Womi Enyɔne Kɛ Ya Ha Korintobi Ɔmɛ

7 Enɛ ɔ he ɔ, nihi nɛ i suɔ, akɛnɛ wa ná si womi nɛ ɔmɛ he je ɔ,+ nyɛ ha nɛ wa fɔ he lo mi mu kɛ mumi mi mu fɛɛ mu ngɛ wa he,+ nɛ wa ha nɛ wa klɔuklɔu peemi ɔ nɛ ye mluku ngɛ Mawu gbeye yemi mi.

2 Nyɛ bli nyɛ tsui mi kɛ ha wɔ.+ Wa tɔ̃ we nɔ ko nɔ, wa puɛ we nɔ ko, nɛ wa sisi we nɔ ko.+ 3 I de we enɛ ɔ nɛ ma kɛ bu nyɛ fɔ. Ejakaa i de hyɛ kaa nyɛ ngɛ wa tsui mi konɛ nyɛɛ kɛ wɔ nɛ bla kɛ gbo nɛ nyɛɛ kɛ wɔ nɛ bla kɛ hi wami mi. 4 I nyɛɔ nɛ i tuɔ nyɛ he munyu faa nitsɛ. I fĩaa wawɛɛ ngɛ nyɛ he. Bua womi hyi mi tɔ; bua jɔmi hyi mi kɛ be nɔ ngɛ wa piimi ɔ tsuo mi.+

5 Ngɛ anɔkuale mi ɔ, benɛ wa ba su Makedonia a,+ wa nɔmlɔ tso* ɔmɛ a he mi jɔɛ mɛ kulaa, mohu ɔ, a ya nɔ nɛ a pii wɔ ngɛ blɔ fɛɛ blɔ nɔ; kunɔ nɔmihi bɔle wɔ kɛ kpe, nɛ gbeye hu ngɛ wa mi. 6 Se Mawu, nɔ nɛ e woɔ nihi nɛ a kɔni mi jɔ̃ ɔ a bua a+ wo wa bua benɛ Tito ba a; 7 nɛ pi bami nɛ e ba a pɛ kɛkɛ, se mohu ngɛ bua womi nɛ e ná ngɛ nyɛ he ɔ hu he je benɛ e ba bɔ wɔ amaniɛ kaa nyɛ hɛ ngɛ jae ngɛ ye he, nɛ nyɛ ngɛ aywilɛho yee wawɛɛ, nɛ nyɛ ngɛ tsui yee* ngɛ ye he ɔ. Enɛ ɔ he ɔ, ye bua jɔ pe kekle ɔ po.

8 Ejakaa ke ye sɛ womi ɔ ha nɛ nyɛ ye aywilɛho po ɔ,+ i pia we ye he. Ke sisije ɔ, i ye aywilɛho po ɔ (akɛnɛ i na kaa sɛ womi ɔ ha nɛ nyɛ ye aywilɛho be bɔɔ ko ɔ he je ɔ), 9 amlɔ nɛ ɔ lɛɛ i ngɛ nyae, pi ngɛ aywilɛho nɛ nyɛ ye ɔ kɛkɛ he je, mohu ɔ, akɛnɛ aywilɛho nɛ nyɛ ye ɔ ha nɛ nyɛ tsake nyɛ tsui ɔ he je. Ejakaa nyɛ ye aywilɛho ngɛ blɔ nɛ sa Mawu hɛ mi nɔ, konɛ nɔ́ ko nɛ ko ye nyɛ awi ngɛ wa he je. 10 Ejakaa aywilɛho nɛ a yeɔ ngɛ blɔ nɛ saa Mawu hɛ mi nɔ ɔ ngɔɔ tsui tsakemi kɛ baa, nɛ lɔ ɔ kɛ nɔ yaa yi wami hemi mi, he piami ko be mi;+ se aywilɛho nɛ a yeɔ nɛ saa je ɔ hɛ mi ɔ lɛɛ, e ngɔɔ gbenɔ kɛ baa. 11 Akɛnɛ nyɛ je nyɛ tsui mi tɔɔ nɛ nyɛ ye aywilɛho ngɛ blɔ nɛ sa Mawu hɛ mi nɔ he je ɔ, nyɛɛ hyɛ nɔ́ nɛ je mi kɛ ba. E ha nɛ nyɛ dla nyɛ blɔ ɔ, e ha nɛ nyɛ mi mi fu, e ha nɛ nyɛ ye gbeye, e ha nɛ nyɛ ná suɔmi nɛ́ mi wa, e ha nɛ nyɛ hɛ dɔ, e ha nɛ nyɛ dla tɔmi ɔ!+ Ngɛ blɔ fɛɛ blɔ nɔ ɔ, nyɛ tsɔɔ kaa nyɛ he tsɔ* ngɛ sane nɛ ɔ mi. 12 E ngɛ mi kaa i ngma nyɛ mohu lɛɛ, se i pee we jã ngɛ nɔ nɛ e tɔ̃ ɔ he,+ aloo nɔ nɛ a tɔ̃ e nɔ ɔ he, mohu ɔ, konɛ bumi nitsɛnitsɛ nɛ nyɛ ngɛ kɛ ha wɔ ɔ nɛ je kpo heii ngɛ nyɛ kpɛti, ngɛ Mawu hɛ mi. 13 Enɛ ɔ lɛ wo wa bua a nɛ.

Se ngɛ bua womi nɛ wa ná a se ɔ, wa nya wawɛɛ ngɛ bua jɔmi nɛ Tito ná a he je, ejakaa nyɛ tsuo nyɛ ha nɛ e tsui nɔ e mi.* 14 Ejakaa ke i fĩa ngɛ nyɛ he kɛ tsɔɔ lɛ ɔ, zo gbi mi; se kaa bɔ nɛ níhi tsuo nɛ wa de nyɛ ɔ ji anɔkuale ɔ, jã kɛ̃ lɛ fĩami nɛ wa fĩa kɛ tsɔɔ Tito ɔ hu ji anɔkuale. 15 Jehanɛ se hu ɔ, e suɔ nyɛ sane wawɛɛ nitsɛ, ejakaa e kaiɔ tue nɛ nyɛ tsuo nyɛ buɔ ɔ,+ kɛ bɔ nɛ nyɛɛ kɛ bumi nɛ mi kuɔ he lɛ atuu ha a. 16 I nyaa kaa ngɛ blɔ fɛɛ blɔ nɔ ɔ, ma nyɛ ma ngɔ ye hɛ kɛ fɔ nyɛ nɔ.*