Visnette in Bybeltye

Bybellesers onthou dalk dat party van Jesus se volgelinge vissermanne was (Mark. 1:​16-20). Hulle het nette gebruik wanneer hulle op die See van Galilea gaan visvang het.

Visnette is gemaak deur tou of linnedraad te knoop om iets te maak wat soos ’n web met baie gate lyk. As ’n visserman klein visse wou vang, het hy ’n net met klein gate gebruik. As hy groter visse wou vang, het hy ’n net met groter gate gebruik. Klein nette het dikwels lood of klippe as gewigte gehad om dit te laat sink, terwyl groot sleepnette gewigte aan die onderkant gehad het, en hout of kurke aan die bokant om dit te laat dryf.

Visnette was duur. Dit kon deur rotse op die seebodem beskadig word of deur die gewig van ’n groot vangs geskeur word (Luk. 5:6). Die Bybel sê dat Jakobus en Johannes “hulle nette reggemaak het” – moontlik deur ’n naald en garing te gebruik (Matt. 4:21). Vissermanne het dalk hierdie herstelwerk gedoen elke keer nadat hulle die net gebruik het. Lukas beskryf ook hoe vissermanne “besig [was] om hulle nette af te was” om enige modder daarvan af te kry (Luk. 5:2). Daarna het vissermanne hulle nette opgehang om dit te laat droog word – moontlik om te keer dat dit vrot. – Eseg. 47:10.

Jesus het mans genooi wat geweet het hoe om nette te gebruik om “vissers van mense” te word.