Inyalo Fuonjere Nedi Gima Mako Kwoŋ Were?

Inyalo fuonjere gima mako kwoŋ Jehova ka isoma Baibul. Chango chon, Jehova oyero ji ndiko wach pere. Wach ma jondiko ilwoŋo ni Baibul. Konon wafuonjere gima mako kwoŋ Were ka wasoma Baibul. Baibul n’iye wach pa Jehova, amomiyo ilwoŋo ni Wach pa Were. Wanyalo geno gima Baibul wacho rupiri Jehova “kinyal twodo.” (Joebulaniya 6:18) Wach pa Were n’iye adyeri.​—Yohana 17:17.

Baibul obedo mich maber mowok bongi Were. Chale gi balwa ma janywol ma maro nyithindho pere ondiko ri jo. Wacho ri wan kwoŋ chikirok pa Were, nike go kidho loko piny me kabedo maber swa. Wacho ri wan gima Were otimo chango chon, gima go timo pama, kodi gima go letimo i hongo ma bino ri joma geno go. Aka konyo wan i teko mawan, kendo konyo wan limo kisangala.​—2 Timothe 3:16, 17.

Wajulizi pa Jehova jobedo merin pa Were aka jobino konyin iniaŋ gima Baibul fuonjo. Wach ri jo ni imito fuonjere Baibul. Jolefuonjin mongoye pesa moro jye m’ichulo. (Matayo 10:8) Medo kwoŋ meno, inyalo kidho kachokirok pajo milwoŋo ni Kingdom Hall. Ka inokidhi i chokirok pa Jokristo me, ibino medo ŋeyo Were.

Gikipiny ma Were ochweyo nyalo fuonjin gima mako kwoŋ go. Baibul wacho ni: ‘Were ochweyo polo gi piny.’ (Menyirok 10:6) Jehova kochweyo “polo” kende, to ochweyo kir waŋchieŋ. Meno fuonjo wan aŋo kwoŋ Were? Fuonjo wan nike Jehova ni gi men madit swa. Go kende ama nyalo timo gima ni gi men paka waŋchieŋ. Kendo gino fuonjo wan nike Jehova ryek, rupiri ripo bedo ni go ooro ryeko madit swa nyalo chweyo waŋchieŋ ma miyo wan lero aka ma kinyal leny woko.

Chwech pa Jehova nyutho ni go maro wan. Par kwoŋ yen mopokere opokere ma Jehova ochweyo manyiak girachama. Jehova oido nyalo chweyo yath achiel kende kosa to weyo ma kochweyo kada achiel. To, Jehova ochweyo ri wan yen makweth manyiak girachama. Gino nyutho ni Jehova obedo Were ma maro wan, ma japok, ma dewo kwoŋ wan, kendo mani gi wor.​—Joroma 1:20.