Bɔwɔ Nu Bɔzʋ̃mɩ Gyehova Kɛɛ Abusunwa

Kɛmɔ ozuma wɔ blohyʋɔ eyi nu nɩ, egyinalɛzʋ-ndwokɔ sʋ̃maa wɔ Bayɩbʋlʋ yɩ nu mɔɔ ɩkɔwʋwa wʋzawʋ nɩɩ wʋ abusunwa. Gyehova ɩpɛ kɛɛ wʋ anyɩ ide. Ɩwɔ anʋhʋba kɛɛ, sɛ ɛfa yɩ ɔzʋ̃mɩnlɛ edi bɔmʋnlɩ a, ‘ɩkɛva eyimmɔ munwatĩĩ ɩkɛhɩnla nwʋmɔ wʋ.’ (Matiyu 6:33) Ɩpɛ paa kɛɛ ɛkɛyɛ yɩ ɔhɔnwʋ. Fa ɔnwʋmɔ ɔhʋanɩ mɔɔ ekenyia bela nɩ hyɛ ɔhɔnwʋvalɛ mɔɔ ɛ nɩɩ Nyamɩnlɩ bɔwɔ nɩ nu ɛzɩzɩbɛ. Eyi ɩdɩ ɔnwʋmɔ ɔhʋanɩ kezile mɔɔ abiye ɩkɔhʋla ikenyia.—Matiyu 22:37, 38.

1 HYƐ́ Ɛ NƖƖ GYEHOVA BƐ ABUSUNWAWƆLƐ YƖ NU ƐZƖZƖBƐ

MƆ BAYƖBƲLƲ YƖ ƖKÃ: “Mɩkɛyɛ ɛzɩlɛ mɩkɛma mʋnlʋmmɔ na mʋnlʋmmɔ bɛayɛ mɩ mma mmenyia nɩɩ mmaalɛ, kɛ Niibenyia Nyamɩnlɩ ise yɛ nɩ.” (2 Kɔlɛntɩmaa 6:18) Nyamɩnlɩ ɩpɛ kɛɛ ɛba ɛyɛ yɩ ɔhɔnwʋ baaba paa. Mpayɩwɔlɛ ɩdɩ ɔhʋanɩ ɔkʋ̃ mɔɔ ɔkɔhʋla okoluwa zʋ ɛkɛyɛ ɔzɔ. Gyehova ɩtʋ salɛ ɩfʋlɔ wʋ kɛɛ ‘bɔ́ mpayɩ eɣile bela.’ (1 Tɛsalonikamaa 5:17) Iziyeziye yɩ nwʋ kɛɛ ikediye wʋ ahʋnlɩnɩ nu odwokɔ nɩɩ wʋ ahyinyiadɩ. (Fɩlɩpɩmaa 4:6) Sɛ ɛ nɩɩ wʋ abusunwa bɔbɔ numɔ bɔbɔ mpayɩ a, ɩkɛma bɔkɔnwʋ kezimɔ ede Nyamɩnlɩ edi kɛɛ ɩwɔ ɛkɛnɩ.

Mɔɔ ɩkɩnla mpayɩ mɔ ɔkɔwɔ Nyamɩnlɩ nwʋ nɩ, ihyinyia kɛɛ etiye yɩ sʋ̃. Ɔkɔhʋla ɛkɛyɛ eyi iluwa yɩ Odwokɔ nɩɩ awuuku mɔɔ igyĩ Bayɩbʋlʋ ɩzʋ mɔɔ okozuma nɩ ɩzʋ. (Psalm 1:1, 2, NWT) Dwɩnɩndwɩnɩ mɔɔ osuma nɩ nwʋ. (Psalm 77:11, 12, NWT) Kɛ ekediye Nyamɩnlɩ sʋ̃ nɩ ihyinyia kɛɛ ɔkɔ Kilisinyianɩ ayiyialɩyɛ eɣile bela.—Hibulumaa 10:24, 25.

Gyehova ɩnwʋ odwokɔ mɔɔ ɛkɛhã ekehile mmenii mvʋlɔ sʋ̃ nɩ, ɩdɩ ɔhʋanɩ fʋlɔ mɔɔ ihyinyia mɔɔ ɔkɔhʋla ɛkɛhyɛ ɛ nɩɩ Gyehova bɛ abusunwawɔlɛ nɩ nu ɛzɩzɩbɛ. Mbɔmɩ sʋ̃maa mɔɔ ɛyɛ ɔzɔ nɩ, mbɔmɩ sʋ̃maa nɩ la yɛ ɛkɛdɩ nɣanlɩ kɛɛ eɣike yɩ a.—Egyima 1:8.

MƆ ƆKƆHƲLA ƐKƐYƐ:

• Belé mmɩlɩ eɣile bela na bɛva bɛɣɩnga Bayɩbʋlʋ na bɔwɔ numɔ bɔwɔ mpayɩ

• Kɛ abusunwa nɩ, bɛma sunzuma nu nninyeni ihyinyia bɛ sʋ̃maa ɩdɛla nninyeni mɔɔ bɛfa bedide bɛ anyɩ nɩɩ mɔɔ bɛfa botwudwo bɔ nwʋ

2 BƐYƐ́ ABUSUNWA ƆZƲ̃MƖNLƐ

MƆ BAYƖBƲLƲ YƖ ƖKÃ: “Mʋnlʋmmɔ bɔhwɩ̃ beɣike Nyamɩnlɩ na yɩzayɩ sʋ̃ ɩkɔhwɩ̃ ikeɣike mʋnlʋmmɔ.” (Gyemisi 4:8) Ihyinyia kɛɛ ɛyɛ abusunwa ɔzʋ̃mɩnlɛ nwʋ nhyɩhyɛlɩyɛ na wʋawɔ mmɔdɩnɩ kɛɛ ekeli ɔzʋlɔ. (Genesis 18:19, NWT) Naasʋ̃ sʋ̃maa wɔ ɛkɛnɩ mɔɔ ɩsɛ kɛɛ ɛyɛ. Ɩsɛ kɛɛ ɛma Nyamɩnlɩ ɩkɩnla wʋ nwʋ wɔ wʋ ɛbɩlawɔlɛ nu eɣile bela. Hyɛ́ ɔhɔnwʋvalɛ mɔɔ wʋ abusunwa bɛ nɩɩ Nyamɩnlɩ wɔ nɩ nu ɛzɩzɩbɛ iluwa ɛhanlɛ mɔɔ ɛkɛhã Nyamɩnlɩ yɩ nwʋ odwokɔ ekehile bɛ “mmɩlɩ mɔɔ ɛda wʋ awudo, mmɩlɩ mɔɔ oluwa ɔhʋanɩ zʋ, mmɩlɩ mɔɔ ɛla ɛkɛnɩ, nɩɩ mmɩlɩ mɔɔ odwodwu.” (Deuteronomy 6:6, 7, NWT) Fa siye wʋ anyɩ zʋ kɛɛ ɛkɛyɛ kɛɛ Dwohyuwa mɔɔ ɩhanlɩ kɛɛ “Mamɩ nɩɩ mɩ awudomaa mɛyɩ, sa yɛsʋ̃mɩ Gyehova.”—Joshua 24:15, NWT.

MƆ ƆKƆHƲLA ƐKƐYƐ:

• Nwʋ wʋ abusunwa nu enii bela yɩ ahyinyiadɩ na fa yɛ wʋ abusunwa ɔzʋ̃mɩnlɛ nwʋ nhyɩhyɛlɩyɛ