Kɛ Ɩkɛyɛ Na Yɛawʋwa Ma Bɛaziyeziye Bulombunli Ayiyialɩyɛ Aliyia Nu a?

Nyamɩnlɩ yi dima nwanzanwanza yɩ nɩ ɩla Gyehova Dasɩvʋlɔmaa bɛ Bulombunli Ayiyialɩyɛ Aliyia bela zʋ. Meti, yɛtɩ nɣanlɩ kɛɛ ɩdɩ ɔnwʋmɔ ɔhʋanɩ mɔɔ yenyia kɛɛ yɛkɔwʋwa ma aliyia yɩ nu ɩkɛdɩ, ɩkɛyɛ mɔɔ ɩfata, na yɛaziyeziye yɩ bʋwɔ. Ɩdɩ yɛ ɔzʋ̃mɩnlɛ mɔɔ ɔnwʋmɔ ɩtɩ yɩ ɔfʋã mɔɔ ihyinyia. Sa abiyela kʋla fa yɩ nwʋ wula nu.

Bɔpɔ ayiyialɩyɛ a, tu wʋ nwʋ siye ɛkɛnɩ ma besiyeziye ɛkɛ. Sɛ bɔpɔ ayiyialɩyɛ bela a, mmeliyema mmenyia nɩɩ mmalɛ bɛfa anyɩnlɩlelɛ besiyeziye Bulombunli Ayiyialɩyɛ Aliyia nɩɩ ayuwalɩyɛ nu ma ɛkɛnɩ ɩtɩ. Igyĩ kɛmɔ bʋwabɩlɛ mɔɔ ɩwɔ ɛkɛnɩ ɩdɩ nɩ, eɣile ɔkʋ̃ wɔ dapɛnɩ anzɛnyɩɩ eziyianɩ nu nɩ, yesiyeziye ɛkɛnɩ bʋwɔ. Asafʋ nu ebani anzɛnyɩɩ sʋ̃mɩvʋlɔ yɛ ikila egyima yɩ zʋ a, bekila nhyɩhyɛlɩyɛ mɔɔ bɛhɛlɛ yɩ wɔ kɛlɛta zʋ yɛ bɛfa bɛyɛ a. Kɛmɔ bɛ ahyinyiadɩ ɩdɩ nɩ, abiyela itu yɩ nwʋ isiye ɛkɛnɩ ma bɔpʋnwa, botwutwu anzɛnyɩɩ bɛpɩba azɩ, bɛpɩba ndudulubo, bɛyɩyɩ ndɛndanlɩ na bɛpɩba ayuwa yɩ nwʋ na bɛhyɩhyɛ yɩ pɛpɛɛpɛ, besiyeziye ayuwalɩyɛ nɩɩ tiyiafĩ yɩ nu, bɛpɩba ndokulo nɩɩ awɔhwɛ nu, botu owula bokua, anzɛnyɩɩ besiyeziye aliyia yɩ nwʋ bɔdʋdɔ ɔnwʋmɔ. Ɩáyɛ bʋwɔ kʋlaa nɩ ɔlʋbɔ bela nɩ, bɛyɩ eɣile ɔkʋ̃ besiye ahanlɩ bɛfa botu ɛkɛnɩ besiyeziye ɛkɛnɩ bʋwɔ. Sɛ yɛma yɛ nnwuakula bɛkɩnla nwʋ ma yesiyeziye ɛkɛnɩ a, nɩ yekile bɛ ma bekehile annidi bɛkɛma dɩka mɔɔ yɛsʋ̃mɩ nɩ.—Ecclesiastes 5:1, NW.

Bʋwa ma bɛyɛ nninyeni mɔɔ ɩzɩkɛzɩkɛ yɩ nɩ bʋwɔ. Ɔlʋbɔ bela nɩ, bekila Bolumbunli Ayiyialɩyɛ Aliyia yɩ nu nɩɩ ɔnwʋmɔ munwala bʋwɔ. Na igyĩ mɔɔ bɔkɔnwʋ yɩ zʋ nɩ, bɛyɛ nhyɩhyɛlɩyɛ besiyeziye nninyeni mɔɔ ɩzɩkɛzɩkɛ yɩ nɩ bʋwɔ na ama aliyia yɩ nɩ ianyia anwʋzɩzɩbɛ, eyi ɩbʋwa ma bɛáwɔ kakɛ mbʋanlɩ mbʋanlɩ. (2 Chronicles 24:13; 34:10, NW) Bolumbunli Ayiyialɩyɛ Aliyia mɔɔ ɔnwʋmɔ ɩtɩ na beziyeziye ɛkɛnɩ bʋwɔ nɩ ɩdɩ dɩka mɔɔ ɩfata mɔɔ yɛsʋ̃mɩ yɛ Nyamɩnlɩ. Yekile kɛɛ yɛdɔ Gyehova na yɛ anyɩ ɩsɔ dɩka mɔɔ yeyiyia numɔ yɛsʋ̃mɩ yɩ nɩ mmɩlɩ mɔɔ yɛzʋ̃ yɛ ahʋnlɩnɩ nu yɛfa yɛ nwʋ yewula egyima eyi nu nɩ. (Psalm 122:1, NW) Eyi sʋ̃ idi dasɩlɛ baaba wɔ yɛ apaa yɩ nu ɛkɛnɩ.—2 Kɔlɛntɩmaa 6:3.

• Mɩnla ti mɔɔ íni kɛɛ yebu yɛ anyɩ yekua dɩka mɔɔ yɛsʋ̃mɩ yɩ zʋ a?

• Mɩnla nhyɩhyɛlɩyɛ yɛɛ bɛyɛ na ama Bolumbunli Ayiyialɩyɛ Aliyia ɛkɛnɩ adɩ a?