OZUMALƐDƖYƐ 25
Bulombunli Ayiyialɩyɛ Nniyia—Mɩnla Ti, Na Mɩnla Ɔhʋanɩ Zʋ Yɛɛ Bekyina a?
Bolivia
Nigeria, ansaana bɛbagyina nɩɩ mmɩlɩ mɔɔ bowieli
Tahiti
Kɛmɔ dima Bulombunli Ayiyialɩyɛ Aliyia ikile nɩ, Bayɩbʋlʋ ehilehilelɛ mɔɔ bosunzu ɔnwʋmɔ wɔ ɛkɛnɩ nɩ igyĩ Nyamɩnlɩ yi Bulombunlililɛ nɩ zʋ—mɛyɩ sʋ̃ yɛɛ nɩ Gyisɛsɩ yɩ ɔzʋ̃mɩnlɛ egyima nɩ igyĩ zʋ a.—Luuku 8:1.
Ɩdɩ nnɩka mɔɔ nɔhʋanlɛ ɔzʋ̃mɩnlɛ ɩkɔlɩ ɔzʋlɔ. Ɛzɛ dɩka eyi yɛɛ yɛyɛ nhyɩhyɛlɩyɛ yɛkɔ yɛkã odwokɔba mɔɔ ɩfalɩ Nyamɩnlɩ yɩ Bulombunlililɛ yɩ nwʋ a. (Matiyu 24:14) Ɔsʋnɩ Bulombunli Ayiyialɩyɛ Nniyia bela yɩ kezile nɩɩ kezimɔ begyina yɩ, nansʋ̃ ɩáyɛ nɣezile ɩbʋlʋ zʋ anzɛnyɩɩ kukuntanyɩɩ, ebiye a asafʋ mɔɔ ɩbʋ ɔkʋ̃ yɛɛ bɔkɔ kɛ a. Aɣile asã yɩ nu nɩ, yegyina Bulombunli Ayiyialɩyɛ Nniyia mvʋlɔ abʋmɩ abʋmɩ sʋ̃maa (sɛ ɛkyɩkyɛ numɔ pɛpɛɛpɛ a, bekyina anlu eɣile ɔkʋ̃ bela) kɛmɔ ɩkɛyɛ na yɛanyia dɩka yɛama ɛlawulowɔlɛmaa nɩɩ asafʋ sʋ̃maa mɔɔ bɔ dʋdʋ ɩkɔɔ anyunumi nɩ. Kɛ ɩyɛ mɔɔ yɛkʋla yɛyɛ eyi a?—Matiyu 19:26.
Fʋtʋlɔ mɔɔ bɛyɩ nɩ yɛɛ bɛfa bekyina a. Bɛfa ɛzɛ fʋtʋlɔ yɩ nɩ bɔnwʋã egyimayɛlɛ dɩka yɩ nɩ kɛmɔ ɩkɛyɛ a, bekenyia ozukua bɛkɛma asafʋ azʋlɔtʋ mɔɔ behyinyia kɛɛ bekyina anzɛnyɩɩ besia besiyeziye bɛ Bulombunli Ayiyialɩyɛ Aliyia nɩ.
Mmenii mɔɔ bɔzʋ̃ bɛahʋnlɩnɩ nu na ɩsʋ̃nɩ dɩka mɔɔ abiyela zʋ mɔɔ bɛáduwa bɛ kakɛ nɩ yɛɛ bekyina a. Wɔ manlɩ sʋ̃maa nu nɩ, bɛhyɩhyɛ Bulombunli Ayiyialɩyɛ Aliyia Egyinalɛmaa Ahubo Ahubo. Bulombunli Ayiyialɩyɛ Aliyia egyinalɛmaa okuwu nɩɩ mmenii mɔɔ bodu bɔnwʋ bɛma nɩ bɔzʋ̃ asafʋ ɔkʋ̃ nu bɔkɔ fʋlɔ nu wɔ manlɩ yɩ nu, ɩyɛ po a, bɔkɔ nzuwalɩyɛ, na bɔkɔ bɔbʋwa asafʋ mɔɔ behyinyia kɛɛ bekyina Bulombunli Ayiyialɩyɛ Nniyia bɛma bɛ nɩ. Wɔ manlɩ mvʋlɔ nu nɩ, bɛyɩ Dasɩvʋlɔmaa be mɔɔ bɛfata kɛɛ behila Bulombunli Ayiyialɩyɛ Nniyia mɔɔ bekyinangyina na besiyeziye yɩ wɔ mansini mɔɔ bɛva bowula bɛ sa nɩ zʋ. Ɩwɔ numɔ kɛɛ egyimayɛlɛmaa mɔɔ bezi egyima nɩ tu bɔnwʋ ma wɔ aliyia yɩ gyinalɛ dɩka yɩ nɩ dɩyɛ, naasʋ̃ mmeliyema mɔɔ bɔwɔ asafʋ yɩ nu nɩ yɛɛ bɛdɩ egyimayɛlɛmaa mɔɔ bɔnwʋ ɩzʋnɩ a. Gyehova yɩ sunzuma nɩɩ mmenii mɔɔ botu bɔnwʋ bɛma nɩ yɛ ɩma eyi munwala ɩyɛ bɔnwʋ a.—Psalm 127:1, NW; Kolosiyiamaa 3:23.
Mɩnla ti mɔɔ bɔfʋlɛ dɩka mɔ yɛsʋ̃mɩ yɩ nɩ kɛɛ Bulombunli Ayiyialɩyɛ Nniyia?
Kɛ ɩyɛ mɔɔ yɛkʋla yekyinagyina Bulombunli Ayiyialɩyɛ Nniyia wɔ oyuwadɩ yɩ dɩka bela?