OZUMALƐDƖYƐ 53

Nninyeni Mɔɔ Ɛfa De Wʋ Anyɩ Nɩ, Ma Ɩzɔ́ Gyehova Anyɩ

Mɔɔ Bedindimi

Gyehova dɩ “anyɩnlɩlelɛ Nyamɩnlɩ.” (1 Timoti 1:11, NWT) Ɩpɛ kɛɛ yɛ anyɩ de wɔ yɛ ɛbɩlawɔlɛ nu. Sɛ yede mmɩlɩ yɛfa yede yɛ mʋnlɩ na yɛfa ebiye sʋ̃ yede yɛ anyɩ a, yɩ anyɩ ɩsɔ yɩ. Wɔ ozumalɛdɩyɛ eyi nu nɩ, yɛkɔnwʋ kezimɔ yɛkɛva mmɩlɩ mɔ yɛfa yede yɛ mʋnlɩ nɩ yɛkɛyɛ nninyeni mɔɔ ɩkɛma yɛ anyɩ kele na yɛazɔ Gyehova sʋ̃ anyɩ.

1. Mɩnla yɛ ɩsɛ kɛɛ yɛdwɩnɩ nwʋmɔ mmɩlɩ mɔ yɛpɛɛ dɩyɛ mɔɔ yɛkɛva yekele yɛ anyɩ nɩ a?

Mɩnla nninyeni yɛ wʋ anyɩ deli nwʋ kɛɛ ɛkɛyɛ wɔ mmɩlɩ mɔ edee wʋ mʋnlɩ nɩ a? Abiyemmɔ bɛ anyɩ deli nwʋmɔ kɛɛ bɛzabɛ nkʋ̃ bɔkɔwʋwa awudo na bɛaɣɩnga buuku, bɛadiye ndwomi, bɛahila TV anzɛnyɩɩ bɛahila nninyeni be wɔ intanɛtɩ zʋ. Abiyemmɔ sʋ̃ bɛ anyɩ deli nwʋmɔ kɛɛ bɛ nɩɩ bɔ ɔhɔnwʋmmɔ kɔwɔ numɔ kodu mpɛsa, bɛahɔ bɛayuwa nzulo na bɛali ɛɣɛlɛ mvʋlɔ. Ɩávalɩ nwʋmɔ mɔɔ yɛ anyɩ deli nwʋmɔ bela nɩ, ɩsɛ kɛɛ yekila kɛɛ nninyeni mɔɔ yɛfa yede yɛ anyɩ nɩ “ɩkɔzɔ ye Niibenyia yɩ anyɩ.” (Ɛfɩsɛsɩmaa 5:10) Nwʋmɔ hyinyia paa kɛɛ yɛkɛdɩ eyi tʋ iluwakɛɛ nnɛ, nninyeni sʋ̃maa yɛ mmenii fa de bɛ anyɩ mɔɔ Gyehova anyɩ iáleli nwʋmɔ a. Ɔzɔ nninyeni yi be yɛ lɛ anyɩnlɩlelɛdɩyɛ mɔɔ awulilɛ, ɛbɩlazɩkɛlɛ, anzɛnyɩɩ azunzuma ndwokɔ wɔ numɔ. (Kɩnga Ndwomi 11:5.) Mɩnla yɛ ɩkɔhʋla ɩkɔwʋwa yɛ ma yekezi pɔkɔba wɔ nninyeni mɔɔ yɛfa yede yɛ anyɩ nwʋ a?

Sɛ yɛfa mmenii mɔɔ bɔdɔ Gyehova ɔhɔnwʋ a, sa bɔkʋla bɔbʋwa yɛ na yɛazi pɔkɔba wɔ nninyeni mɔɔ yɛfa yede yɛ anyɩ nɩ nwʋ. Kɛmɔ yeli bɔmʋnlɩ yezuma nɩ, “enii mɔɔ ɩ nɩɩ nɣɛlɛbɛmaa bɔ nɩ ɩkɛyɛ nɣɛlɛbɛvʋlɔ.” Ɔzɔ la sʋ̃ yɛ sɛ yɛkɔlɩ ɔzʋlɔ yɛ nɩɩ bɛzabɛ mɔɔ bɛálɔ Nyamɩnlɩ nɩ bɔ a, ‘ikowieli yɛ tanɩ’ a.—Ɛɣɛlɛwulɛ 13:20.

2. Mɩnla ti yɛ nwʋmɔ ihyinyia kɛɛ yekila mmɩlɩ dʋdʋ mɔɔ yɛfa yede yɛ anyɩ nɩ bʋwɔ a?

Sɛ mɔɔ yɛfa yede yɛ anyɩ nɩ ɩfata po a, ɩsɛ kɛɛ yekila bʋwɔ na yɛázɩkɛlɩ mmɩlɩ sʋ̃maa wɔ nwʋmɔ. Kɛ zɔ a, yelényia mmɩlɩ sʋ̃maa yɛkɛyɛ nninyeni mɔɔ nwʋmɔ hyinyia baaba paa nɩ. Bayɩbʋlʋ tu yɛ fʋlɔ kɛɛ “yɛva yɛ mmɩlɩ yɛyɛ nninyeni mɔɔ nwʋmɔ ihyinyia.”—Kɩnga Ɛfɩsɛsɩmaa 5:15, 16, NWT.

SUMÁ SƲ̃MAA

Sumá kezimɔ ekezizi abɔkɔba wɔ nninyeni mɔɔ ɛfa de wʋ anyɩ nɩ nwʋ.

3. Pʋ́ anyɩnlɩlelɛdɩyɛ mɔɔ ɩávata

Mɩnla ti mɔɔ ɩsɛ kɛɛ yekila nninyeni mɔɔ yɛfa yede yɛ anyɩ nɩ bʋwɔ a? Yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ili ɛkɛnɩ nɩ nwʋ.

VIDIYO: Mɩnla Nninyeni Yɛ Ɩsɛ Kɛɛ Mɩfa Mide Mɩ Anyɩ a? (4:39)

Mɩnla ɔhʋanɩ zʋ yɛ ɛɣɛlɛlilɛ mɔɔ nɩ ɩkɔlɩ ɔzʋlɔ wɔ ɔwɔkɩ Wulomi nɩ, ɩ nɩɩ nnɛ dɩyɛ di nsɛ a?
Wɔ vidiyo yi nu nɩ, mɩnla yɛ Danny zumanlɩ valɩ anyɩnlɩlelɛdɩyɛ nwʋ a?

Kɩnga Wulomimaa 12:9, na akʋ̃ bozunzú odwokɔɣizialɛ eyi nwʋ:

Sɛ ɛpɩbɛɛ nninyeni mɔɔ ɛkɛva kele wʋ anyɩ a, kɛ ɛhɛlɛlɛ odwokɔ eyi kɔwʋwa wʋ keze a?

Nninyeni mɔɔ Gyehova kyi nɩ ebiye yɛ lɛ mɩnla a? Kɩnga Ɛɣɛlɛwulɛ 6:16, 17 nɩɩ Galatiyiamaa 5:19-21. Sɛ bɛkɩnga ɛhɛlɛlɛ ndwokɔ eyi nu ɔkʋ̃ bela bowie a, bozunzú odwokɔɣizialɛ eyi nwʋ:

Nninyeni mɔɔ bɔwʋwɔ ɔzʋlɔ wɔ ɛhɛlɛlɛ odwokɔ eyi nu nɩ, numɔ ɛhɩnla dɩyɛ yɛ yɛnwʋ yɩ wɔ anyɩnlɩlelɛdɩyɛ nu wɔ nnɛ a?

Ndwokɔɣizialɛ mɔɔ ɩkɔwʋwa wʋ ma ɛkɛyɩ anyɩnlɩlelɛdɩyɛ mɔɔ ɩfata

Biziá wʋ nwʋ kɛɛ:

Asʋ̃ dɩyɛ be wɔ numɔ mɔɔ Gyehova kyi a?
Asʋ̃ ikele mmɩlɩ mɔ ɩsɛ kɛɛ mɩfa mɩyɛ nninyeni mɔɔ nwʋmɔ hyinyia paa nɩ a?
Asʋ̃ ɩkɛma mɩkɛva mʋ nwʋ mʋkɔwɔ mmenii mɔɔ bɛálɔ Gyehova a?

Kɛmɔ yɛyɛ mɔɔ yɛkɔhʋla bela yɛtwɩ̃ yɛ nwʋ kʋlaa wɔ nninyeni mɔɔ ɩkɔhʋla ɩkɛva yɛ ikediã asianɩ nu nwʋ nɩ, ɔzɔ la sʋ̃ yɛ ihyinyia kɛɛ yɛtwɩ̃ yɛ nwʋ kʋlaa wɔ anyɩnlɩlelɛdɩyɛ bela mɔɔ yesunzu kɛɛ ɩ́dɩ baaba ɩma yɛ nɩ nwʋ a

Kaalɩ be iluwaa file be yi munwa. Kaalɩ yɩ mɛda ɩwɔ yɩ tʋ kɛɛ ɩtʋlʋʋ ɩkɔhɔ azɩ.

4. Fá wʋ mmɩlɩ di egyima bʋwɔ

Yɩ́ VIDIYO nɩ, na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.

VIDIYO: Mɩnla Yɛ Ide Wʋ Mmɩlɩ Paa a? (2:45)

Ɩwɔ numɔ kɛɛ nɩ eliyema benyia mɔɔ ɩwɔ vidiyo yi nu nɩ iáhila nninyeni tanɩ dɩyɛ, naasʋ̃ mɩnla yɛ nɩ ididee yɩ a?

Kɩnga Fɩlɩpɩmaa 1:10, na akʋ̃ bozunzú odwokɔɣizialɛ eyi nwʋ:

Mɩnla ɔhʋanɩ zʋ yɛ ɛhɛlɛlɛ odwokɔ eyi kɔhʋla kɔwʋwa yɛ ma yɛkɔnwʋ mmɩlɩ dʋdʋ mɔɔ ɩsɛ kɛɛ yɛfa yede yɛ anyɩ a?

5. Pɩbɛ́ anyɩnlɩlelɛdɩyɛ mɔɔ ɩfata

Ɩwɔ numɔ kɛɛ anyɩnlɩlelɛdɩyɛ be wɔ ɛkɛnɩ mɔɔ Gyehova anyɩ iáleli nwʋmɔ dɩyɛ, naasʋ̃ ebiye sʋ̃ wɔ ɛkɛnɩ mɔɔ odwokɔ bela íni nwʋmɔ. Kɩnga Odwokɔhanlɛvʋlɔ 8:15 nɩɩ Fɩlɩpɩmaa 4:8, na akʋ̃ bozunzú odwokɔɣizialɛ eyi nwʋ:

Anyɩnlɩlelɛdɩyɛ mɔɔ ɩfata ɛhɩnla dɩyɛ yɛ wʋ anyɩ ideli nwʋmɔ a?

Mfonyini: Mmenii mɔɔ ɩsʋnɩ abiyela yɩ ɔlʋbɔ mɔɔ ili nɩ, bɛlɛ nninyeni mɔɔ ɩfata bedee bɛ anyɩ. 1. Kuakula baalɛ be ɩdʋlɔɔ mfonyini mmɩlɩ mɔ itiyee ndwomi nɩ. 2. Mmɩlantɩyɛ asã be bɔbɔɔ basketball. 3. Nnwuakula mmenyia anwɩ̃ be botwii bicycle. 4. Kuakula benyia be ɩhyɩhyɛɛ kaalɩ. 5. Benyia be ɩbɔɔ baanʋ. 6. Kuakula benyia be ɩ nɩɩ yɩ papa bɔbɔɔ vidiyo geemi. 7. Baalɛ be ituaa mfonyini. — Sa ɔkʋla ɛfa nninyeni mɔɔ ɩfata ede wʋ anyɩ

ABIYEMMƆ BƐKÃ KƐƐ: “Sɛ ɛfa nninyeni mɔɔ awulilɛ, ɛbɩlazɩkɛlɛ, nɩɩ azunzuma ndwokɔ wɔ numɔ ede wʋ anyɩ a, mfʋmɩ bela íni nwʋmɔ. Mɔɔ ihyinyia yɛ lɛ kɛɛ, ɛlɛ́yɛ ebiye.”