Petro Klekleekle Womi
1 Imi Petro, nɛ i ji Yesu Kristo bɔfo ɔ,+ i ngɛ womi nɛ ɔ ngmae kɛ ya ha ma se bi nɛ a gbɛ fia Ponto, Galatia, Kapadokia,+ Asia, kɛ Bitinia a, ee, kɛ ya ha nyɛ nihi nɛ a hla a. 2 Mawu nɛ ji hiɔwe Tsɛ ɔ hla nyɛ kaa bɔ nɛ e to kɛ fɔ si ɔ.+ E ha nyɛ mumi klɔuklɔu ɔ konɛ e pee nyɛ klɔuklɔu.+ E pee jã bɔ nɛ pee nɛ nyɛɛ bu lɛ tue nɛ nyɛ he nɛ tsɔ kɛ gu Yesu Kristo muɔ ɔ nɔ:+
Dloomi kɛ tue mi jɔmi nɛ́ hiɛ kɛ ha nyɛ.
3 Á je Mawu nɛ ji wa Nyɔmtsɛ Yesu Kristo Tsɛ ɔ yi, ejakaa ngɛ e mɔbɔ nami babauu ɔ nya a, e ha nɛ a fɔ wɔ ehe+ kɛ ha hɛ kɛ nɔ fɔmi nɛ ngɛ hɛ ngmengmle+ kɛ gu si nɛ e tle Yesu Kristo kɛ je gbogboehi a kpɛti ɔ nɔ.+ 4 Mawu ha nyɛ weto ní ko nɛ e be nyɛe ma puɛ loo a be nyɛe ma kpata hɛ mi.+ E ngɔ kɛ to ha nyɛ ngɛ hiɔwe.+ 5 Nyɛ hemi kɛ yemi ɔ he je ɔ, Mawu gu e he wami ɔ nɔ kɛ ngɛ nyɛ he bue kɛ ha yi wami hemi. Yi wami hemi nɛ ɔ lɛ a ma je lɛ kpo ngɛ nyagbe be ɔ mi ɔ nɛ. 6 Enɛ ɔ he ɔ, nyɛ ngɛ nyae wawɛɛ nitsɛ, e ngɛ mi kaa amlɔ nɛ ɔ, e he hia kaa ka slɔɔtohi nɛ́ ha nɛ nyɛɛ hao be kpiti ko,+ 7 bɔ nɛ pee nɛ nyɛ hemi kɛ yemi nɛ a ka nɛ a hyɛ ɔ+ nɛ́ ha nɛ nyɛ ná yi jemi kɛ hɛ mi nyami kɛ bumi ngɛ be nɛ Yesu Kristo ma je e he kpo ɔ mi.+ Nyɛ hemi kɛ yemi nɛ ɔ he jua wa kulaa pe sika tsu nɛ́ a kɛ la ka lɛ* nɛ́ ngɛ lɔ ɔ tsuo se ɔ, e ma nyɛ ma puɛ ɔ. 8 E ngɛ mi kaa nyɛ nɛ́ lɛ hyɛ mohu lɛɛ, se nyɛ suɔ lɛ. E ngɛ mi kaa nyɛ nɛ́ lɛ amlɔ nɛ ɔ, se kɛ̃ ɔ, nyɛ heɔ lɛ yeɔ, nɛ nyɛ ngɛ nyae wawɛɛ kɛ bua jɔmi nɛ hí kalemi nɛ hɛ mi ngɛ nyami, 9 be mi nɛ nyɛ suɔ nyɛ hemi kɛ yemi ɔ he oti ɔ nɛ ji nyɛ yi wami hemi ɔ he ɔ.*+
10 Ngɛ yi wami hemi nɛ ɔ he ɔ, gbali ɔmɛ nɛ a gba kɛ kɔ dloomi nɛ a maa dloo nyɛ ɔ he ɔ bi níhi a mi saminya, nɛ a hla níhi a mi fitsofitso.+ 11 A ya nɔ nɛ a hla nɔ́ nɛ maa ya nɔ, kɛ be nɛ níhi nɛ mumi nɛ ngɛ a mi ɔ ngɛ tsɔɔe kɛ kɔ Kristo ɔ he,+ ejakaa mumi ɔ sɛ hlami nɛ e ye amanehluhi nɛ Kristo maa na,+ kɛ hɛ mi nyami nɛ maa nyɛɛ se kɛ ba a he odase. 12 Mawu je kpo ngɔ tsɔɔ gbali ɔmɛ kaa pi mɛ nitsɛmɛ a he nɛ a ngɛ sɔmɔe, se nyɛ mohu lɛ a ngɛ sɔmɔe ɔ nɛ. Nɛ amlɔ nɛ ɔ, a jaje ní nɛ ɔmɛ kɛ tsɔɔ nyɛ kɛ gu nihi nɛ a ha nɛ nyɛ le sane kpakpa a nɔ. A pee jã ejakaa mumi klɔuklɔu ɔ nɛ a tsɔ kɛ je hiɔwe ɔ ye kɛ bua mɛ.+ Ní nɛ ɔmɛ ji níhi nɛ hiɔwe bɔfohi suɔ wawɛɛ kaa a maa nu sisi saminya.
13 Lɔ ɔ he ɔ, nyɛɛ pee nyɛ juɛmi klaalo kɛ ha ní tsumi;+ nyɛ hɛ nɛ hi nyɛ he nɔ saminya;+ nyɛɛ ngɔ nyɛ hɛ kɛ nɔ fɔmi ɔ kɛ ma dloomi nɛ a maa dloo nyɛ ngɛ Yesu Kristo kpo jemi ɔ mi ɔ nɔ. 14 Akɛnɛ nyɛ ji bimɛ nɛ a buɔ tue he je ɔ, nyɛ ha nɛ akɔnɔhi nɛ nyɛ ná be ko nɛ be benɛ nyɛ li nɔ́ ko ɔ nɛ kpa nyɛ kudɔmi, 15 se kaa bɔ nɛ Nɔ Klɔuklɔu ɔ nɛ e tsɛ nyɛ ɔ ngɛ ɔ, nyɛ hu nyɛɛ pee nihi nɛ a ngɛ klɔuklɔu ngɛ nyɛ je mi bami tsuo mi,+ 16 ejakaa a ngma ke: “Nyɛɛ pee klɔuklɔu, ejakaa i ngɛ klɔuklɔu.”+
17 Nɛ ke nyɛ ngɛ Tsɛ ɔ, nɔ nɛ e kojoɔ nɔ fɛɛ nɔ ngɛ e ní tsumihi a he nɛ e hlɛ nɔ mi ɔ+ tsɛe ɔ, lɛɛ nyɛɛ kɛ gbeye yemi nɛ ba nyɛ je mi+ ngɛ be nɛ nyɛɛ kɛ hiɔ si kaa ma se bi ɔ mi. 18 Ejakaa nyɛ le kaa pi níhi nɛ a puɛɔ, kɛ sika hiɔ aloo sika tsu nɛ a kɛ ha nɛ nyɛ ye nyɛ he*+ kɛ je nyɛ yaka si himi blɔ nɛ nyɛ nɛmɛ ɔmɛ ngɔ* kɛ ha nyɛ ɔ he. 19 Mohu ɔ, a kɛ muɔ nɛ he jua wa,+ nɛ ngɛ kaa jijɔ bi nɛ kpa ko kɛ mu ko be e he ɔ muɔ,+ nɛ ji Kristo nɔ́ ɔ lɛ pee jã.+ 20 Ngɛ anɔkuale mi ɔ, a hla lɛ momo loko a to je ɔ sisi,+ se a je lɛ kpo heii ngɛ be ɔmɛ a nyagbe ɔ mi ngɛ nyɛ he je.+ 21 Kɛ gu e nɔ ɔ, nyɛ ba he Mawu ye,+ nɔ nɛ e tle lɛ si kɛ je gbogboehi a kpɛti+ nɛ e wo e hɛ mi nyami ɔ,+ konɛ nyɛ hemi kɛ yemi ɔ kɛ nyɛ hɛ kɛ nɔ fɔmi ɔ nɛ hi Mawu mi.
22 Amlɔ nɛ ɔ nɛ nyɛ tsu nyɛ he* kɛ gu anɔkuale ɔ tue nɛ nyɛ bu ɔ nɔ, nɛ́ lɔ ɔ ha nɛ nyɛ ba suɔ nyɛmimɛ a sane nɛ osato be mi ɔ,+ nyɛɛ suɔ nyɛ sibi wawɛɛ nitsɛ kɛ je nyɛ tsui mi.+ 23 Ejakaa a fɔ nyɛ ehe,+ pi kɛ gu wu* nɛ puɛɔ nɔ, se mohu kɛ gu nɔ́ nɛ e puɛ we nɔ,+ kɛ gu Mawu hɛ kalɔ ɔ nɛ e ngɛ kɛ yaa neneene ɔ munyu ɔ nɔ.+ 24 Ejakaa “he lohi* tsuo ngɛ kaa nga, nɛ a hɛ mi nyami ɔ tsuo ngɛ kaa nga nɔ mɔmɔ; nga gbliɔ, nɛ mɔmɔ wɔleɔ, 25 se Yehowa* munyu ɔ ngɛ kɛ yaa neneene.”+ Nɛ “munyu” nɛ ɔ ji sane kpakpa a nɛ a jaje kɛ tsɔɔ nyɛ ɔ nɛ.+