Gwok Watti ki Jehovah ka Itye ka Medo Rwom Kwanni

1-2. (a) Ka iyero me medo rwom kwanni, gin ango ma bimitte ni imedde ki timone? (b) Tyen lokke ngo me ‘medde ki wot i yo ma dong io iye-ni?’ (Jo Pilipi 3:16)

I NGE tyeko kwan ma gamente me lobogi omoko ni mitte ma lubbe ki cik, Lucaden mogo gimoko tamgi me medo rwom kwangi. Me labolle, giromo yero me pwonyo tic cing nyo biacara nyo nongo pwonnye mukene. Giromo bedo ki tam ni pwonnye ma kit meno bikonyogi me nongo tic ma weko gibedo ki kero me culo pi jami ma mitte kacel ki tic pi Jehovah ki cwinygi ducu. Ka imoko tammi me medo rwom kwanni, gin ango ma itwero timone me neno ni imedde ki bedo cok ki Jehovah? (Yak. 4:8a) Labongo akalakala mo, ikemme ki atematema mapol i kare ma onongo itye ka kwan i cinia. Dong bimitte ni ‘imedde ki wot i yo ma dong io iye-ni’—ma te lokke ni, myero imedde ki tic pi Jehovah ki gen kit ma ibedo ka timone kwede con.—Kwan Jo Pilipi 3:16.

² Nyig lok me leb Grik ma kitiyo kwede ma gonye ni ‘medde ki wot i yo ma dong wao iye’ onongo pol kare kitiyo kwede me tito kit ma lumony dorre kwede kacel labongo cung nyo dok cen. Ka imoko tammi me medo rwom kwanni, bimitte ni ibed calo lumony magi. Man tyen lokke ni, ibimedde ki wot kacel ki omege ki lumege kun itimo jami ma weko ibedo cok ki Jehovah. Mitini myero obed me jingo watti ki Jehovah matek ento pe me doko goro i yo me cwiny. Pwony man binyamo cik ma igi lac angwen ma bikonyi. Cik magi obedo gin ma dong ingeyogi con. Itiyo kwedgi i kare mukato, dok bimitte ni imedde ki ketogi i tic ka itye ka medo rwom kwanni ki dong i nge tyeko kwanni bene.

MEDDE KI TIMO JAMI MA WEKO WATTI KI JEHOVAH BEDO MATEK

3. Ariya ango ma itwero kemme kwede ka itye ka nongo pwonnye me medo rwom kwanni?

³ Ariya ma tye. Ka itye ka nongo pwonnye me medo rwom kwanni, ibibedo ki jami mapol adada me atima nino ducu. Dok kit macalo itye ki miti me kato penyi maber, iromo cako keto pi kwanni mukwongo me ka timo jami ma jingo watti ki Jehovah. Iromo bene cako keng cokke, cito i tic me pwony, kwano Baibul nino ducu ki dong lega.—Yabo 2:4.

4. Tyen lokke ngo me ‘medde ki tic pa Rwot nino ducu?’ (1 Jo Korint 15:58)

⁴ Kwan 1 Jo Korint 15:58. Wek lela omedde ki ngwec, mitte ni imedde ki nyonone. I yo acel-lu, me gwoko watti ki Jehovah wek obed matek, mitte ni ilung wii i tic pire. Meno aye omiyo Baibul wacciwa ni omyero ‘wamedde ki tic pa Rwot nino ducu.’ Meno pe kwako mere medo cawani i tic pi Jehovah keken. Ento kwako keto tic pi Jehovah mukwongo. Wii opo ni tic pi Jehovah aye obedo gin ma pire tek loyo i kwo, ento pe medo rwom kwanni. (Mat. 22:37) Laminwa mo matidi ma nyinge Samantha owaco ni, “Ma peya acako nongo pwonnye me medo rwom kwanna, amoko tamma ni ka pwonnye man biweko doko tek bota me tic pi Jehovah, ci abigiko kwan meno woko.”

5. Gin ango ma itwero timone wek imedde ki lungo wii i tic pa Jehovah?

⁵ Gin ango ma iromo timone ma pud peya icako medo rwom kwanni? Tute me neno ni tic pi Jehovah aye obedo gin mukwongo i kwoni. Pennye kekeni ni, ‘Yub ango ma atye kwede me neno ni kare ducu abedo tye i cokke ki tic me pwony kun bene amedde ki kwano Baibul nino ducu?’ (Yoc. 1:8; Mat. 28:​19, 20; Ibru 10:25) Itwero bene pennye kekeni ni: ‘Abedo ka nongo cawa me timo jami magi nining i kare ma pud atye i cinia?’ Ka tye jami mogo ma itamo ni pe itimo maber, alokaloka ango ma itwero timone kombeddi? Mok tammi me medde ki lungo wii i tic pa Jehovah ka iwoto ki nongo pwonnye me medo rwom kwanni. Pire tek adada ni itim maber i gang kwan. Ento pe dong ilung wii iye tutwal ma weko ibedo pe ki cawa kacel ki kero me tic pi Jehovah.a—Mat. 6:24.

6. Lapeny macalo mene ma iromo pennye kwede me niang ka ce pud itye ka keto Jehovah mukwongo i kwoni? (Nen bene cal.)

⁶ Ka itye ka nongo pwonnye me medo rwom kwanni, kwany kare me ngine kekeni dwe ki dwe. Pennye kekeni ni: ‘Tika tic pi Jehovah aye pud pire tek loyo i kwona?’ Me nongo lagam pi lapeny meno, iromo dok pennye ki lapeny magi: ‘Tika akeng cokke kare ki kare nyo amaro o lacen? Tika abedo ka tamo pi ticca me gang kwan i cawa me cokke? Tika dong acako timo cokke kun abedo i Zoom me ka cito i Ot me Ker?’ Iromo bene pennye kekeni ki lapeny mukene calo: ‘An mono alego dok akwano Baibul kit ma onongo atimo kwede con? Tika acito i tic me pwony keken pien mitte ni aco ripot, kun bene abedo wiye wiye iye?’ Ka lagammi obedo ni eyo pi lapeny acel nyo aryo i kin magi, ci tute matek me timo alokaloka. Pe iwek lok me medo rwom kwanni ogengi ki keto Jehovah mukwongo i kwoni.

“GWOK . . . NIANG MATUT MA ITYE KWEDE”

7. Medo rwom kwanni twero loko tammi nining?

⁷ Ariya ma tye. Ma lubbe ki gin ma itye ka kwanone i gang kwan, i kare mukene kiromo pwonyi ki jami ma Baibul waco ni pe tye ada, jami ma Baibul lwongo ni “tam me ryeko nyo me bwola mo ma tere pe.” Me labolle, kiromo pwonyi ni Lubanga pe, dok kwo ocakke pire kene. (Kol. 2:8) Pwony magi twero weko itamo ni itwero jenge i komi kekeni ento pe i kom Jehovah. Omego mo matidi wiye po ni: “Pe kipwonyowa ki diro me tic keken, ento bene kipwonyowa kit ma myero watam kwede dok onongo pat ki kit ma Jehovah mito ni watam kwede. Me labolle, kipwonyowa ni wek wabed ki yomcwiny i kwo, myero wajenge i komwa kekenwa. Meno oweko acako tamo ni pe amito kony pa Jehovah me bedo ki yomcwiny i kwona. Oweko odoko tek bota me jenge i kome.”

8. Pingo pire tek me ‘gwoko niang matut ma watye kwede?’ (Carolok 3:21)

⁸ Kwan Carolok 3:21. Baibul cikowa ni: “Gwok . . . niang matut ma itye kwede.” Wagwoko gin moni ka ce ngat mo tye ka temo balone nyo kwanyone woko ki botwa. Meno mitte pien Catan ki lobone gitye ka tute me balo tamwa. (1 Pet. 5:8) Kit ma dano gitamo kwede i kom gin maber ki marac, kit ma kwo ocakke kwede, ki dong ka ada Lubanga tye, twero weko wacako bedo ki akalakala i kom gin ma Lubanga pwonyowa i Baibul. Gitamo ni tamgi obedo tam ma rwomme lamal ento i ada obedo tam ma rwomme lapiny. Ada, “i nyim Lubanga obedo gin me mingo.”—1 Kor. 3:​18-20.

9. Gin ango ma itwero timone me gwoko niang matut ma itye kwede?

⁹ Gin ango ma iromo timone ma pud peya icako medo rwom kwanni? Me gwoko niang matut ma itye kwede, mok ki cwinyi ducu ni lok ma tye i Baibul obedo lok ada ma peya icako medo rwom kwanni. Pennye kekeni ki lapeny calo: ‘Pingo aye i kom Lubanga? Angeyo nining ni Baibul obedo lok pa Lubanga? Ngo ma weko aye ada ni kwo ma lubbe ki cik me Baibul ber loyo kit ma dano me lobo-ni gikwo kwede?’ Dok bene wii opo ni: Kipwonyi ki tam me lobo-ni i kare ma pud itye i cinia. Tika niyeni odoko goro pien jo mukene onongo giye ni kwo ocakke pire kene? Tika onongo kwo macilo pa lutino kwan luwoti obedo atematema madit boti? Ka ce tye jami mogo ma iwinyo ni pe itimogi maber i kare mukato, itwero jingo niyeni nining kombeddi? Mok tammi me gwoko niang matut ma itye kwede ka iwoto ki medo rwom kwanni.—2 Tem. 2:​16-18.b

10. Itwero medde ki gwoko niang matut ma itye kwede nining?

¹⁰ Ka iwoto ki nongo pwonnye me medo rwom kwanni, bed ka ngine kekeni kare ki kare. Pennye kekeni ni: ‘Tika dong acako tamo ni jami maraco ma jo mukene timo pe rac tutwal kit ma Jehovah waco-ni? Tika aniang ni lok ma kitye ka pwonya kwede-ni obedo ryeko pa dano ento pe lok ada? An mono aye ada ni Ker pa Lubanga keken aye twero cobo pekki pa dano?’ Me gwoko niang matut ma itye kwede, medde ki kwano Baibul i yo matut kun iketo gin ma ipwonyo i tic. Kwano Baibul kacel ki lwodone matut bikonyi me jingo genni ni itye i ada.—1 Tem. 4:15.

TI KI CAWANI I YO ME RYEKO

11. Ka itye ka nongo pwonnye me medo rwom kwanni, pingo twero bedo tek me tic ki cawani i yo me ryeko?

¹¹ Ariya ma tye. Medo rwom kwanni twero kwanyo pol pa cawani woko tutwalle ka itye ka yubbe pi peny nyo itye ki tic ma omyero ityek oyotoyot. Ka pe itiyo ki cawani maber, ci itwero bedo ki par kun bene iol matek adada. Meno aye tyen lok mumiyo mitte adada ni ikwany kare me gwoko yotkomi.

12. Jami ango ma myero inong cawa me timogi? (Jo Epeco 5:​15, 16)

¹² Kwan Jo Epeco 5:​15, 16. Twero bedo tek adada me ‘tic ki kare ma itye kwede i yo maber.’ Tye kit meno pien itye ki jami mapol me atima. Me labolle, mitte ni ikwan matek pi peny, ento ma pire tek loyo, omyero inong cawa me bedo kacel ki lupacowu ki dong utmege me kacokkewu. (Jab. 133:1; Car. 18:1) Dong gin ma pire tek loyo ducu aye timo jami ma nyikki cok ki Jehovah. (Mat. 6:33) Twero bene mitte ni ikony jo gangwu ki tic mogo nyo gwok bene itye ki dog ticci. Medo i kom meno, myero igwok yotkomi kun inongo yweyo muromo dok ikwanyo kare me ryeyo ler. (Latit. 4:6; 1 Tem. 4:8) Me timo jami magi ducu, mitte ni iti ki cawani i yo maber.

13. Gin ango ma itwero timone wek iti ki cawani i yo me ryeko?

¹³ Gin ango ma iromo timone ma pud peya icako medo rwom kwanni? Baibul waco ni wek wabed ki kwo maber, mitte ni wayubbe con. (Car. 21:5) Pi meno, bed ki yub maber me tic ki cawani ma peya icako medo rwom kwanni. Me timo meno, tam i kom kare ma onongo pud itye i cinia ci ipennye kekeni ni: Tika onongo anongo cawa me timo jami ducu ma pigi tego? Ka ce tye jami mogo ma iwinyo ni pe itimogi maber i kare mukato, itwero timo alokaloka ango i kare-ni? Nen ni iketo yub maber me tic ki cawani wek pe iwiny calo ipe ki cawa me timo gin mo keken.c

14. Lapeny mene ma iromo pennye kwede ka itye ka ngine kekeni?

¹⁴ Ka iwoto ki medo rwom kwanni, ngine kekeni kare ki kare me neno kit ma itye ka tic kwede ki cawani. Pennye kekeni ni: ‘Tika atye ka nongo cawa muromo me yweyo ki ryeyo ler? Tika pud atye ki cawa me namo kacel ki omege ki lumege me kacokkewa? Tika atyeko tic ma lapwony mina ni atim ki gang i wang cawa kikome? Ka pe, ci tika obedo pien atye ki tic mapol tutwal me atima nyo mono pe atye ka tic ki cawana maber? Tika lurema kacel ki jo gangwa gitamo ni omyero atim alokaloka?’ Ka iniang ni omyero itim alokaloka i kit ma itiyo kwede ki cawani nyo mitte ni ilub yub ma iketo con, ci tim meno cutcut. Itwero bene nongo tam ki bot jo mukene ma gingeyo kit me tic ki cawagi maber.—Car. 11:14.

MEDDE KI “BEDO KACEL KI JO MARYEK”

15. Ka itye ka medo rwom kwanni, ariya macalo mene ma itwero kemme kwede?

¹⁵ Ariya ma tye. Ka iwoto ki medo rwom kwanni, lutino kwan luwoti giromo lwongi ka namo kwedgi. Iromo bedo ki miti me ribbe kacel kwedgi. Tye kit meno pien mwakawu cokcok, mitiwu rom, dok wutero cawa malac kacel i ot kwan. Itwero cako winyo calo wii rwatte kwedgi loyo wii utmege me kacokke. Ento myero igwokke adada. Kadi bed ni tye jami mogo ma wunywako kacel ki lutino kwan luwoti, ento wii opo ni in ipat kwedgi pien imito yomo cwiny Jehovah. Dok ka itero kare malac kwedgi, ci ibicako tam calo gin. (1 Kor. 15:33) Man aye gin mutimme i kom omego mo ma nyinge Michael, ma onongo pwonnye pi mwaki angwen i lok kom yubo mac. En owaco ni, “Onongo atero cawa makato 40 cabit ducu me bedo kacel ki lutic luwota ma onongo gitiyo ki leb marac, giwinyo wer macilo ma pe opore ki Lakricitayo, dok pe ginyuto woro bot mon. Dok an bene acako tamo ni lokgi ki jami ma gitimo pe rac tutwal.”

16. Tyen lokke ngo me “bedo kacel ki jo maryek?” (Carolok 13:20)

¹⁶ Kwan Carolok 13:20. Baibul cikowa ni bedo ki lurem maraco bikelo peko mapol i komwa. Ki tungcel, “ngat ma bedo kacel ki jo maryek pwonnye doko ryek bene.” Pwony ma wanongo aye ni: Jo ma wamaro bedo kwedgi gigudo kwowa i yo maber nyo i yo marac. Pi meno, mak lirem ki jo ma gimaro Jehovah calo in dok gimito ni ibed ki yomcwiny me ada.—Jab. 101:​6, 7; 119:63.

17. Gin ango ma itwero timone me gwokke ki lurem maraco?

¹⁷ Gin ango ma iromo timone ma pud peya icako medo rwom kwanni? Mok woko con cawa ma ibicwalo me bedo kacel ki lutino kwan luwoti ki dong wat ango ma bibedo i kinwu. Omego mo ma nyinge Trenton owaco ni: “Anyuto kica bot lutino kwan luwota, ento pe acwalo cawa kwedgi ka dong waa ki i ot kwan. Gubedo lutino kwan luwota ento pe gubedo lurema macok.” Gin ango ma ibitimo wek inen ni pe icwalo cawa malac tutwal ki lutino kwan luwoti? Me konyi gamo lapeny meno, pennye kekeni ni: ‘Atimo jami magi nining i kare ma onongo atye i cinia? Ka ce tye jami mogo ma iwinyo ni pe itimogi maber i kare mukato, itwero timo alokaloka ango kombeddi? Mok tammi me medde ki “bedo kacel ki jo maryek” kun pe icwalo cawa malac ki jo ma pe maro Jehovah.d

18. Lapeny mene ma myero ipennye kwede kekeni? (Nen bene cal.)

¹⁸ Kare ki kare, ngine kekeni kun ipennye ni: ‘Tika atye ka nyikke cok tutwal ki lutino kwan luwota? Tika dong acako lok, tam nyo timo jami calo gin? Jehovah winyo nining i kom wat ma tye i kin an ki lutino kwan luwota?’ (Jab. 1:1) Ka iniang ni kiti ocako balle woko, ci tim alokaloka cutcut. Tute matek me neno ni luremi macok loyo tye i kin jo ma maro Jehovah calo in. Medo i kom meno, pe ilwor miyo caden bot lutino kwan luwoti. Kit macalo gingeyi dok gibedo kwedi i gang kwan-ni, in aye itye ki kare maber me pwonyogi lok i kom Jehovah kacel ki Baibul.

BED MA IYUBBE

19. Itwero yubbe nining me loyo ariya ma ibikemme kwede ka itye ka medo rwom kwanni? Mi lapor.

¹⁹ Tam kong i kom lapor man: Ngat ma bicito ka ito got myero oyubbe maber ma peya ocako wotte. Me labolle, myero onen ni etye ki kero muromo me ito got, eruko bongo mupore pi wot meno, dok bene engeyo ka ma ebicito iye. Kadi bed en pe ngeyo jami ducu ma bitimme i yo, timo jami magi bikonye me o ka ma en tye ka cito iye-ni. Itwero poro man ki gin ma bikonyi ka itye ka medo rwom kwanni. Medde ki cung matek i niye, ‘ruk jami lweny ducu ma Lubanga miyo,’ dok ibed ki yub ma imito cobone. Yubbi pe obedo me doko lalonyo nyo nongo yweka i lobo man ento me kelo deyo bot Jehovah i jami ducu ma itimo.—Ep. 6:​11-13; 1 Kor. 9:​26, 27; 10:31.

20. I yo ma nining ma itwero medde ki ‘ngine kekeni, wek inen ka ce icung matek i niye?’

²⁰ Baibul cuko cwinywa ni: “Kong wungine kekenwu, wek wunen ka ce wucung matek i niyewu. Wutemme kekenwu.” (2 Kor. 13:5) Itwero timo meno ka itye ka medo rwom kwanni. I yo ma nining? Kare ki kare, ngine kekeni i kom jami mogo ma kiloko iye i pwony man calo: Tika itye ka timo jami ducu ma weko watti ki Jehovah bedo matek? Tika itye ka gwoko tammi ki i ryeko me lobo man? Tika itye ka tic ki cawani i yo me ryeko? Tika itye ka mako lurem i kin utmege kun igwokke ki mako lurem ki jo maraco? Magi obedo lapeny ma myero ipennye kwedgi kadi bed itye i gang kwan, gang tic, nyo i kabedo mukene. Mok tammi me cung matek i niye i kwo mo keken ma itye ka kato ki iye. Jehovah bikonyi me bedo ki kwo maber loyo ka iwoto ki tute me bedo cok kwede.—Car. 3:​5, 6.