Sane Bimihi Nɛ Je Ní Kaneli A Ngɔ

Mɛni be nɛ je ma amɛ ma de ke “tue mi jɔmi kɛ slɔkee si himi ba”?

Kaa bɔ nɛ “Sane Bimihi Nɛ Je Ní Kaneli A Ngɔ” nɛ ba Hwɔɔmi Mɔa ɔ mi lingmi nɛ ɔ tsɔɔ ɔ, e be kɛe nɛ Yehowa kɛ “e susumi” maa wo “koli nyɔngma amɛ” (nɔ yemihi tsuo) a tsui mi kaa a ngɔ a he wami ɔ kɛ a blɔ nya a kɛ ha “lohwe awi yelɔ tsutsuutsu” ɔ, nɛ ji Je Ma Amɛ A Kake Peemi Kuu ɔ. A tsɛɔ lohwe nɛ ɔ hu ke “lohwe awi yelɔ ɔ he amaga a.” (Kpo. 13:​14, 15; 17:​3, 13, 16, 17) “Koli nyɔngma amɛ” kɛ lohwe ɔ nɛ e ba ná he wami ɔ ma kpata lakpa jami hɛ mi ngɛ je ɔ mi tsuo. Anɛ je ma amɛ ma de ke “tue mi jɔmi kɛ slɔkee si himi ba”b loko a ma kpata lakpa jami hɛ mi aloo ke a kpata e hɛ mi se?—1 Tes. 5:3.

Ngɛ e kpiti pomi mi ɔ, wa li be tutuutu nɛ je ma amɛ ma de ke “tue mi jɔmi kɛ slɔkee si himi ba.” Ke wa le níhi tsuo nɛ kɔɔ be nɛ ɔ he ɔ fitsofitso ɔ, jinɛ e he ko hia we kaa waa pee klaalo nɛ waa hwɔɔ. Se kɛ̃ ɔ, Yesu ya nɔ nɛ e bɔ e se nyɛɛli ɔmɛ kɔkɔ si abɔ kaa ‘a ya nɔ nɛ a hwɔɔ.’ (Mat. 24:42; 25:13; 26:41) Amlɔ nɛ ɔ, nyɛ ha nɛ waa hyɛ nɔ́ nɛ Yehowa gu bɔfo Paulo nɔ kɛ gba kɛ fɔ si nɛ ngɛ sɛ womi nɛ e ngma kɛ ya ha Tesalonikabi ɔmɛ ɔ mi.

Paulo ngma ke: “Be mi nɛ a maa hi dee ke, “Tue mi jɔmi kɛ slɔkee si himi ba!” a, kɛkɛ si kake too ɔ, hɛ mi kpatami maa ba a nɔ tlukaa.” (1 Tes. 5:​2, 3) Wa womi ɔmɛ pɔɔ munyu nɛ ɔ nɛ Paulo tu ɔ sisi tsɔɔmi kaa: Ke e piɛ bɔɔ nɛ haomi ngua a maa je sisi ɔ, a ma de ke “tue mi jɔmi kɛ slɔkee si himi ba,” nɛ lɔ ɔ ma kadi Babilon Ngua a, nɛ ji je ɔ mi lakpa jami blɔ nya tomi ɔ hɛ mi kpatami. Wa deɔ hu ke, ke a de ke “tue mi jɔmi kɛ slɔkee si himi ba” a, lɛɛ lɔ ɔ tsɔɔ kaa e be kɛe nɛ amanehlu ngua a maa je sisi.

Se benɛ wa to wa tsui si nɛ wa susu ngmami nɛ ɔ he saminya a, wa ba na kaa ngmami nɛ ɔ ma nyɛ maa hɛɛ sisi numi kpa ko hulɔ. E ma nyɛ maa ba kaa, a ma de ke “tue mi jɔmi kɛ slɔkee si himi ba” ke a kpata lakpa jami hɛ mi se. Mɛni he je nɛ wa de jã a? Mo susu sane bimi nɛ ɔmɛ a he nɛ o hyɛ.

Mɛni lakpa jami pee kɛ tsɔɔ kaa a fĩ tahi nɛ a ngɛ hwue ngɛ je ɔ mi ɔ se? Baiblo ɔ tsɔɔ kaa: “Yo ɔ [“yaholɔ ngua a,” Babilon Ngua a] mi nɛ a na . . . nihi tsuo nɛ a gbe mɛ ngɛ zugba a nɔ ɔ a muɔ ɔ ngɛ.” (Kpo. 17:​1, 5; 18:24) Ngɛ yi nɔhi tsuo a mi ɔ, lakpa jami fĩ ta hwumi se, nɛ mɛ lɛ a ngɔɔ basabasa peemi kɛ baa, nɛ lɔ ɔ haa nɛ nihi fuu gboɔ. Enɛ ɔ he ɔ, lakpa jami ngɔɛ tue mi jɔmi kɛ slɔkee si himi kɛ bɛ. Lɔ ɔ tleɔ sane bimi nɛ ɔ si: Ke a kpata Babilon Ngua a hɛ mi se ɔ, anɛ jamɛ a be ɔ mi pɛ lɛ je ma amɛ maa hi dee ke “tue mi jɔmi kɛ slɔkee si himi ba” lo? E ma nyɛ maa ba jã, se wa be nɔ mi mami.

Ke je ma amɛ de ke “tue mi jɔmi kɛ slɔkee si himi ba” a, mɛni maa nyɛɛ lɔ ɔ se? Paulo de ke: “Kɛkɛ si kake too ɔ, hɛ mi kpatami maa ba a nɔ tlukaa.” (1 Tes. 5:3) Study note nɛ ngɛ ngmami nɛ ɔ he ɔ de ke: “Paulo ngɛ tsɔɔe kaa ke a de ke “tue mi jɔmi kɛ slɔkee si himi ba” a, be be mi puee aloo be bɔɔ pɛ lɛ ma pue mi nɛ́ a ma kpata je ma amɛ a hɛ mi. E maa ba tlukaa, nɛ a ti nɔ ko nɔ ko he be mi jee gblegbleegble.” Ke je ɔ mi nɔ yemi ɔmɛ kpata lakpa jami hɛ mi se, nɛ a de ke “tue mi jɔmi kɛ slɔkee si himi ba” a, kɛkɛ ɔ, tlukaa a, a ma kpata je ma amɛ a hɛ mi.

Kɛ Yehowa we bi maa pee a ní ha kɛɛ ngɛ níhi nɛ a gba kɛ fɔ si ɔ he? Paulo de ke: “Nyɛmimɛ, nyɛɛ lɛɛ nyɛ be diblii mi nɛ́ ligbi ɔ ma ba ti nyɛ si kaa e maa pee juli ɔ.” (1 Tes. 5:4) Mo susu he nɛ o hyɛ: Ke a kpata lakpa jami hɛ mi se loko je ma amɛ de ke “tue mi jɔmi kɛ slɔkee si himi ba” a, lɛɛ Yehowa we bi maa na kaa je ma amɛ a hɛ mi kpatami ɔ su si ta. Se ngɛ je ma amɛ a blɔ fa mi ɔ, a hɛ mi kpatami ɔ maa ba kaa bɔ nɛ julɔ baa a—e maa ba tlukaa.

Mɛni lɛ wa ma nyɛ maa hyɛ blɔ? E piɛ bɔɔ nɛ “koli nyɔngma amɛ” kɛ lohwe awi yelɔ ɔ nɛ a ha lɛ he wami ɔ ma kpata lakpa jami hɛ mi. Enɛ ɔ maa pee amanehlu ngua a sisije. Wa le hu kaa be ko maa su nɛ je ma amɛ ma de ke “tue mi jɔmi kɛ slɔkee si himi ba.” Mɛni be lɛ a ma de jã a? Wa susu si fɔfɔɛ enyɔ he. Kekleekle si fɔfɔɛ: A ma de ke “tue mi jɔmi kɛ slɔkee si himi ba” loko a ma kpata lakpa jami hɛ mi. Si fɔfɔɛ enyɔne: Ke je ɔ mi nɔ yemi ɔmɛ kpata lakpa jami hɛ mi ɔ, e ma nyɛ maa ba kaa a ma de ke “tue mi jɔmi kɛ slɔkee si himi ba.” E ma bi nɛ waa mlɛ nɛ wa hyɛ nɔ́ nɛ maa ba. Behi fuu ɔ, ke Baiblo gbami ko ngɛ mi bae loo e ba mi ta a, loko wa nuɔ sisi saminya.—Kɛ to Yohane 12:16 he.

Pi be nɛ je ma amɛ ma de ke “tue mi jɔmi kɛ slɔkee si himi ba” a nɛ he hia wɔ, mohu ɔ, anɔkuale nɛ wa maa ye Yehowa a ji nɔ́ nɛ he hia wɔ pe kulaa. E sa nɛ ‘waa hwɔɔ nɛ wa hɛ nɛ hi wa he nɔ’ konɛ wa nyɛ nɛ wa dla wa he saminya kɛ to nɔ́ fɛɛ nɔ́ nɛ maa ba a.—1 Tes. 5:6.