩ ɔhʋanɩbukolɛ egyima yɩ. Bɔhɔlɩ Giliyadɩ sukuulu wɔ 1984 na bɔsʋ̃mɩɩ kɛɛ odwokɔbadɛlɛlɛmaa wɔ Ecuador.

Wɔ bɛ odwokɔbadɛlɛlɛ egyima azʋlɔtʋ yɩ nu nɩ, mɩnla yɛ ɩwʋwalɩ bɛ ma bɛyɛlɩ nzɩnzanlɩyɛ na bɛ anyɩ sʋ̃ leli a?

Mats: Bɛzɩnzanlɩ ye egyimalilɛ mbɔmɩ sʋ̃maa. Naasʋ̃ yɛwɔlɩ mmɔdɩnɩ yezumazumanlɩ Gyisɛsɩ, titili wɔ kezimɔ nɩ ɩkã yɩ nwʋ azɩ nɩ. (Kol. 2:​6, 7) Kɛ ndianwʋ nɩ, kɛ ankɩ yekehila ɔhʋanɩ kɛɛ mmeliyema yɩ kɛyɛ nninyeni kezimɔ yɛpɛ yɩ nɩ, yɛwɔlɩ mmɔdɩnɩ kɛɛ yekozuma sianti mɔɔ bɛyɛ nninyeni wɔ ɔhʋanɩ pɔkyɩɩ be zʋ. Nɩ yɛpɛ kɛɛ yɛtɩ kezimɔ bɔdwɩ̃ nɩɩ bɛ amamɩlɛ tʋ. Mbɔmɩ sʋ̃maa mɔɔ yezumazumanlɩ Gyisɛsɩ nɩ, mbɔmɩ sʋ̃maa yɛ yɛdɩlɩ nɣanlɩ kɛmɔ ‘boluwa yɛ wɔ azudɩnlɩ nwʋ’ mɔɔ yenyi wɔ dɩka bela mɔɔ bɛkɛma egyimalilɛ yɛ nɩ.—Ndw. 1:​2, 3.

Ann-Catrin: Sɛ botu owudo be bɛ tɛ na ikenyi a, ihyinyia oyuwa. Gyehova hile kɛɛ ɩdɩ “oyuwa” ɩma yɛ mmɩlɩ munwala. (Ndw. 84:11) Ɩmanlɩ yenyianlɩ mmeliyema mmenyia nɩɩ mmalɛ mɔɔ bɔdɔ yɛ. Kɛ ndianwʋ nɩ, wɔ yɛ asafʋ ɛgyɩkɩ̃ɩ̃ mɔɔ ɩwɔ Tehran, wɔ Iran nɩ, bɛlalɩ ngyɛvʋlɔyɛlɛ mɔɔ sɛ ɛkɩnga Bayɩbʋlʋ yɩ a ɔkɔnwʋ yɩ nɩ be ali behileli yɛ. Yenyianlɩ a, ankɩ sa yɛbʋwa Iran yɛkyɛ, naasʋ̃ wɔ July 1980 nɩ, bɛvalɩ salɛ bedianlɩ Gyehova Dasɩvʋlɔmaa be egyima yɩ zʋ wɔ kɛnɩ na bɛmanlɩ eɣile anwɩ̃ yɛ kɛɛ yɛzʋ̃ manlɩ yɩ nu yɛhɔ́. Bɛmanlɩ yɛhɔlɩ Zaire (mɔɔ nnɛ bɔfʋlɔ yɩ Congo) wɔ Africa.

Mmɩlɩ mɔ mɩdɩlɩ kɛɛ bɛma egyimalilɛ yɛ wɔ Africa nɩ, muzunli baaba. Mɔɔ mɩdɩlɩ mɩvalɩ nwɔlɔ nɩɩ adimakɛlɛ mɔɔ ɩwɔ Africa nwʋ nɩ manlɩ mukunlu duli. Naasʋ̃ yɛ ɔhɔnwʋmmɔ anwɩ̃ mɔɔ bɔzʋ̃mɩ wɔ kɛnɩ bɛhyɛ nɩ hã hileli yɛ kɛɛ: “Máma bo kunlu tu, bɔlɔ́kɔlɩ Africa kyɩ̃, naasʋ̃ yezi kɛɛ bɛ anyɩ kele! Amba sʋ̃ yɛ anyɩ leli. Mmeliyema mmenyia nɩɩ mmalɛ yɩ dɔ yɛ paa. Nɔhʋanlɛ nu nɩ, alʋbɔ ahyiã mɛda mɔɔ nɩ ɩsɛ kɛɛ yɛzʋ̃ Zaire yɛkɔ nɩ, mɩzɩlɩlɩ mihileli mʋ nwʋ iluwakɛɛ mʋnwʋnlɩ kɛɛ nɩ mʋbɔɔ Gyehova mpayɩ kɛɛ “Misiãã wʋ, ma yɛwʋwá Africa.”

Mɩnla nyilalɛ yɛ benyia wɔ alʋbɔ mɔɔ bɛva bɔzʋ̃mɩ Gyehova nɩ nu a?

Mats: Iluwa ye egyimalilɛ yi ti, yɛ nɩɩ odwokɔbadɛlɛlɛmaa mɔɔ bɔzʋ̃ amanlɩ mvʋlɔ zʋ va ɔhɔnwʋ mɔɔ numɔ yɛ sɩ. Akʋ̃ sʋ̃, wɔ ye egyimalilɛ mvʋlɔ nu nɩ, yɛkʋla yɛyɛ Bayɩbʋlʋ dɩyɛzumanlɛ sʋ̃maa mɔɔ ɩyɛ a, enii ɔkʋ̃ kʋla yɛ Bayɩbʋlʋ dɩyɛzumanlɛ 20, na eyi ma yɛ anyɩ de paa! Mɩlanwʋ la mɩkakɛ ɔlɔlɛ nɩɩ ngyɛvʋlɔyɛlɛ mɔɔ ye mmeliyema mmenyia nɩɩ mmaalɛ mɔɔ bɔwɔ Africa nɩ lalɩ yɩ ali hile yɛ nɩ. Mmɩlɩ mɔ yɛhɔ yegyelalɩ asafʋ azʋlɔtʋ mɔɔ ɩwɔ Tanzania nɩ, nɩ yɛda yɛ kaalʋ nu, na mmeliyema yɩ lalɩ ngyɛvʋlɔyɛlɛ ali hileli yɛ ma “ɩwʋlʋlɩ zʋ” ɩávalɩ nwʋmɔ kɛɛ nɩ bedi ehyinyia nɩ. (2 Kɔl. 8:3) Debe mɔɔ nɩ yɛ anyɩ deli nwʋmɔ yɛ lɛ mɔɔ nɩ yɛfʋlɔ yɩ kɛɛ story time nɩ. Eyi yɛ lɛ mmɩlɩ mɔ sɛ eɣile nɩ ba awielɩyɛ a, mɩ nɩɩ Ann-Catrin yɛbʋwa azɩ yɛbɔ mɔɔ ɩhɔlɩ zʋlɔ wɔ eɣile nɩ nu nwʋ nkɔmmɔ na yɛda Gyehova asɩ kɛɛ ɩhɩnlanlɩ yɛ nwʋ wɔ eɣile yi nu.

Ann-Catrin: Mamɩ mɛyɩ, mɔɔ ɩma mɩ anyɩ de paa yɛ lɛ mmeliyema mɔɔ bɔzʋ̃ nnɩka mvʋlɔ mɔɔ yɛ nɩɩ bɛ bɔ nɩ. Yezuma ndɛnɩ azʋlɔtʋ mɔɔ ebiye yɛ lɛ Farsi, French, Luganda, nɩɩ Swahili. Na yezuma amamɩlɛ azʋlɔtʋ mɔɔ ɩyɛ anyɩnlɩlelɛ sʋ̃. Yɛwʋwa ma bɛdɩdɩ mmeliyema mmenyia nɩɩ mmaalɛ mvʋlɔ, yenyia ɔhɔnwʋmmɔ mɔɔ bɔdɔ yɛ, na yɛlɛ “ɔkʋ̃yɛlɛ” yɛsʋ̃mɩɩ Gyehova.—Zɛf. 3:9.

Akʋ̃ sʋ̃, yɛnwʋ Gyehova yɩ abɔdɩ ngɩnlɩma azʋlɔtʋ. Mmɩlɩ bela mɔ yenyianlɩ egyimalilɛ fʋlɔ nɩ, yɛdɩlɩ nɣanlɩ kɛɛ yɛ nɩɩ Gyehova yɛkɔɔ dɩka na ikilee ɔhʋanɩ yɛ. Ɩma yenyia ozumanlɛnwʋnlɛ azʋlɔtʋ mɔɔ ankɩ yɛzayɛ yɛlɔ́kʋla kenyia kyɩ̃.

Mɩnla ndwokɔzɩzɩbɛ yɛ beyiyia a, na mɩnla yɛ ɩwʋwalɩ bɛ ma begyinanlɩ pindinyii a?

Mats: Wɔ alʋbɔ yi nu nɩ, yenyianlɩ adimakɛlɛ azʋlɔtʋ mɔɔ nɩ obunlu kɩnla nwʋ. Na Ann-Catrin yɛlɩ opilehyɛnɩ azʋlɔtʋ be mɔɔ nɩ yɛáhila yɩ ɔhʋanɩ. Akʋ̃ sʋ̃, nɩ yɛdwɩnɩɩ yɛ awʋvʋlɔ mɔɔ bɔ ɔlʋbɔ hɔ anyunumi nɩ nwʋ. Meti, yɛ anyɩ sɔ mmʋwalɩyɛ mɔɔ ye mmenlima yɩ va manlɩ bɛ mmɩlɩ mɔ yɛyɛɛ yɛ ɔzʋ̃mɩnlɛ egyima yɩ. Bɛvalɩ abʋtalɩ, anyɩnlɩlelɛ, nɩɩ ɔlɔlɛ behilalɩ bɛ. (1 Tim. 5:4) Ɩwɔ numɔ, yɛyɛlɩ mɔɔ yɛkɔhʋla bela yɛwʋwalɩ bɛ ɩávalɩ nwʋmɔ kɛɛ yɛáɣike bɛ nɩ. Naasʋ̃ ɩyɛ a yɛ ɛɣɛɛlɛ bɔ, iluwakɛɛ ye kunlu a ankɩ yɛyɛ mɔɔ ɩtɛla zɔ.

Ann-Catrin: Wɔ 1983, mmɩlɩ mɔ nɩ yɛsʋ̃mɩɩ wɔ Zaire nɩ, cholera mɔɔ yi munwa yɛ ɛhyɩmɛ hyɩlɩ mɩ. Dɔkɩta yɩ hã hileli Mats kɛɛ, “Ɛ nɩɩ yɩ zʋ̃ manlɩ yɩ nu bɔhɔ́ nnɛ la!” Awulohyɩnlɩ nɩ, yenyianlɩ pileeni be mɔɔ ɩfa nninyeni. Nɩ mɛyɩ la yɛ nɩ ɩdɩ pileeni mɔɔ ɩkɔɔ Sweden a.

Mats: Nɩ yezunzu kɛɛ yɛ odwokɔbadɛlɛlɛ egyima yɩ ɣa awielɩyɛ, meti yezunli paa. Nɩ dɔkɩta yɩ sunzu kɛɛ Ann-Catrin yɩ nwʋ ɩlɔ́tɔ yɩ, naasʋ̃ ɩdɩlɩ pɔkɔ. Na wɔ ɔlʋbɔ ɔkʋ̃ mɛda nɩ, yezia yɛhɔlɩ Zaire, ɔzɔ mmɩlɩ yɩ yɛhɔlɩ asafʋ ɛgyɩkɩ̃ɩ̃ be mɔɔ bɛkã Swahili wɔ Lubumbashi.

Ann-Catrin: Mmɩlɩ mɔ nɩ yɛwɔ Lubumbashi nɩ, mɩɣɩnzɛlɩ naasʋ̃ ɛɣɩnzɛlɛ yɩ zɩkɛlɩ. ɩwɔ numɔ, nɩ íni yɛ adwɩnɩ nu kɛɛ yɛkɔwʋ dɩyɛ, naasʋ̃ mmɩlɩ mɔ kuakula yɩ wuli nɩ, ɩyɛlɩ ɛyɛkɛ mɩ baaba. Wɔ ɔzɔ mmɩlɩ mɔ nɩ yedii alɔbɔ nɩ, Gyehova manlɩ yenyianlɩ debe mɔɔ nɩ yɛáhila yɩ ɔhʋanɩ. Yenyianlɩ Bayɩbʋlʋ dɩyɛzumanlɛmaa sʋ̃maa dɛlalɩ mmɩlɩ bela. Iátwu ɔlʋbɔ ɔkʋ̃ yɛ ɛlawulowɔlɛmaa 35 mɔɔ bɔwɔ asafʋ yɩ nu nɩ ɣa yɛlɩ 70 a, na mmenii 40 mɔɔ nɩ bɛba dɩyɛzumanlɛ sʋ̃ nɩ ɣa yɛlɩ 220. Yɛvalɩ yɛ nwʋ yewulalɩ dasɩlɛlilɛ egyima yi nu paa, na Gyehova yilalɩ yɛ mmɔdɩnɩwɔlɛ zʋ na eyi manlɩ mɩ ɛɣɛɛlɛ yɩkyɩlɩ. Naasʋ̃ ɩyɛ a, yɛta yɛdwɩnɩ yɛ ɣa yɩ nwʋ na yɛbɔ yɩ nwʋ nkɔmmɔ. Yekilaa ɔhʋanɩ kɛɛ Gyehova kɛyɩ yɛ ɛyɛkɛ yɩ wɔ kɛnɩ wɔ eɣile be.

Mats: Idwuli mmɩlɩ be nɩ, Ann-Catrin yɩ anwʋzɩzɩbɛ wɔlɩ tʋ kɛɛ ɩkɔɔ azɩ paa na nɩ ɩfɛ sʋ̃. Mmɩlɩ kʋ̃ yɩ nu la, minyianlɩ kansa ɛyɛlɛyɛlɛ be mɔɔ nɩ ihyinyia kɛɛ bɛyɛ mɩ opilehyɛnɩ. Naasʋ̃ sikalɛyɩ, mʋ nwʋ dɩyɛnɛ na Ann-Catrin sʋ̃ ɩyɛɛ mɔɔ ɩkɔhʋla.

Yɛɣa yɛyɛ yɩ ndwɩ kɛɛ, kɛ yɛzayɛ nkʋ̃ la yɛ yeyiyiaa ndwokɔzɩzɩbɛ a. Wɔ 1994 kʋnɛ mɔɔ izili wɔ Rwanda mɛda nɩ, yɛhɔ gyelalɩ mmeliyema mmenyia nɩɩ mmalɛ mɔɔ bɔwɔ refugee camp nɩ. Mmɩlɩ mɔ yɛnwʋnlɩ be dedi, bɛ akɛnɣazɩzɩbɛ nɩɩ bɛ ngyɛvʋlɔyɛlɛ nɩ, ɩmanlɩ yɛnwʋnlɩ kɛɛ Gyehova lɛ tumi mɔɔ ɩfa ɩbʋwa yɩ mmenii mmɩlɩ mɔ beyiyiaa ndwokɔzɩzɩbɛ nɩ.—Ndw. 55:22.

Ann-Catrin: Mmɩlɩ mɔ yɛhɔlɩ Bɛtɩlɩ mɔɔ bowukoli yi munwa fʋlɔ wɔ Uganda wɔ 2007 nɩ, yeyiyialɩ odwokɔzɩzɩbɛ fʋlɔ. Yɛbɔlɩ nɩ, yɛ nɩɩ odwokɔbadɛlɛlɛmaa nɩɩ Bɛtɩlɩmaa kɛyɛ 25 vʋlɩ kaalʋ ɔkʋ̃ kɛɛ yɛkɔɔ Nairobi, Kenya. Ɩka ɛgyɩkɩ̃ɩ̃ ma yetwu Kenya bɔda yɩ zʋ nɩ, baasɩ ɛgyɩkɩ̃ɩ̃ be ɣa va wɔlɩ yɛ dɩyɛ yɩ nu. Dɩlayɩva yɩ nɩɩ mmeliyema anlu wuli wɔ amʋnɔ nu kɛnɩ la; aɣinzi yi, eliyema baalɛ ɔkʋ̃ sʋ̃ wuli wɔ asʋpiti. Yekilaa ɔhʋanɩ kɛɛ yɛkɔnwʋ yɛ ɔhɔnwʋmmɔ yɩ dɔkʋ̃!—Dwb. 14:​13-15.

Aɣinzi yi, mʋ nwʋ dɔlɩ mɩ. Naasʋ̃, asɩdɛntɩ yɩ hɔlɩ zʋlɔ lileli mɩ nɩɩ Mats nɩɩ mmeliyema mɔɔ nɩ yɛ nɩɩ bɛ wɔ kaalʋ yɩ nu nɩ be. Wɔ mamɩ mɩ ɔfʋã nu nɩ, sɛ itwu nunuma a, nɩ mɩáhʋla mɩda na nɩ mɩ ahʋnlɩnɩ ɩbɔɔ ndɛndɛ. Nɩ eyi ma mʋ kunlu tu. Naasʋ̃ mpayɩ mɔɔ yɛwɔlɩ nɩɩ ɛɣɛɛlɛyɩkyɩlɛ mɔɔ yenyianlɩ wɔ ɛhɛlɛlɛndwokɔ azʋlɔtʋ mɔɔ yɛ anyɩ deli nwʋmɔ nɩ wʋwalɩ yɛ ma yegyinanlɩ yi munwa. Yɛhɔlɩ asʋpiti ma behilalɩ yɛ na eyi wʋwalɩ ma adwɩnɩndwɩnɩ mɔɔ nɩ ɩhyɛ yɛ zʋ nɩ zʋ dɩlɩ. Kakɩ yenyia anwʋzɩzɩbɛ na yesiã Gyehova kɛɛ ɩwʋwa yɛ ma yɛyɩkyɩ bɛzabɛ mɔɔ bɔwɔ bʋwabɩlɛ mɔɔ ɩdɩ zɔ nu nɩ bɛ ɛɣɛɛlɛ.

Mmɩlɩ mɔ bɛkãã kezimɔ bɔhʋla begyinanlɩ ndwokɔzɩzɩbɛ munwa nɩ, bɛhanlɩ kɛɛ Gyehova “zʋwalɩ bɛ kɛɛ kolomviyia amʋnɔ.” Mɩnla yɛ nɩ bɛpɛɛ bekehile a?

Mats: Ɔzɔ odwokɔ yɩ zʋ̃ Swahili odwokɔ be mɔɔ bɛkãã kɛɛ “Tumebebwa kama mayai mabichi,” anzɛnyɩɩ “Bɔzʋwalɩ yɛ kɛɛ kolomviyia amʋnɔ.” Kɛmɔ abiye sɔ kolomviyia amʋnɔ nu bʋwɔ na iábukoli nɩ, Gyehova zʋ̃ ɔlɔlɛ nu wʋwa yɛ wɔ ye egyimalilɛ yi nu ɔkʋ̃ bela nu. Yɛ sa kã mɔɔ yehyinyia mmɩlɩ munwala ma ibulu zʋlɔ po. Ɔhʋanɩ ɔkʋ̃ mɔɔ yɛnwʋ kɛɛ Gyehova dɔ yɛ paa yɛ lɛ kunlumiba mɔɔ iluwa Ɔhʋanɩhilelɛ Okuwu yi zʋ ɩda yɩ ali ikile yɛ nɩ.

Ann-Catrin: Mɩpɛ kɛɛ mɩkã ndianwʋ ɔkʋ̃ mɔɔ ikile kɛɛ Gyehova bʋwa yɛ. Eɣile ɔkʋ̃ be, minyianlɩ kɔɔlʋ be mɔɔ ɩzʋ̃ Sweden, na bɛhã behileli mɩ kɛɛ mɩ papa ɩádɩ pɔkɔ na dɩka mɔɔ ɩla nɩ ɩdɩbɛ kʋlaa. Nɩ ɩlɛ́kyɛlɩ yɛ obunlu mɔɔ ɩhyɩlɩ Mats sʋ̃ nɩ yiakili a. Nɩ yɛlɔ́kʋla kɔdɔ tekiti mɔɔ yɛkɛva kɔvʋ pileeni kɔhɔ kɛ, meti yezili pɔkɔ kɛɛ yɛkɔdɔnɩ yɛ kaalʋ yɩ. Akʋ̃, yenyianlɩ kɔɔlʋ anwɩ̃ be; nɩ ɔkʋ̃ dɩ agyiahʋnlɩmaa be mɔɔ bɛdɩ ye odwokɔ yɩ mɔɔ nɩ bɛpɛ kɛɛ bɔtɔ tekiti ɔkʋ̃ bɛma yɛ. Kɔɔlʋ ɔkʋ̃ yɩ sʋ̃, nɩ ɩzʋ̃ eliyema baalɛ ebani be mɔɔ iziye ozukua wɔ alakaba be nu mɔɔ ɩhɛlɛ nwʋmɔ kɛɛ “Abiye mɔɔ ihyinyia mmʋwalɩyɛ.” Gyehova wʋwalɩ yɛ ma yɛ sa hanlɩ mɔɔ yehyinyia wɔ mmɩlɩ ɛgyɩkɩ̃ɩ̃ be nu!—Hib. 13:6.

Sɛ bekila alʋbɔ 50 mɔɔ bɛva bɛyɛ mmɩlɩ munwala ɔzʋ̃mɩnlɛ egyima yɩ a, mɩnla yɛ bozuma a?

Ann-Catrin: Muzuma kɛɛ sɛ ‘yɛbʋwa kɛnɩ dinyii na yɛfa yɛ nwʋ yetiã yɩ zʋ a,’ yekenyia anwʋzɩzɩbɛ. Sɛ yenyia Gyehova nu anwʋlazʋ a, ɩkɔhʋ̃ yɛ kʋnɛ kɛma yɛ. (Ayɩ. 30:15; 2 Mm. 20:​15, 17) Iluwakɛɛ yɛyɛlɩ egyimalilɛ bela mɔɔ bɛva bowulalɩ yɛ sa yɛva yɛzʋ̃mɩnlɩ Gyehova nɩ ti, yenyia nyilalɛ mɔɔ ankɩ yɛzayɛ yɛlɔ́kʋla kenyia kyɩ̃.

Mats: Ozumalɛdɩyɛ titili mɔɔ minyia yɛ lɛ kɛɛ mɩkɛva mʋ nwʋ mikediã Gyehova zʋ̃ wɔ bʋwabɩlɛ bela nu, na miahila kezimɔ ikeli ɩkɛma mɩ. (Ndw. 37:5) Ɩwʋwa mɩ mmɩlɩ munwatĩĩ kɛmɔ ɩwɔ anʋhʋba nɩ. Kakɩ yɛwɔ Myanmar Bɛtɩlɩ, na yɛnwʋ kɛɛ Gyehova lanwʋ la ɩbʋwaa yɛ.

Yekilaa ɔhʋanɩ kɛɛ mmɩlantɩyɛ nɩɩ nɣɛdɛkɛ sʋ̃maa mɔɔ bɛpɛ kɛɛ bɛtɛlɛ bɔ ɔzʋ̃mɩnlɛ nu nɩ kenyia Gyehova yɩ nɔhʋanlɛ ɔlɔlɛ mɔɔ ɩlalɩ yɩ ali ihileli yɛ nɩ bɛ. Yɛwɔ anwʋlazʋ kɛɛ sɛ bɛma ɔhʋanɩ ma Gyehova ma benyi wɔ dɩka bela mɔɔ bokoluwa bɛ nɩ a, Gyehova kɛla ɔlɔlɛ ali kehile bɛ.