Fá Wʋ Ɔhɔnwʋmmɔ Wɔ Nɣɛlɛbɛ Nu

Ɔhɔnwʋmmɔ baaba ma yɛ anyɩ de wɔ mmɩlɩ baaba nu na bɔbʋwa yɛ sʋ̃ wɔ mmɩlɩ mɔ nninyeni nu yɛ sɩ nɩ. Naasʋ̃ Bayɩbʋlʋ ɩbɔ yɛ kɔkɔ kɛɛ, kɛ abiyela yɛ ɩdɩ ɔhɔnwʋba a. Meti, kɛ ɩkɛyɛ na wʋava ɔhɔnwʋba a? Sunzú ndwokɔɣizialɛ eyimmɔ nwʋ.

1. Mɩnla tumi yɛ wʋ ɔhɔnwʋmmɔ kɔhʋla kenyia wɔ wʋ zʋ a?

Bɛta bɛkã kɛɛ, kile mɩ wʋ ɔhɔnwʋ na mihile wʋ subanɩ. Ɔzɔ odwokɔ yɩ ikile kɛɛ, ɔhɔnwʋmmɔ mɔɔ bebike yɛ anzɛnyɩɩ bɔwɔ sohyiya midiya zʋ nɩ, sa yɛkʋla yesuma bo subanɩba anzɛnyɩɩ bo subanɩ tanɩ nɩ be. Kɛmɔ Bayɩbʋlʋ ɩkã nɩ, “enii mɔɔ ɩ nɩɩ nɣɛlɛbɛmaa bɔ nɩ ɩkɛyɛ nɣɛlɛbɛvʋlɔ, na enii mɔɔ ɩ nɩɩ ahwasɩya [bɛzabɛ mɔɔ bɛálɔ Gyehova] bɔ nɩ, ikowieli yi tanɩ.” (Ɛɣɛlɛwulɛ 13:20) Sɛ ɛfa ɔhɔnwʋmmɔ mɔɔ bɔdɔ Gyehova na bɔsʋ̃mɩ yɩ a, ɩkɔwʋwa wʋ ma ekeɣike Gyehova na wʋazizi abɔkɔ baaba. Naasʋ̃ bɛzabɛ mɔɔ bɛázʋ̃mɩ Gyehova nɩ, sa bɔkʋla bɛma yɛtwɩ̃ yɛ nwʋ wɔ Gyehova nwʋ. Ɩáyɛ nnwʋánlɩ kɛɛ Bayɩbʋlʋ ɩhyɛ yɛ ɛzɩzɩbɛ kɛɛ yɛvá ɔhɔnwʋmmɔ wɔ nɣɛlɛbɛ nu! Sɛ yɛfa ɔhɔnwʋmmɔ mɔɔ bɔdɔ Nyamɩnlɩ a, yɛ nɩɩ bo munwala kenyia ɔzʋlɔ mfasʋ. Ɩma yɛkʋla ‘yesizi yɛ ɔhɔnwʋmmɔ bɛ kɛnɣa, na yɛbʋwa yɛ nwʋ nkʋ̃kʋ̃ nkʋ̃kʋ̃.’—1 Tɛsalonikamaa 5:11.

2. Mmenii mɔɔ yɛfa bɔ ɔhɔnwʋ nɩ, kɛ ɩma Gyehova ɩtɩ nɣanlɩ ise a?

Kɛ abiyela yɛ Gyehova fa yɩ ɔhɔnwʋ a. “Ɛdɩnɣɛlɛmaa yɛ bɛdɩ yɩ ɔhɔnwʋmmɔ paa a.” (Ɛɣɛlɛwulɛ 3:32) Sɛ yɛfa ɔhɔnwʋmmɔ mɔɔ bɛálɔ Gyehova a, kɛ ɩkɛma ɩkɛdɩ nɣanlɩ ikeze a? Ɩkɛma ikeli ɛyɛkɛ paa! (Kɩnga Gyemisi 4:4, NWT) Naasʋ̃ sɛ yɛpʋ ɔhɔnwʋmmɔ tanɩ na yebike Gyehova nɩɩ bɛzabɛ mɔɔ bɔdɔ yɩ nɩ a, yɩ anyɩ keleli yɛ nwʋ na ɩava yɛ ɔhɔnwʋ.—Ndwomi 15:1-4.

SUMÁ SƲ̃MAA

3. Kilá wʋ nwʋ bʋwɔ wɔ ɔhɔnwʋmmɔ tanɩ nwʋ

Mmenii mɔɔ bɛálɔ Nyamɩnlɩ nɩɩ yɩ mmɛla nɩ, bɛdɩ ɔhɔnwʋmmɔ tanɩ. Yɩ́ VIDIYO nɩ, na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.

VIDIYO: Sumá Kɛɛ Ɔkɔbʋ Ɔhɔnwʋ Tanɩ (6:17)

• Mɩnla ɔhʋanɩ zʋ yɛ yɛkɔhʋla yɛ nɩɩ ɔhɔnwʋmmɔ tanɩ kɔwɔ wɔ mmɩlɩ mɔ yɛ anyɩ ɩála a?

Kɩnga 1 Kɔlɛntɩmaa 15:33, na akʋ̃ bozunzú ndwokɔɣizialɛ eyimmɔ nwʋ:

• Mɩnla subanɩ yɛ sɛ abiye da yɩ ali a, ikile kɛɛ ɩdɩ ɔhɔnwʋ tanɩ a? Mɩnla ti a?

Kɩnga Ndwomi 119:63, na akʋ̃ bozunzú odwokɔɣizialɛ eyi nwʋ:

• Mɩnla yɛ ɩkɛma ɔkɔnwʋ kɛɛ abiye ɩdɩ ɔhɔnwʋba a?

4. Sa yɛkʋla yɛfa mmenii mɔɔ ɩsʋnɩ dɩka mɔɔ bɔzʋ̃, nnwuakula nɩɩ mbanimbani munwala ɔhɔnwʋ

Bayɩbʋlʋ ɩkã Devidi nɩɩ Dwonatanɩ mɔɔ bɔwʋwalɩ azɩ wɔ ɔwɔkɩ Yizilaya nwʋ odwokɔ. Nɩ ɩsʋnɩ bo nu bela yɩ ɔlʋbɔ nɩɩ yɩ bʋwabɩlɛ dɩyɛ, naasʋ̃ nɩ bɛdɩ ɔhɔnwʋmmɔ baaba paa. Kɩnga 1 Samʋwɛlɩ 18:1, na akʋ̃ bozunzú odwokɔɣizialɛ eyi nwʋ:

• Mɩnla ti mɔɔ íni kɛɛ yɛfa mmenii mɔɔ yɛ nɩɩ be gyinabʋ ɩdɩ ɔkʋ̃ anzɛnyɩɩ yɛ nɩɩ bɛ bɔ atipɛnɩ nkʋ̃ la ɔhɔnwʋ a?

Kɩnga Wulomimaa 1:11, 12, na akʋ̃ bozunzú odwokɔɣizialɛ eyi nwʋ:

• Mɩnla ɔhʋanɩ zʋ yɛ ɔhɔnwʋmmɔ mɔɔ bɔdɔ Gyehova kɔhʋla kɛhyɛ bɔ nwʋ bɔ nwʋ ɛzɩzɩbɛ a?

Wɔ vidiyo eyi nu nɩ, kilá kezimɔ abɩlantɩyɛ be nyianlɩ ɔhɔnwʋ wɔ dɩka mɔɔ nɩ iáhila yɩ ɔhʋanɩ. Yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ili ɛkɛnɩ nɩ nwʋ.

VIDIYO: Pɩbɛ Ɔhɔnwʋmmɔ Wɔ Nnɩka Mɔɔ Wʋáhila Yɩ Ɔhʋanɩ (5:06)

• Wɔ vidiyo yi nu nɩ, mɩnla ti yɛ ɔhɔnwʋmmɔ mɔɔ Akil valɩ bɛ wɔ sukuulu nɩ, nwʋmɔ odwokɔ lileli yɩ awʋvʋlɔ a?

• Bɔmʋnlɩ nɩ, mɩnla yɛ ɩmanlɩ ɩvalɩ ɔzɔ mmenii yi ɔhɔnwʋ a?

• Kɛ ɩyɛlɩ mɔɔ ɩhʋlalɩ ilili yɩ ankʋnamɩyɛlɛ zʋ a?

5. Kezimɔ yekenyia ɔhɔnwʋmmɔ baaba

VIDIYO: Aninyia Paa Yɛ Ɩdɩ Ɔhɔnwʋba a? (4:14)

Kɩnga Ɛɣɛlɛwulɛ 18:24 nɩɩ 27:17, na akʋ̃ bozunzú ndwokɔɣizialɛ eyimmɔ nwʋ:

• Mɩnla ɔhʋanɩ zʋ yɛ ɔhɔnwʋmmɔba bʋwa bɔ nwʋ a?

• Asʋ̃ ɔwɔ ɔhɔnwʋmmɔ mɔɔ bɛdɩ ɔzɔ a? Sɛ éni ebiye a, kɛ ɩkɛyɛ na wʋanyia ebiye a?

Kɩnga Fɩlɩpɩmaa 2:4, na akʋ̃ bozunzú odwokɔɣizialɛ eyi nwʋ:

• Sɛ ɛpɛ kɛɛ enyia ɔhɔnwʋmmɔ baaba a, ɩsɛ kɛɛ wʋzawʋ sʋ̃ ɛyɛ ɔhɔnwʋba. Kɛ ɛkɛyɛ eyi keze a?

YƖ DƆKƆWƆLƐ

Sɛ yɛfa ɔhɔnwʋmmɔ baaba a, yɛma Gyehova anyɩ de na yɛzayɛ sʋ̃ yenyia ɔzʋlɔ mfasʋ.

Kɛ Okowuwa Ekeze a?

• Mɩnla ti yɛ ɔhɔnwʋ kʋ̃ mɔɔ yɛkɛva nɩ, nwʋmɔ odwokɔ hyinyia Gyehova a?

• Aninyiammɔ yɛ íni kɛɛ yɛfa bɔ ɔhɔnwʋ a?

• Mɩnla ɔhʋanɩ zʋ yɛ yɛkɔhʋla yɛ nɩɩ bɛzabɛ mɔɔ bɔwɔ subanɩba kɛva ɔhɔnwʋ ɛzɩzɩbɛ ɛzɩzɩbɛ a?

PƖBƐ́ SƲ̃MAA

Kilá kezimɔ ɔhɔnwʋmmɔ baaba kɔhʋla kɔwʋwa yɛ wɔ mmɩlɩ mɔ yeyiyiaa ndwokɔzɩzɩbɛ nɩ.

“Ɛ Nɩɩ Wʋ Mmeliyema Bɛva Ɔhɔnwʋ Ɛzɩzɩbɛ Ɛzɩzɩbɛ Ansaana Awielɩyɛ Nɩ Ɩaɣa” (Ɔwɩɛnɩlɛ Aɣanɩ, November 2019)

Kilá mɔɔ ɔkɔhʋla ɛkɛyɛ na ama wʋanyia ɔhɔnwʋmmɔ baaba.

“Kɛ Ɩkɛyɛ Na Mianyia Ɔhɔnwʋmmɔ Baaba a?” (Ndwokɔ Mɔɔ Mmɩlantɩyɛ Nɩɩ Nɣɛdɛkɛ Bebizia—Munwalɩyɛ Mɔɔ Ɩkɔwʋwa Bɛ, Ɔfʋã 1, yi ti 8)

Mɩnla yɛ ɩsɛ kɛɛ ɔnwʋ wɔ intanɛtɩ zʋ ɔhɔnwʋvalɛ nwʋ a?

Ma Wʋ Anyɩ Ɩlá Ɛkɛ Wɔ Intanɛtɩ Zʋ Nkitanwʋlilɛ Nwʋ (4:12)

Wɔ odwokɔ mɔɔ ise “Nɩ Mɩpɩbɛɛ Mɩ Zɩ” nu nɩ, kilá mɔɔ ɩwʋwalɩ benyia be ma izia izunzunli mmenii mɔɔ ɩfa bɔ ɔhɔnwʋ nɩ nwʋ.

“Bayɩbʋlʋ Ɩsɩnza Ɛbɩlawɔlɛ” (Ɔwɩɛnɩlɛ Aɣanɩ, April 1, 2012)