Die Skepper kry die eer

“BLOMME is daar om mooi te lyk en vrugte om gebruik te word. Maar baie van die vrugte is mooi. Ons hemelse Vader hou daarvan as bruikbare dinge ook mooi is.” Hierdie aanhaling kom nie uit ’n godsdienshandboek nie. Dit kom uit ’n wetenskapboek met die titel The Child’s Book of Nature. Dit is in 1887 geskryf en die skrywer, Worthington Hooker, M.D., wou hê dat die boek in gesinne en skole vir die onderrigting van kinders gebruik word.

Die skryfstyl in hierdie boek gee blyk van die skrywer se geloof in en ontsag vir die Skepper. Dr. Hooker skryf voorts: “Die verskeidenheid van aangename smake in die vrugte van die aarde is baie groot, soos jy sal sien as jy probeer dink aan soveel as wat jy kan. Wat ’n bewys is dit tog van God se oorvloedige goedheid! Hy bevredig ons nie net met ’n paar dinge nie, maar met baie. Die aangename dinge van hierdie wêreld is feitlik oneindig in hulle verskeidenheid. Hoe vreemd is dit tog dat enigiemand hiervan bewus kan wees en dag vir dag sonder enige dankbaarheid teenoor sy Maker kan voortleef!”

Toe The Child’s Book of Nature vir die eerste keer uitgegee is, was Darwin se teorieë al amper drie dekades lank algemeen bekend. Dr. Hooker se boek het egter getoon dat ’n handboek selfs laat in die 19de eeu die eer vir die natuurwonders openlik aan God kon gee, eerder as aan blinde toeval.—Vergelyk Jesaja 40:26.