Lapeny Pa Lukwan Bukkewa

Tika lok ma Daudi ocoyo i Jabuli 37:25 ki ma Yecu owaco i Matayo 6:33 nyuto ni Jehovah pe biweko Lakricitayo bedo labongo cam muromo?

Daudi ocoyo ni ‘pud peya eneno gibwoto dano ma kite atir, kadi ki litinone bene pe eneno ka giyenyo kwon ayenya.’ En onongo tye ka lok mere ma lubbe ki gin mutimme i kwone. En onongo ngeyo ni Lubanga gwoko jone kare ducu. (Jab. 37:25) Ento, lok pa Daudi-ni pe te lokke ni jo ma giworo Jehovah gubedo ki jami ma mitte me kom kare ducu nyo ni gubibedo kwede kare ducu.

Daudi bene i kine mukene obedo ki kwo matek adada. Man otimme i kare ma en tye ka ngwec ki bot Caulo. En olego ni kimiye cam ki dong bot jone i kare ma camme onongo tye ka tum woko. (1 Cam. 21:1-6) I kare meno, Daudi onongo tye ka ‘yenyo kwon ayenya.’ Ento, i cawa meno ma kwo tek tutwal-li, en onongo ngeyo ni Jehovah pe obwote ata. I kom lok, pe wakwano ka mo keken ma wacci Daudi olego cam alega wek ekwo.

I Matayo 6:33, Yecu ocuko cwinywa ni Lubanga bimiyo jami ma mitte bot luticce ma lugen ma giketo pi Kerre bedo mukwongo i kwogi. “Kong wukwong keto cwinywu i kom kerre, ki nongo kit ma atir ma en tye kwede, ci jami magi ducu [calo ginacama, ginamata, ki dong bongo] gibimedo botwu.” Ento, Yecu bene owaco ni kec romo neko ‘utmegine’ pien nongo kitye ka unogi. (Mat. 25:35, 37, 40) Meno aye gin mutimme i kom lakwena Paulo. En bene i kine mukene kec ki orwo pii oneke.—2 Kor. 11:27.

Jehovah wacciwa ni kibiunowa i yo mapat pat. En romo weko wabedo labongo jami mogo ka nongo wagamo adot ma Larac-ci okelo. (Yubu 2:3-5) Me labolle, utmegiwa mogo ma kitweyogi i buc i kare pa Hitler gudeno can mapol pien kibedo ka unogi. Kibedo ka twenyo Lucaden magi kun pe kiminigi cam muromo wek gutur gennegi. Jehovah pe obwoto Lucaden magi ata pien gugwoko gennegi dok gubedo luwiny. Jehovah oweko gin guwok ki i aunauna man kit macalo en weko Lukricitayo mukene-ni ducu giwok ki i atematema mapat pat. Jehovah konyo jo ducu ma gideno can pi nyinge. (1 Kor. 10:13) Wiwa myero pe owil i kom lok ma kicoyo i Jo Pilipi 1:29, ma waco ni: ‘Kimiyowu mot me kica pi Kricito, pe mot me ye en keken, ento me neno can pire bene.’

Jehovah ocikke me gwoko jone. Me lapore, Icaya 54:17 waco ni: “Pe tye jami lweny mo ma giteto pi lweny i komi ma bicobo ticce.” Cikke man kacel ki mukene moko atir ka maleng ni Lubanga bigwoko jone macalo gurup. Ento, Lukricitayo ducu ki acel acel giromo wok ki i atematema ma twero bene kwanyo kwogi.