Kit me Bedo ki Wat Macok ki Utmegiwa

1. Watwero nongo lurem me ada ki kwene?

“KA LAREMWA mito kony, wabibedo tye me miyo kony. Watwero bedo larem, ngat ma twero niang maber!” Tika lok meno ma kikwanyo ki i wer ma wiye tye ni “Wamarre Matek ki i Cwinywa” gudo cwinyi? Jehovah ngeyo ni wamito lurem ma kit man, pi meno en miniwa lurem i kin jone! (Jab. 119:63) Watye calo jo me ot acel ma giworo Jehovah dok gimarre i kingi.

2. Kit lirem ango ma wamito makone kacel ki omege ki lumege?

² Pe wamito ni wange omegiwa ki lumegiwa wiye wiye. Me ka meno, wamito ni wadok lurem macok dok ma gigenne. Watye jo me ot acel ma giworo Jehovah dok gimaro Yecu, dok mar meno ribowa kacel. (Jon 13:35) Ento lirem ma kit man pe dongo pire kene. Omyero wati matek me doko lurem macok. Dok kit macalo watye ki roc, wanongo ariya mapatpat ma weko bedo tek botwa me gwoko lirem.

3. Pingo twero bedo tek botwa me gwoko lirem macok ki utmegiwa?

³ Lok ada tye ni, pe waromo bedo lirem macok ki dano ducu. Pingo? Watwero bedo cok ki jo mukene pien wamaro jami marom nyo watamo dok watimo jami i yo marom. Ento watwero nongo ni tek me gwoko lirem ki omege ki lumege mogo ma i kacokke. I kare mogo, niang manok twero bedo tye i kinwa dok meno twero weko wanongo ni tek me maro ngat meno. Twero bedo ni kitwa pat adada ma weko wawinyo calo pe watwero bedo larem ngat moni. Dok ka omego nyo lamego moni tye ki goro me kom nyo peko me two wic, twero bedo tek adada botwa me bedo lurem macok. I pwony man, wabinyamo labol ma Yecu oweko madok i kom kit me gwoko lirem kadi bed ariya tye. Ento mukwongo, kong wanenu kit ma lubo lanen pa Jehovah twero konyowa kwede me medde ki bedo lirem macok ki omege ki lumege.

LUBO LANEN PA JEHOVAH KONYOWA ME GWOKO LIREM MACOK

4. Watwero jingo wat i kinwa ki utmegiwa nining?

⁴ Me jingo wat i kinwa ki utmegiwa, mitte ni watute matek me neno kitgi mabeco. Gin acel ma twero konyowa me neno kitgi mabeco aye ka watero kare kacel kwedgi. Lakwena Paulo onongo tye ki miti matek me bedo kacel ki omege ki lumege. En ocoyo bot utmege ma i kacokke me Tecalonika ni: “Watemo twatwal ki miti madwong me nongo yo wek dok wanenne kwedwu wang ki wang.” (1 Tec. 2:17) Omege ki lumege mapol ginongo ni yo maber loyo me jingo wat i kingi ki luremgi obedo lok wang ki wang. Watye ki kare mapol me timo meno ka watye i ticwa me pwony, nyo i cokkewa, gure me adwol ki gure madito. Ento ka peko tye i kinwa ki ngat mo, waromo nongo ni tero mere kare keken kacel ki ngat meno pe bicobo peko meno.

5. Gin ango ma twero konyowa me medde ki bedo ki wat maber ki ngat moni kadi bed wanongo ni pe yot? Mi lapor. (Jo Kolocai 3:12)

⁵ Lubo kit pa Jehovah twero konyowa me gwoko wat i kinwa ki laremwa mo ka peko tye i kinwa. (Kwan Jo Kolocai 3:12.) Ka watute me nyuto ni waparo pi dano, wabedo lukica, wanyuto mwolo dok wadiyo cwinywa, ci bibedo yot botwa me loyo ariya ma twero balo wat i kinwa ki luremwa ma i kacokke. Me lapore, kit ma moo weko injin me mutoka tiyo maber, mitte ni walub kit pa Jehovah wek wat i kinwa ki utmegiwa obed maber. Kong dong wanyamu ariya adek ma twero balo wat i kinwa ki utmegiwa. Pi ariya acel acel ma wabinyamo, wabineno kit ma lubo lanen pa Yecu me mwolo, diyo cwiny ki kica bikonyowa me medde ki bedo lurem me ada.

KA NIANG MANOK TYE I KINWU

6. Pingo bedo ki niang manok twero balo lirem woko?

⁶ Pingo man obedo ariya? Ka niang manok tye i kin jo aryo, ngat acel acel nongo tamo ni tamme aye tye kakare. Me labolle, omege aryo gitwero bedo ki tam mapatpat i kom kit ma gurupgi me tito kwena omyero oti kwede i wang ticgi. Ngat acel acel i kingi winyo calo tamme ber loyo pa lawote. Niang manok i kom gin matidi kit man twero doko peko madit ma balo wat i kingi woko. Gitwero weko cwiny me awaka aye dong doro tamgi. Ka pe gunyamo lok man maber ci gucobo woko, ci gitwero mako akemo i cwinygi. Ka kare woto ki kato, ngat man twero cako weyo lawote ci wat i kingi balle woko. Man twero timme pi peko mo matidi.

7. Ngo ma Yecu otimo me pwonyo lulub kore ni bedo jo ma mwol bikonyogi me cobo niang manok?

⁷ Nong pwony ki i lanen me mwolo pa Yecu. En opwonyo lulub kore ni, me cobo niang manok ma tye i kingi, mitte ni gubed mwol. Lupwonnyene onongo gubedo ka laro lok teretere i kom anga madit loyo i kingi. Man onongo obedo lok ma orwako lwite matut i cwiny lupwonnyene. Dong me konyogi wek gulok tamgi, Yecu otittigi ni omyero gunen jo mukene calo jo madito loyogi. (Mat. 20:​25-28) Ada, Yecu onongo tye ka pwonyogi me bedo jo ma mwol. Kadi wa i dyeworne me agikki i lobo, Yecu ‘onyutigi lanen’ me mwolo ki lwoko tyengi, ma meno onongo obedo tic ma pol kare opii aye timo. (Jon 13:​3-5, 12-16) Ki timo meno, en onyutigi kit ma giromo medde ki gwoko kwede wat i kingi. Ka onongo gineno jo mukene calo gidito loyogi, ci onongo bibedo yot botgi me ye tam pa luwotgi kadi bed ni pat ki meggi. Onongo gibinongo ni yot botgi me medde ki bedo lurem macok kadi bed ni tamgi pe rwatte i kine mukene.

8. Mwolo twero konyi nining me gwoko wat ma tye i kinwu ka niang manok tye? (Jo Kolocai 3:13) (Nen bene cal.)

⁸ Itwero gwoko wat i kinwu nining? Ka ibedo ngat ma mwol, ci bibedo yot boti me jalo lok ki me timo kica ki jo mukene. (Kwan Jo Kolocai 3:13.) Mwolo bikonyi pe me keco oyot ka niang manok tye, dok macalo adwogine weko wat i kinwu medde ki bedo maber. (Jab. 4:4) Kadi bed ni iwaco lok ma pe nyuto kica ki lawoti, wii opo ni wan ducu wawaco jami ma weko wakoko ange lacen. (Latit. 7:​21, 22) Pennye kekeni ni, ‘Tika dido lok ni tamma aye tye atir pire tek loyo gwoko lirem i kinwa?’ Bedo ber ka iye me lubo tam pa lawoti me ka moko liking i tam ma megi. Itwero bedo ma wii opye mot ka iyero pe me kelo lok meno doki i kare me anyim.

9. Nyuto mwolo bikonyi nining ka cobo lok moni tye ka doko tek? (Carolok 17:9)

⁹ Mwolo bene twero konyi ka cobo lok moni tye ka doko tek. Pe ibed ka laro lok me nyuto ni tammi aye tye kakare. (Kwan Carolok 17:9; 1 Kor. 6:7) Twero bedo me kony ka wii opo ni imito medde ki bedo larem ngat meno. Omege ki lumege mapol gubedo ki kare me cobo lok i kingi maber kun giloko i yo me kica ki miti me cobo peko ma tye i kingi. (Jab. 34:14) Itwero waco ki laremi ni: ‘Wan dong wabedo lurem pi kare malac. Watwero lok i kom gin mutimme-ni?’ Bed atera me ye balli dok iye ni lokki ocwero cwiny lawoti kun bene ibedo atera me kwayo kica. Dok ka omeru nyo lameru okwayo kica, nyut mwolo dok itimme kica. (Luka 17:​3, 4) Wii opo ni, mitini pe tye me moko anga ma onongo lokke tye atir, ento me cobo peko ma tye i kinwu ki me medde ki bedo lurem.—Car. 18:24.

KA KITWU PATPAT

10. Gin ango ma twero weko bedo tek me medde ki bedo lurem?

¹⁰ Pingo man obedo ariya? Twero bedo tek botwa me doko lurem macok ki omege ki lumege ma kitgi pat ki megwa. Jo mogo kitgi twero wango iwa nyo cwero cwinywa. Jo mukene pe gingeyo kwo i kin dano pien pe kipwonyogi maber nyo kiunogi i kare ma gitino, nyo gia ki i tekwaro ma danone gilworo tito kit ma giwinyo kwede nyo tekwaro ma dano pe giling ki lok. Nyo twero bedo ni, ngat acel maro kwo i kin dano ento lawote maro bedo kekene.

11. Gin ango ma okonyo Yecu me medde ki bedo larem jo ma kitgi pat ki mege?

¹¹ Nong pwony ki i lanen me diyo cwiny pa Yecu. En omedde ki bedo larem jo ma kitgi onongo pat ki mege. Me labolle, lukwenane Yakobo gin ki ominne Jon gunyuto ni gimito bedo ki rwom madit i kare ma gupenyo Yecu ni oketgi i cinge tung acuc ki acam i Kerre. (Mar. 10:​35-37) Ki tungcel, Yecu onyuto mwolo ki weko rwomme madit i polo me bino i lobo. (Pil. 2:​5-8) Tam kong i kom jo adek magi. Kitgi onongo pat adada! Kadi bed kit meno, Yecu odiyo cwinye i kom Yakobo ki Jon ki jo mukene.

12. Gin ango ma okonyo Yecu me diyo cwinye i kom lureme?

¹² Yecu pe obedo ki tam ni lureme myero tamgi obed atir kare ducu. En onongo ngeyo ni tam pa Yakobo ki Jon nyuto cwiny me pyem ma lupwonnyene mukene-ni bene gitye kwede. (Mar. 9:34) Yecu bene onongo odongo i tekwaro acel-lu. I kare meno, lupwonye dini onongo gicuko cwiny dano me neno yweka ki bedo ki rwom madito calo jami ma pigi tego adada, pi meno Yecu onongo niang kit ma lupwonnyene gitamo kwede. Dong en odiyo cwinye i komgi, dok pe obedo ki tam ni myero gutim alokaloka cutcut me jwayo cwiny me awaka kacel ki miti me nongo yweka ma onongo gudongo kwede.—Mar. 10:​42-45.

13. Diyo cwiny twero konyowa nining me medde ki bedo lurem? (Jo Epeco 4:2)

¹³ Itwero gwoko wat i kinwu nining? Medde ki dongo kit me diyo cwiny kun ikanyo kit pa omege ki lumege mukene ma wango ii. (Car. 14:29) Wan ducu watye ki kitwa ma pol kare nongo pe rac, ento obedo kit ma kinywalowa kwede. Pi meno, wabedo ki pwoc ka jo mukene gidiyo cwinygi i komwa. (Kwan Jo Epeco 4:2.) Omyero bene pe waket gingi i komgi kun waweko gibedo agonya me kwo ki yomcwiny. Me labolle, ka in ngat ma loko mapol, dok itye ka lok ki ngat ma lalewic, tem goyo i wii kit ma twero bedo tek kwede bote me bedo i kin dano nyo boko lok kwedgi. Ki tungcel, ka in lalewic, tute matek me diyo cwinyi ka itye ka lok ki ngat ma loko mapol dok maro bedo i kin dano. Pe watwero bedo lurem macok adada ki dano ducu, ento wiwa myero opo ni, kadi wa Lukricitayo ma kitgi patpat pud gitwero tic kacel maber adada.

14. Ka wabedo jo ma diyo cwinygi, wabiketo tamwa i kom gin ango?

¹⁴ Diyo cwiny bikonyowa me keto tamwa i kom kit mabeco ma omege ki lumege gitye kwede. Ka watimo man, ci pe wabiweko kit mapatpat ma watye kwede gengowa me medde ki bedo lurem. Me labolle, Yakobo gin ki Jon gunyuto cwiny marac me mito yweka. Ento tamgi meno onyuto ni gitye ki niye matek i kom Ker pa Lubanga. Yecu oneno meno dok opwoyogi pi niyegi. Ka waketo cwinywa i kom kit mabeco ma luremwa gitye kwede, ci nongo watye ka lubo lanen pa Yecu gin ki Wonne, Jehovah.

15. Waromo nongo kony ki kwene me medde ki bedo larem jo ma kitgi pat ki megwa?

¹⁵ Ma dong pire tek loyo ducu, myero waleg Jehovah wek okonywa me medde ki bedo lurem ki jo ma kitgi pat ki megwa. Tam i kom jami ma twero weko ikeco i kom ngat moni, ci ileg Jehovah wek okonyi me bedo ma komi opye mot. Wii opo ni, Jehovah aye Ocweyowa dok ngeyo ni wan ducu watye ki kit mapatpat. Dong ka itye ka lega, bed ki tekcwiny ni Jehovah ngeyo gin ma imito me medde ki diyo cwinyi i kom luwoti. Dok ka inongo ni tek adada me diyo cwinyi, leg Jehovah pi cwiny mere maleng wek okonyi me bedo ma komi opye mot.—Luka 11:13; Gal. 5:​22, 23.

KA LAYE LAWOTWA MO TYE KA DENO CAN

16. Ariya ango ma watwero kato ki iye ka omegiwa ki lumegiwa gitye ka deno can?

¹⁶ Pingo man obedo ariya? Ka omegiwa ki lumegiwa gitye ka kato ki i peko ma gudo komgi nyo gitye ki arem i cwinygi, giromo lok nyo timo jami i yo ma cwero cwinywa. Me labolle, giromo kwero bedo i kin dano, giromo keco oyot, nyo bene timo jami ma cungo wi dano woko. (Yubu 6:​2, 3) Twero bedo ni omegiwa ki lumegiwa gitye ka lweny ki pekki ma pe wangeyo. Dong twero bedo tek botgi me timo jami i yo mupore.

17. Gin ango ma ipwonyo ki i kit ma Yecu otero kwede Bartimayo?

¹⁷ Nong pwony ki i lanen me kica pa Yecu. Yecu onongo lakica adada bot jo ma gitye ka deno can, kadi wa jo ma en peya orwatte kwedgi. Me labolle, nen kong kit ma Yecu otero kwede latowang mo ma nyinge Bartimayo. I kare ma en owinyo ni Yecu tye ka kato, en ocako dange ki dwan malongo wek Yecu owinye. Jo mogo i kin lwak guwaco ki Bartimayo ni oling mot. Ento en onongo tye ki miti madwong ni Yecu myero ocange, pi meno en omedde ki dange ki dwan malongo adada. Twero bedo ni dange pa Bartimayo-ni owango i jo mukene i kin lwak. Ento, ‘kica omako Yecu i kome,’ ma nyuto ni neno pekone otugo cwiny Yecu me konye. (Mat. 20:34; Mar. 10:​46-52) En oloko ki Bartimayo ki kica dok opwoye pi nyuto niye matek. I nge meno, Yecu otimo tango me cango wang Bartimayo.

18. Omyero iter luremi ma gitye ka deno can nining? (1 Jo Tecalonika 5:14)

¹⁸ Itwero gwoko wat i kinwu nining? Bed ngat ma lakica. Meno bikonyi me loko lok ma ‘cuko cwiny’ omege ki lumege ma gitye ka deno can. (Kwan 1 Jo Tecalonika 5:14.) Wii opo ni, larem me ada kare ducu bedo atera me konyo luwote, tutwalle i kare me “peko.” (Car. 17:17) Larem me ada winyo marac ka lureme gitye ka deno can. Dok bene en timo jami ducu ma twere me konyogi me bedo ma cwinygi opye mot, me cuko cwinygi ki me miyogi kony i yo ma nen.

19. I yo mapatpat ango ma watwero nyuto kwede kica bot ngat mo ma tye ka deno can? (Nen bene cal.)

¹⁹ I yo mapatpat ango ma watwero nyuto kwede ki kica? Ngene kene ni, pe watwero kwanyo peko nyo cango arem cwiny ma lawotwa tye kwede. Ento watwero tute me niang gin ma gitye ka wok ki iye kacel ki kit ma giwinyo kwede. (Mat. 7:12; 1 Pet. 3:8) Ter iti ka winyo lokke ka en tye ka titi pekone. Ka opore, tute me loko lok mo ma kweyo cwinye. (Car. 12:25) Gwokke ki tamo ni ingeyo jami ducu ma tye ka timme i kwone. (Car. 18:13) Di cwinyi i kome dok pe itam ni en myero otim jami ducu maber.—Ep. 4:32.

20. Kit larem ango ma imito ni ibedi?

²⁰ Watye ki pwoc pi bedo ki lurem me ada i dul pa Jehovah. Ento wan ducu watye ki roc, dok jo mapol i kinwa jami maraco dong otimme i komgi. Meno aye oweko wan ducu i kare mukene watimo nyo wawaco jami ma cwero cwiny luwotwa. Pi meno, wabedo ki pwoc madit ka omege ki lumege gimwol, gidiyo cwinygi i komwa, giterowa ki kica dok giyero me bedo luremwa. Dong watute wunu me timo jami ducu ma watwero me bedo larem ma kit meno bot jo mukene.