Bed ki Tekcwiny ni Jehovah Mari

1. Pingo idyere bot Jehovah? (Nen bene cal.)

WI TIKA po i kom kare ma idyero kwede kwoni bot Jehovah? Imoko tam meno pien ngecci i kome kacel ki marri pire odongo matek. Icikke bote ni tic pire bibedo gin ma pire tek loyo i kwoni dok ni ibimedde ki mare ki cwinyi ducu, kwoni ducu, tammi ducu, kacel ki tekki ducu. (Mar. 12:30) Cakke i kare meno, marri pire omedde ameda ki dongo. Dong ka ngat mo openyi ni, “In tika imaro Jehovah?” ibigamone ningo? Labongo galle, ibigamo ni, “Amare matek makato gin mo nyo ngat mo keken!”

2-3. Gin ango ma Jehovah mito ni waye ki cwinywa ducu, dok ngo ma wabinyamo i pwony man? (Jeremia 31:3)

² Kadi bed wangeyo ni wamaro Jehovah matek, ento watwero bedo ki akalakala kace Jehovah marowa. Gwok nyo watamo ni pe wapore me nongo marre. Laminwa mo ma pe kinyutte mar i kare me tinone owaco ni: “Amaro Jehovah ki cwinya ducu. Ape ki akalakala mo iye. Ento gin ma pol kare abedo ka kalone akala aye ka ce Jehovah mara.” Dong gin ango ma twero konyi me ngeyo kit ma Jehovah winyo kwede i komi?

³ Jehovah mito ni ibed ki tekcwiny ni en emari. (Kwan Jeremia 31:3.) Lok ada tye ni, Jehovah aye ma oywayi ci okeli bote. Dok i kare ma idyero kwoni bote ci inongo batija, en omiyo boti mot mo ma pire tek adada, ma meno aye mar mere ma pe lokke. Meno nyuto ni en mari matek dok pe biweki matwal. Pien Jehovah tye ki mar ma pe lokke pi luticce ma lugen, en nenogi macalo “gin me wel,” meno nyuto ni in bene piri tek adada bote. (Mal. 3:​17, NWT) Jehovah mito ni iwiny kit ma lakwena Paulo onongo winyo kwede. Paulo onongo tye ki gen matek ni Jehovah mare mumiyo en ocoyo ni: “Angeyo ada ni, kadi to, kadi kwo, kadi lumalaika, kadi luloc, kadi gin ma tye i kare man, kadi gin ma mito bino, kadi teko, kadi gin ma tye malo, kadi gin ma tye piny, kadi ki gin mo keken i kom ginaketa ducu, pe bibedo ki twero mo me pokowa woko ki i kom mar pa Lubanga.” (Rom. 8:​38, 39) I pwony man, wabinyamo pingo pire tek ni wajing tekcwinywa ni Jehovah marowa ki dong gin ango ma twero konyowa me timo meno.

PINGO PIRE TEK NI IYE NI JEHOVAH MARI?

4. Goba mene ma Catan mito ni waye, dok watwero cung matek i nyim Catan nining?

⁴ Ka waye ni Jehovah marowa, ci twero konyowa me lweny i kom “roro pa Catan.” (Ep. 6:11) Catan timo gin mo keken ma en twero me gengowa ki tic pi Jehovah. Roro acel ma Catan tiyo kwede aye lok goba ni Jehovah pe marowa. Wii pe owil ni Catan tye calo ladwar ma kuro kare maber loyo me lweny i komwa. En pol kare lwenyo i komwa i kare ma nongo wagoro adada—calo ka cwinywa otur pi gin mutimme i kwowa i kare mukato, nyo pi pekki ma watye ka kato ki iye kombeddi, nyo pi paro kwowa me anyim. (Car. 24:10) Catan tye calo labwor ma kuro kare maber me lweny i kom lee ma goro. Pi meno, en tiyo ki kare ma nongo cwinywa otur me tyeko kerowa wek wail cingwa woko. Ento ka wamedde ki jingo tekcwinywa ni Jehovah marowa, ci wabibedo ki teko me ‘cung matek’ i nyim Catan kacel ki rorone.—1 Pet. 5:​8, 9; Yak. 4:7.

5. Pingo pire tek ni iye ni Jehovah mari dok paro piri?

⁵ Ka waye ki cwinywa ducu ni Jehovah marowa, ci watwa kwede bibedo matek. Pingo watwero wacone kit meno? Jehovah ocweyo dano ki miti me nyuto mar bot jo mukene kun nongo gin bene gimito ni kinyutigi mar. Ka ngat mo onyutiwa mar, meno tugo cwinywa me maro en bene. Pi meno, ka wawinyo ni Jehovah marowa, ci wan bene wabimare matek. (1 Jon 4:19) Dok ka marwa pire odongo, ci marre piwa bene bidongo. Baibul wacciwa ni: “Wunyik cok bot Lubanga, ci en bene binyiko cok botwu.” (Yak. 4:8) Dong, gin ango ma watwero timone wek wabed labongo akalakala mo keken ni Jehovah marowa matek?

GIN ANGO MA TWERO KONYI ME YE NI JEHOVAH MARI?

6. Ka itye ki akalakala ka ce Jehovah mari, gin ango ma itwero timone?

⁶ Medde ki lega bot Jehovah wek okonyi me niang pingo en mari. (Luka 18:1; Rom. 12:12) Twero mitte ni ileg bot Jehovah tyen mapol nino ducu wek okonyi me niang kit ma en winyo kwede i komi. I kare mukene, itwero winyo marac adada ma weko inongo ni tek me ye ni Jehovah mari. Ento wii myero opo ni Jehovah dit kato cwinyi. (1 Jon 3:​19, 20) En neno kit mabeco ma itye kwede kadi bed in kikomi pe inenogi. (1 Cam. 16:7; 2 Tekwaro 6:30) Pi meno, pe ilwor ‘yabo cwinyi woko ducu bote,’ kun ilege ni okonyi me ye ni en mari. (Jab. 62:8) I nge lega bote, pire tek ni ilub tam ma kiryeyogi i paragraf magi ma lubo-ni.

7-8. I yo ma nining ma lok ma kicoyo i Jabuli konyowa me bedo ki gen ni Jehovah marowa?

⁷ Gen lok pa Jehovah ma tye i Baibul. Jehovah omiyo cwiny mere maleng bot jo ma gucoyo Baibul. Pi meno, lok ma gucoyo i kom Jehovah tye ada. I jabuli mo acel, Daudi otito i yo mamwonya adada kit ma Jehovah paro kwede piwa. En ocoyo ni: “[Jehovah] tye cok ki jo ma cwinygi goro, en laro jo ma gitye ki arem madwong i cwinygi.” (Jab. 34:18) Ka cwinyi tye ka cwer, itwero tamo ni pe tye ngat mo ma niang kit ma iwinyo kwede nyo ma twero konyi. Ento Jehovah ocikke ni i kare ma kit meno, en bibedo cok kwedi pien neno ni imito kony ma mege. I jabuli mukene doki, Daudi ocoyo ni: “Ityeko piko pig wanga i opokoni!” (Jab. 56:​8, Baibol) Jehovah neno ka itye ki arem madwong i cwinyi. En paro piri dok winyo arem ma megi i cwinye. Kit macalo pii ma i opoko pire tek adada bot lawot ma tye i dye aroo, pig wangi bene pire tek adada bot Jehovah dok wiye po kare ducu ma ikok ki pig wangi. I Jabuli 139:3 Daudi owaco bot Jehovah ni: “Ingeyo kit yo me kwona ducu.” Jehovah neno jami ducu ma itimo, ento en keto cwiny i kom jami mabeco ma itimo. (Ibru 6:10) Pingo? Pien en tye ki pwoc madit pi tuteni ducu me yomo cwinye.a

⁸ Jehovah tiyo ki tyeng macalo magi me titi ni en paro piri dok emari matek. Ento kit ma waneno kwede con, Catan nyayo lok goba ni Jehovah pe mari. Dong ka i kare mukene itye ki akalakala ka ce Jehovah mari, pennye kekeni ni, ‘Anga ma abiye lokke—Catan “won goba” nyo “Lubanga me ada”?’—Jon 8:44; Jab. 31:5.

9. Jehovah ocikke nining bot jo ma gimare? (Nia 20:​5, 6)

⁹ Lwod kit ma Jehovah winyo kwede i kom jo ma gimare. Nen kong gin ma Jehovah owaco bot Moses ki bot Luicrael. (Kwan Nia 20:​5, 6.) Jehovah ocikke ni ebimedde ki nyuto mar ma pe lokke bot jo ma gimare. Pien Jehovah lagen, watwero bedo ki tekcwiny ni en pe twero kwero nyuto mar bot ngat ma mare. (Nek. 1:5) Ka icako tamo ni gwok nyo Jehovah pe mari, wii myero opo ni imaro Jehovah. Dong, ka imare dok itye ka tute ki tekki ducu me yomo cwinye, itwero bedo ki gen ni en bene mari matek. (Dan. 9:4; 1 Kor. 8:3) Meno tyen lokke ni, ka itye ki gen ni imaro Jehovah, ci pe mitte ni ibed ki akalakala ka ce en mari. Itwero bedo ki tekcwiny ni en bimari kare ducu dok pe biweki matwal.

10-11. Gin ango ma Jehovah mito ni wii opo iye i kom ginkok? (Jo Galatia 2:20)

¹⁰ Lwod lok i kom ginkok. Jehovah omiyo mic madit loyo bot dano i kare ma ocwalo Wode Yecu Kricito me to piwa. (Jon 3:16) Ento tika Jehovah ocwalo Wode me to pi in bene? Eyo! Tam kong i kom lakwena Paulo. En otimo jami maraco mapol i kare ma peya odoko Lakricitayo, dok kadi wa i nge meno, onongo mitte ni omedde ki lweny ki gorone. (Rom. 7:​24, 25; 1 Tem. 1:​12-14) Ento en obedo ki gen matek ni Jehovah omiyo Wode macalo mic pire. (Kwan Jo Galatia 2:20.) Wii opo ni Jehovah aye omiyo cwiny mere maleng bot Paulo wek oco lok magi i Baibul. Dok jami ducu ma kicoyo i Baibul tye me pwonyowa. (Rom. 15:4) Jehovah mito ni iye ni gityer pa Yecu obedo mic ma En omiyo piri. Ka icako neno ginkok kit man, ci ibijingo genni ni Jehovah mari.

¹¹ Wapwoyo Jehovah matek pi cwalo Yecu i lobo ni oto piwa. Ento tyen lok mukene ma omiyo Yecu obino i lobo aye me pwonyo dano ki lok ada i kom Lubanga. (Jon 18:37) Yecu bene opwonyowa lok ada i kom kit ma Jehovah marowa kwede.

YECU TWERO KONYI ME BEDO KI TEKCWINY NI JEHOVAH MARI MATEK

12. Pingo watwero ye lok ma Yecu owaco i kom Jehovah?

¹² I kare ma Yecu onongo tye i lobo, en okonyo dano me niang nga ma Jehovah obedo. (Luka 10:22) Watwero ye gin ma Yecu otitiwa i kom Jehovah. Pingo? Pien Yecu onongo kong obedo kacel ki Wonne i polo pi kare malac adada ma peya obino i lobo. (Kol. 1:15) Yecu ngeyo kit ma Wonne mare kwede. Dok en bene oneno kit ma Wonne onyuto kwede marre pi lumalaika ma lugen kacel ki luticce ma lugen ma gikwo i lobo. Yecu konyowa nining me bedo ki gen ni Jehovah marowa?

13. Gin ango ma Yecu mito ni waniang iye madok i kom Jehovah?

¹³ Yecu mito ni wange kit ma Jehovah winyo kwede i komwa. I Jiri angwen-ni, Yecu olwongo Jehovah ni “Won” tyen makato 160 kulu. Dok i kare ma en tye ka lok ki lulub kore, en olwongo Jehovah ni “Wonwu” nyo “Wonwu ma tye i polo.” (Mat. 5:16; 6:26) Ma peya Yecu obino i lobo, lutic pa Jehovah ma lugen onongo gilwongo Jehovah ni ‘Won Twer Ducu,’ ‘Ngat ma Malo Twal,’ ‘Lacwec,’ kacel ki nying me dog tic mukene. Ento Yecu onongo pol kare lwongo Jehovah ni ‘Wonwa.’ Lwongo ma kit meno onongo nyuto ni Jehovah mito ni luticce gubed cok kwede kit macalo latin matidi bedo cok kwede ki wonne. Kong dong wanyamu labol aryo ma nyuto kit ma Yecu otiyo kwede ki nyig lok ni “Won.”

14. Yecu onyuto nining ni wan ducu ki acel acel piwa tek i wang Jehovah? (Matayo 10:​29-31) (Nen bene cal.)

¹⁴ Mukwongo, nen kong lok pa Yecu ma kicoyo i Matayo 10:​29-31. Matayo 10:​29-31 (NWT) waco ni: “Aribe aryo pe kicatogi pi nyig cente acel ma welle tidi? Kadi bed kit meno, mo acel i kingi pe poto piny ma Wonwu pe ongeyo. Dok en ngeyo kadi wa wel yer wiwu ducu. Pi meno, pe wulwor; pien piwu tek kato pi aribe mapol.” Aribe gubedo winyo matinotino ma pe gimaro nyo giworo Jehovah. Kadi bed kit meno, Wonwa tero kadi aribe acel calo gin ma pire tek mumiyo en ngeyo ka opoto piny. Ka Jehovah neno winyo matidi kit meno ni pire tek, ci watwero bedo ki gen ni en paro piwa makato pien wan wamare dok wawore! Yecu bene owaco ni Wonwa ngeyo kadi wa wel yer wiwa ducu. Kit macalo Jehovah ngeyo kadi wa jami matino ma i komwa, watwero bedo ki gen ni en paro piwa matek adada. Dong nen ka maleng ni Yecu mito ni wan ducu ki acel acel wabed ki gen ni piwa tek bot Wonwa me polo.

15. Lok pa Yecu ma nonge i Jon 6:44 tittiwa gin ango i kom Wonwa me polo?

¹⁵ Nen kong labol me aryo i kom kit ma Yecu otiyo kwede ki nyig lok me “Won.” (Kwan Jon 6:44.) Woru ma i polo aye okonyi me ngeyo en kacel ki marre. Pingo en otimo meno? Pien Jehovah oneno ni itye ki kit mabeco. (Tic 13:48) I kare ma Yecu owaco lok ma tye i Jon 6:​44, twero bedo ni en onongo tye ka nwoyo lok pa Jehovah ma kicoyo i Jeremia 31:3. I tyeng meno, Jehovah owaco bot jone ni: ‘Aywayowu bota ki mar mera ma pe lokke.’ (Jer. 31:3; por ki Kocea 11:4.) Tam kong iye. Wonwa ma lamar-ri kare ducu neno kit mabeco ma itye kwede ma twero bedo ni in kikomi pe ineno.

16. (a) Gin ango ma Yecu opwonyi kwede dok pingo omyero iye lokke? (b) Gin ango ma twero konyi me bedo ki gen matek ni Jehovah aye wego maber loyo piri? (Nen bene bok ma wiye tye ni “Wego Maber Loyo Piwa.”)

¹⁶ Yecu opwonyi ni Jehovah pe obedo Wonne keken, ento obedo Woru bene. Yecu mito ni ibed ki gen matek ni Jehovah mari dok paro piri. Dong ka i kare mukene itye ki akalakala i kom mar pa Jehovah, pennye kekeni ni, ‘Tika omyero abed ki akalakala i kom lok pa Yecu ma ngeyo Jehovah maber adada dok kare ducu loko lok ada?’—1 Pet. 2:22.

MEDDE KI JINGO TEKCWINYI NI JEHOVAH MARI

17. Pingo omyero wamedde ki jingo tekcwinywa ni Jehovah marowa?

¹⁷ Omyero wamedde ki jingo tekcwinywa ni Jehovah marowa. Wii myero opo ni Catan tye ka tute matek me jukowa ki tic pi Jehovah. En mito ni wabed ma goro i yo me cwiny. Pi meno, en bimedde ki tutene wek watam ni Jehovah pe marowa. Pe omyero waye goba pa Catan!—Yubu 27:5.

18. Gin ango ma itwero timone me medde ki bedo ki gen ni Jehovah mari?

¹⁸ Me bedo ki tekcwiny ni Jehovah mari, medde ki lega bote wek okonyi me neno kiti mabeco ma en neno. Lwod wang Ginacoya mogo ma tito kit ma Jehovah paro kwede pi jo ma gimare. Wii opo ni Jehovah kare ducu maro ngat ma mare. Wii pe owil ni Jehovah omiyo Wode macalo ginkok piri. Gen lok pa Yecu ma owaco ni Jehovah obedo Woru me polo. Dong ka ngat mo openyi ni: “Tika itye ki gen ni Jehovah mari?” Ibidok iye ki tekcwiny ni: “Eyo, en mara! Dok an bene atute ki kerona nino ducu me nyuto ni amare!”