Mɔɔ Ɩkɔwʋwa Wʋ Ma Ɛkɛda Kozuma Dɩyɛ
ASƲ̃ ɩyɛ sɩ ɩma wʋ kɛɛ ɛkɛda kɛyɛ wʋzawʋ wʋ Bayɩbʋlʋ dɩyɛzumanlɛ a? Asʋ̃ ɩyɛ a ɛtɩ nɣanlɩ kɛɛ ɩyɛlɛ ɩáyɛ anyɩnlɩlelɛ a? Ɩyɛ a ɩtʋ ye munwala. Naasʋ̃ sunzu debe mɔɔ yɛta yɛyɛ, dɩkɛɛ oyuwalɛ nwʋ kila. Oyuwalɛ de mmɩlɩ nɩɩ mmɔdɩnɩwɔlɛ, naasʋ̃ sɛ ɔbɔ mmɔdɩnɩ biya a, kila kezimɔ wʋ nwʋ tɔ wʋ! Bayɩbʋlʋ zumanlɛ sʋ̃ kɔhʋla kɛma yɛ nwʋ kɔdɔ yɛ dɩkɛɛ mɔɔ ‘bɛva nzulo bɔwʋwʋ’ yɛ nwʋ. (Ɛfɩ. 5:26) Bɛmá yehila adwɩnɩhilelɛ be mɔɔ ɩkɔhʋla kɔwʋwa yɛ:
Yɛ nhyɩhyɛlɩyɛ. Wʋzawʋ wʋ dɩyɛzumanlɛ kɩnla nninyeni mɔɔ “ɩdɩ baaba” mɔɔ íni kɛɛ Kilisinyianii bu yɩ anyɩ ikua zʋlɔ nɩ nwʋ. (Fɩl. 1:10) Mɔɔ ɩkɔwʋwa wʋ ma ekeli wʋ nhyɩhyɛlɩyɛ yɩ zʋ nɩ, fa fʋãmɩ dɩka mɔɔ ɩkɛyɛ mɛlɛkɛ kɛɛ ɔkɔnwʋ yɩ dɩkɛɛ banɩ nwʋ anzɛnyɩɩ wʋ fɩlɩgyɩ nwʋ. Anzɛnyɩɩ sa ɔkʋla sɛtɩ alaamɩ wɔ wʋ foonu zʋ mɔɔ ɩkɛhakɛ wʋ kɛɛ ozumá dɩyɛ.
Sɩnza mmɩlɩ nɩɩ ɔhʋanɩ mɔɔ oduwa zʋlɔ suma dɩyɛ nɩ nu. Asʋ̃ ɔkʋla fa mmɩlɩ tɩndɩnlɩ suma dɩyɛ a, anzɛnyɩɩ osuma ɛgyɩkɩ̃ɩ̃ be a yɛ ɩbʋwa wʋ a? Wʋzawʋ yɛ ezi mɔɔ ɩkɔwʋwa wʋ a. Meti ma eyi ɩwʋwa wʋ adwɩnɩ nu mmɩlɩ mɔ ɛyɛɛ wʋ nhyɩhyɛlɩyɛ nɩ. Sɛ mmɩlɩ mɔ ɛfa osuma dɩyɛ nɩ twu na wʋádɩ nɣanlɩ kɛɛ ozumá dɩyɛ a, bɔ mmɔdɩnɩ fa miniti bunlu la suma dɩyɛ. Ɔzɔ mmɩlɩ sikalɛ mɔɔ ɛkɛva kozuma dɩyɛ nɩ, ɩdɩ baaba ɩtɛla kɛɛ olósuma hwɩɩ kʋlaa. Na sɛ ɔbɔ yɩ tʋ zɔ a, sa ɩkʋla ɩhyɛ wʋ ɛzɩzɩbɛ ma osuma kyɛ.—Fɩl. 2:13.
Pɩbɛ nninyeni mɔɔ ɛpɛ kɛɛ osuma nɩ tiã kɛ. Sɛ wʋ dɩyɛzumanlɛ mmɩlɩ twu ansaana wʋabɩbɛ mɔɔ okozuma a, ɩlɛ́ma ɛkɛva wʋ ‘mmɩlɩ ekeli egyima bʋwɔ.’ (Ɛfɩ. 5:16, NWT) Mɩnla ti mɔɔ wʋáli bɔmʋnlɩ kɛlɛ ndwokɔ anzɛnyɩɩ nninyeni mɔɔ ɛpɛ kɛɛ osuma nɩ tiã kɛ a? Mmɩlɩ bela mɔ odwokɔɣizialɛ be kɛɣa wu ti nu nɩ, kɛlɛ tiã kɛ. Na sɛ osuma dɩyɛ owie bela sʋ̃ a, ebiye a ekenyia dɩyɛ fʋlɔ kɛhɩnla nninyeni mɔɔ ɛpɛ kɛɛ osuma nɩ nwʋ.
Sɛ nwʋmɔ ba hyinyia kɛɛ ɛyɛ nzɩnzanlɩyɛ a, yɛ́. Bɔ mmɔdɩnɩ kɛɛ ɛlɛ́yɛ kyɩngyɩ̃ɩ̃ wɔ mmɩlɩ mɔ ɛfa suma dɩyɛ nɩɩ nninyeni mɔɔ osuma nɩ nwʋ. Mɔɔ ihyinyia yɛ lɛ kɛɛ ɛkɛda kozuma dɩyɛ, na kɛ mmɩlɩ mɔ ɛfa suma dɩyɛ, mmɩlɩ tɩndɩnlɩ mɔ ɛfa suma anzɛnyɩɩ dɩyɛ mɔɔ osumaa nɩ.
Sɛ yesuma dɩyɛ eɣile bela a, yenyia zʋlɔ mfasʋ. Ɩma yɛtwɩ̃ yebike Gyehova, yesuma kɛɛ yɛkɛyɛ yɛ dɩyɛ wɔ nɣɛlɛbɛ nu na yɛ nwʋ tɔ yɛ.—Dwh. 1:8.