Pwonnye me Lworo Lubanga Calo Obadia

Obadia aye onongo obedo lagwok ot pa Kabaka Akab, dok kabaka man oweko tim me woro jok Baal oromo lobo Icrael ducu. Ento Obadia, odongo cwiny me lworo Jehovah ‘cakke ka tinone.’ (1 Luker 18:​1-13) Dong i kare ma Daker Jejebel ogolo rukca ni omyero kinek lunebi pa Jehovah ducu, Obadia onongo ngeyo ni myero enyut tekcwiny me konyo lunebi magi. Kano lanebi acel keken onongo bibedo gin marac adada; ento Obadia okano lunebi 100 kulu dok obedo ka miyo botgi ginacama kadi wa i kare ma cam onongo nok adada! Go kong kit ma onongo tek kwede bot Obadia me bedo ka kano lunebi magi wek lunebi ma lugoba ma gitiyo i ot pa kabaka pe guniang i kom ticce meno.—1 Luker 18:19.

Pwony ango ma wanongo ki bot Obadia? Kadi bed en onongo lworo Akab, ento en onongo lworo Lubanga makato Akab. Man omiyo en obedo ki tekcwiny me keto kwone ka mading wek egwok omegine. Mitte bene ni wadong cwiny me lworo Jehovah, tutwalle ka kiketo kigeng i kom woro me ada i kabedowa. Lworo ma kit man bijingo niyewa dok weko wabedo ki kero me konyo utmegiwa ka gitye i peko.