Kpojemi Nɛ A Kɛ Ha Yohane
15 Nɛ i na okadi kpa ko hu ngɛ hiɔwe, okadi ngua ko nɛ e ngɛ nyakpɛ, hiɔwe bɔfohi kpaago+ nɛ a hɛɛ haomihi kpaago. Enɛ ɔmɛ ji nyagbe níhi, ejakaa a nɔ lɛ a maa gu kɛ gbe Mawu mi mi fumi ɔ nya.+
2 Nɛ i na nɔ́ ko nɛ e ngɛ kaa wo nɛ ngɛ ngleinglei kaa ahuhuɛ+ nɛ la futu mi, nɛ ni nɛmɛ nɛ a ye lohwe awi yelɔ ɔ kɛ e he amaga a+ kɛ e biɛ ɔ yibɔ ɔ+ nɔ kunimi ɔ+ daa si ngɛ wo nɛ ngɛ ngleinglei kaa ahuhuɛ ɔ he, nɛ a hɛɛ Mawu sakuhi. 3 A ngɛ Mawu nyɔguɛ Mose la a+ kɛ Jijɔ Bi ɔ la a lae,+ nɛ a ngɛ dee ke:
“Yehowa* Mawu, Ope,+ o ní tsumi ɔmɛ kle nɛ a ngɛ nyakpɛ.+ Neneene Matsɛ,+ o blɔ ɔmɛ da nɛ a ji anɔkuale.+ 4 Yehowa,* mɛnɔ po lɛ e be mo gbeye yee, nɛ e be o biɛ ɔ hɛ mi nyami woe? Ejakaa mo pɛ ji anɔkualetsɛ.+ Je ma amɛ tsuo maa ba o hɛ mi nɛ a ma ba ja mo,+ ejakaa a je o dami mlaa amɛ kpo.”
5 Enɛ ɔ se ɔ, i na nɛ a bli he klɔuklɔu ɔ nɛ ngɛ odase yemi bo tsu ɔ+ mi ɔ nya ngɛ hiɔwe,+ 6 nɛ hiɔwe bɔfo kpaago ɔmɛ nɛ a hɛɛ haomi kpaago ɔmɛ+ je kpo kɛ je jami he ɔ, nɛ a wo klala tade nɛ e he tsɔ nɛ e ngɛ kpɛe, nɛ sika tsu mlɛ mi fimi níhi fi a gugue. 7 Adebɔ níhi eywiɛ nɛ wami ngɛ a mi ɔ a kpɛti nɔ kake ha hiɔwe bɔfo kpaago ɔmɛ sika tsu kpluhi kpaago nɛ Mawu, nɔ nɛ e ngɛ kɛ yaa neneene ɔ mi mi fumi ɔ hyi mɛ tɔtɔɔtɔ ɔ.+ 8 Nɛ Mawu hɛ mi nyami ɔ kɛ e he wami ɔ ha nɛ lasuku hyi jami he ɔ tɔ,+ nɛ nɔ ko nɔ ko nyɛ we nɛ e sɛ jami he ɔ kɛ ya si be nɛ hiɔwe bɔfo kpaago ɔmɛ a haomi kpaago ɔmɛ+ ba nyagbe.