Kekleekle Womi Kɛ Ya Ha Timoteo
5 Ko kã nyumu nɔkɔtɔma ko hɛ mi tsɔ.+ Mohu ɔ, o kɛ bumi nɛ tu munyu kɛ tsɔɔ lɛ kaa tsɛ, kɛ tsɔɔ nihewi kaa nyɛminyumuhi, 2 kɛ tsɔɔ yi nikɔtɔmahi kaa nyɛmɛ, kɛ tsɔɔ yihewi kaa nyɛmiyihi nɛ́ susumi yaya ko kulaa be se.*
3 Mo susu* yalɔyihi* nɛ a ji yalɔyihi* nitsɛnitsɛ ɔ* a he.+ 4 Se ke yalɔyo* ko ngɛ bimɛ loo bibimɛ ɔ, á kase Mawu jami ngɛ mɛ nitsɛmɛ a we mi kekle,+ nɛ a to a fɔli kɛ a namɛ kɛ a nɛnɛmɛ nane mi bɔ nɛ sa mɛ,+ ejakaa enɛ ɔ saa Mawu hɛ mi.+ 5 Jehanɛ ɔ, yo nɛ e ji yalɔyo* nitsɛnitsɛ, nɛ e be nɔ ko nɔ ko ɔ ngɔɔ e hɛ kɛ fɔɔ Mawu nɔ,+ nɛ e hɛɛɔ pɛɛ kpami nɛ mi wa kɛ sɔlemi mi nyɔ kɛ pia.+ 6 Se nɔ nɛ ngɔɔ e he kɛ haa bɔmi nami akɔnɔ ɔ, e ngɛ mi kaa e ngɛ wami mi mohu lɛɛ, se e gbo. 7 Enɛ ɔ he ɔ, yaa nɔ nɛ o ngɔ blɔ tsɔɔmi* nɛ ɔmɛ kɛ ha, bɔ nɛ pee nɛ sé ko nɛ ko hi a he. 8 Ngɛ anɔkuale mi ɔ, ke nɔ ko hyɛ we lɛ nitsɛ e nihi a nɔ ɔ, titli ɔ, ni nɛmɛ nɛ a ji e we mi bimɛ ɔ, lɛɛ e kua hemi kɛ yemi ɔ, nɛ e ji nɔmlɔ yayami kulaa pe nɔ nɛ e be hemi kɛ yemi po.+
9 Ke o maa ngma yalɔyo* ko biɛ kɛ piɛɛ biɛ ɔmɛ a he ɔ, e pee nɔ nɛ e ye kɛ je jeha 60 kɛ yaa, e pee nɔ ko nɛ e gba nyumu kake, 10 nɔ nɛ́ a tuɔ e he munyu kpakpa kaa e tsuɔ ní tsumi kpakpahi,+ lɔ ɔ ji kaa e lɛ bimɛ,+ e pee nihi nibwɔ,+ e fɔ ni klɔuklɔuhi a nane he,+ e ye bua nihi nɛ e fĩ mɛ,+ nɛ e tu e he kɛ ha ní tsumi kpakpa fɛɛ ní tsumi kpakpa.
11 Se koo ngma yalɔyihi* nɛ a wɛ ɔ a biɛ kɛ piɛɛ biɛ ɔmɛ a he, ejakaa ke a bɔmi nami he akɔnɔhi ba pee blɔ tsimi nɔ́ ngɛ a kɛ Kristo ɔ a kpɛti ɔ, a ma hla kaa a sɛ gba si himi mi. 12 Nɛ a maa ngɔ kojomi kɛ ba a nɔ, ejakaa a ngmɛɛ kekleekle hemi kɛ yemi ɔ nɛ a je kpo ɔ* he kɛ fɔ si. 13 Ngɛ jamɛ a be ɔ mi nɔuu hu ɔ, a pee a he nihi nɛ a sume ní tsumi, nɛ a hii si kpae kɛ jeɔ we kake mi kɛ yaa we kpa mi; ee, pi kaa a tsu we nɔ́ ko pɛ kɛkɛ, se mohu a ji sieku yeli kɛ nihi nɛ a ngɔɔ a he kɛ woɔ ni kpahi a sanehi+ nɛ kɔ we a he ɔ mi. 14 Enɛ ɔ he ɔ, i suɔ nɛ yalɔyihi* nɛ a wɛ ɔ nɛ a gba,+ a fɔ bimɛ,+ a hyɛ we nɔ, nɛ a ko ha nɔ nɛ e teɔ si kɛ woɔ nɔ ɔ he blɔ nɛ e tu munyu kɛ si wɔ. 15 Ngɛ anɔkuale mi ɔ, a ti ni komɛ kpale kɛ ya ngɛ Satan se nyɛɛe momo. 16 Ke yo ko nɛ e heɔ yeɔ ɔ ngɛ wekuli nɛ a ji yalɔyihi* ɔ, ha nɛ e ye bua mɛ bɔ nɛ pee nɛ tlomi nɛ ko ba fɔ si ngɛ asafo ɔ nɔ. Kɛkɛ ɔ, asafo ɔ ma nyɛ maa ye bua ni nɛmɛ nɛ a ji yalɔyihi* nitsɛnitsɛ ɔ.*+
17 Nikɔtɔmahi nɛ a hyɛɔ asafo ɔ nɔ ngɛ blɔ kpakpa nɔ ɔ,+ e sa nɛ a ngɔ bumi nɛ e bɔ he si enyɔ kɛ ha mɛ,+ titli ɔ, ni nɛmɛ nɛ a tsuɔ ní wawɛɛ ngɛ munyu tumi kɛ ní tsɔɔmi mi ɔ.+ 18 Ejakaa ngmami ɔ deɔ ke, “Ke o kɛ na ku ngɛ ngma fiaae ɔ, koo fi e nya,”+ nɛ jehanɛ hu ɔ, “Ní tsulɔ ɔ, e hiɔwo sa lɛ.”+ 19 Ke a po asafo mi nɔkɔtɔma ko nya a, koo kplɛɛ nɔ, ja odase yeli enyɔ aloo etɛ ye he odase.+ 20 Ni nɛmɛ nɛ a hii yayami pee ɔ,+ kã a hɛ mi+ ngɛ nihi tsuo a hɛ mi konɛ e pee kɔkɔ bɔmi kɛ ha ni nɛmɛ nɛ a piɛ ɔ.* 21 I kɛ hɛdɔ ngɛ mo fãe ngɛ Mawu kɛ Kristo Yesu kɛ hiɔwe bɔfohi nɛ a hla a a hɛ mi kaa o ngɔ blɔ tsɔɔmi nɛ ɔmɛ kɛ tsu ní nɛ́ nɔ he juɛmi yaya nami aloo nɔ mi hlami nɛ ko hi mi.+
22 O kɛ oya yemi nɛ ko ngɔ o nine kɛ pue nyumu ko nɔ kɔkɔɔkɔ;*+ nɛ koo piɛɛ ni kpahi a he ngɛ a yayamihi a mi; yaa nɔ nɛ o ha nɛ o je mi bami he nɛ tsɔ.
23 Koo nu nyu hu,* se mohu nuu wai bɔɔ ngɛ o mi mi ɔ kɛ hiɔ nɛ pɔɔ mo numi kpitikpiti ɔ he je.
24 Ni komɛ a yayamihi jeɔ kpo nɛ nihi leɔ, nɛ lɔ ɔ haa nɛ a kojoɔ mɛ amlɔ nɔuu, se ni kpahi a nɔ́ lɛɛ, pee se loko e jeɔ kpo.+ 25 Jã nɔuu kɛ̃ nɛ ní tsumi kpakpahi jeɔ kpo nɛ nihi leɔ,+ nɛ a kɛ ní nɛmɛ nɛ ji kpo ɔ hu be nyɛe maa laa daa.+