Ná Juɛmi Nɛ Da Ngɛ O Nyagba Amɛ A He

1-2. Mɛni e sa kaa waa pee konɛ wa nyɛ nɛ wa tsu wa nyagba amɛ a he ní saminya? (Hyɛ foni ɔ hulɔ.)

ANƐ a yi mo dami sane, o wekuli ngɛ si tee kɛ ngɛ mo woe, aloo a ngɛ mo yi mi wae ngɛ o hemi kɛ yemi ɔ he je lo? Anɛ o be nɔmlɔ tso mi he wami kpakpa ko aloo o kɛ bwɔmi mi nyagbahi ngɛ kpee lo? Aloo o kɛ si fɔfɔɛ ko nɛ mi wa ngɛ kpee, kaa o suɔlɔ ko gbenɔ lo? Yehowa suɔ e we bi wawɛɛ. Se a kpɛti nihi fuu ngɛ nɛ a si himi “hyi tɔ kɛ haomi kɛ aywilɛho sɔuu.”—La 90:10.

² Loko wa ma nyɛ ma tsu wa nyagba amɛ a he ní saminya a, e sa nɛ wa ná juɛmi nɛ da ngɛ nyagba amɛ a he. Mɛni he je nɛ enɛ ɔ he hia a? Waa kɛ ma nyɛ maa to nɔ́ nɛ ɔ he: Nyagbahi nɛ waa kɛ kpeɔ ngɛ kaa nyagbahi nɛ nɔ ko kɛ kpeɔ ke e ngɛ lɔle kudɔe. Be komɛ ɔ, e ma bi nɛ e kudɔ lɔle ɔ kɛ ya muɔ nɔ loo hiɔ nɔ, loo e nyɛɛ blɛuu, loo e da si bɔɔ. Loko dlɛɛva a ma nyɛ ma tsu nyagba a he ní saminya a, e sa nɛ e le nɔ́ nɛ ji nyagba a tutuutu. Se ke nyu loo bunyuku ngɛ lɔle ɔ glaasi ɔ hɛ mi ɔ, e be hae nɛ e hyɛ nɔ́ saminya. Lɔ ɔ he ɔ, loko wa ma nyɛ tsu wa nyagba amɛ a he ni saminya a, e sa nɛ waa na nyagba a kaa bɔ nɛ Yehowa naa lɛ ɔ. Ngɛ ní kasemi nɛ ɔ mi ɔ, wa ma susu (1) bɔ nɛ e sa nɛ waa na wa nyagba amɛ ha, (2) haomi nɛ ma nyɛ maa ba ke wa ná we juɛmi nɛ da ngɛ wa nyagba amɛ a he, kɛ (3) ní komɛ nɛ wa ma nyɛ maa pee kɛ ná juɛmi nɛ da ke waa kɛ nyagbahi ngɛ kpee.

BƆ NƐ E SA NƐ WAA NA WA NYAGBA AMƐ HA

3. Ngɛ je yaya nɛ ɔ mi ɔ, mɛni lɛ e sa nɛ waa hyɛ blɔ?

³ Wa be nyɛe maa tu nyagbahi a nya fo ngɛ je yaya nɛ ɔ mi. Akɛnɛ wa yi mluku, nɛ loloolo ɔ Satan lɛ ngɛ je ɔ nɔ yee he je ɔ, wɔ tsuo waa kɛ nyagbahi maa kpe kɛ̃. Jehanɛ se hu ɔ, be mi nɛ je nɛ ɔ nyagbe ngɛ sue nɛ ɔ, waa kɛ nyagbahi nɛ a mi wa wawɛɛ maa kpe. Nyagba nɛ ɔmɛ ekomɛ ma nyɛ maa pee adebɔ mi oslaahi, kɛ oslaahi nɛ jeɔ adesahi a ní peepee mi kɛ baa. (Mat. 24:8; 2 Tim. 3:13) Ke Yehowa ngɛ nyagba nɛ ɔmɛ a he ní tsue amlɔ nɛ ɔ, e maa pee kaa e ngɛ Satan ye buae konɛ e nyɛ e ye je nɛ ɔ nɔ saminya. Be abɔ nɛ wa ngɛ Satan je yaya nɛ ɔ mi ɔ, waa kɛ “oslaa” maa kpe kokooko.—Fiɛɛ. 9:​12, sisi ningma.

4. Mɛni nyagba kpahi nɛ Kristofohi kɛ kpeɔ?

⁴ Akɛnɛ wa buɔ Kristo tue he je ɔ, waa kɛ nyagba kpahi kpeɔ. Yesu de e kaseli ɔmɛ si abɔ kaa a maa wa mɛ yi mi ngɛ a hemi kɛ yemi ɔ he je. (Mat. 24:9; Yoh. 16:2) Ke wa le enɛ ɔ, wa hemi kɛ yemi ɔ be mimiɛe ke a ngɛ wɔ yi mi wae. (1 Tes. 3:​3, 4) Ke wa ya nɔ nɛ wa fĩ si ngɛ wa hemi kɛ yemi ɔ mi ɔ, wa ma nyɛ ma ná nɔ mi mami kaa, wa ngɛ blɔ nɛ kɛ nɔ yaa neneene wami mi ɔ nɔ nyɛɛe. Jehanɛ se hu ɔ, wa hla kaa wa ma sɔmɔ Yehowa akɛnɛ e ji nɔ yelɔ kpakpa a he je, nɛ wa tsɔɔ kaa Satan ji lakpatsɛ. Lakpa munyuhi nɛ Satan tu ɔ eko ji kaa, adesahi jaa Mawu ngɛ níhi nɛ e kɛ ha mɛ ɔ he je, se pi a tsui mi nɛ a jeɔ kɛ peeɔ jã. Bɔ nɛ pee nɛ e nyɛ nɛ e tsu yi mi tomi nɛ ɔ he ní ɔ, e ngɛ Yehowa we bi tuae wawɛɛ. (Hiob 1:​9-11) Ke wa ya nɔ nɛ wa fĩ si akɛnɛ wa suɔ Yehowa a, e bua jɔɔ saminya.—Abɛ 27:11.

5. Mɛni wa ma nyɛ maa kase ngɛ Fiɛɛlɔ 7:​13, 14 ɔ mi? (Hyɛ foni ɔmɛ hulɔ.)

⁵ Yehowa ngmɛɔ nɔ́ nami blɔ. Yehowa pee we yiwutso ní kɔkɔɔkɔ, nɛ jã a kɛ̃ nɛ e kɛ ní yayamihi bɛ wa nɔ. (Yak. 1:13) Se mɛni he je nɛ Matsɛ Salomo ngma ke “amanehlu ligbi” ji “anɔkuale Mawu ɔ ní tsumi” ɔ? (Kane Fiɛɛlɔ 7:​13, 14.) Kaa bɔ nɛ wa le ɔ, enɛ ɔ tsɔɔ we kaa Yehowa lɛ haa nɛ ní yayamihi baa, mohu ɔ, e ngmɛɔ blɔ nɛ a baa. Salomo kɛ ga womi nɛ ma nyɛ maa ye bua wɔ konɛ wa ná juɛmi nɛ da ke waa kɛ kahi ngɛ kpee. Kekleekle ɔ, e sa nɛ wa ná juɛmi nɛ da ngɛ Satan je yaya nɛ ɔ mi, ejakaa pi be fɛɛ be nɛ níhi maa ya nɔ saminya ha wɔ ngɛ si himi nɛ ɔ mi. Ke Yehowa pee ní kpakpahi ha wɔ ɔ, e sa nɛ waa na kaa e ji nike ní nɛ je e ngɔ, nɛ waa na lɛ si. Enyɔne, Salomo ha nɛ wa na kaa, ‘adesa be nyɛɛ maa le nɔ́ nɛ maa ba hwɔɔ se,’ níhi maa ya saminya jio, níhi be nɔ yae saminya jio, wa li. Nyagbahi nɛ a hyɛ we blɔ ba náa nimli kpakpahi kɛ nimli yayahi tsuo.

6. Mɛni he je nɛ Yehowa ngmɛɔ blɔ nɛ waa kɛ kahi kpeɔ? (Hebribi 12:​7, 11)

⁶ Ke wa ná juɛmi nɛ da ngɛ wa ka amɛ a he ɔ, wa maa na kaa Yehowa suɔ nɛ waa ngɔ wa hɛ kɛ fɔ e nɔ, se pi wɔ nitsɛmɛ wa nɔ. Yehowa le nyagbahi nɛ waa kɛ kpeɔ, nɛ e suɔ kaa e maa ye bua wɔ. E ngɛ mi kaa e ngmɛɔ blɔ nɛ wa nyɛɛɔ “dɔgba nɛ mi wo diblii kpii mi” mohu lɛɛ, se e yaa nɔ nɛ e tsɔɔ wɔ blɔ, e haa nɛ wa náa nɔ mi mami kaa e suɔ wɔ, nɛ e haa wɔ he wami konɛ wa nyɛ nɛ wa fĩ si. (La 23:4) Nyagbahi nɛ waa kɛ kpeɔ ɔ hu ma nyɛ ma ha nɛ wa yɔse wa gbɔjɔmi komɛ, nɛ Yehowa ma nyɛ maa ye bua wɔ nɛ wa pee tsakemihi nɛ sa. (Kane Hebribi 12:​7, 11.) Kaa nɔ hyɛmi nɔ́ ɔ, e he ba hia nɛ Hiob nɛ e kase he si bami. Tsa pi Yehowa nɛ e kɛ ka amɛ ba Hiob nɔ mohu lɛɛ, se e ngmɛ blɔ, nɛ e gu ka amɛ a nɔ kɛ ye bua Hiob nɛ e kase ní komɛ nɛ a he hia. (Hiob 42:​1-6) Wa le kaa bɔ fɛɛ bɔ nɛ ji ɔ, Mawu be blɔ ngmɛe konɛ kahi nɛ waa kɛ maa kpe ɔ nɛ puɛ huɛ bɔmi nɛ ngɛ waa kɛ lɛ wa kpɛti ɔ. Ke waa kɛ anɔkuale yemi fĩ si ngɛ kahi nɛ waa kɛ ngɛ kpee ɔ mi ɔ, wa maa ‘ye kunimi kɛ pi si.’—Rom. 8:​35-39.

7. Mɛni he je nɛ ke a ngɛ mo yi mi wae ngɛ o hemi kɛ yemi ɔ he je po ɔ, o bua ma nyɛ maa jɔ ɔ?

⁷ Ke a ngɛ wɔ yi mi wae po ɔ, wa bua ma nyɛ maa jɔ. Ke a ngɛ mo yi mi wae ngɛ o hemi kɛ yemi ɔ he je po ɔ, ko susu kaa Yehowa kplɛɛ we o nɔ. Mohu ɔ, yi mi wami nɛ o kɛ ngɛ kpee ɔ tsɔɔ kaa Yehowa kplɛɛ o nɔ. (Mat. 5:​10-12) Ke wa ná juɛmi nɛ da ngɛ yi mi wami he ɔ, wa ma nyɛ ma ná bua jɔmi kaa bɔ nɛ Yesu kaseli ɔmɛ hu ná bua jɔmi ɔ. (Níts. 5:​40-42) Jehanɛ hu ɔ, lɔ ɔ ma nyɛ maa ye bua ni kpahi konɛ a ba kase Yehowa he ní, nɛ a “wo Mawu hɛ mi nyami.” (1 Pet. 2:12) Benɛ a wo Yosef tsu ɔ, Yehowa ye bua lɛ, nɛ benɛ a je lɛ ngɛ tsu ɔ mi hu ɔ, e ya nɔ nɛ e ye bua lɛ. Wɔ hu Yehowa ma nyɛ maa ye bua wɔ ja nɔuu kɛ̃.—1 Mose 39:​3, 23.

8. Mɛni ji nɔ́ kpa ko nɛ maa wo wɔ he wami konɛ waa ya nɔ nɛ wa fĩ si?

⁸ Wa ka amɛ a se maa po kokooko. Hiob nɔ hyɛmi nɔ́ ɔ kaiɔ wɔ kaa wa nyagba amɛ a se maa po. Ngɛ anɔkuale mi ɔ, “Yehowa jɔɔ Hiob wami si himi nyagbe ɔ kulaa pe e sisije ɔ.” (Hiob 42:12) Wɔ hu Yehowa wo wɔ si kaa e maa jɔɔ wɔ ngɛ je ehe ɔ mi. Waa kɛ jɔɔmi nɛ wa ma ná hwɔɔ se ɔ be nyɛe maa to nyagbahi nɛ waa kɛ ngɛ kpee mwɔnɛ ɔ he kɔkɔɔkɔ. Anɛ enɛ ɔ wui wɔ tsuo he wami konɛ waa ya nɔ nɛ wa fĩ si kɛ ya si nyagbe lo?—Mat. 24:13.

BƆ NƐ SUSUMI NƐ DƐ MA NYƐ MAA YE WƆ AWI HA

9. Ngɛ mɛni blɔ nɔ nɛ susumi nɛ dɛ ma nyɛ maa ye wɔ awi?

⁹ Nyagba saisaa nɛ waa kɛ ngɛ kpee ɔ, e sa nɛ wa ná juɛmi nɛ da ngɛ he, ke pi jã a, sane ɔ ma puɛ kulaa. Kaa nɔ hyɛmi nɔ́ ɔ, eko ɔ, wa ma nyɛ ma susu kaa Yehowa lɛ e kɛ haomi ɔ ngɛ wa nɔ bae. Benɛ Hiob kɛ haomihi ngɛ kpee ɔ, e ná susumi ɔ kaa e haomi ɔmɛ je Yehowa ngɔ. Susumi nɛ dɛ nɛ ɔ ha nɛ e “bu e he dalɔ mohu pe Mawu.” (Hiob 32:2) Jã nɔuu kɛ̃ nɛ sisije ɔ, Naomi pia Yehowa benɛ e kɛ haomihi ngɛ kpee ɔ. (Rut 1:​13, 20, 21) Ke Hiob kɛ Naomi ya nɔ nɛ a hɛɛ susumi nɛ dɛ nɛ ɔ mi ɔ, lɔ ɔ ko puɛ huɛ bɔmi nɛ ngɛ a kɛ Yehowa a kpɛti ɔ. (Abɛ 19:3) Se Yehowa ye bua mɛ nɛ a ná susumi nɛ da ngɛ a haomi ɔmɛ a he, nɛ e jɔɔ mɛ ngɛ a we anɔkuale yemi ɔ he je.

10. Ke waa kɛ kahi ngɛ kpee ɔ, mɛni susumi nɛ eko ɔ, wa ma ná?

¹⁰ Ke wa ngɛ nɔ mi mami kaa pi Yehowa nɛ ha nɛ wa ngɛ nɔ́ nae po ɔ, eko ɔ, wa maa nu he kaa e susuu we wa he. Susumi nɛ dɛ nɛ ɔ ma nyɛ ma ha nɛ wa kɔni mi nɛ e jɔ̃. (Abɛ 24:10) Matsɛ David kɛ gbalɔ Habakuk kɛ nyagbahi kpe, nɛ be komɛ po ɔ, a biɔ Yehowa sanehi ngɛ nɔ́ he je nɛ e pui a nya mi ɔ. (La 10:1; Hab. 1:2) Se loloolo ɔ, a kpa we sɔlemi. Yehowa ma nɔ mi kɛ ha nyumu anɔkualetsɛmɛ nɛ ɔmɛ kaa e maa ye bua mɛ, nɛ e maa pee jã kɛ ha mo hulɔ.—La 10:17.

11. Mɛni ma nyɛ maa ba ke wa ná we juɛmi nɛ da ngɛ nyagbahi nɛ waa kɛ kpeɔ ɔ he?

¹¹ Ke wa ná we juɛmi nɛ da ngɛ nyagbahi a he, nɛ waa kɛ nyagba ko kpe ɔ, e ma ti wɔ si tlukaa, nɛ eko ɔ, wa ma susu kaa e sɛ nɛ nɔ́ ko kaa jã nɛ ba wa nɔ. (1 Pet. 4:12) E he wa ha Yesu kaseli ɔmɛ kaa a ma he ye kaa nihi maa wa Yesu yi mi wawɛɛ. (Luka 18:​33, 34) Yesu de e kaseli ɔmɛ kaa e kɛ nyagbahi maa kpe, se a he we yi kaa Mawu maa ngmɛ blɔ nɛ Yesu nɛ na nɔ́. Yesu le kaa susumi kaa jã a be hae nɛ e nyɛ nɛ e pee Yehowa suɔmi nya ní, enɛ ɔ he je ɔ, e kã Petro hɛ mi. (Mar. 8:​31-33) Ngɛ Yesu gbenɔ se po ɔ, e ye ha e kaseli ɔmɛ kaa a maa nu níhi nɛ ya nɔ ɔ sisi. Se loloolo ɔ, Yesu kɔni gbo we ngɛ a he. Benɛ a tle lɛ si se ɔ, e ye bua mɛ nɛ a na nɔ́ he je nɛ e sa kaa e na nɔ́, kɛ gu ‘Ngmami ɔ mi nɛ e blɛke saminya kɛ ha mɛ ɔ nɔ.’ (Luka 24:​25-27, 32, 44-48) Ke Yesu se nyɛɛli ɔmɛ pue a yi mi tɛ ngɛ nɔ́ nɛ e tsɔɔ mɛ ɔ he ɔ, lɔ ɔ maa ye bua mɛ nɛ a dla a he kɛ ha si temi kɛ womi nɛ e be kɛe nɛ a kɛ maa kpe ɔ. Wɔ hu wa ma nyɛ maa da nɔ́ nɛ Ngmami ɔ de kɛ kɔ yi mi wami kɛ kahi a he ɔ nɔ kɛ dla wa he kɛ to loko waa kɛ nyagbahi nɛ kpe.

12. Ke wa ná we juɛmi kpakpa ngɛ si fɔfɔɛ ko nɛ wa ya je mi ɔ he ɔ, kɛ lɔ ɔ ma ha nɛ waa nu he ha kɛɛ?

¹² Ke wa ná we juɛmi nɛ da ngɛ si fɔfɔɛ nɛ wa ngɛ mi ɔ he ɔ, wa ma nyɛ ma susu kaa nɔ́ ko be hie peemi ngɛ he. Yesu tsɔɔ nɔ́ he je nɛ e ma nyɛ maa ba lɛ jã. E kɛ ní tsuli komɛ nɛ a ya tsu ní ngɛ wai ngmɔ ko mi ɔ pee enɛ ɔ he nɔ hyɛmi nɔ́. Ní tsuli ɔmɛ ekomɛ a bua jɔɛ ejakaa a susu kaa a wui mɛ hiɔ saminya. Se a nyɔmtsɛ ɔ de a ti nɔ kake ke: “Awetsɛ, i tsa tɔ̃ we o nɔ.” (Mat. 20:​10-13) Ní tsuli ɔmɛ susu kaa a nyɔmtsɛ ɔ ngɛ mɛ sisie. Se pi jã ji sane ɔ. Mɛ mohu lɛ a susumi ɔ dɛ. Mwɔnɛ ɔ, Odasefohi komɛ kɛ si fɔfɔɛhi loo nyagbahi kaa enɛ ɔ nɔuu kpeɔ. Kaa nɔ hyɛmi nɔ́ ɔ, ke e he ba hia kaa a ngmɛɛ sɔmɔmi he blɔ komɛ nɛ a ngɛ ɔ he ɔ, e gbaa a nya. Mɛni ma nyɛ maa ye bua wɔ konɛ ke waa kɛ si fɔfɔɛ ko nɛ mi wa kpe ɔ, wa ná juɛmi nɛ da?

NÍ KOMƐ NƐ WA MA NYƐ MAA PEE KE WAA KƐ HAOMI KPE

13. Ke waa kɛ nyagba ko kpe ɔ, mɛni ma nyɛ maa ba wa juɛmi mi?

¹³ Yehowa sɔmɔli le nɔ́ nɛ Baiblo ɔ de ngɛ nyagbahi nɛ adesahi kɛ kpeɔ ɔ he. Ke nihi kɛ nyagbahi ngɛ kpee ɔ, wa kaneɔ ngmami komɛ kɛ woɔ a bua. Se ke wɔ nitsɛmɛ waa kɛ nyagba ko kpe ɔ, eko ɔ, e he ma nyɛ maa wa ha wɔ kaa wa ma ná juɛmi nɛ da ngɛ he. Be komɛ ɔ, eko ɔ, wa ma susu kaa Yehowa ngɛ wa tue gblae, aloo e bui wa sɔlemihi tue. Ke e ba jã a, mɛni wa ma nyɛ maa pee konɛ wa ná juɛmi nɛ da?

14. Ke o kɛ haomi ngɛ kpee ɔ, mɛni he o ma nyɛ maa sɔle ngɛ? (Filipibi 4:13)

¹⁴ Bi Yehowa nɛ e ye bua mo. Mo de Yehowa o nyagba a, kɛ bɔ nɛ e ngɛ o nɔ he wami náe ha. O ma nyɛ maa sɔle ngɛ nɔ́ tutuutu nɛ o suɔ nɛ Yehowa nɛ pee ha mo ɔ he. O ma nyɛ ma bi lɛ nɛ e ha mo e mumi klɔuklɔu ɔ konɛ o ná he wami kɛ juɛmi nɛ o kɛ da si fɔfɔɛ ɔ nya. Mo kai hu kaa Yehowa ma nyɛ maa gu blɔ ko nɔ kɛ ha o sɔlemi ɔ heto nɛ o juɛmi be he kpee. (Efe. 3:20) E ma nyɛ maa gu bɔfo ɔmɛ kɛ nyɛmimɛ ɔmɛ a nɔ kɛ ye bua mo. (La 34:7) Lɔ ɔ he ɔ, moo kplɛɛ blɔ saisaa nɔ nɛ Yehowa guɔ kɛ yeɔ bua mo ɔ nɔ, nɛ o na lɛ si ngɛ he. E kɛ e mumi ɔ haa nɔ faa, nɛ e maa ye bua mo kɛ da nyagba fɛɛ ko nya.—Kane Filipibi 4:13.

15. Ke o kɛ nyagba ko ngɛ kpee ɔ, mɛni maa ye bua mo konɛ o fĩ si? (Hyɛ foni ɔ hulɔ.)

¹⁵ Yaa nɔ nɛ o pee níhi nɛ ma ha nɛ huɛ bɔmi kpakpa nɛ hi o kɛ Yehowa nyɛ kpɛti. Ke o nyɛ we nɛ o pee níhi nɛ o nyɛɔ peeɔ be ko nɛ be ɔ po ɔ, moo pee nɔ́ nɛ o ma nyɛ. Ha Mawu susumihi nɛ hi o juɛmi mi be fɛɛ be ke o kɛ “haomi kɛ nyagba” ko ngɛ kpee po. (La 119:143) Moo kase Baiblo ɔ daa ligbi nɛ o pue o yi mi tɛ ngɛ he. Tsu fiɛɛmi ní tsumi ɔ bɔ nɛ o ma nyɛ, nɛ o ya asafo mi kpe be fɛɛ be, nɛ o kɛ o he nɛ wo kpe ɔ mi. Ko je o he kɛ je nyɛmimɛ ɔmɛ a he. Mo mia o hɛ mi nɛ o kɛ nyɛmimɛ ɔmɛ nɛ bɔ, ke e ngɛ mo pee kaa ó yu o he kɛ je a he.—Abɛ 18:1.

16. Ke o kɛ nyagbahi ngɛ kpee ɔ, mɛni susumihi ma nyɛ maa ba o juɛmi mi, nɛ kɛ o ma tsu a he ni ha kɛɛ? (2 Korintobi 10:​4, 5)

¹⁶ Bɔɔ mɔde kaa o be hae nɛ o yi mi nɛ pee mo enyɔɔnyɔ. Ke waa kɛ nyagba ko kpe ɔ, e sa nɛ wa je “níhi nɛ a du si wawɛɛ ɔ,” nɛ ekomɛ ji, wa yi mi nɛ peeɔ wɔ enyɔɔnyɔ ngɛ wɔ nitsɛmɛ kɛ Yehowa he ɔ kɛ je. (Kane 2 Korintobi 10:​4, 5.) “Mawu nile ɔ” nɛ ngɛ Baiblo ɔ kɛ asafo womi ɔmɛ a mi ɔ ma nyɛ maa ye bua mo konɛ o yi mi nɛ ko pee mo enyɔɔnyɔ. Kaa nɔ hyɛmi nɔ́ ɔ, anɛ e peeɔ mo kaa Yehowa bua jɔɛ o he lo? Ke jã a, moo kase bɔfo Paulo he ní. Benɛ e ngɛ fiɛɛmi ní tsumi ɔ tsue ɔ, e kɛ nyagbahi nɛ a mi wa kpe; se nyagba nɛ ɔmɛ ha nɛ e ná nɔ mi mami kaa e ji sɔmɔlɔ nɛ Kristo kplɛɛ e nɔ. (2 Kor. 11:​23-27) Anɛ o nuɔ he kaa Yehowa kɛ tɔmi nɛ o pee be ko nɛ be ɔ ki mo lo? Ke jã a, moo ngma ngmamihi nɛ tsɔɔ kaa Yehowa kɛ yayamihi keɔ ɔ kɛ fɔ si. (Yes. 43:25) Lɔ ɔ se ɔ, moo kane ngmami nɛ ɔmɛ nɛ o pue o yi mi tɛ ngɛ he. (La 119:97) Anɛ o kɛ oslaa ko kpe nɛ lɔ ɔ haa nɛ e peeɔ mo kaa Mawu be nyɛe maa po e sɔmɔli a he piɛ kaa bɔ nɛ e wo si ɔ lo? Ke jã a, mo hla níhi a mi ngɛ nɔ́ he je nɛ Mawu ngmɛ nɔ́ nami blɔ ɔ he, nɛ́ o hla níhi a mi kɛ kɔ bɔ nɛ e poɔ huɛ bɔmi nɛ ngɛ waa kɛ lɛ wa kpɛti ɔ he piɛ ha a hu he. (La 91:​9-12) Jehanɛ hu ɔ, moo kane nyɛmimɛ nyumuhi kɛ yihi nɛ a kɛ nyagba kpe se a nyɛ nɛ a da nya a he ní.a

17. Mɛni e sa nɛ waa pee ke waa kɛ haomi ko kpe?

¹⁷ Eko ɔ, amlɔ nɛ ɔ, o kɛ nyagba ko nɛ mi wa kpi tsɔ. Ke jã a, moo na Yehowa si, nɛ́ o je e yi ngɛ ní kpakpahi nɛ e ngɛ pee ha mo ɔ he. (Fiɛɛ. 7:14) Se ke o kɛ nyagba ko kpe pee se ɔ, mo ná juɛmi nɛ da ngɛ nyagba a he, nɛ o ná hɛ kɛ nɔ fɔmi ngɛ Yehowa mi. Ke o pee jã a, Yehowa ‘ma nyɛ maa je blɔ nɛ́ o maa gu nɔ kɛ je mi, konɛ o nyɛ nɛ o da nya.’ (1 Kor. 10:13) Se wa nyɛmimɛ nyumuhi kɛ yi ɔmɛ hu nɛɛ? Mɛni wa ma nyɛ maa pee kɛ ye bua mɛ ke a kɛ haomihi ngɛ kpee? Wa ma susu sane bimi nɛ ɔmɛ a he ngɛ ní kasemi nɛ nyɛɛ se ɔ mi.