Kã Odwokɔba Nɩ Kɛɛ Oyuwadɩ Baaba Be Iɣike!

Wɔ November nu nɩ, sa yɛyɛ nhyɩhyɛlɩyɛ titili be yɛfa yɛbɔ odwokɔba nɩ ɛlawulo kɛɛ oyuwadɩ baaba be iɣike. (Ndw 37:10, 11; Yik 21:3-5) Yɛ́ wʋ mmɩlɩ nhyɩhyɛlɩyɛ bʋwɔ na ama wʋava wʋ nwʋ wʋawula ɛlawulowɔlɛ yɩ nɩ nu. Sɛ ɛyɛ ɔhʋanɩbukolɛ bʋwavʋlɔ wɔ ɔzɔ eziyianɩ nɩ nu a, sa ɔkʋla ɛfa dɔnhwɩlɩ 30 anzɛnyɩɩ 50 ɛyɛ.

Siyeziye wʋ nwʋ kɛɛ ɛkɛɣɩnga ɛhɛlɛlɛ odwokɔ be mɔɔ ɩfalɩ oyuwadɩ fʋlɔ nɩ nwʋ ekehile mmenii sʋ̃maa wɔ wʋ azɩlɛ-sini yi nu. Sɛ ɛfaa Ɛhɛlɛlɛ Odwokɔ be a, sunzu mɔɔ mmenii sʋ̃maa bɛ anyɩ ikeleli nwʋ wɔ wʋ azɩlɛ-sini yi nu. Sɛ abiye yɩ anyɩ ɩba ideli odwokɔ yɩ nwʋ wɔ egyelalɛ mɔ ili bɔmʋnlɩ nɩ nu a, fá Ɔwɛn-Aban No. 2 2021 mɔɔ yɛlɛ yɛma nɩ be ma yɩ. Akʋ̃ siá kɔ kegyela yɩ ndɛndɛ zʋ la, na bɔ́ mmɔdɩnɩ kɛɛ ɛkɛva Sa Ɔkʋla Enyia Anyɩnlɩlelɛ Daabaa! blohyʋɔ nɩ ɔkɔwɔ́ Bayɩbʋlʋ dɩyɛzumanlɛ tʋ. Kilá kezimɔ ɩyɛ anyɩnlɩlelɛ kɛɛ yɛkɛva yɛ nwʋ munwala yekowula nu yɛkɛhã “dɩyɛba nwʋ odwokɔba”!—Ayɩ 52:7.

KILÁ NDWOMI MƆƆ ÍNI YE NDWOMI BUUKU YI NU VIDIYO MƆƆ ISE OYUWADƖ FƲLƆ NƖ NU, NA AKƲ̃ YƖ́ NDWOKƆƔIZIALƐ EYIMMƆ BO MUNWA:

• Mɩnla eɣile be baaba yɛ nɩ kuakula baalɛ nɩ ituaa nwʋmɔ mfonyini wɔ yɩ adwɩnɩ nu a?

• Oyuwadɩ fʋlɔ yɩ nu nninyeni ɛhɩnla dɩyɛ yɛ ekila yɩ ɔhʋanɩ a?

• Sɛ ɔdwɩnɩdwɩnɩ anyɩnlɩlazʋ mɔɔ ɔwɔ nɩ nwʋ a, mɩnla ɔhʋanɩ zʋ yɛ ɩkɔwʋwa wʋ ma ɛkɛva wʋ nwʋ munwala okowula November dasɩlɛlilɛ titili nɩ nu a?—Lk 6:45