JONGMENSE VRA

Moet ek my laat doop? – Deel 1: Wat dit beteken om gedoop te word

Elke jaar laat baie jongmense wat as Jehovah se Getuies grootgemaak word hulle doop. Dink jy daaraan om jou te laat doop? As dit die geval is, moet jy eers verstaan wat toewyding en doop beteken.

Wat is doop?

Die doop waarvan die Bybel praat, beteken dat ’n mens heeltemal onderdompel word in water – nie net dat daar water op jou gesprinkel word nie – en dit simboliseer iets baie belangriks.

Wanneer jy tydens jou doop onder die water gaan, wys jy in die openbaar dat jy nie meer net vir jouself sal lewe nie.
Wanneer jy uit die water opkom, wys dit dat jy ’n nuwe lewe begin wat daarop gefokus is om God se hart bly te maak.

Wanneer jy jou laat doop, erken jy in die openbaar dat Jehovah die gesag het om te besluit wat reg en wat verkeerd is. So wys jy ook vir ander mense dat jy belowe om vrywillig te doen wat Hy van jou vra.

Iets om oor te dink: Hoekom sal jy vir ander mense wil wys dat jy belowe het om ’n lewe van gehoorsaamheid aan Jehovah te lei? Sien 1 Johannes 4:19 en Openbaring 4:11.

Wat is toewyding?

Voordat jy jou laat doop, moet jy jou in ’n private gebed aan Jehovah toewy. Hoe?

In ’n persoonlike gebed sê jy vir Jehovah dat jy belowe om hom vir ewig te dien en dat jy sal doen wat hy van jou vra, maak nie saak wat gebeur of wat ander mense kies om te doen nie.

Wanneer jy jou laat doop, wys jy vir ander dat jy hierdie private toewyding gemaak het. Dit sê vir ander dat jy opgehou het om vir jouself te lewe en nou aan Jehovah behoort. – Matteus 16:24.

Iets om oor te dink: Hoekom word jou lewe beter wanneer jy aan Jehovah behoort? Sien Jesaja 48:17, 18 en Hebreërs 11:6.

Hoekom is doop belangrik?

Jesus het gesê dat doop ’n vereiste is vir sy dissipels (Matteus 28:19, 20). Daarom is doop nog steeds ’n vereiste vir Christene. Om die waarheid te sê, volgens die Bybel is doop nodig om gered te word. – 1 Petrus 3:21.

Maar jou motief moet reg wees – jy moet gedoop word omdat jy Jehovah liefhet en hom waardeer. Jou gesindheid moet soos dié van die psalmis wees, wat geskryf het: “Waarmee sal ek Jehovah terugbetaal vir al die goeie dinge wat hy vir my gedoen het? . . . Ek sal die naam van Jehovah aanroep. Ek sal my geloftes aan Jehovah betaal.” – Psalm 116:12-14.

Iets om oor te dink: Watter goeie dinge het Jehovah vir jou gedoen, en hoe kan jy hom terugbetaal? Sien Deuteronomium 10:12, 13 en Romeine 12:1.

Mites en feite

MITE – Net grootmense is volwasse genoeg om gedoop te word.

FEIT – Dit is nie altyd net ’n mens se ouderdom wat bepaal dat jy volwasse is nie, maar jou liefde vir Jehovah en jou gewilligheid om aan hom gehoorsaam te wees. Toe Josef, Samuel en Josia nog jonk was, het hulle al hierdie soort volwassenheid gehad. Vandag het baie jongmense dit ook.

Die Bybel sê: “Deur sy dade wys ’n kind of sy gedrag rein en reg is.” – Spreuke 20:11.

MITE – As jou vriende gedoop word, moet jy dit ook doen.

FEIT – Die besluit om jou toe te wy en gedoop te word, is ’n persoonlike besluit en moet uit ’n gewillige hart kom. Dit is nie net iets wat ’n mens moet doen wanneer jy mondig geword het of ’n volwasse ouderdom bereik het of omdat jy dink dat ander dit van jou verwag nie.

Die Bybel sê: “[God se] volk sal hulle gewillig aanbied.” – Psalm 110:3.

MITE – As jy nie gedoop is nie, sal jy nie aanspreeklik gehou word vir jou dade nie.

FEIT – Jy word aanspreeklik teenoor Jehovah, nie wanneer jy gedoop word nie, maar wanneer jy weet wat reg en wat verkeerd is in sy oë.

Die Bybel sê: “As iemand dan weet hoe om te doen wat reg is en dit tog nie doen nie, is dit vir hom ’n sonde.” – Jakobus 4:17.

WENK: As jy bang voel vir die verantwoordelikheid daarvan om ’n toegewyde, gedoopte Christen te word en dit vir jou soos ’n swaar las voel, is dit ’n goeie idee om jouself te ondersoek om uit te vind hoekom jy so voel en wat jy kan doen om hierdie gevoelens te oorkom. Jy kan dit doen deur hoofstuk 37 te lees van die boek Vrae wat jongmense vra—Antwoorde wat werk, Deel 2.