Kit ma Itwero Weko Kwanni me Baibul Bedo Mamit Dok ma Kelo Adwogi Maber

Yocwa tye ka kwano cik; cel me Jeriko tye ka poto kun ot pa Rakab ocung matek; Yocwa otingo cinge malo kun neno polo dok woto ki lega

YOCWA onongo myero otel wi rok me Icrael otergi wa i Lobo ma Kiciko Pire-ni. Man onongo bibedo tic matek adada. Ento, Jehovah ojingo dok ocuko cwinye kun wacce ni: ‘Bed oteka ma cwinyi nwang.’ En owaco bot Yocwa ni ka okwano dok olubo Cik pa Moses, ci en bimoko tam me ryeko dok bicobo ticce ducu maber.—Yocwa 1:7, 8.

Watye ka kwo i “kare me agikki,” pi meno kwowa twero bedo tek. (2 Temceo 3:1) Ka wamito ni wabed calo Yocwa kun ticwa ducu cobbe kakare, omyero walub tam ma Jehovah omiyo bote. Omyero wakwan Baibul nino ducu dok wati ki ngec ma wanongo me moko tam mabeco.

Ento jo mukene pe gingeyo kit me kwan, nyo gwok pe gimaro kwan. Kadi bed kit meno, kwano Baibul piri keni pire tek adada. Ka itye ka kwano bok me “Tem Timo Jami Magi,” ibinongo tam ma twero konyi wek kwanni me Baibul obed mamit dok okeli adwogi maber.

Laco jabuli owero ni: ‘Tela i yo me cikki, pien yomo cwinya mada.’ (Jabuli 119:35) In bene itwero nongo mit pa kwano Lok pa Lubanga. Ibinongo jami mamwonya mapol ka imedde ki kwanni me Baibul.

Kadi bed ni pe itye ki tic me telo wi rok kulu kit ma Yocwa otimo-ni, ento itye ki pekki mogo i kwoni. Dong, calo Yocwa, kwan dok ilub Lok pa Lubanga. Ka itimo kit meno, ci ibimoko tam me ryeko dok ticci ducu bicobbe kakare.

TEM TIMO JAMI MAGI

Leg ma peya icako kwanni. Baibul tye ki tam pa Jehovah, dok kicoyo me konyowa. Pi meno ka ibicako kwano Baibul, leg Jehovah wek okonyi me niang gin ma itye ka kwanone, wek wi opo iye, dok iti kwede me moko tam mabeco i kwoni.—Ejira 7:10.
Pennye kekeni ka iwoto ki kwano Baibul nyo bukkewa ma jenge i kom Baibul. Me labolle: ‘Bute man pwonya gin ango i kom Jehovah? Lok man kubbe ki kwena me Baibul nining? Atwero tic ki gin ma akwano-ni me konyo jo mukene nining?’
Lwod lok matut i kom ngo ma itye ka kwanone. Gik kong kwanni manok, ci itam i kom gin ma ia ka kwanone. Pennye kekeni ni: ‘Man weko awinyo nining? Pingo weko awinyo kit meno? Lok man kubbe nining ki gin mutimme i kwona i kare mukato angec, gin ma tye ka timme i kwona i kare-ni, nyo ma romo timme i anyim? Atwero tic ki tira man nyo cik ma igi lac magi nining i kwona?’ (Yubu 23:5; Jabuli 49:3) Ka itye ka lwodo lok, nen ka itwero tito pingo Jehovah mito ni jone gugwokke ki tim mogo. Nyo tam kong kit ma adwogine onongo bibedo pat kwede ka ngat ma ikwano lok i kome-ni onongo omoko tam me ryeko.—Nwoyo Cik 32:28, 29.
Go cal jami ma itye ka kwano i wi. Me labolle, go kong gin mutimme i kare ma omegi Yucepu gucate bot jo Icmael? (Acakki 37:18-28) Ngo ma onongo ibineno, ibiwinyo, dok ibingweyo? Ket kong ni itye ngat acel i kingi. Onongo gitye ka winyo nining dok gitye ka tamo gin ango? Ka igoyo cal jami ma ikwano i wi, ci kwanni bibedo mamit mada.
Ti ki jami me kwedo lok ma dul pa Jehovah oyubo. Tic ki jami magi twero weko kwanni bedo mamit. Pwony kit me tic ki jami me kwedo lok ma tye i lebwu, kadi ma tye i intanet nyo ma kigoyo macalo buk. Pe ilwor penyo kony ki bot jo mukene wek ipwony kit me tic ki jami magi. Me labolle, Watch Tower Publications Index nyo Buk ma Konyo Lucaden pa Jehovah me Kwedo Lok bikonyi me nongo jami ma kicoyogi i kom wi lok mogo kun bene nyamo tyeng mapol me Baibul. Ti ki lamed ngec me Baibul me New World Translation of the Holy Scriptures ka tye nonge i leb mo ma ingeyo. Lamed ngec magi tye ki ngec ma kwako kabedo, tekwaro, lapim jami, ki lok mukene.
Wot wiye wiye i lok ma pigi tego ma ikwano. Man bikonyi weko wi pe wil i kom jami ma ibedo ka kwanone. Ma dong ber loyo, lok ki jo mukene i kom gin ma ikwano. Tika tye gin mo ma ikwano ma itwero tic kwede i ticci me pwony? Ka itimo jami magi, ci wi bipo i kom lok ma pigi tego ma ikwano, dok jo mukene bene binongo adwogi maber ki i kwanni.