LAPENY PA LUKWAN BUKKEWA

Lanen ango ma ‘kimwono’ me nyuto ni Lubanga owiro Lakricitayo moni dok gin ango ma kijengo me “moko” ni gibinongo motgi?​—2 Kor. 1:21, 22.

Mwono: Ma lubbe ki buk mo acel, lok ni ‘mwono’ ma kitiyo kwede i 2 Jo Korint 1:22 obedo “lok ma kwako cik kacel ki biacara” ma te lokke ni “cul mukwongo, nyo cente mo manok ma kiculo pi gin ma kimito wilone-ni, ma bedo but wel ma giculo mukwongo, dok meno nyuto ni gin moni dong megi ma lubbe ki cik nyo bedo calo gicikke ma kimoko.” Ma dok i kom jo ma kiwirogi, Jehovah dong omwono lanen ma moko ni gibinongo mot . Kitito pi cul ducu nyo mot ma gibinongone i 2 Jo Korint 5:1-5 ma kwako ruko kom ma pe top me kwo i polo. Motte bene kwako nongo kom ma pe twero to.​—1 Kor. 15:48-54.

I leb Grik ma kiloko i kareni, nyig lok ma kitiyo kwede rom ki lagit cing ma nyuto ni ngat moni dong oye nyomme. Man tye lapor ma rwatte pi jo ma gibibedo i kin jo ma kilwongo i Baibul ni dako pa Kricito.​—2 Kor. 11:2; Yabo 21:2, 9.

Moko: I kare macon, gin me moko gin mo nyo citam onongo gitiyo kwede calo alama me nyuto rwod gin moni, ada pa gin moni, nyo gicikke moni. Ma lubbe ki jo ma kiwirogi, kiketo lanyut me moko nyo alama mo i komgi, ma cwiny maleng aye oketo ma nyuto ni gin aye jo pa Lubanga kikome. (Ep. 1:13, 14) Lanen ma moko meno pe bedo pi naka, ento bedo nio wa i kare ma ngat moni ma lagen dong cok to nyo nio ka twon can madit atika-ni cok cakke.​—Ep. 4:30; Yabo 7:2-4.