Cik Iti ka Winyo Lok i Cokke

1-2. (a) Gin ango ma Jehovah tye ka timone pi jone i kare-ni? (Jabuli 23:​1, 2, 5) (b) Gin ango ma wabinyamo i pwony man?

I KARE-NI, Jehovah tye ka miniwa cam me cwiny madwong adada. Pi meno, waye wer pa Daudi ma owero ni: “[Jehovah] aye lakwat ma kwayo an; pe tye gin mo ma birem bota.”—Kwan Jabuli 23:​1, 2, 5.

² Yo acel ma Jehovah pwonyowa kwede i kare-ni aye ki i cokkewa. I cokkewa magi, pol kare wawinyo jami ma dong wangeyo con. Kadi bed dong warii i ada pi kare malac dok wangeyo lok me Baibul maber adada, pud mitte ni wawiny lok magi. (2 Pet. 1:12) Ento ka kitye ka pwonyo gin mo ma dong wangeyo con i cokke, tika inongo ni tek me keto cwinyi ka winyo lok? Ka tye kit meno, ci gin ma wabinyamo i pwony man bikonyi. Wabinyamo tyen lok mumiyo pire tek adada me ciko iti ka itye i cokke. Wabineno bene kit ma omege ma gimiyo pwony gitwero weko bedo yot bot jo me kacokke me keto cwinygi ka lubo pwonygi. Dok wabinyamo bene gin ma wan ducu ki acel acel watwero timone me ciko itwa ka watye i cokke. Ento mukwongo, wabicako ki gamo lapeny man: Anga kikome ma pwonyowa ka watye i cokke?

JEHOVAH AYE PWONYOWA KA WATYE I COKKE

3. Jehovah loko kwedwa nining, dok luticce gitiyo ki Lokke nining?

³ Jehovah loko kwedwa kun tiyo ki Lokke, ma nonge i Baibul. (2 Tem. 3:​16, 17) Yecu onongo ngeyo meno maber. En otiyo ki Lok pa Lubanga ki diro adada ma omiyo jo ma winyo lokke gubedo ka pennye i kingi ni: “Dano man ongeyo nukuta [nyo “Ginacoya”] nining, kun kono pe okwano?” (Jon 7:15) Jo ma onongo gimwol dok gimito pwonyo lok i kom Jehovah cwinygi obedo yom adada me winyo kit ma Yecu tito kwede tyen lok me Ginacoya. Lukricitayo me cencwari me acel, calo Paulo gin ki Apolo, gulubo lanen pa Yecu. Pol kare onongo gitiyo ki Lok pa Lubanga me konyo jo mukene me niang gin ma Jehovah mito ki botgi. (Tic 17:​2, 3; 18:​24, 28) Wan macalo Lucaden pa Jehovah, wangeyo ni pwony ducu ma nonge i bukkewa ki ma kimiyogi i cokkewa, purogram me JW Broadcasting® ma katti dwe ki dwe, ki dong vidiowa ducu jenge i Baibul. Jo mapol ma gibino i cokkewa pi tyen mukwongo gibedo ki ur me neno ni watiyo ki Baibul teretere ka watye i cokkewa. Jo ma gimiyo pwony i cokkewa gitiyo ki Baibul me pwonyo dano. Pe gikwano wang Baibul akwana keken ento bene gigonyo tyene dok gikonyo dano me ketone i tic.—Luka 24:32.

4. Pingo pire tek adada me keto cwinywa ka winyo lok ka watye i cokke?

⁴ Ka watye ka kwano Baibul i cokkewa, nongo Jehovah tye ka pwonyowa wek waniang gin ma en mito ni watim ki pingo, dok meno weko doko yot botwa me bedo luwiny bote. Wangeyo ni Jehovah cwinye bedo yom ka waciko itwa ka winyo lok i cokke dok waketo i tic jami ma wapwonyo.—Car. 27:11.

PINGO PIRE TEK ME KETO CWINYWA KA WINYO LOK I COKKE?

5. Marwa pi Jehovah tugo cwinywa me timo gin ango? (Jon 4:​23, 24; 1 Jon 5:3)

⁵ Waketo cwinywa ka winyo lok i cokke pien wamaro Jehovah. (Mat. 22:37) Ka wamedde ki pwonyo lok i kom Jehovah, ci marwa pire bene bimedde ki dongo. Mar meno tugo mitiwa me bedo luwiny bote ki me wore i yo ma en mito.—Kwan Jon 4:​23, 24; 1 Jon 5:3.

6. Gin ango ma Jehovah pwonyowa kwede i cokkewa?

⁶ Waketo cwinywa ka winyo lok i cokke pien wamaro dano. (Mat. 22:39) I cokkewa, Jehovah pwonyowa kit me konyo utmegiwa kacel ki jo ma pud pe gupwonyo ada. Me labolle, bukwa me Mar Dano—Konygi me Doko Lupwonnye tye ka konyowa me dongo kit mogo mabeco ma twero konyowa me lok ki dano i tic me pwony. I cokkewa me dye cabit, kipwonyowa kit me keto i tic tam mapatpat ma kimiyo i buk man. Tika inongo ni tek me cako lok ki dano? Ka tye kit meno, ci ket cwinyi ka winyo lok ka omege ki lumege gitye ka miyo pwony i bute me “Tute Matek i Tic me Pwony” i cokke me dye cabit.

7. Pingo pire tek adada ni wamedde ki bedo luwiny bot Jehovah?

⁷ Waketo cwinywa ka winyo lok i cokke pien wamito bedo ki yomcwiny i kare-ni ki dong kwo ma pe tum i anyim. Kit ma Jehovah owaco kwede bot luticce i kare macon, ka wamito bedo ki yomcwiny ki dong nongo kwo ma pe tum i kare me anyim, ci mitte ni wabed luwiny bote. (Nwo. 32:​44-47) Ka waketo cwinywa ka winyo lok i cokke, wanongo cuko cwiny dok wapwonyo kit me ciro can ka wawoto ki kuro lobo manyen. (Rom. 8:25) Pire tek adada ni wabed luwiny bot Jehovah dok wamedde ki bedo ma komwa mit i ticce i kare man me agikki-ni.—Mat. 24:​42-44; Yabo 1:3.

KIT ME KONYO JO MUKENE ME KETO CWINYGI I COKKE

8. Pingo pire tek adada ni omege ma gimiyo pwony i nyim lwak myero gumedde ki dongo dirogi me pwony?

⁸ Omege ma gitye ki mot me miyo pwony i cokke, tutwalle jo ma gimiyo pwony pi lwak, myero gumedde ki dongo dirogi me pwony. Ka omego mo oyubo pwonye maber dok oweko pwonye jenge i Baibul, en twero konyo jo ma peya gungeyo Jehovah me pwonyo lok ada me Baibul. En bene bikonyo Lucaden luwote me niang lok ada me Baibul i yo matut ki me medde ki ketone i tic. Pi meno, ka itye ki pwony mo keken i cokke, wii opo ni pwonyi twero konyo jo mukene ma loyo kit ma ibyeko kwede. Dong ka itye ki mot me miyo pwony, nen kong kit ma tam ma kiryeyogi-ni twero konyi kwede me dongo dironi me pwony. Kadi bed tam magi tutwalle tye pi omege ma gimiyo pwony pi lwak, ento pud gitwero konyo ngat mo keken ma tye ki pwony i cokke.—2 Tem. 4:2; Tito 1:9.

9. Gin ango ma itwero timone wek obed yot bot dano me niang pwonyi?

⁹ Can pwonyi kore ki kore. Ka itye ka miyo pwony, nongo mitini tye ni jo ma gitye ka winyo lokki guniang maber, dok gunen kit ma lok ma pigi tego ma i pwonyi gikubbe kwede. Bedo tek adada pi jo ma gitye ka winyo lokki me keto cwinygi i pwonyi ka niang iye tek nyo iloko i kom jami mapol tutwal. Dong gin ango ma twero konyi? (1) I acakki me pwonyi, lok wiye wiye i kom lok ma pigi tego ma ibiloko iye. (2) Nyam lok ma pigi tego magi ki acel acel, kun kong iling manok i nge tyeko lok ma pire tek moni ka dong ikobo i mukene. (3) Me dolo te pwonyi, wot wiye wiye i kom lok ma pigi tego magi.

10. Pingo pire tek me maro pwony ma ibimiyo ki lwak?

¹⁰ Tute matek me maro pwony ma ibimiyo ki lwak. Ka imaro pwony moni, ibibedo ki miti me lok iye dok jo ma gitye ka winyo lokki gibineno meno. (Car. 2:​4, 5; Tic 4:20) Me konyi wek imar pwony ma ibimiyone-ni, lwod lok matut i kom jami ma ibiwaco kacel ki wang ginacoya ma ibinyamogi i pwony meno. Omego mo ma dong tye ki mwaka 70 ki wiye dok bedo i lobo Amerika, wiye pud po i kom pwony mo ma en owinyo i kare ma tye ki mwaka apar ki wiye. En owaco ni: “Wiya pud po i kom kit ma lami pwony meno ocuko kwede cwinywa me lwodo lok matut ka watye ka kwano Lok pa Lubanga. En otito maber kit me timone dok onongo atwero neno ni lok meno obedo gin ma pire tek adada bote. Pwony meno oloko kwona; okonya me pwonyo jami mapol ka atye ka kwano Baibul ki me doko larem Jehovah macok.”

11. Gin ango ma omege ma gimiyo pwony pi lwak gitwero pwonyone ki i 1 Temceo 4:​13-16?

¹¹ Tam i kom gin ma bikonyo lwak dok iminigi tam i kom kit me keto pwonyi i tic. Me ka miyo ngec bot lwak lumuku, ti ki wang Baibul me cuko cwiny lwak ki me konyogi me neno kit ma gitwero keto gin ma Baibul waco i tic. Me labolle, lakwena Paulo otito ki Temceo gin ma myero otim wek omedde ki bedo ki wat macok ki Jehovah i kare ma Temceo obedo ka tic matek me konyo omege ki lumege ma i Epeco. (Kwan 1 Temceo 4:​13-16.) Tam matut i kom gin ma twero konyo jo ma tye ka winyo lokki, dok ikonygi me niang kit me keto pwonyi i tic i kwogi.

12. Ka itye ka miyo pwony, pingo pire tek me lok kit ma iloko kwede jwi?

¹² Ka itye ka yubo pwonyi, por miyone tyen mapol kun itiyo ki dwan malongo. Me ka coyo nyig lok ducu ma i pwonyi piny kun ikwano akwana, tem lok bot lwak kit ma iloko kwede jwi, dok meno biweko bedo yot botgi me keto cwinygi ki dong me niang pwonyi. I brocuwa me Dong Dironi me Kwan ki Pwony kiwaco ni: “Lok kit ma iloko kwede jwi, i yo ma nyuto kit ma iwinyo kwede i kom gin ma itye ka lok iye-ni ki jo ma tye ka winyi.” Ka iloko kit ma iloko kwede jwi, jo ma gitye ka winyi gibiketo cwinygi i lokki dok gibibedo ki miti me keto pwonyi i tic.

13. Ka itye ka yubo pwonyi, pingo bedo ber me penyo pi kony ki bot omego mo ma ladiro i miyo pwony? (Nen bene cal.)

¹³ Peny omego mo ma ladiro i miyo pwony wek okonyi. Me labolle, ma peya nino me miyo pwonyi oromo, itwero nyuto ki omego meno kit ma iyubo kwede pwonyi ci i ngeye, tute me tic ki tam ma en bimini wek pwonyi obed maber adada. Medo i kom meno, ka itye ka poro miyo pwonyi ki dwan malongo, kwaye me winyone wek otitti ka ma mito ayuba. (Car. 1:5) Pol kare, wan kikomwa pe waneno ka ma mito ayuba. Pi meno, omego meno romo titti kit ma itwero weko pwonyi bedo yot kwede me aluba ki me ketone i tic. Mitte ni wadong dirowa me lok ki me pwony wek wakony jo mukene me niang kacel ki keto i tic lok ada ma nonge i Baibul.a

GIN MA TWERO KONYOWA ME KETO CWINYWA I COKKE

14. Pingo mitte ni wabed ki cwiny acel ma laco Jabuli 119 obedo kwede-ni? (Jabuli 119:​24, 111, 167)

¹⁴ Wabibedo ki miti me keto cwinywa i cokke ka wiwa po ni lok ma Jehovah miyo me poyo wiwa obedo gin ma pire tek. Wamito lapo wic magi wek okonywa me kanyo pekkiwa i kare man me agikki ma piny tye ‘marac-ci.’ (2 Tem. 3:1) Dong ka i kare mogo wawinyo calo kitye ka nwoyo gin ma wawinyo tyen mapol, bedo ber ka wadongo cwiny ma laco Jabuli 119 obedo kwede i kom lok me poyo wic ma a ki bot Lubanga.—Kwan Jabuli 119:​24, 111, 167.

15. Gin ango ma twero konyowa me neno lok ma wapwonyo i cokkewa calo gin ma pire tek adada?

¹⁵ Pire tek ni wamedde ki neno pwony ma wanongo ki i cokkewa calo mic ma oa ki bot Jehovah. Waromo nongo pwony ki i gin mutimme i kom Luicrael i kare ma Jehovah obedo ka minigi manna ma gitye i dye tim aroo. (Nia 16:​15, 31) I acakkine, cwinygi obedo yom adada pi manna. Cam meno onongo oa ki bot Jehovah, onongo mit adada dok oweko gumedde ki bedo kwo. Ento ka kare woto ki kato, jo mogo guol woko ki camo manna nino ducu. (Wel 21:5) Pwony ango ma wanongo? I kare-ni, tye pwony mogo ma kibedo ka nwoyone i cokkewa kare ki kare. Kadi bed kit meno, pe omyero wanen pwony magi calo gin ma pire pe tek. Ento wiwa myero opo ni cokkewa obedo mic ma oa ki bot Jehovah. Ki bene, gin ma kipwonyowa kwede i cokke pire myero obed tek botwa. Wiwa myero opo ni, lagwok ot ma lagen yero ki diro gin ma kibipwonyowa kwede i cokke. Gin ma wapwonyo konyowa me moko tam me ryeko ki dong me nongo kwo ma pe tum.—Car. 3:​13, 16-18; Jon 17:3.

16. Gin ango ma okonyo omege ki lumege mogo ma dong gurii i ada me keto cwinygi ka winyo lok i cawa me cokke? (Nen bene bok ma wiye tye ni “Tam ma Twero Konyi me Keto Cwinyi ka Winyo Lok.”)

¹⁶ Watwero dongo dirowa me winyo lok ka waketo tam magi ma kimiyo-ni i tic. Nen kong gin ma okonyo lutic pa Jehovah mogo ma dong gurii i ada pi mwaki mapol me medde ki keto cwinygi i cokke. Laminwa Anna, ma dong otiyo pi Jehovah pi mwaki makato 30, owaco ni: “Yubo gin ma kibinyamo con konya me keto cwinya ka atye i cokke. Ka pe ayubbe pi cokke, anongo ni tek adada me miyo lagam dok acako tamo pi jami mapat i cawa me cokke.” Omego Josef, ma dong otiyo pi Jehovah pi mwaki 52 kulu, owaco ni: “Yomo iya ka kibedo ka nwoyo pwony acel-li kare ki kare i cokke. Ka awinyo lumi pwony mapatpat kacel ki jo ma gimiyo lagam i cokke giloko i kom pwony acel-li, apwonyo gin manyen ki i lokgi.” Dok en omedde ni: “Kadi bed omego moni pe miyo pwony mamit, atute me keto cwinya i kom pwony ma en tye ka miyone me ka keto cwinya i kom kit ma en miyo kwede ki pwonye.”

17. Gin ango mukene ma twero konyi me keto cwinyi ka itye i cokke? (Nen bene cal.)

¹⁷ Kiryeyo kany tam mogo ma twero konyi me keto cwinyi i cawa me cokke. (1) Pe icam madwong wek nino pe onuri i cawa ma itye i cokke. (2) Tute me o con dok inong kabedo ma cokke pud peya ocakke. (3) Dwok dwan cimmi nyo tabulet ma megi piny wek pe owir tammi kacel ki tam pa lwak i cawa me cokke. (4) Tem goyo i wii jami ma lami pwony twero lok iye. (5) Cik wangi i kom lalok ento pe i kom jami ma tye ka timme i ngeti. (6) Co piny lok ma pigi tego, nyo go cal ma romo poyo wii i kom lok ma pigi tego. (7) Ket cwinyi i kom kit ma lalok tito kwede wang ginacoya dok itam kit ma ginacoya magi gikubbe kwede ki pwonye. (8) Pennye kekeni ni, ‘Atwero tic ki lok man nining me konyo ngat mo ma i kacokke nyo i wang ticwa?’ (9) Ma peya icito i gure me adwol nyo gure madito, kwany kareni me wot wiye wiye i yub me nino meno kun ineno wi lok kacel ki wang ginacoya me pwony acel acel. (10) Bed mot laling kun iwoto ki winyo wer kacel ki neno vidio me wer wek ka yub ocakke, nongo dong itye atera me winyo pwony ma Jehovah oyubo piri.

MEDDE KI KETO CWINYI KA WINYO LOK PA JEHOVAH

18. Pingo omyero wamedde ki keto cwinywa ka winyo lok i cokke?

¹⁸ Myero wamedde ki keto cwinywa ka winyo lok i cokke pien meno aye kit ma Jehovah tirowa kwede. (Jab. 23:3; 31:3) Wamito tira pa Jehovah wek wamedde ki timo gin ma atir dok pe wabed calo yeya ma yamo bayo woko ki i yo ma myero olubi. Pi meno, omyero ‘wagwokke i kit ma wawinyo kwede ki lok’ dok waketu tira ma wanongo ki i cokke i tic. (Luka 8:18) Jo ma giketo cwinygi ka winyo lok pa Jehovah gibedo ki yomcwiny i kare-ni dok gibinongo kwo ma pe tum i kare me anyim.—Jab. 119:​2, 14.