Voorkom verkragting—Baklei!

“DIE mening dat ’n vrou wat haar [teen ’n verkragter] verset heel waarskynlik beseer of gedood sal word, is sommer ouvroupraatjies”, het James Bannon, uitvoerende onderhoof van Detroit se Polisiemag, gesê. “Daar is hoegenaamd geen getuienis om dit te staaf nie.” En dr. Mary Lystad, hoof van die Nasionale Sentrum vir die Voorkoming en Beheer van Verkragting, sê dat nuwe studies bewys dat “vroue wat uiteenlopende vorms van fisiese en sielkundige weerstand gebruik het, soos om te skreeu, te slaan, te byt, te skop en te probeer vlug, beter daarin geslaag het om verkragting te voorkom”.

Maar vroue wat net gehuil het en probeer het om die man om te praat om dit nie te doen nie, is in die meeste gevalle verkrag. Trouens, passiewe vroue loop groter gevaar om ernstig beseer te word as die wat hulle daadwerklik teen die verkragter se toenadering verset. “Moet tog nooit heeltemal passief wees nie”, het Lystad gewaarsku. “Dit wil voorkom of ’n vrou wat optree asof sy swak en weerloos is haar risiko om verkrag te word, vergroot.”

Soortgelyke raad is al lank aan Bybellesers beskikbaar. In eerstydse Israel het die Wet vereis dat ’n vrou wat deur ’n verkragter gemolesteer word, moet skreeu en aldus daadwerklik weerstand moet bied.—Deut. 22:23-27.