Vrae van lesers

▪ Is daar ’n verskil tussen “die skepping” en “die skeppingsleer”?

Ja, daar is. Die woord “skepping”, wat sowat 18 keer in die New World Translation of the Holy Scriptures voorkom, het tereg op Jehovah se skeppingswerk betrekking. (Kyk byvoorbeeld Romeine 1:20; 8:21; 2 Korinthiërs 5:17, NW.) Die woord “skeppingsleer” (Engels, “creationism”) kom nie in die Bybel voor nie.

Webster’s Third New International Dictionary (1971) definieer “skepping” as “die handeling van skep”, en “skeppingsleer” as “’n leerstelling of teorie oor skepping”.

In hierdie tagtigerjare is “die skeppingsleer” nie meer ’n neutrale woord nie, maar dit omvat uiterste fundamentalistiese beskouings van die Bybel, soos die beskouing dat God die aarde en alles daarop in ses dae van 24 uur elk geskep het. Daar is nou meer as 350 boeke in sirkulasie wat hierdie “skeppingsleer” uiteensit. Jehovah se Getuies verwerp die onredelike teorieë van “die skeppingsleer” ten gunste van wat die Bybel werklik oor “die skepping” leer.

Kyk asseblief die artikel “Evolusie, die skepping of die skeppingsleer​—Waaraan glo jy?” op bladsye 12-15 van ons medetydskrif Ontwaak! van 22 Julie 1983 vir ’n breedvoeriger antwoord op die bogemelde vraag.