Tika Cente Aye Obedo Acakki me Gin Maraco Ducu?

Lagam ma Baibul miyo

Pe. Baibul pe waco ni cente rac, dok bene pe waco ni cente aye obedo acakki me gin maraco ducu. Lok man ma dano gimaro wacone ni “cente aye obedo acakki me gin maraco ducu” pe rwatte ki gin ma Baibul waco. I adane, Baibul waco ni “maro lim en aye acakki me gin maraco ducu.”a—1 Temceo 6:10.

Gin ango ma Baibul waco i kom cente?

Baibul waco ni cente ka kitiyo kwede i yo me ryeko twero bedo me kony, dok bene twero ‘gwokowa.’ (Latitlok 7:12) Medo i kom meno, Baibul pwoyo jo ma ginyuto yot cing bot jo mukene, ma bene kwako miyo mot me cente.—Carolok 11:25.

Ki tungcel, Baibul cikowa ni pe wawek cente obed gin ma pire tek loyo i kwowa. Waco ni: “Pe wubed jo ma maro lim; jami ma wutye kwede myero oromwu.” (Jo Ibru 13:5) Man pwonyowa ni omyero wati ki cente i yo maber, ento pe wayeny lonyo. Ma ka meno, myero watute me bedo jo ma giyeng ki jami ma mitte, calo cam, ginaruka, ki dong kabedo.—1 Temceo 6:8.

**Pingo Baibul cikowa pe me maro cente?**

Luworo pe gibinongo kwo ma pe tum. (Jo Epeco 5:5) Tyen lok acel aye ni, cwiny me woro obedo but woro me goba. (Jo Kolocai 3:5) Tyen lok mukene aye ni, jo ma luworo pol kare pe gilubo cik me Baibul i tutegi me nongo gin ma gimito. Carolok 28:20 waco ni, “Ngat ma laro ni elony woko oyotoyot pe bibwot ki pwod.” Giromo bene donyo i atematema me kwalo cente i wi diro, kwalo dano wek kikokgi ki cente madwong, nyo neko dano.

Kadi bed maro lim pe otero ngat moni me timo jami maraco, ento maro lim twero kelo adwogi maraco mukene. Baibul waco ni “jo ma mito bedo lulonyo miyo Catan bitogi ci gipoto i bal, ka dong gimoko i owic pa Catan pi mitigi mapol me mingo ma tye ka unogi.”—1 Temceo 6:9.

Adwogi maber ango ma watwero nongo ki i tam ma Baibul miyo ka odok i kom cente?

Ka wamedde ki timo gin matir ki gin ma yomo cwiny Lubanga, wabiwore kenwa dok wabinongo cwak pa Lubanga. Lubanga ocikke bot jo ma gitute me yomo cwinye ni: “Pe abiboli, pe abibwoti ata.” (Jo Ibru 13:5, 6) En bene ocikke ni ‘Dano ma lagen bilimo mot mapol.’—Carolok 28:20.

Tyeng mogo me Baibul ma loko i kom cente

Latitlok 7:12: ‘Lim gwoko ngat ma tye kwede.’

Tyen lokke: Ka kitiyo ki cente i yo maber, ci twero miniwa gwok mo olo.

Luka 12:15: “Kwo pa dano pe cung i wel lim mapol ma en tye kwede.”

Tyen lokke: Cente pe obedo gin ma pire tek loyo i kwo, dok pe bikonyowa me nongo larre.

1 Temceo 6:10: “Maro lim en aye acakki me gin maraco ducu; man en gin ma omiyo jo mogo gua woko ki i niye, ka dong gurwatte ki lwak can mapol ata mucorre i komgi.”

Tyen lokke: Cente pe obedo gin marac. Ento dano ma gimaro cente—dok giweko bedo gin ma pire tek loyo i kwogi—gikelo peko i komgi kekengi, calo pokke i kin jo me ot ki peko me yot kom pien gitiyo pi cawa malac tutwal me nongo cente.

Jo Ibru 13:5: “Pe wubed jo ma maro lim; jami ma wutye kwede myero oromwu.”

Tyen lokke: Ma ka tute ki kerowa ducu me nongo lonyo, wanyuto ryeko ka wayeng ki jami ma mitte.

Matayo 19:24: “Kinaga twero donyo i wang libira oyot, makato lalonyo me donyo i ker pa Lubanga.”

Tyen lokke: Yecu onongo pud oa ka lwongo laco mo ma lalonyo me lubo kore. Laco-ni okwero woko pien onongo maro lonyone tutwal. Pi meno, Yecu onongo tye ka cikowa. Ngat ma maro lonyo makato Lubanga twero keng kwo ma pe tum.

a Tyeng man bene kigonyo ni: “Maro cente aye acakki me jami ducu ma wanowa.”