Kekleekle Womi Kɛ Ya Ha Korintobi Ɔmɛ

8 Jehanɛ ɔ, ngɛ niye ní nɛ a kɛ sã afɔle kɛ ha wɔhi ɔ blɔ fa mi ɔ,+ nɔ́ nɛ i ngɛ demi ngɛ he ji nɛ ɔ nɛ: Wa le kaa wɔ tsuo wa ngɛ nile.+ Nile haa nɛ nɔ woɔ e he nɔ, se suɔmi fiaa nɔ kɛ maa si.+ 2 Ke nɔ ko susuɔ kaa e le nɔ́ ko ɔ, e li jamɛ a nɔ́ ɔ kaa bɔ nɛ e sa kaa e le ɔ lolo. 3 Se ke nɔ ko suɔ Mawu ɔ, Mawu hu le jamɛ a nɔ ɔ.

4 Jehanɛ ɔ, ngɛ niye ní nɛ a kɛ sã afɔle kɛ ha wɔhi a yemi blɔ fa mi ɔ, wa le kaa wɔ be he wami ko kulaa+ ngɛ je ɔ mi, anɔkuale Mawu kake pɛ lɛ ngɛ, ekpa ko be hu.+ 5 Ejakaa e ngɛ mi kaa ní komɛ ngɛ nɛ a tsɛɔ mɛ mawuhi ngɛ hiɔwe aloo zugba a nɔ,+ kaa bɔ nɛ “mawuhi” fuu kɛ “nyɔmtsɛmɛ” fuu ngɛ ɔ mohu lɛɛ, 6 se ngɛ wɔɔ lɛɛ wa blɔ fa mi ɔ, ngɛ anɔkuale mi ɔ, Mawu kake pɛ lɛ ngɛ,+ Tsɛ ɔ,+ nɔ nɛ e mi lɛ níhi nɛ a ngɛ ɔ tsuo je, nɛ́ wa ngɛ kɛ ha lɛ ɔ;+ nɛ Nyɔmtsɛ kake lɛ ngɛ, Yesu Kristo, nɔ nɛ e nɔ lɛ níhi nɛ a ngɛ ɔ tsuo gu kɛ ba,+ nɛ́ e nɔ lɛ wɔ hu wa gu kɛ ba a.

7 Se pi nihi tsuo nɛ a ngɛ nile nɛ ɔ.+ Se ni komɛ lɛɛ akɛnɛ be ko nɛ be ɔ, a ja wɔhi he je ɔ, a yeɔ niye ní kaa nɔ́ ko nɛ a kɛ sã afɔle kɛ ha wɔhi,+ nɛ akɛnɛ a he nile gbɔjɔ he je ɔ, lɔ ɔ bleɔ a he nile ɔ.+ 8 Se niye ní be wɔ ngɔe kɛ su Mawu he haa;+ ke wa yi ɔ, wa gbee we si, nɛ ke wa ye hu ɔ, wa ná we nɔ́ ko tsɔ.+ 9 Se nyɛɛ ya nɔ nɛ nyɛɛ hyɛ nɛ hi nɛ he blɔ nɛ nyɛ ngɛ nɛ nyɛɛ kɛ mwɔɔ nyɛ yi mi kpɔ ɔ nɛ ko pee nane tɔ̃tɔ̃mi nɔ́ kɛ ha nihi nɛ a gbɔjɔ ɔ.+ 10 Ejakaa mo nɛ o ngɛ nile ɔ, ke nɔ ko na mo nɛ o ngɛ ní yee ngɛ wɔ tsu ko mi ɔ, anɛ nɔ nɛ e gbɔjɔ ɔ, e he nile be gboe hluu po kaa e ma ya ye niye ní nɛ a kɛ sã afɔle kɛ ha wɔhi lo? 11 Enɛ ɔ he ɔ, o kɛ o nile ɔ ngɛ nɔmlɔ nɛ e gbɔjɔ, nɛ ji o nyɛmi ɔ nɛ Kristo ba gbo ngɛ e he ɔ hɛ mi kpatae.+ 12 Ke nyɛ pee yayami kɛ si nyɛ nyɛmimɛ ngɛ blɔ nɛ ɔ nɔ, nɛ nyɛ plaa a he nile nɛ gbɔjɔ ɔ,+ nyɛ ngɛ yayami pee kɛ ngɛ Kristo sie. 13 Lɔ ɔ he ɔ, ke niye ní haa nɛ ye nyɛmi nane tɔ̃tɔ̃ɔ ɔ, i be muɔ lo yee hu gblegbleegble konɛ ma ko ha nɛ ye nyɛmi ɔ nane nɛ tɔ̃tɔ̃.+