Pingo Lucaden pa Jehovah Gikwero Cam me Otyeno pa Rwot i Yo Mapat ki Dini Mukene-ni?

Watute matek me lubo Baibul ki kore kit ma kwer me Cam me Otyeno pa Rwot, ma bene kilwongo i yo mapatpat ni “Cam pa Rwotwa,” Cam me Agikki, ki Nipo me To pa Yecu, myero owot kwede. (1 Jo Korint 11:20) Ento ki tungcel, niye ki jami ma dini mukene-ni gilubo ma kwako kwer man pe jenge i kom lok me Baibul.

Tyen Lok me Kwerone

Tyen lok me kwero Cam me Otyeno pa Rwot aye me po i kom Yecu, kun wanyuto pwocwa pien omiyo kwone me kokowa. (Matayo 20:28; 1 Jo Korint 11:24) Kwer man pe obedo (Cakramento) nyo yub mo maleng me timo kica ki kwanyo bal pa dano.a Baibul pwonyo ni timo kica pi balwa pe jenge i kom kwer ma wakwero-ni, ento twere keken pi niye i kom Yecu.—Jo Roma 3:25; 1 Jon 2:1, 2.

Tyen Adi?

Yecu ociko lupwonnyene me kwero Cam me Otyeno pa Rwot, ento pe otito tyen adi, nyo i nge kare marom mene. (Luka 22:19) Jo mogo gitamo ni kwer man myero obed dwe ki dwe, mukene gikwero cabit ki cabit, dok mogo nino ducu, mukene tyen mapol i nino acel, nyo tekki giwinyo ni oporre.b Ento, tye jami mogo ma pire tek ma kitito kany ma myero kong kinyam.

Yecu ocako kwer me Cam me Otyeno pa Rwot i nino me Kato (Paska), ci lacen i nino acel-lu en oto woko. (Matayo 26:1, 2) Man pe gin ma otimme atima. Pien Ginacoya poro ginkok pa Yecu ki latin romo me Kato (Paska). (1 Jo Korint 5:7, 8) Kato (Paska) onongo kikwero kicel mwaka ki mwaka. ( 12:1-6; Lulevi 23:5) I yo acel-lu, Nipo me to pa Yecu onongo bene Lukricitayo macon gikwero kicel mwaka ki mwaka,c dok Lucaden pa Jehovah gilubo yo me kwerone acel-lu ma jenge i kom Baibul-li.

Nino dwe ki Cawa

Yo ma Yecu ocako-ni konyo me moko tyen adi ma omyero ki kwer kwede yub me Nipo, kacel ki nino dwe ki cawa me kwerone. En ocako yub meno i nge poto ceng, me Nican 14, 33 C.E., ma lubbe ki kalenda me Baibul ma tiyo ki dwe. (Matayo 26:18-20, 26) Wan wamedde ki kwero Nipo mwaka ki m mwaka, kit ma Lukricitayo macon onongo gitimo.d

Kadi bed ni Nican 14, 33 C.E. onongo ceng Abic, nino dwe acel-lu poto i nino mapatpat me cabit mwaka ki mwaka. Watiyo ki yo ma kitiyo kwede i kare pa Yecu me moko nino ma Nican 14 poto iye mwaka ki mwaka, me kaka tic ki kalenda pa Lujudaya me kareni.e

Mugati ki kongo vino

I kwer manyen-ni Yecu otiyo ki mugati ma tobi pe iye ki kongo vino makwar ma onongo gudong ki i cam me Kato (Paska). (Matayo 26:26-28) Ma lubbe ki lanen pa Yecu, watiyo ki mugati ma tobi pe iye ki kongo vino makwar ma pe ki gin mo mukene iye, dok pe watiyo ki kongo vino ma kimedo iye jami calo cukari-gi nyo jami makur mo.

Dini mogo gitiyo ki mugati ma tye ki tobi iye, ento pol kare i Baibul tobi cung pi bal. (Luka 12:1; 1 Jo Korint 5:6-8; Jo Galatia 5:7-9) Pi meno, mugati ma pe ki tobi keken aye twero cung pi kom Yecu ma pe ki bal-li. (1 Petero 2:22) Tim mukene ma pe rwatte ki lok ma i Baibul aye tic ki pig olok manyen ma pud peya odoko kongo me kaka kongo vino. Dini mogo gitimo kit meno pien gilubo pwony goba ni Lukricitayo myero pe gumat kongo, lok ma pe kicoyo i Baibul.—1 Temceo 5:23.

Mugati pe obedo ringo kome dok kongo vino pe obedo remone

Mugati ma pe ki tobi-ni ki kongo vino makwar-ri onongo gicung pi ringo kom Kricito ki remone. Pe gilokke i yo me tango gidoko ringo kome nyo remone kit ma jo mukene gitamo kwede. Tam kong niango ma Baibul miyo i kom lok man.

• Ka Yecu onongo ociko lupwonnyene ni gumat remone, kono onongo tye ka waco ni gutur cik pa Lubanga ma gengo camo remo. (Acakki 9:4; Tic pa Lukwena 15:28, 29) Ento man onongo pe twere, pien Yecu onongo pe twero ciko dano me turo cik pa Lubanga i kom neno remo calo gin maleng.—Jon 8:28, 29.

• Ka lupwonnyene onongo dong gitye ka mato remo pa Yecu, en onongo pe dok biwacci remone ‘bio’, gin ma onongo bitimme i anyim i kare me tone.—Matayo 26:28.

• Yecu otyero kwone “kicel keken.” (Jo Ibru 9:25, 26) Ento, ka ce mugati ki vino onongo olokke odoko ringo kome ki remone i kare ma kitye ka camo Cam me Otyeno pa Rwot, ci jo ma gicamo nongo gitye ka nwoyo tyero kwone doki.

• Yecu owacci: “Wutim kuman me po pira,” pe ni “macalo gityera.”—1 Jo Korint 11:24.

Jo ma cwako pwony man ni mugati ki kongo vino gilokke gidoko kom Yecu ki Remone kikome, giwacci pwony man jenge i kom ginacoya mogo me Baibul. Me laporre, i Baibul mapol ma kigonyo, kicoyo ni Yecu oloko i kom kongo vino-ni ni: “Man aye remona.” (Matayo 26:28) Ento, lok pa Yecu-ni bene gonnye ni: “Man te lokke ni remona,” “Man cung pi remona,” nyo “Man lanyut me remona.”f Kit ma Yecu obedo ka timone kare ki kare-ni, en onongo tye ka pwony kun tiyo ki carolok.—Matayo 13:34, 35.

Angagi ma gicamo?

Ka Lucaden pa Jehovah gitye ka kwero Cam me Otyeno pa Rwot, jo manok keken i kingi aye gicamo mugati dok gimato kongo vino. Pingo?

Remo pa Yecu ma oony piwa-ni oketo “gicikke manyen” ma oleyo wang gicikke ma obedo i kin Lubanga Jehovah ki rok me Icrael. (Jo Ibru 8:10-13) Jo ma gitye i gicikke manyen meno aye gicamo cam me Nipo meno. Man pe kwako Lukricitayo weng, ento “jo ma gilwongo” i yo ma kite pat ma lubbe ki yub pa Lubanga. (Jo Ibru 9:15; Luka 22:20) Jo meno gibiloc i polo kacel ki Kricito, dok Baibul wacci dano 144,000 gibinongo mot meno.—Luka 22:28-30; Niyabo 5:9, 10; 14:1, 3.

Ka kiporo ki “romi manok” ma kilwongogi ka loc kacel ki Kricito, jo ma gitye ki gen me bedo i kin “lwak dano mapol ata” ma gibinongo kwo ma pe tum i lobo kany dok gipol. (Luka 12:32; Niyabo 7:9, 10) Kadi bed ni wan ma watye ki gen me bedo i lobo kany pe wanywako i camo mugati nyo mato kongo vino i kwer me Nipo, waribbe kacel kwedgi i nyuto pwocwa pi ginkok pa Yecu pi dano.—1 Jon 2:2.