Womi Enyɔne Kɛ Ya Ha Korintobi Ɔmɛ

5 Ejakaa wa le kaa ke a ku* wa we nɛ ngɛ zugba nɛ ɔ nɔ, nɛ ji bo tsu nɛ ɔ kɛ pue si ɔ,+ wa ma ná tsu ko kɛ je Mawu ngɔ, we nɛ pi ninehi nɛ a kɛ pee,+ nɛ e maa hi si kɛ maa ya neneene ngɛ hiɔwe. 2 Ejakaa ngɛ anɔkuale mi ɔ, wa kɛmɛɔ ngɛ we* nɛ ɔ mi, nɛ wa suɔ wawɛɛ kaa wa maa wo nɔ́ nɛ ji wa nɔ́ ɔ* nɛ e je hiɔwe ɔ,*+ 3 konɛ ke wa wo ɔ, a ko na kaa wa hɛɛ wa he gu. 4 Ngɛ anɔkuale mi ɔ, wɔ nɛ́ wa ngɛ bo tsu nɛ ɔ mi ɔ, wa kɛmɛɔ, nɛ wa haoɔ wawɛɛ, ejakaa wa sume nɛ wa ma je enɛ ɔ kɛ fɔ si, se kɛ̃ ɔ, wa suɔ kaa wa maa wo kaketsɛ ɔ,+ bɔ nɛ pee nɛ a ngɔ neneene wami ɔ kɛ da nɔ́ nɛ gboɔ ɔ nane mi.+ 5 Jehanɛ ɔ, Mawu ji nɔ nɛ dla wɔ kɛ ha kikɛmɛ a wami nɛ ɔ nɛ,+ lɛ nɛ e ha wɔ mumi ɔ kaa nɔ́ nɛ maa ba a he okadi.*+

6 Enɛ ɔ he ɔ, be fɛɛ be ɔ, wa nɔ gbagba teɔ, nɛ wa le kaa be abɔ nɛ nɔmlɔ tso ɔ ji wa we mi ɔ, wa be Nyɔmtsɛ ɔ ngɔ,+ 7 ejakaa wa ngɛ nyɛɛe ngɛ hemi kɛ yemi nya, se pi ngɛ níhi nɛ a naa a nya. 8 Se wa nɔ gbagba teɔ, nɛ wa ná nɛ jinɛ wa be nɔmlɔ tso ɔ mi, konɛ waa kɛ Nyɔmtsɛ ɔ nɛ hi we mi.+ 9 Enɛ ɔ he ɔ, waa kɛ lɛ ngɛ we mi jio, wa be e ngɔ jio, oti nɛ waa kɛ ma wa hɛ mi ji kaa wa maa sa e hɛ mi. 10 Ejakaa e sa nɛ wɔ tsuo wa ya je kpo ngɛ Kristo kojomi sɛ ɔ hɛ mi, konɛ nɔ fɛɛ nɔ nɛ e ná níhi nɛ e pee be mi nɛ e ngɛ nɔmlɔ tso ɔ mi ɔ he hiɔwo, kpakpa jio, yayami* jio.+

11 Enɛ ɔ he ɔ, akɛnɛ wa le Nyɔmtsɛ ɔ gbeye yemi ɔ he je ɔ, wa yaa nɔ nɛ wa plɛɔ nihi a yi mi, se Mawu le wɔ saminya.* Se kɛ̃ ɔ, i he ye kaa nyɛ he nile ɔ hu le wɔ saminya.* 12 Pi nɛ wa kpale ngɛ wa yi jee kɛ ngɛ nyɛ hae, mohu ɔ, wa ngɛ nyɛ he wami womi nɔ́ ko hae nɛ́ nyɛɛ da nɔ kɛ fĩa ngɛ wa he, konɛ nyɛ ná heto kɛ ha nihi nɛ a fĩaa ngɛ kpo nɔ blɔ níhi a he,+ se pi ngɛ tsui mi níhi a he ɔ. 13 Ejakaa ke wa yi puɛ ɔ,+ e puɛ kɛ ha Mawu; ke wa juɛmi mi tsɔ ɔ, e mi tsɔ kɛ ha nyɛ. 14 Suɔmi nɛ Kristo ngɛ ɔ nyɛɔ wa nɔ, ejakaa bɔ nɛ wa ma nya si ha ji nɛ ɔ nɛ, kaa adesa kake gbo kɛ ha nihi tsuo;+ enɛ ɔ he ɔ, nihi tsuo gbo. 15 Nɛ e gbo kɛ ha nihi tsuo konɛ nihi nɛ a ngɛ wami mi ɔ nɛ a ko hi wami mi kɛ ha mɛ nitsɛmɛ a he hu,+ se mohu kɛ ha nɔ nɛ e gbo kɛ ha mɛ nɛ a tle lɛ si ɔ.

16 Enɛ ɔ he ɔ, kɛ je piɔ kɛ yaa a, ngɛ he lo blɔ fa mi ɔ, wa li adesa ko.+ Ke be ko nɛ be ɔ wa le Kristo ngɛ he lo nya po ɔ, ngɛ anɔkuale mi ɔ, amlɔ nɛ ɔ lɛɛ wa li lɛ ngɛ jamɛ a blɔ ɔ nɔ hu.+ 17 Lɔ ɔ he ɔ, ke nɔ ko kɛ Kristo pee kake ɔ, nɔ ɔ ji adebɔ nɔ́ ehe;+ ní momo ɔmɛ be kɛ ho; hyɛ! ní ehehi lɛ a ba. 18 Se níhi tsuo je Mawu ngɔ, nɔ nɛ e gu Kristo nɔ kɛ dla waa kɛ lɛ wa kpɛti+ nɛ e ha wɔ sɔmɔmi ní tsumi ko nɛ́ yeɔ buaa nihi konɛ a dla huɛ bɔmi nɛ ngɛ a kɛ Mawu a kpɛti ɔ,+ 19 lɔ ɔ ji kaa Mawu ngɛ e kɛ je ko a kpɛti dlae kɛ gu Kristo nɔ,+ e bui a tɔmi ɔmɛ a he akɔtaa kɛ si we mɛ,+ nɛ e ngɔ sɛ gbi nɛ ma ha nɛ nihi nɛ a dla huɛ bɔmi nɛ ngɛ a kɛ Mawu a kpɛti ɔ kɛ wo wa dɛ.+

20 Enɛ ɔ he ɔ, wa ji nane mi dali+ nɛ wa daa si ngɛ Kristo nane mi,+ kaa nɔ́ nɛ Mawu gu wa nɔ kɛ ngɛ pɛɛ kpae. Akɛnɛ wa ji nihi nɛ a daa si ngɛ Kristo nane mi he je ɔ, wa kpaa pɛɛ ke: “Nyɛ ba dla nyɛɛ kɛ Mawu nyɛ kpɛti.” 21 Nɔ nɛ e li yayami ɔ,+ wa he ɔ, a ha nɛ e plɛ pee yayami afɔle,* konɛ kɛ gu e nɔ ɔ, wa ba plɛ pee dali ngɛ Mawu hɛ mi.+