Ka Iwinyo Calo Pe Dong Itwero Medde ki Kwo

Adriana, ma a ki i lobo Brazil, otito ni: “Par ma awinyo onongo pe jukke. Pi meno, amoko tamma me kwanyo kwona woko.”

TIKA dong kare mo iwinyo marac adada ma inongo ni myero ito woko? Ka tye kit meno, ci itwero niang kit ma Adriana owinyo kwede. En onongo lwenyo ki par mukato kare woko, medo i kom cwercwiny kacel ki tam ni konye pe. Ludaktar gunongo ni Adriana tye ki two turcwiny.

Nen bene labol pa Kaoru, laco ma a ki i lobo Japan, ma obedo ka gwoko lunyodone ma gutii dok komgi lit. En otito ni, “I kare meno, onongo atye ka kato ki i lyeto magwar adada i dog ticca. Mitina me cam orweny woko dok pe onongo atwero nino maber. Acako tamo ni ka ato woko ci pekona bigik.”

Ojebode, laco ma a ki i lobo Nigeria owaco ni: “I cawa ducu onongo cwinya bedo ka cwer ma weko akok matek, pi meno ayenyo yo me kwanyo kwona woko.” Ki pwoc madit, Ojebode, Kaoru, ki Adriana pe gukwanyo kwogi. Ento mwaka ki mwaka, cokcok dano 800,000 gikwanyo kwogi.

KA MA ITWERO NONGO IYE KONY

Pol pa dano ma gikwanyo kwogi kekengi gubedo co, ma polgi lewic makogi me penyo pi kony. Yecu owaco ni jo ma komgi lit gimito daktar. (Luka 5:31) Pi meno, ka itye ki turcwiny ma weko itamo ni myero ikwany kwoni woko, pe iwek lewic omaki me yenyo kony. Dano mapol ma gilwenyo ki two turcwiny giwaco ni nongo kony ki bot ludaktar konyogi me kanyone. Ojebode, Kaoru, ki Adriana gunongo kony ki bot ludaktar dok i kare-ni gitye ka kanyo pekkigi maber.

Daktar twero tic ki yat nyo loko aloka ki ngat ma tye ki turcwiny kun miye tam. Jo ma cwinygi otur bene gimito wadi ki lurem ma giniang, gidiyo cwinygi, dok ginyuto kica. Larem maber loyo ma itwero bedo kwede aye Lubanga Jehovah, ma miyo kony i Lokke, Baibul.

TIKA TYE YO MO ME CANGONE MATWAL?

Jo ma gitye ki two turcwiny pol kare gimito kony pi kare malac dok omyero gupwonnye me kanyo peko man kun giloko yo me kwogi. Ento ka ilwenyo ki turcwiny, itwero keto tammi i kom anyim mamwonya, calo Ojebode. En owaco ni, “Atye ka kuro neno cobbe pa Icaya 33:24, ma tito pi kare mo i anyim ma pe tye ngat mo i lobo-ni ma biwaco ni ‘An koma lit.’” Calo Ojebode, in bene itwero nongo kwe cwiny ki i cikke pa Lubanga pi “lobo manyen” ka ma “arem” dong bibedo pe. (Niyabo 21:1, 4) Cikke meno tyen lokke ni two wic nyo turcwiny mo keken bibedo pe. Arem cwiny ma iwinyo birweny woko matwal. ‘Pe dong ibipo’ pi arem ma itye kwede dok “pe bene dano mo bitamo pigi.”—Icaya 65:17.

Tyeng Mogo me Baibul ma Twero Konyi

Lubanga niang kit ma iwinyo kwede.

“An a Rwot Lubangawu, dong amako cingwu ma lacuc woko liking; an atye ka waco botwu ni: ‘Pe wulwor, abikonyowu.’”—Icaya 41:13.

Jehovah niang kit ma wawinyo kwede maber loyo ngat mo keken, dok en mito konyowa.

Lwod lok ma tye i Baibul.

“[Elia] olego Rwot [Jehovah] ni, ‘. . . ai Rwot, tin dong ikwany kwona woko.’”—1 Luker 19:4.

Ojebode owaco ni, “Lwodo Lok pa Lubanga okonya adada. Aniang ni lanebi Elia bene obedo ki turcwiny calo an.”

Nong pwony ki i labol me Baibul.

“Alego piri [Petero] ni niyeni pe odok cen.”—Luka 22:32.

I kare ma Petero okwero Yecu tyen adek, en owinyo marac dok okok matek. Kaoru owaco ni, “Gin mutimme i kom Petero okonya me neno ni Jehovah gin ki Yecu onongo giparo pi kit ma Petero winyo kwede. Man ocuko cwinya adada.”

‘Pe dong wubipo pi’ arem cwiny ma wuwinyo i kare-ni, “pe bene dano mo bitamo pigi.”—Icaya 65:17