Faiza Seid is al vanaf Junie 2009 in die tronk in Eritrea

Jehovah se Getuies in die tronk weens hulle geloof – Volgens land

Vanaf Maart 2026 is meer as 275 Getuies van Jehovah regoor die wêreld in die tronk weens hulle geloof.

Artikel 18 van die Internasionale Verdrag oor Burgerlike en Politieke Regte waarborg die reg op vryheid van denke, gewete en godsdiens. Maar in party lande word Jehovah se Getuies hierdie reg geweier. In daardie plekke kan hulle onregverdig in die tronk gesit en wreed mishandel word omdat hulle hulle geloof beoefen of omdat hulle gewetensbeswaar teen militêre diens het.

Rusland

In April 2017 het die Russiese Hooggeregshof die regsentiteite van Jehovah se Getuies verban en gelikwideer as gevolg van beweerde ekstremistiese bedrywigheid. As gevolg hiervan is plekke van aanbidding toegemaak en afgevat, en hulle lektuur is verbied. Owerhede het toe begin om Getuies as individue aan te val omdat hulle hulle private aanbidding geassosieer het met die organisasie wat verbied is. Die polisie het die Getuies se huise deursoek, en dit het daartoe gelei dat hulle mishandel, op ’n wrede manier ondervra en gearresteer word. Op die oomblik is ten minste 171 Getuies van Jehovah in aanhouding voor hulle verhoor, of besig om ’n vonnis van dwangarbeid of tronkvonnisse uit te dien.

Kliek hier vir ’n lys van al Jehovah se Getuies in Rusland wat op die oomblik in die tronk is weens hulle geloof.

Suid-Korea

Op 26 Oktober 2020 het Suid-Korea alternatiewe burgerlike diens (ACS) vir gewetensbeswaardes beskikbaar gemaak. Maar party mense sê dat hierdie vorm van diens wreed en onregverdig is omdat dit 36 maande lank is, terwyl militêre diens in Suid-Korea gewoonlik net 18 maande lank is. Al was daar hofsake waarin hierdie reëling betwis is, het die Konstitusionele Hof van Suid-Korea in 2024 beslis dat die reëling wettig is en kan voortgaan. Die meeste van Jehovah se Getuies het gekies om ACS te doen, selfs al duur dit langer en is die werksomstandighede baie sleg. Maar, sover, het 15 jong broers beswaar gemaak teen die huidige ACS-reëling. Van die 15 broers is een in die tronk, en ’n hele paar broers wag om verhoor te word, waarna hulle dalk tronk toe gestuur sal word.

Kliek hier vir ’n lys van al Jehovah se Getuies in Suid-Korea wat op die oomblik in die tronk is weens hulle geloof.

“Dink aan dié wat in die tronk is asof julle saam met hulle daar is.” – Hebreërs 13:3.