Kɛ Ya Ha Hebribi Ɔmɛ

12 Lɛɛ enɛ ɔ he ɔ, akɛnɛ wa ngɛ odasefohi babauu nitsɛnitsɛ kaa bɔku nɛ bɔle wɔ kaa kikɛ nɛ ɔ he je ɔ, nyɛ ha nɛ wɔ hu wa sake nɔ́ fɛɛ nɔ́ nɛ e jiɔ kɛ yayami ɔ nɛ e fiɔ wɔ ngɛ blɔ nɛ e yi kulaa nɔ ɔ kɛ fɔ he,+ nɛ nyɛ ha nɛ waa kɛ hɛ mi miami nɛ tu fo ɔ nɛ e fɔɔ si ngɛ wa hɛ mi ɔ,+ 2 be mi nɛ wa hyɛɔ wa hemi kɛ yemi ɔ he Hɛ Mi Nyɛɛlɔ Kpanaa a kɛ nɔ nɛ haa nɛ wa hemi kɛ yemi ɔ Yeɔ Mluku, nɛ ji Yesu ɔ+ totooto ɔ. Ejakaa bua jɔmi nɛ a ngɔ kɛ ma e hɛ mi ɔ he je ɔ, e fĩ si ngɛ sɛumi tso* ɔ nɔ, nɛ zo pee we lɛ, nɛ e ya hi si ngɛ Mawu matsɛ sɛ ɔ hiɔ nɔ.+ 3 Niinɛ, nyɛ susu nɔ nɛ e fĩ si ngɛ munyu yayahi nɛ yayami peeli tu kɛ si lɛ+ kɛ ye mɛ nitsɛmɛ a he awi ɔ he wawɛɛ, konɛ pɔ nɛ ko tɔ nyɛ he nɛ nyɛ kɔni mi hu nɛ ba jɔ̃.*+

4 Ngɛ ta nɛ nyɛ ngɛ hwue kɛ ngɛ jamɛ a yayami ɔ sie ɔ mi ɔ, nyɛ hwui ta a kɛ ya sui he nɛ a ma plɛ nyɛ muɔ kɛ pue si ɔ lolo. 5 Nɛ nyɛ hɛ je he wami womi munyu nɛ a tu kɛ tsɔɔ nyɛ kaa bimɛ ɔ nɔ kulaa: E de ke: “Ye bi, koo bu tsɔsemi nɛ jeɔ Yehowa* ngɔ ɔ kaa nɔ́ ko nyafii, nɛ jã kɛ̃ nɛ ke e gbla o tue ɔ, o kɔni mi nɛ ko wo nyu; 6 ejakaa nihi nɛ Yehowa* suɔ mɛ ɔ, mɛ lɛ e tsɔseɔ, ngɛ anɔkuale mi ɔ, e fiaa nɔ fɛɛ nɔ nɛ e ngɔɔ lɛ kɛ peeɔ e bi ɔ kpa.”*+

7 E he hia nɛ nyɛ fĩ si, ejakaa lɔ ɔ piɛɛ nyɛ tsɔsemi* ɔ he. Mawu kɛ nyɛ ngɛ kaa bimɛ.+ Ejakaa bi te nɛɛ lɛ e tsɛ tsɔse we lɛ?+ 8 Se ke nyɛ tsuo nyɛ ná we tsɔsemi nɛ ɔ mi blɔ fa mi nɔ́ ɔ, lɛɛ nyɛ ji plã bimɛ se pi bimɛ nitsɛmɛ. 9 Jehanɛ hu ɔ, jinɛ wa tsɛmɛ nɛ a ji adesahi ɔ* gblaa wa tue, nɛ wa buɔ mɛ. Anɛ e sɛ kaa waa je wa tsui mi nɛ waa ngɔ wa he kɛ wo wa hiɔwe Tsɛ ɔ nɛ e kɛ mumi klɔuklɔu ɔ buɔ wa wami he ɔ sisi po pe jã konɛ waa hi wami mi lo?+ 10 Ejakaa mɛɛ a gbla wa tue be kpiti ko kɛkɛ bɔ nɛ sa a hɛ mi, se lɛɛ lɛɛ e peeɔ jã konɛ e hi kɛ ha wɔ, bɔ nɛ pee nɛ wa ná e klɔuklɔu peemi ɔ mi blɔ fa mi nɔ́.+ 11 Niinɛ, tsɔsemi ko be nɛ amlɔ nɔuu ɔ, wa naa lɛ kaa e ji bua jɔmi nɔ́, mohu ɔ, e yeɔ* nɔ; se pee se ɔ, e woɔ tue mi jɔmi yiblii nɛ ji dami kɛ haa ni nɛmɛ nɛ a gu nɔ kɛ tsɔɔ mɛ ní ɔ.

12 Enɛ ɔ he ɔ, nyɛ ha nɛ ninehi nɛ a mi jɔ kɛ nakutsohi nɛ a gbɔjɔ ɔ, a mi nɛ wa,+ 13 nɛ nyɛɛ ya nɔ nɛ nyɛɛ nyɛɛ tɛɛ ngɛ blɔ nɛ da a nɔ,+ konɛ nane ɔ nɛ e mi jɔ ɔ nɛ e ko kplɔ kɛ je kpɔji nya a he, mohu ɔ, a tsa lɛ. 14 Nyɛɛ di tue mi jɔmi se ngɛ bɔ nɛ nyɛɛ kɛ nihi tsuo hiɔ si ha a mi,+ nɛ nyɛɛ di klɔuklɔu peemi hu se,+ ejakaa ke nɔ ko be klɔuklɔu ɔ, e be nyɛe maa na Nyɔmtsɛ ɔ. 15 Nyɛɛ hyɛ nɛ hi saminya konɛ Mawu dloomi ɔ nɛ ko bɔ nɔ ko, nɛ nyɛɛ hyɛ saminya bɔ nɛ pee nɛ nɔ ko nɛ ko ba pee kaa tso nɛ duɔ ngɛ mi sipoku nɛ́ ngɛ wae.* Jamɛ a nɔ ɔ ngɔɔ nyagba kɛ baa nɛ e bleɔ nihi fuu;+ 16 nɛ nyɛɛ hyɛ nɛ hi konɛ ngɛ nyɛ kpɛti ɔ, nɔ ko nɛ e ko pee e he ajuama bɔlɔ,* aloo nɔ ko nɛ e bua jɔɛ ní klɔuklɔuhi a he kaa bɔ nɛ Esau pee ɔ, nɔ nɛ e ngɔ e blɔ nya kaa bitɛte ɔ kɛ tsake si kake niye ní ɔ.+ 17 Ejakaa nyɛ le kaa pee se benɛ e ngɛ hlae kaa a jɔɔ lɛ ɔ, a kua lɛ; ejakaa e ngɛ mi kaa e bɔ mɔde wawɛɛ kaa e maa ngɔ vonyu kɛ tsake e juɛmi* mohu lɛɛ,+ se kulaa pee yaka.*

18 Ejakaa yoku nɛ nyɛ ba su he ɔ, pi yoku nɛ nyɛ ma nyɛ maa pɛtɛ he, nɛ pi nɔ́ ko nɛ a mɛ he la,*+ kɛ bɔku yumu ko, kɛ diblii kpii ko, kɛ kɔɔhiɔ nɛ nya wa wawɛɛ ko,+ 19 kɛ titimati ko pɛmi,+ kɛ gbi ɔ nɛ ngɛ munyuhi tue ɔ,+ gbi ɔ nɛ benɛ ni ɔmɛ nu ɔ, a kpa pɛɛ kaa a ko de mɛ nɔ́ ko hu ɔ.+ 20 Ejakaa a ye gbeye benɛ Mawu de ke: “Ke lohwe po he sa yoku ɔ he ɔ, e sa nɛ a fiaa lɛ tɛ” ɔ.+ 21 Jehanɛ se hu ɔ, nɔ́ nɛ e je kpo ɔ ngɛ gbeye hluu po kaa Mose de ke: “I ngɛ gbeye yee nɛ ye he ngɛ doe blibliibli.”+ 22 Se nyɛɛ lɛɛ nyɛ ba su Zion Yoku+ ko kɛ Mawu hɛ kalɔ ɔ ma ko he, nɛ ji hiɔwe Yerusalem+ kɛ bɔfo akpe nyɔngmahi abɔ a kpe ngua a, 23 kɛ kekleekle bimɛ+ nɛ a ngma a biɛ ngɛ hiɔwe ɔ a we asafo ɔ, kɛ Mawu nɛ ji níhi tsuo a Kojolɔ ɔ,+ kɛ dali nɛ a ha nɛ a ye mluku ɔ a mumi mi wami ɔ,+ 24 kɛ Yesu nɛ ji somi ehe ɔ+ mi dalɔ ɔ,+ kɛ muɔ ɔ nɛ a fĩa nɛ e tuɔ munyu ngɛ blɔ nɛ hi pe Habel muɔ ɔ nɔ ɔ.+

25 Nyɛɛ hyɛ nɛ hi nɛ nyɛ ko tsi nyɛ tue ha nɔ nɛ e ngɛ munyu tue ɔ.* Ejakaa ke ni nɛmɛ nɛ a kua ke a be nɔ nɛ e ngɔ Mawu kɔkɔ bɔmi ɔ kɛ ngɛ hae ngɛ zugba a nɔ ɔ tue bue ɔ yi a he ɔ, lɛɛ ke wɔ hu wa kpale kɛ je nɔ nɛ e tuɔ munyu kɛ jeɔ hiɔwe ɔ se ɔ, wa be wa he yee kɔkɔɔkɔ!+ 26 Ngɛ jamɛ a be ɔ mi ɔ, e gbi ɔ mimiɛ zugba a,+ se amlɔ nɛ ɔ lɛɛ e wo si ke: “Se si kake ekohu ɔ, ma kpale mimiɛ níhi, pi zugba a pɛ kɛkɛ, se hiɔwe ɔ hulɔ.”+ 27 Jehanɛ ɔ, munyu nɛ ji “si kake ekohu” ɔ tsɔɔ kaa a ma je níhi nɛ a mimiɛ ɔ, nɛ ji níhi nɛ a pee ɔ, konɛ níhi nɛ a mimiɛ we mɛ ɔ nɛ a hi si. 28 Enɛ ɔ he ɔ, akɛnɛ wa na kaa wa nine maa su Matsɛ Yemi nɛ a be nyɛe ma mimiɛ lɛ ɔ nɔ he je ɔ, nyɛ ha nɛ waa ya nɔ nɛ wa ná dloomi, lɔ ɔ nɔ lɛ wa maa gu nɛ waa kɛ Mawu gbeye yemi kɛ bumi nɛ mi kuɔ ma sɔmɔ Mawu ngɛ blɔ klɔuu nɔ ɔ nɛ. 29 Ejakaa wa Mawu ɔ ji la nɛ kpataa nɔ́ hɛ mi.+