Ngɔɔ Baiblo Sisi Tomi Mlaahi Kɛ Tsɔse O He Nile

1-2. (a) Mɛni nike ní nɛ Yehowa kɛ ha Adam kɛ Hawa? (b) Mɛni blɔ nɔ nɛ jinɛ Adam kɛ Hawa ko tsɔɔ kaa a bua jɔ nike ní nɛ ɔ he?

KE LOHWEHI maa pee nɔ́ ko ɔ, a susuu we he loko a peeɔ. Klamahi fuu hu ngɛ nɛ a tsuɔ ní kaa bɔ nɛ a to a he blɔ nya a. Se adesahi lɛɛ a je ekpa. Yehowa bɔ wɔ nɛ e ha wɔ nike ní klɛdɛɛ ko, nɛ Kristofohi a bua jɔ he wawɛɛ. Nike ní nɛ ɔ ji he blɔ nɛ wa ngɛ nɛ waa kɛ hlaa nɔ́ nɛ wa suɔ aloo waa kɛ mwɔɔ yi mi kpɔ ngɛ wa dɛ he. Baiblo ɔ tsɔɔ kaa Mawu bɔ Adam ngɛ e subai nɔ. Lɛ ji nɔ kekleekle nɛ e bɔ. (1 Mose 1:​26, 27) Yehowa bɔ Adam kɛ Hawa, nɛ e ha mɛ nyɛmi konɛ mɛ nitsɛmɛ a kɛ mwɔ a yi mi kpɔ.

² Yehowa wui Adam kɛ Hawa mlaahi fuu. E de mɛ ke a hyɛ zugba a nɔ, nɛ a fɔ nɛ a hyi zugba a nɔ, nɛ a je bumi kpo kɛ tsɔɔ lɛ ejakaa lɛ nɛ e ngɛ he blɔ nɛ e tsɔɔ mɛ nɔ́ nɛ e sa kaa a pee kɛ nɔ́ nɛ e sɛ nɛ a pee. (1 Mose 1:28; 2:​16, 17) Mɛni blɔ nɔ nɛ jinɛ Adam kɛ Hawa ko tsɔɔ kaa a ngɛ bumi kɛ ha Yehowa, nɔ nɛ ha mɛ nike ní nɛ ji he blɔ nɛ a ngɛ nɛ a kɛ peeɔ nɔ́ nɛ a suɔ ɔ? E sa nɛ níhi tsuo nɛ Yehowa pee kɛ ha mɛ ɔ ko ha nɛ a ko bu mlaa nɛ e wo mɛ ɔ tue. Nɛ lɔ ɔ ko tsɔɔ kaa a suɔ Yehowa, nɛ a suɔ kaa e bua nɛ jɔ.—Abɛ 23:15.

3. Kɛ Adam kɛ Hawa ngɔ he blɔ nɛ a ngɛ kaa a hlaa nɔ́ nɛ a suɔ ɔ kɛ tsu ní ha kɛɛ?

³ Baiblo ɔ tsɔɔ kaa Adam kɛ Hawa kɛ he blɔ nɛ a ngɛ nɛ a kɛ hlaa nɔ́ nɛ a suɔ ɔ tsu we ní saminya. Mohu ɔ, a mwɔ a yi mi kpɔ kaa a ma gbo Yehowa tue. Yi mi kpɔ nɛ a mwɔ ɔ tsɔɔ kaa a suɔ mɛ nitsɛmɛ a he, se pi Yehowa. (1 Mose 3:​1-7) Kɛ ba si mwɔnɛ ɔ, wa ngɛ nɔ́ nae ngɛ yi mi kpɔ yaya nɛ a mwɔ ɔ he je.—Rom. 5:12.

4. (a) Ngɛ Galatiabi 6:5 ɔ nya a, mɛni e sa kaa wɔ tsuo waa pee? (b) Mɛni nike ní kpa he wa ma susu ngɛ ní kasemi nɛ ɔ mi?

⁴ Mwɔnɛ ɔ, níhi yɛ nɔ saminya ngɛ adesahi a si himi mi. Daa ligbi ɔ, e he hia nɛ waa mwɔ yi mi kpɔhi fuu. (Kane Galatiabi 6:5.) Yi mi kpɔ nɛ ɔmɛ ekomɛ a mwɔmi yi kulaa, se ekomɛ ngɛ nɛ a mwɔmi yee. Kɛ wa ma plɛ kɛ mwɔ yi mi kpɔhi nɛ Yehowa bua maa jɔ he ha kɛɛ? Kekleekle ɔ, e sa nɛ waa kplɛɛ nɔ kaa wa hia Yehowa yemi kɛ buami. (Abɛ 16:3; Yer. 10:23) Yesu ye mluku, se e le kaa e hia Mawu yemi kɛ buami. (Heb. 5:7) Wa yi mluku. Enɛ ɔ he ɔ, wa hia Yehowa yemi kɛ buami wawɛɛ po pe Yesu. Nyɛ ha nɛ wa susu nike ní kpa ko nɛ maa ye bua wɔ konɛ wa nyɛ nɛ waa mwɔ yi mi kpɔ nɛ da a he. Lɔ ɔ ji, he nile.

MƐNI JI HE NILE?

5. (a) Mɛni ji he nile? (b) Ngɛ mɛni blɔ nɔ nɛ wa he nile yeɔ buaa wɔ? (Romabi 2:​14, 15)

⁵ Mawu bɔ adesahi nɛ e ha mɛ he nile konɛ e ye bua mɛ nɛ a le nɔ́ nɛ da kɛ nɔ́ nɛ dɛ. Nihi nɛ a li nɔ́ ko ngɛ Mawu mlaa amɛ a he po ngɛ he nile. (2 Kor. 4:2) Wa he nile ngɛ kaa kojolɔ. E buɔ wɔ fɔ ke wa pee nɔ́ nɛ dɛ, nɛ ke wa pee nɔ́ nɛ da a hu ɔ, e haa nɛ wa leɔ. (Kane Romabi 2:​14, 15.) Ke wa yaa pee nɔ́ ko nɛ dɛ ɔ, wa he nile ɔ ma nyɛ maa bɔ wɔ kɔkɔ. (1 Sam. 26:​8-11) Jehanɛ hu ɔ, e ma nyɛ maa wo wɔ he wami nɛ waa pee nɔ́ nɛ wa le kaa e da. E ngɛ mi kaa Yehowa ha wɔ he blɔ kaa waa hla nɔ́ nɛ wa suɔ mohu lɛɛ, se lɔ ɔ tsɔɔ we kaa Yehowa bua jɔ yi mi kpɔhi tsuo nɛ wa mwɔɔ ɔ he. E sa nɛ wa he nile nɛ ye bua wɔ nɛ waa le slɔɔto nɛ ngɛ yi mi kpɔ nɛ da kɛ nɔ́ nɛ dɛ a kpɛti.

6. Mɛni he je nɛ pi be fɛɛ be nɛ wa he nile ɔ tsuɔ ní saminya a?

⁶ Se aywilɛho sane ji kaa pi be fɛɛ be nɛ wa he nile ɔ tsuɔ ní saminya. Kaa bɔ nɛ wa yi mluku ɔ, jã kɛ̃ nɛ wa he nile ɔ hu yi mluku. Weku mi nɛ wa je, ma nɛ wa je mi, loo akɔnɔ yayahi nɛ wa náa a ma nyɛ ma puɛ wa he nile ɔ. Baiblo ɔ tsɔɔ kaa wa he nile ma nyɛ ma “gbɔjɔ.” Jehanɛ hu ɔ, wa ma nyɛ maa wo he mu, e ma nyɛ maa “sã kaa bɔ nɛ a kɛ dade nɛ dɔ la sãa nɔ́ ɔ,” loo e ma nyɛ ma ha nɛ waa pee nɔ́ “yaya.” (1 Kor. 8:12; Tito 1:15; 1 Tim. 4:2; Heb. 10:22) He nile kaa jã a, be nyɛe maa ye bua wɔ nɛ waa pee nɔ́ nɛ da. He nile ngɛ kaa sɛni tɛ nɛ e tsu we ní, nɛ e he hia nɛ a dla. Enɛ ɔ he ɔ, e hia nɛ waa bɔ mɔde wawɛɛ nɛ wa tsɔse wa he nile konɛ e nyɛ nɛ e tsu ní saminya. (1 Pet. 3:16) Mɛni blɔ nɔ wa maa gu kɛ pee jã?

BƆ NƐ WA MA PLƐ KƐ TSƆSE WA HE NILE Ɔ HA

7-8. (a) Mɛni maa ye bua wɔ konɛ wa tsɔse wa he nile ɔ? (b) Mɛni blɔ nɔ nɛ Baiblo sisi tomi mlaahi ma nyɛ maa ye bua wɔ? Ngɔɔ nɔ́ he tomi nɔ́ ko kɛ tsɔɔ mi. (Hyɛ foni ɔ hulɔ.)

⁷ Kɛ wa ma plɛ kɛ tsɔse wa he nile ɔ ha kɛɛ? E sa nɛ waa kane Baiblo ɔ daa, nɛ waa le nɔ́ nɛ da kɛ nɔ́ nɛ dɛ ngɛ Yehowa hɛ mi. Ke wa kase Mawu mlaa amɛ ɔ, wa maa le e susumi ngɛ níhi a he. Se kaa bɔ nɛ wa na ngɛ ní kasemi nɛ sɛ hlami ɔ mi ɔ, tsa pi si fɔfɔɛhi tsuo a mi nɛ waa kɛ mlaa ma nyɛ ma tsu ní ngɛ. Enɛ ɔ he ɔ, e sa nɛ waa le Baiblo sisi tomi mlaahi ejakaa a haa nɛ wa leɔ bɔ nɛ Yehowa susuɔ níhi a he kɛ bɔ nɛ e nuɔ he ha.—Yes. 55:9.

⁸ Wa ma nyɛ maa ngɔ wa si himi kɛ to nɔ ko nɛ e ngɛ nga kplanaa nɔ nyɛɛe, nɛ kadimi níhi be blɔ ɔ nɔ ɔ he. Ke nɔ ɔ hyɛɔ pu ɔ kɛ dodoe ɔmɛ ɔ, lɔ ɔ maa ye bua lɛ konɛ e na he nɛ e sa kaa e gu konɛ e ya su he nɛ e yaa a. Se ke e hɛɛ zugba he foni ɔ, lɛɛ e be yee ha lɛ kulaa kaa e maa na bɔ nɛ zugba a si fɔfɔɛ ngɛ ha, kɛ ní komɛ nɛ ngɛ blɔ ɔ nɔ, kaa yokuhi kɛ pahi. Zugba he foni ɔ maa ye bua lɛ konɛ e ná nɔ mi mami kaa blɔ nɛ e ngɛ nɔ nyɛɛe ɔ da. Oti nɛ waa kɛ ma wa hɛ mi ji kaa wa maa sa Yehowa hɛ mi. Baiblo ɔ ngɛ kaa zugba he foni nɛ ma nyɛ maa tsɔɔ wɔ blɔ pɔtɛɛ nɛ e sa kaa waa nyɛɛ nɔ. Baiblo sisi tomi mlaahi ngɛ kaa kadimi níhi nɛ a ngɛ blɔ ɔ nɔ ɔ. Ke wa nyɛɛ ngɛ sisi tomi mlaa nɛ ɔmɛ a nya a, wa ma nyɛ ma ná nɔ mi mami kaa wa ma ya su he nɛ wa yaa a.

9. Mɛni ji nɔ́ kpa ko hu nɛ maa ye bua wɔ konɛ wa tsɔse wa he nile ɔ? (Romabi 9:1)

⁹ Loko wa ma nyɛ ma tsɔse wa he nile ɔ saminya a, wa hia Mawu mumi klɔuklɔu ɔ yemi kɛ buami. (Kane Romabi 9:1.) Mumi klɔuklɔu ɔ ma nyɛ maa ye bua wɔ konɛ waa le Mawu susumi ngɛ níhi a he. Jehanɛ hu ɔ, e ma nyɛ maa wo wɔ he wami nɛ waa pee níhi nɛ maa sa Yehowa hɛ mi. (Flp. 2:13) Se kɛ Yehowa ma plɛ kɛ ye bua wɔ kɛ e mumi klɔuklɔu ɔ ha kɛɛ?

10. Mɛni blɔ nɔ nɛ mumi klɔuklɔu ɔ ma nyɛ maa ye bua wɔ? (Luka 11:​10, 13)

¹⁰ Moo sɔle kɛ bi mumi klɔuklɔu ɔ. (Kane Luka 11:​10, 13.) Wa ma nyɛ ma ná nɔ mi mami kaa ke wa bi Yehowa nɛ e ye bua wɔ kɛ e mumi klɔuklɔu ɔ, e maa pee jã. (Yoh. 3:34) E pee klaalo kaa e maa ngɔ e mumi klɔuklɔu ɔ kɛ ye bua nihi nɛ a buɔ lɛ tue ɔ. (Abɛ 1:23; Yak. 1:5) Mɛni ji nɔ́ kpa ko hu nɛ maa ye bua wɔ konɛ wa tsɔse wa he nile ɔ?

11. (a) Mɛni e sa kaa wa kɛ pee oti ngɛ wa si himi mi? (b) Mɛni he je nɛ e sa nɛ waa hyɛ kaa wa tsɔse wa he nile ɔ, nɛ e ngɛ ní tsue saminya a?

¹¹ Bɔɔ mɔde kaa o maa pee Yehowa suɔmi nya ní be fɛɛ be. (Abɛ 8:​34, 35) E sa nɛ enɛ ɔ nɛ pee nɔ́ titli ngɛ wa si himi mi. Ke wa bɔ mɔde kaa wa maa pee Yehowa suɔmi nya ní be fɛɛ be ɔ, lɔ ɔ maa ye bua wɔ kɛ tsɔse wa he nile ɔ. Ke wa tsɔse wa he nile ɔ saminya a, e maa ye bua wɔ konɛ wa susu níhi a he, nɛ waa nu níhi a he kaa Yehowa nɔuu. Akɛnɛ mwɔnɛ ɔ, si himi ɔ mi wa he je ɔ, ke wa tsɔse wa he nile ɔ saminya a, e maa ye bua wɔ wawɛɛ. Behi fuu ɔ, e he hia nɛ waa mwɔ yi mi kpɔ ngɛ ní komɛ nɛ Baiblo ɔ de we nɔ́ ko pɔtɛɛ ngɛ he ɔ he. Ní nɛ ɔmɛ ekomɛ ma nyɛ ma kɔ hɛja jemi, ní tsumi, sukuu yami, aloo nihi nɛ waa kɛ mɛ bɔɔ ɔ he. Kɛ wa ma plɛ kɛ le kaa Yehowa bua jɔ yi mi kpɔhi nɛ wa mwɔɔ ngɛ ní nɛ ɔmɛ a he ɔ he ha kɛɛ?—2 Kor. 1:12.

12. Mɛni maa ye bua wɔ konɛ waa le ke ji kaa wa he nile ɔ ngɛ wɔ blɔ nɛ da tsɔe? (Efesobi 5:10)

¹² Mo pue o yi mi tɛ ngɛ nɔ́ nɛ o kaneɔ ngɛ Mawu Munyu ɔ mi ɔ he. (La 49:3) Ke o ngɛ Baiblo ɔ kanee ɔ, mo hla sisi tomi mlaahi nɛ maa ye bua mo nɛ o na Yehowa susumi ngɛ níhi a he. (Kane Efesobi 5:10.) Ke waa kɛ nyagba ko kpe ɔ, Baiblo sisi tomi mlaa nɛ ɔmɛ maa ye bua wɔ konɛ waa le ke ji wa he nile ɔ ngɛ wɔ ye buae nɛ waa mwɔ yi mi kpɔhi nɛ da loo e yi bua wɔ. (Abɛ 2:​4-9, 11-13) Ke waa kɛ sisi tomi mlaa nɛ ɔmɛ tsɔse wa he nile ɔ, e maa ye bua wɔ konɛ waa pee níhi nɛ Yehowa suɔ.—Heb. 5:14.

13. Mɛni e sɛ nɛ waa pee? Mo ha enɛ ɔ he nɔ hyɛmi nɔ́.

¹³ Koo mwɔ yi mi kpɔ loko pee se ɔ, o ya hla sisi tomi mlaahi kɛ fĩ se. Wa sume nɛ waa kase Israelbi ɔmɛ nɛ a hi Yuda zugba a nɔ loloolo benɛ a kpata Yerusalem ma a hɛ mi ngɛ jeha 607 loko mwɔnɛ ɔ be kanemi. A de Yeremia ke: “Yehowa o Mawu ɔ nɛ tsɔɔ wɔ blɔ nɛ sa kaa waa nyɛɛ nɔ kɛ nɔ́ nɛ e sa kaa waa pee.” (Yer. 42:​3-6) Se aywilɛho sane ji kaa, a mwɔ yi mi kpɔ ngɛ nɔ́ nɛ a suɔ kaa a maa pee ɔ he momo. A bua jɔɛ nɔ́ nɛ Yehowa de mɛ ke a pee ɔ he, nɛ a pee nɔ́ nɛ a suɔ. Enɛ ɔ ngɔ hɛ mi kpatami kɛ ba a nɔ. (Yer. 42:​19-22; 43:​1, 2, 4) Lɔ ɔ he ɔ, loko wa maa mwɔ yi mi kpɔ ko ɔ, e sa nɛ wa hla Baiblo sisi tomi mlaahi nɛ tsɔɔ Yehowa susumi ngɛ yi mi kpɔ ɔ he, nɛ wa kɛ tsu ní.

14. Mɛni he je nɛ e sa nɛ waa kɛ Baiblo sisi tomi mlaahi nɛ tsu ní ke wa ngɛ yi mi kpɔhi mwɔe ɔ?

¹⁴ Moo da Baiblo sisi tomi mlaahi a nɔ kɛ mwɔ yi mi kpɔhi. (Mat. 7:​24-29; Yak. 1:​23-25) Ke wa daa Baiblo sisi tomi mlaahi a nɔ kɛ mwɔɔ yi mi kpɔhi ɔ, lɔ ɔ tsɔɔ kaa wa ngmɛ blɔ nɛ mumi klɔuklɔu ɔ ngɛ wɔ blɔ tsɔɔe. Enɛ ɔ ma ha nɛ Yehowa maa ya nɔ ma ha wɔ e mumi ɔ. (Níts. 5:32) Se ke wa ha we nɛ Yehowa mumi ɔ nɛ e tsɔɔ wɔ blɔ ɔ, lɔ ɔ ma ha nɛ wa maa pee mumi ɔ “nɔdɔ nɔ́,” aloo wa maa tsi lɛ blɔ. (Efe. 4:30; Yes. 63:10; Níts. 7:51) Yehowa ma nyɛ ma je e mumi ɔ kɛ je wa nɔ. (La 51:11; 1 Tes. 5:19) Enɛ ɔ maa ye wɔ awi ejakaa wa hia he wami nɛ jeɔ mumi klɔuklɔu ngɔ ɔ.—Efe. 3:16.

BƆ NƐ WA MA PLƐ KƐ NA BAIBLO SISI TOMI MLAAHI NƐ MAA YE BUA WƆ HA

15-16. (a) Kɛ wa ma plɛ kɛ na Baiblo sisi tomi mlaahi nɛ maa ye bua wɔ ha kɛɛ? (b) Mɛni Baiblo sisi tomi mlaahi lɛ ma nyɛ maa ye bua Baiblo kaselɔ ko konɛ e nyɛ nɛ e kpa sigaleti numi?

¹⁵ Ngɔɔ ní kasemi ga dade ɔmɛ kɛ tsu ní. Loko waa kɛ Baiblo sisi tomi mlaahi ma nyɛ ma tsu ní saminya a, e sa nɛ waa bɔ mɔde nɛ wa yɔse mɛ ngɛ Ngmami ɔ mi. Waa ngɔ lɛ kaa e he wa ha nɔ ko nɛ o kɛ lɛ kaseɔ Baiblo ɔ kaa e ma kpa sigaleti numi? E ma nyɛ ma susu kaa ‘Baiblo ɔ de we ke a ko nu sigaleti. Se kɛ wa plɛ kɛ le kaa e ji tɔmi kaa nɔ ko maa nu sigaleti ha kɛɛ?’ Kɛ o ma plɛ kɛ ye bua lɛ ha kɛɛ konɛ e na Baiblo sisi tomi mlaahi nɛ tsɔɔ kaa sigaleti numi hí? Ní tsɔɔmi ga dade ko nɛ se be ji Research Guide for Jehovah’s Witnesses ɔ. O ma nyɛ maa tsɔɔ o Baiblo ní kaselɔ ɔ munyuyi nɛ ji “Tobacco and Smoking.” Ngɛ jamɛ a munyuyi ɔ sisi ɔ, e maa na munyu nɛ ji “What Is God’s View of Smoking?” nɛ je kpo ngɛ June 1, 2014 Blɛfo gbi Hwɔɔmi Mɔ ɔ mi ɔ mi. Ke e ngɛ jamɛ a Hwɔɔmi Mɔ ɔ kanee ɔ, mɛni ngmamihi kɛ sisi tomi mlaahi lɛ e maa na?

¹⁶ Nyɛ ha nɛ waa hyɛ sisi tomi mlaa enuɔ komɛ nɛ a je kpo ngɛ jamɛ a Hwɔɔmi Mɔ ɔ mi. (1) E sɛ nɛ waa pee nyɔguɛ kɛ ha nɔ́ ko nɛ kɛ nɔ yaa gbenɔ mi. (Rom. 6:16) (2) E sa nɛ waa yu wa he kɛ je nɔ́ fɛɛ nɔ́ nɛ ma puɛ wa nɔmlɔ tso ɔ he. (2 Kor. 7:1) (3) Yehowa suɔ nɛ wa ja lɛ kɛ wa tsui tsuo. (Mat. 22:37) (4) E sɛ nɛ wa ní peepee nɛ ye ni kpahi awi. (Mat. 22:39; 1 Kor. 10:24) (5) Yehowa ma nyɛ ma ha wɔ he wami konɛ wa nyɛ nɛ waa pee nɔ́ nɛ da. (Flp. 4:13) Enɛ ɔ he ɔ, e ngɛ mi kaa Baiblo ɔ de we tɛ̃ɛ kaa sigaleti numi hí mohu lɛɛ, se sisi tomi mlaahi nɛ ngɛ Baiblo ɔ mi ɔ ma nyɛ maa ye bua o Baiblo kaselɔ ɔ konɛ e yɔse Yehowa susumi ngɛ sane ɔ he.

17. Kɛ nyɛminyumu ko kɛ nyɛmiyo ko nɛ a ngɛ hlae maa sɛ gba si himi mi ɔ ma plɛ kɛ na Baiblo sisi tomi mlaahi nɛ maa ye bua mɛ ha kɛɛ?

¹⁷ Kɛ nyɛminyumu ko kɛ nyɛmiyo ko nɛ a ngɛ hlae maa sɛ gba si himi mi ɔ ma plɛ kɛ na Baiblo sisi tomi mlaahi nɛ maa ye bua mɛ nɛ a mwɔ yi mi kpɔhi nɛ da ha kɛɛ? Research Guide ɔ hu ma nyɛ maa ye bua mɛ. A maa na Baiblo sisi tomi mlaahi ngɛ munyuhi nɛ ngɛ munyuyi nɛ ji Weddings and Receptions” ɔ sisi. Nyɛ ha nɛ waa hyɛ sisi tomi mlaa ekpa komɛ nɛ ma nyɛ maa ye bua mɛ. (1) E sa nɛ a blɔ nya tomi ɔ tsuo nɛ wo Yehowa hɛ mi nyami. (1 Kor. 10:​31, 32) (2) E sa nɛ a wo tade nɛ sa, nɛ e be nɔ ko nane tɔ̃tɔ̃e. (1 Tim. 2:9; 1 Pet. 3:​3, 4) (3) E sɛ nɛ níhi nɛ maa ya nɔ ngɛ yo kpeemi ɔ sisi ɔ nɛ tsɔɔ kaa wa ngɛ fĩae kaa bɔ nɛ nihi nɛ a sɔmɔ we Yehowa a peeɔ a ní ɔ. (Yoh. 17:14; Yak. 1:27; 1 Yoh. 2:​15, 16) (4) E sa nɛ a ha nɛ nɔ́ fɛɛ nɔ́ nɛ ya nɔ ngɛ blɔ nya tomi nya. (1 Kor. 14:40) (5) E sɛ nɛ okplɔɔ ngmɛmi ɔ nɛ pee hoo nɛ nihi nɛ a de dã. (Gal. 5:21) (6) E sa nɛ a kɛ ní peemi ɔ nɛ wo nɔ ko pɔtɛɛ dɛ nɛ e hyɛ nɔ.—Yoh. 2:​8, 9.

18-19. (a) Mɛni ga dade kpa lɛ ma nyɛ maa ye bua wɔ? (b) Mɛni sisi tomi mlaahi lɛ ngɛ ga dade nɛ ɔ mi nɛ maa ye bua mo kɛ mwɔ yi mi kpɔ kɛ kɔ gbijlɔ yemi he? (Hyɛ daka nɛ ji, “Anɛ O Ma Nyɛ Ma Yɔse Sisi Tomi Mlaa Amɛ Lo?” ɔ hulɔ.)

¹⁸ Ga dade kpa nɛ ye bua nihi babauu ji Ngmamihi Nɛ Yeɔ Buaa Kristofohi ɔ. O maa na ngmamihi fuu ngɛ munyuyi slɔɔtoslɔɔtohi a sisi. Ke o hla munyuyi nɛ o ngɛ hlae ɔ, o maa na sane bimihi kɛ ngmamihi ngɛ munyuyi ɔ sisi nɛ ma nyɛ maa ye bua mo kɛ yɔse Baiblo sisi tomi mlaahi. Kaa nɔ hyɛmi nɔ́ ɔ, Kristofono ko yi mi ma nyɛ maa pee lɛ enyɔɔnyɔ kaa e kɛ e he nɛ wo gbijlɔ ko mi aloo e kɛ e he nɛ ko wo mi. Ke e ya munyuyi nɛ ji “Gbijlɔhi” ɔ, e maa na munyuyi kpa nɛ ji “Gbijlɔhi nɛ Kristofohi kɛ a he wui mi.”

¹⁹ Mo susu munyu komɛ nɛ a tu he munyu ngɛ fã nɛ ɔ sisi ɔ he nɛ o hyɛ. Eko ji: “Mɛni he je nɛ e sɛ kaa waa kɛ wa he nɛ wo gbijlɔhi nɛ a he tsɔ we nɛ a je lakpa jami mi ɔ mi ɔ? (1 Kor. 10:21; 2 Kor. 6:​14-18; Efe. 5:​10, 11).” A tsɔɔ gbijlɔ nɛ ɔmɛ ekomɛ ngɛ jamɛ a fã a mi. Ngɛ munyuyi nɛ ji “Ma gbijlɔhi” ɔ sisi ɔ, a tsɔɔ Baiblo sisi tomi mlaahi nɛ maa ye bua Kristofono ko konɛ e hyɛ ke ji e kɛ e he ma nyɛ maa wo gbijlɔhi nɛ kɔɔ ma kudɔmi yi nɔ sanehi a he ɔ mi, loo gbijlɔhi nɛ a kɛ kaiɔ tahi nɛ a hwu blema, aloo gbijlɔhi nɛ woɔ adesahi a hɛ mi nyami ɔ mi. Hyɛ bɔ nɛ wa bua jɔ ha kaa Yehowa asafo ɔ ha wɔ ga dade nɛ ɔmɛ konɛ e ye bua wɔ kɛ tsɔse wa he nile!

MOO TSƆƆ KAA O TSƆSE O HE NILE Ɔ SAMINYA

20. Mɛni blɔ nɔ wa maa gu kɛ tsɔɔ kaa wa tsɔse wa he nile ɔ saminya?

²⁰ Wa bua jɔ he blɔ nɛ wa ngɛ kaa wɔ nitsɛmɛ wa maa hla nɔ́ nɛ wa suɔ ɔ he. Se wa le hu kaa, e sa nɛ wa tsɔse wa he nile ɔ konɛ wa nyɛ nɛ waa kɛ jamɛ a he blɔ ɔ nɛ tsu ní saminya. Ke wa pee jã a, wa maa mwɔ yi mi kpɔhi nɛ maa wo Yehowa hɛ mi nyami konɛ e bua nɛ jɔ. Se wa hia Yehowa mumi klɔuklɔu ɔ yemi kɛ buami loko wa ma nyɛ maa pee jã. Enɛ ɔ he ɔ, e sa nɛ waa ya nɔ nɛ wa bi Yehowa e mumi klɔuklɔu ɔ, nɛ wa ha nɛ mumi ɔ nɛ tsɔɔ wɔ blɔ. Baiblo sisi tomi mlaahi hu ma nyɛ maa ye bua wɔ kɛ tsɔse wa he nile ɔ. Nyɛ ha nɛ waa ngɔ nike ní nɛ ɔ kɛ tsu ní saminya, nɛ ke wa pee jã a, wa maa na bɔ nɛ Mawu Munyu ɔ maa ye bua wɔ ha.—2 Tim. 3:​16, 17; Heb. 4:12.