Wor Tam ma Jo Mukene Gumoko

1-2. Pingo tam ma wamoko pat ki tam ma Lukricitayo mukene gimoko?

TIKA dong nino mo ngat mo ongolo kop i komi pi tam ma imoko? Nyo tika in bene ingolo kop i kom Lakricitayo lawoti mo pi tam ma en omoko? Pol pa wan watwero gamo lapeny aryo magi ducu ni eyo.

² Pe omyero wabed ki ur ni i kare mogo tam ma wamoko bedo pat ki pa omege ki lumege mukene. Pingo? Pien ngat acel acel i kinwa pat ki lawote. Wan ducu ki acel acel waneno jami i yo mapatpat. Tekwarowa, paci ma wadongo iye, nyo kwo ma wakato ki iye gudo kit ma waneno kwede ki jami. Ento kadi bed watye ki tam mapatpat, pe omyero wawek meno obal kuc kacel ki ber bedo ma tye i kacokke.—Ep. 4:3.

3. Gin ango ma twero weko wangolo kop i kom Lakricitayo lawotwa pi tam mo ma en omoko?

³ Ka Lakricitayo lawotwa mo omoko tam ma pe rwatte ki megwa, waromo winyo calo omyero walok kwede wek olok tamme nyo watit ki jo mukene ni ngat meno omoko tam marac. Waromo timo meno pien nongo watye ki miti me konye. Wamaro omegiwa ki lumegiwa dok wamito ni gubed ki yomcwiny. (Car. 17:17) Pi meno, pe wamito ni gumok tam ma biweko gikoko ange lacen nyo ma bibalo watgi ki Jehovah.

4-5. Gin ango ma omyero watim ka Lakricitayo lawotwa mo omoko tamme me timo gin ma pe rwatte ki tamwa?

⁴ Ka wawinyo calo omego nyo lamego mo omoko tam marac, ci tika omyero wacit ka lok kwede pi tam ma en omoko-ni? Cawa mukene watwero lok kwede nyo i kare mogo pe mitte. Me labolle, ka en tye ki tam me timo gin mo ma turo cik me Baibul, ci omyero watute me konye me niang tam pa Jehovah i kom lok meno. Watimo meno pien wamare. (Car. 27:​5, 6) Ento ket kong ni omego nyo lamego mo tye ki tam me timo gin mo ma pe turo cik pa Lubanga, ento tamme aye pe orwatte ki megwa? Baibul miniwa lagam i ginacoya ma pwony man jenge iye. Pe ‘wangolo kop i kom tam ma en omoko.’—Rom. 14:1.

⁵ Kadi bed kit meno, pud twero bedo tek botwa me woro tamme. I pwony man, wabinyamo pingo omyero wawor tam pa jo mukene ki kit ma waromo timone kwede. Ento mukwongo, kong wanenu jami mogo ma twero weko wangolo kop i kom jo mukene pi tam ma gumoko.

JAMI MENE MA TWERO WEKO WACAYO TAM PA JO MUKENE?

6-7. Mi kong labol pa jami mogo ma twero weko wangolo kop i kom jo mukene.

⁶ Kit ma kitito kwede con, pi kwo ma wakato ki iye con nyo kabedo ma wadongo iye, twero weko wabedo ki tam ni gin moni ber nyo rac. Dok watwero bedo ki tam ni jo mukene bene gineno jami kit ma waneno kwede. Ento meno pe lok ada. Nen kong labol mogo. Labol me 1: Ma peya omego moni odoko Lacaden, en odongo kun neno kit ma wonne onongo mer kwede ki kongo. I nino mo ma en tye ka namo kacel ki Lukricitayo luwote, en oneno ka gimato kongo. Neno gin man ocwero cwinye adada dok owaco botgi ni gin ma gitye ka timo-ni pe obedo gin maber. Labol me 2: Laminwa mo onongo kome lit adada ento i nge kare mo en ocang woko. Lacen, en oniang ni lamego mukene tye ki two acel-lu. En tye ki miti me konyo lawote meno, pi meno en owaco bote me tic ki yo me cango two ma okonye-ni. En owaco ki lamego meno me camo kit cam moni nyo me bedo ka mwonyo yat moni nyo tic ki yat tekwaro. Labol me 3: Omego moni onongo yam tye i dini mapat. En pe dong mito gin mo keken ma kubbe ki dini meno. Ento ma en oniang ni omego mo ocito i kanica pi lega lyel, cwinye ocwer adada.a

⁷ Nen kong dok labol mukene. Labol me 4: Omego moni odongo i kare ma onongo dano gineno ni pe opore pi omege me lotto yer tikgi, dok pe pore pi lumege me ruko long pi cokke, gure madito nyo tic me pwony. Omego-ni ngeyo ni ma lubbe ki niango manyen ma oa ki bot Lukiko Madit, pe rac pi omege me lotto yer tikgi nyo pi lumege me ruko long. Kadi bed kit meno, en tiko waco ki jo mukene ni timo jami magi rac. Labol me 5: Laelda mo ngeyo omego mo ma omedo rwom kwanne ci lacen oa woko ki i ada. Ma oniang ni omego mo matidi ma i kacokkegi mito medo rwom kwanne, laelda man ocako bedo ki lworo dok ocako tute me lok ki omego matidi man kacel ki lunyodone wek gulok tamgi woko ka twere.

8. (a) Gin ango ma twero weko lanyodo moni cako ngolo kop i kom lunyodo mukene? (b) Gin ango ma twero timme i kacokke ka watamo marac i kom omege ki lumege?

⁸ Nen kong labol mo ma gudo lunyodo. Labol me 6: Macalo lanyodo ma Lacaden, itiyo matek me gwoko lutinoni ‘kun ipwonyogi dok inyebogi ki kit mabeco ma Jehovah pwoyo.’ (Ep. 6:4) Ento lunyodo mukene ma gin bene Lucaden giweko lutinogi bedo agonya me timo jami mapol ma loyo lutinoni. Me labolle, pe giketo gingi pi cawa ma lutinogi myero gudwog kwede gang, giye ki lutinogi me tuko tuko me vidio ma pe ki tim gero, nyo giye ki lutinogi me bedo ki cim kadi bed pud gitino. Macalo adwogine, lutinoni ginongo ni in lagingi. Lutinoni giromo penyi ni, “Pingo pe iweko wabedo agonya calo lunyodo mukene-ni?” Ka gin ma kit meno otimme, twero weko icako tam marac i kom lunyodo mukene-ni. Ngene kene ni, ka Lakricitayo mo omoko tam ma pe rwatte ki megwa, cwinywa twero cwer ci wacako ngolo kop i kome. Me labolle, waromo cako bedo ki lapeny i kom kit ma en tiyo kwede ki centene, pi kit ma en maro namo kwede, nyo kit galowang ma en maro. Ento myero wagwokke wek kit ma wawinyo kwede pe obal kuc ma tye i kacokke.

9. Yub ango ma wan ducu watye kwede dok gin ango ma omyero wan ducu wagwokke ki timone? (Nen bene cal.)

⁹ Watwero moko tam ma pe rwatte ki pa omegiwa ki lumegiwa, ento meno pe te lokke ni ngat acel i kinwa omoko tam marac. (Rom. 14:5) Ka Baibul owacciwa ni omyero ‘wabed ki cwiny acel,’ nongo te lokke ni wan ducu omyero walub cik pa Jehovah. Ento pe te lokke ni omyero watam tam marom aroma i kom jami ducu. (2 Kor. 13:11) Waromo poro tam ma wamoko ki yo ma wayero me tic kwede ka watye ka cito ka mo. Pol kare, tye yo mapol ma twero terowa i kabedo moni. Wayero yo ma wamaro ki ma rwatte ki wiwa. I yo acel-lu, wan ducu wayero jami mapatpat ento watye ki yub acel: Wamito yomo cwiny Jehovah. Pi meno, pe pore me ngolo kop i kom jo mukene pi tam ma gumoko.—Mat. 7:1; 1 Tec. 4:11.

PINGO OMYERO WAWOR TAM MA JO MUKENE GUMOKO?

10. Ma lubbe ki Yakobo 4:​12, gin ango ma wape ki twero me timone, dok pingo?

¹⁰ Baibul miniwa tyen lok mapol ma omiyo omyero wawor tam ma jo mukene gumoko. Nen kong tyen lok mogo. Pe watye ki twero me waco ki jo mukene gin ma myero gutim ka odok i kom jami ma Baibul pe oketo macalo cik. (Kwan Yakobo 4:12.) Jehovah keken aye obedo Lami-cik ki Langolkop. En keken aye opore me wacciwa gin ma omyero watim nyo pe watim. Dong omegiwa ki lumegiwa gibicung i nyim Jehovah pi tam ma gumoko ento pe i nyimwa. (Rom. 14:10) Pe watye ki twero me ngolo kop i kom jo mukene nyo me cayogi pi tam ma gumoko ma nongo pe rwatte ki megwa.b

11. Watwero konyo me gwoko kuc ki note ma tye i kacokke nining? (Nen bene cal.)

¹¹ Jehovah mito ni jo ma gitiyo pire gubed ma gunote, ento pe gubed marom aroma. Ki lok ada, yomo cwiny Jehovah adada ka wapat ki luwotwa! Watwero neno man ka maleng i jami ma en ocweyogi. Me labolle, kadi pot yadi aryo ma gua ki i kom yat acel pud gibedo pat. Tam bene i kom dano. I kin dano makato bilion aboro kulu ma gitye i wi lobo-ni, pe tye kadi dano aryo mo ma girwatte litap. Jehovah ocweyowa me bedo pat ki luwotwa. En pe ocweyowa marom i yo ducu. Ento en mito ni wabed ma wanote. Pi meno, ka jo mukene gumoko tam ma pe rwatte ki megwa, pe omyero wawek meno ocwer cwinywa. Gin ma pire tek loyo botwa aye ni kuc ki ribbe tye i kacokke ento pe tamwa ki gin ma wamito.—Rom. 14:19.

KIT ME NYUTO WORO PI TAM MA JO MUKENE GUMOKO

12-13. Omyero wadok iye nining ka watamo ni ngat moni tye ka timo gin ma Baibul waco ni rac? (Jo Galatia 6:1; nen bene bok ma wiye tye ni “Ka Tamwu Pe Orwatte.”)

¹² Ka jo mukene gumoko tamgi i kom lok ma gudogi. Pennye kekeni ni, ‘Tika ngat meno dong cok timo gin mo ma Baibul waco atir ni rac nyo kece en tye ka timo jami i yo mapat ki kit ma an onongo abitimone kwede? Ka ce en cok timo bal, pennye kekeni ni, ‘Tika an abedo Lakricitayo muteggi ma tye ki twero me tiro ngat meno nyo mono ngat mukene calo laelda aye twero tiro ngat meno?’ Ka itye ki twero me lok ki ngat meno, ci lok kwede i yo me mwolo. (Kwan Jo Galatia 6:1.) Ento pol kare, ibinongo ni ngat meno pe otimo gin mo marac ento otimo gin ma pe rwatte ki tammi aye. Ka tye kit meno, ci pe ibed ki akalakala i kome nyo icak lok marac i kome pi tamme. Wor twerone me moko tamme pire kene, dok pe ingol kop i kome.—Rom. 14:​2-4.

¹³ Tam kong i kom lapor man: Ka wucito ka cam i otel mo wun ki laremi, tika ibiketo gingi ni laremi bene ocam dek ma in ibicamo-ni? Pe. Ibiweko en bedo agonya me camo gin ma iye mito. Kadi bed in pe imaro gin ma en oyero me camone, meno pire pe tek pien pe in aye ibicamo. Dok ka ni en aye obed in, onongo pe ibiye ni en aye oyer piri dek me acama. I yo acel-lu, wanyuto woro pi jo mukene ka waweko gimoko tamgi me timo gin ma gimito dok pe wadiyogi me timo gin ma wamito.

14. Itwero gwoko kuc ma tye i kacokke nining ka itye ka moko tam? (1 Jo Korint 8:​12, 13)

¹⁴ Ka itye ka moko tammi i kom lok ma gudi. Itwero konyo jo me kacokke me bedo ma gunote ka itute matek pe me cwero cwiny jo mukene. (Kwan 1 Jo Korint 8:​12, 13.) I cawa mukene, twero bedo ni ingeyo ni tam ma ibimoko-ni pe turo cik mo. Ento ka ce tam meno bicwero cwiny omego nyo lamego mo, ci tika tam meno bibedo me “kony”?c (1 Kor. 10:​23, 24) Me ka tamo ni, ‘Atye ki twero me timo gin mo keken ma amito’ bedo ber ka itamo pi kit ma jo mukene giwinyo kwede. (Rom. 15:1) Ento mono pud pe waa ka wacone ni jo mukene myero guwor tamwa? Meno tye ada. Myero guwor tamwa kit ma wan bene waworo kwede ki tamgi. Ento omyero wiwa bene opo i kom tira ma Baibul miyo i Jo Roma 12:​18, ma waco-ni: “Ka ce twerre ki tung botwu, myero wubed ki kuc ki dano ducu.” Pi meno, watimo jami ducu ma watwero me bedo ki kuc ki jo mukene dok ka wangeyo ni gin moni bicwero cwinygi, ci wagwokke ki timone.

15. Gin ango ma luelda gitwero timo me gwoko note ma tye i kacokke? (1 Jo Korint 4:6)

¹⁵ Luelda giworo tam pa jo mukene. Luelda gikonyo jo me kacokke me bedo ma gunote ka pe giketo cik i kom jami ma mitte ni ngat acel acel omok tamme iye dok pe gikato wang cor ma Baibul oketo. (Kwan 1 Jo Korint 4:6.) Man bene tyen lokke ni pe giwaco gin ma pe rwatte ki tira ma kicoyo i bukkewa. Medo i kom meno, ka omego nyo lamego moni openyo pi kony ki bot laelda mo, laelda meno myero ogwokke adada ki miyo tam ma lubbe ki ngecce keken. Me ka meno, en myero omi tira ma jenge i Lok pa Lubanga.—Ic. 48:​17, 18.

16. Laelda moni twero nyuto nining ni eworo tam ma luelda mukene-ni gumoko?

¹⁶ Laelda moni nyuto woro ka en cwako tam ma luelda luwote gumoko macalo gurup. Ka luelda me kacokke moni gulego pi cwiny maleng, dok gungiyo tira me Baibul maber, gimoko tam kacel. Dong mitte ni laelda acel acel myero ocwak tam ma kimoko kadi bed tam meno pe rwatte ki mege. (Ep. 5:17) Medo i kom meno, luelda myero gugwokke ki tic ki tira ma nonge i bukkewa i yo marac kun giloko tam ma iye wek orwatte ki tamgi. Me labolle, laelda pe myero oti ki dul lok acel moni keken ki i bukkewa me nyuto ni tamme tye kakare labongo kwano pwony meno maber.

17. Kacokkewa bibedo nining ka waworo tam ma jo mukene gimoko?

¹⁷ Kit ma dong wapwonyo kwede, ngat acel acel i kinwa pat ki lawote. Dok ngat acel acel tye ki jami ma en maro. Ento meno obedo gin maber adada! Kit macalo wan ducu waa ki i kabedo mapatpat dok kitwa patpat, man miyo wabedo agonya dok bedo i kacokke bedo mit adada. Dong me ka weko apokapoka magi odok ariya i kacokke, waworo tam ma luwotwa gimoko, dok i yo meno wagwoko kuc kacel ki note ma tye i kacokke. Ka watimo kit meno, ci tutewa binyako nyige. Wabibedo ki yomcwiny kacel ki ribbe i kacokke!—Jab. 133:1; Mat. 5:9.